Черива понда куимдас кольть

(ордч.: одзза вариант)

Кöр олан деревняын — кыскö городö; кöр олан городын — кыскö деревняö.

Кресенняö мийö зонöкöт мунiм деревняö — вуграсьны, шондi вылын жаритчыны, сёйыштны черива.

Ю дорын адззим бытшöм местаок, и недыр мыйись миян дозын вöлiсö ни дас-мöд ёкыш, шаклей да пескан.

— Черива пуам! — решитiм мийö. Зонö пондiс весöтны черисö, а ме иньдöтчи деревняö, медбы небны кинлiськö кольттез — нытöг чериваыс абужык чöскыт.

Деревняын некин абу — быд ворота одзын тас. Но шор дорын кылö шовкöтöм. Мунi сэтчин, адзза: посок вылын нöшöн вартлiсьö инька. А шорок саяс, зöрын, ветлöтö пияна порсь, кукань зöр роззэсö пешлö, тусясьöны дзодзоггез да курöггез.

Инькаыс сэтшöм натужнöя уджалö, что оз и казяв сюсис подасö. Лэбтi кок увтсим шать, котöртi вашöтны сюсис подасö. Но эг на лок сю дорас, кыдз кылi кыз да лöг голос:

— Ой тэ, дзимшыр! Ноко чапкы бедьтö, а то волькöта ассит сюргиэтö!

Бергöтчи ме, а сiя инькаыс одзам ни сулалö — ыджыт, кыз кока, лэдзчисьöм юрсиа.

— Тэ мый сэтöн керан? - сувтöтiс синнэсö ме вылö.

— Мöдi тай подасö вашöтны.

— А нiя разь тэнат? Али сюсö тэ кöдзин? Эн!.. Дак мый эстiсь кошшан?

— Кольтёккез бы меным. Черива мöда пуны. Инька пышналiс менö сьöд синнэзнас и лöга юалiс:

— Деньгаыт эм?

— Кыдз инö? Конечно, эм!

— Но дак мунам, сета. Только отсав кайöтны корзинаэсö, — шуис сiя и важнöя, дюттясьöмöн, кайис шор дорсис.

Ме котöртi посок дорас, кватитi кык ыджыт корзина гывьялöм паськöмöн да турьялöмöн кысси сы бöрсянь. Керку дынас инька босьтiс корзинаэсö, тшöктiс:

— Чапкав йöр дорсис песоккесö поленичö, а то öшлiсьны мешайтчöны. — Колис корзинаэсö, ачыс пырис гортас.

Ме тэрмаси, но пессö тэчикö сё жö чулалiс дас минута гöгöр. Кöр тэчсис, инька петкöтiс кольттезöн кудок.

— Кыным десяток сетны?

— Десяток? Да кык кольть тырмасö.

— И тэ лысьтiн кык кольтьыс понда манитны менö? Тридцать или немымда! Кылан?

— Но десятоксö сет инö.

— Тридцать, шуöны тэныт! Али он кыв? Лöсьöт, кытчö тэчны.

— Некытчö сымдасö пуктыны.

— Ладно, адззам мыйкö. Не городскöйöсь, подикось. И не нищöйез. Бригадирша ме. Вежöртiн? — Сiя йöр вылiсь чöвтiс важ нямöт, ольсыштiс му вылö да кöстiс сiдз, медбы сайöвтчис бырöм местаыс, пондiс тэчны сэтчö кольттесö. — Жöникö квать деревняöн бергöтлö. Колхозыс мотоцикл козьналiс сылö... Вот и тридцать. Вай куим руб...

― Ö-ö-ö...

— Мый, оз гленитчö?

— Поснитöсь жö да.

— А тэныт гырисьöсь колöны? Сэк ачыт кольттяв! — орöтiс баснисö сiя да куртыштiс вöлi быдöс чукöроксö нямöт сорнас.

— Не, не! Ме просто сiдз, — повзи ме. — Вот деньгаыс, — и нюжöтi пятёрка.

Бригадирша чышкис киэсö подулас, босьтiс деньгасö, нюкайтыштiс, шуч видзöтiс шондi весьтын да вежöртöтiс:

— Подикось, виöсьтöм али госöсьтöм? Сэтшöмсö шыр сёйö... Кывзы, босьт-ко эшö кык десяток.

— Спасибо, тётка! Сет сдача.

— Ме тэныт абу тётка. А кöть и тётка бы вöлi, дак сёравно сдачаыс абу... Норовит ноко, — висьталiс сiя да пырис огородечö.

Ме ректi сылiсь нямöтсö — тэчи кольттесö шляпаам да видi ас кежам боёк бригадиршасö.

Дзур-вир оссис воротка, ме дынö оськöвтiс бригадирша да пуктiс одзам быдса ноша луктурун да кык кушман, домалöмöсь оча бöж.

— Вот тэныт сдачаыс туйö... Куим руб вылö лоас... Сёй на здоровье да эн касьты менö лёк кылöн.

Дата добавления: 2015-11-16