ХОХАГ ЛÆГ БЫДЫРБÆСТЫ

Мæн фæкодтой мæ къæсæй

Мæ ахуыр хъæбултæ зæрондæй.

Ныр æцæгæлон бæсты

Æз æрвитын, хъæрзгæйæ, мæ бонтæ.

О, фæлыгъдтæн фыддзардæй,

Фæлæ зæрдæ йæ митыл нæ райы,

Ам дæ ничи — æрвадыл,

Ничи хион, хæларыл нымайы.

Кæс, хæхбæстæ — дæ разы:

Уалдзæг у, сисы дзывылдар цъиу-цъиу,

Кæсаг хуыдымы хъазы,

Къадздон комы ныххиутæ.

Сæрд — æхсыр æмæ хурæй,

Уым нæу тæвд, нæй дзы рыг йе дзынгатæ, —

Хор æрзайын кæ дурыл,

Суг, хъæбæр цыхт, — дæ къона у адæн.

Фæззæг бур у, цъæнутау. Нæ рæгътæ —

Фаст, рæсугъд чызджы фаззон дзыккутау...

Тагъд — зымæг, нард — дæ фосы рæгъæуттæ,

Хорæй дзаг у дæ куыройы къуту.

Зымæг карз у, ныззæй кæнынц миттæ,

Фæлæ сыхаг сыхаджы æмбары:

Нал — хылтæ, нал — æдзæлгъæды митæ,

Æмæ кæмтты ныййазæлы зарæг.

Сугтæ цадæгтай баппар дæ артыл, —

Уый дæ амонды хорз у, дæ пайда...

О Хуыцау, кæд нæ мæгуырæг цардæн

Нæ кæрон ис, нæ — райдиан?!

Мæлæтыл ничи кæны разы,

Сты адæм иууылдæр йæ цот...

Æрмæст дзы иу æрра лæг хъазы,

Йæ ном та у — мæгуыр поэт.

Цынæ цæлхдуртæ йын æвæры

Йæ разы — коммæгæс ын уа,

Уæд та уый худгæйæ фæзæгъы:

Дæумæ цы хæрзтæ ис, зæгъ-ма?

Сыджыты хъарм — уый у дæ артдзæст,

Фæлæ дзы цъиуызмæлæг нæй,

Æмæ кæимæ нуазон хъуамæ,

Фæззæг кæимæ кæнон най?!

10.01.96

Дата добавления: 2015-09-05