Ног азы куывд

Гъæтт, цы рухс æхсæв у абон,

Цыма уалдзæг у, æрбабон,

Къада зул-мулæй тæхы:

— Ног аз, Ног аз у! — зæгъы.

Мит уæззау пакъуыйæ уары

Иунæг цитт нæ хъуысы тары.

Мыст йæ хуыккомæй кæсы,

Ай цы уа, зæгъгæ, фæрсы.

Арс йæ хъарм лæгæтæй растад,

У æхсæрæгмæ йæ фарста:

— Ай цытæ кæнут, цытæ,

Æви нал уынут фынтæ?

— Диссаг у, — зæгъы æхсæрæг, —

Ком йæ фæдджитæм нызмæлыд:

Бирæгъ сау сыджыт хæры,

Комы та нæ дон нæры.

Рувасыл æууæнды карк дæр, —

Фервæзти йæ хин, йæ маргæй.

Сæгуыт хохрындзыл лæууы,

Уый дæр ацырдæм хъæуы.

Уæд кæм нæу зымæгдзу халон,

Ууыл дæр, мæ бон, æрбабон;

Сырддонцъиу ын у хуындзау, —

У сæ рæгыæнæг Хуыцау.

Тæрхъусмæ уыдзæни дзурæг,

Ау, кæм нæ уыдзæни худæг:

Уый йæ тæппуддзинад ныр

Ам нæ равдисдзæн, мæгуыр!

Æмæ уæд нызмæлыд ком...

Сырдтæ, абон уа йе сом,

Хъуамæ уой æмтуг, æмдзæрин, —

Фод сæ лæгæттæ æмдзæрæн!

Æмæ фынг, — кæм зоныс, ахæм, —

Къах-къухтыл фæкафыд халон,

Мыст,

Æхсæрæг,

Арс,

Тæрхъус —

Нал дардтой сæ цардмæ хъус!..

Бирæгъ дæр кæцæйдæр ниуы,

Уый дæр агуры йæхион: —

Ног аз, Ног аз нæм æрцыд, —

Назбæлас — нæ мад, нæ фыд!..

Дата добавления: 2015-09-05