КУЫДЗЫ МÆЛÆТ

Æхсæв, сау мигъ кæм хуыссы ’ввонгæй,

Каубын ихау, кæм ныкъкъæдз сындз,

Уым фыд-зæронд æмæ стонгæй

Марди бур-бурид митыл куыдз.

Уый хуыссыди куыдзау тымбылтæй,

Кодта дзæмбытыл хъарм йæ рус.

Тагъди цæстытæм миты тъыфылтæй

Æмæ хæдзары рудзынгæй рухс.

Хъуысти кæртмæ фæрныг фысымтæй

Гъæйтты зарæг, фыдрасгуыты дау,

Æмæ хицауы къухы фысы стæг

Дардмæ ’рттывта, цырагъы зынгау.

Ферох куыдзæй, кæй хызта рагæй

Уыцы сау фысы — рафтыд йæ тых

Æмæ бирæгъы тигъджын дæндагæй

У нырыонг йæ синæй къуылых.

Уымæй ферох, кæй уыд æлвæст риу,

Тары цæстæй нæ ивгъуыдта мыст,

Уымæй ферох æппæтдæр, æрмæст-иу

Хатгай йе ’фсæры къæдз ныррызт.

Кæртмæ рахызти иу афон хицау,

Ыстæг раппæрста, айвæзта ком,

Фæлæ нал хъуыди куыдзы ницы, —

Уымæн йе ссыртæ нал кодтой гом.

***

Дæ цæст куы ’рхæца ме ’мдзæвгæтыл искæд,

Æнæрхъуыдыйæ,

Йе та рæстæг цыбыр кæнгæйæ,

Куы фехъусай фæлурс дамгъæты зарæг, —

Дæ зæрдыл дар:

Æз зæрдæмæ æвнæлдтон,

Æвзонг хирургау,

Хъавгæ!..

Уæ хъарм уаты фæлмæн тæрхæджы риуыл

Фынджы размæ,

Дæ уарзонæн ирхæфсæн хъазт куы мысай,

Мæ сонт хъуыды, æргом бæллицтыл

Худын

Куы ’рфæндадæу, —

Уæд ма кæ тагъд:

Æз сæ фыстон зымæгон къахфæндæгтыл

Ызнæт уады къуыс-къуысмæ!..

Мыййаг дæм кæд фæлмаст мигъы цъысымæй

Мæ ризгæ худт,

Цъæхснаг ихы къæс-къæсау,

Æбæрæг цины сур зæлтау, куы хъуыса, —

Æрæвдæл-иу:

Уым фыхт мæ туджы равг

Æнуд цæсгæмтты хъарм цардмæ кæсгæйæ!

Æппынфæстаг, къæмдзæстыг дзырдты астæу,

Ирон лæджы цъæх цухъхъайы

Рæбынæй,

Æргом æмæ фæразон зæрдæ сыстад, —

Уæд бамбар мæн:

Уый уыд мæ нæргæ цин, мæ зарæг!..

Дата добавления: 2015-09-05