Ответ, 241.

Везде убо в своих вопросе не престаеши лгати и неправду глаголати на учителей церковных. И в сем вопросе на Либерата Африкийскаго лжеши. Ибо не Либерат о подписании (помяновенных тобою) предстателей церковных уставов собора Диоскорова пишет, но Бароний в лете Господнем 449. Либерата же он приводит во свидетельство ниже сего. Но и о покаянии сих епископов неправдословствуеши, якобы пред единеми точию своими овцами каяхуся; а выше писанное тем же Баронием претекл еси, повествуемое сице: "И подписаша (си есть уставы Диоскоровы) первейший, си есть Ювеналий Иеросалимский, и Домн Антиохийский, и Василий Селевкийский, и инии едва не вси; и бе подписаний девятьдесят и шесть, иже потом вси на соборе Халкидонском каяхуся, и в лице Диоскору о его злобе и оном принуждении глаголаху". Бароний в лете Господнем 449, стих 11. И паки той же Бароний пишет, како сии епископи каяхуся на четвертом вселенском соборе, сице: "В то время онии епископи подписавшии возопиша, глаголюще: никто волею своею подписася, вси принуждени бехом мечами, дреколми, прещеньми изгнания из епископств. Егдаже им Диоскор со своими рече: христианин не боится никого, православный не радит о прещениях, возопиша: "вси согрешихом, вси прощения просим"". Бароний в лете Господнем 451, стих 7.

Виждь убо, зде сии епископи совершенно покаяшася и прощения испросиша; тамо же, пред своими овцами, точию себе укоряюще плакаху, а не прощения испрошаху.

Но вознепщуеши ли сих епископов за неволное свое подписание испадших быти своего священства, и с волно отступившими совершенно благочестия сравнитися? Не буди сего! Понеже святейший Мелетий патриарх пиша до белорусцев о рукоположенных отступивших к папе римскому, различне принимати повелевает: яко за едино точию временное отступление дарует прощение, и сподобляет священства, пребывших же во оном усердне, и похвалявших ереси, и на благочестие вооружавшихся совершенно из санов изметати повелевает. Идеже, призывая оных ко общению, сице пишет: "Но обратитеся, сынове отступившии, глаголет Господь Исаием пророком, призывая вас. Аще убо обратятся, о боголюбивии князи и господие, сию токмо едину вину отступления имуще, да улучат прощение, первее просяще и укоряюще себе, яко удобь прельстишася сотвориша, да будут прощени от вашея церкви и от всякаго человеколюбия; пребывающии же в вине, священства да отлучатся, и да пребудут праздни отнюд". Послание 4-е, лист 466. И паки тойже пишет к Гедеону епископу Львовскому: "А иже, рече, оставиша свой сан же и чин, и отступиша восточныя церкве, в нейже крещени быша, в нейже воспиташася, в нейже научени, в нейже рукоположени, - оле дерзости! яже на свою матерь матерни недостойнии чада дерзнуша, тии убо, аще пребудут во отступлении, да будут не токмо низложени священническаго, или святительскаго чина, но отлучени и не прощени, и в не церкви Христовы, и сами они, и последующии им. Закон убо сей церковный есть праведный: иже приобщается неприобщенному, да будет не приобщен. Праведно убо тем не токмо извержению, имже осуждени быша и от вас соборне, но и клятвам и проклятию подлежати, понеже пребыша во отступлении". Послание 6-е, лист 484. И Афанасий великий к Руфину пишет о священниках, приобщившихся арианом: принужденным и кающимся, и паче нрав извествующим, да не тем изверженным, введшимжеся арианом, людие парахии онех удобь от ариан прельщени отпадут от истины, изволиша сами еже пострадаша, арианом приобщившеся, и плачуще, приятися сим в прежний сан вступити повелевает; а иже прельстившеся, и первых нрава не имуще, приобщившеся и пребыша время довольно, и о том кающеся, никако же таковым в прежний чин ввестися повелевает. Зри в Кормчей главу 29, лист 264, и Матфея Властаря, состава а, главу 1.

Подобне же сим, написанным в твоем вопросе епископом, и на соборе Константина Копронима поневоле епископи благочестивии соизволиша на иконоборную ересь, и потом каяшася на седмом вселенском соборе, и прияти быша в том же сане, якоже от истории Тарасия патриарха, февраля в 25, и преподобно-мученика Стефана Новаго, ноября в 28, явствуется.

Темже от сих вышереченных свидетельств удобно есть познати о важности впадающих во отступление, яко поневоле в сие приведшимся от святыя церкви дается милость и возвращение санов; по воле же, паче же по усердию и долгому пребытию во оном, не ктому сим, тако приобщившимся, прощается паки имети своя саны.

Дата добавления: 2015-07-12