СОНЕТ КАДЫ ТЫХХÆЙ

Дæ кад æрхауд — фæстæмæ йæ нæй сисæн...

Фыдызнæгтæн сæ фæндиаг фæдæ.

Цы ма давой дæ сагъæстæ, дæ фæндтæ, —

Дæ хиуæттæм дæр нал хъары дæ риссаг?!

Ды раст лæг дæ, фæлæ-иу хæц дæ дзыхыл,

Бæллиццаг ма цы лæгæн у дæ фенд...

Фæстæмæ ма йæ раздахы поэт,

Цыфæнды йæ куы сывдылдæуа цъыфы,

Фæлæ гъе уый дæр а царды фæстæ...

Æмæ та ногæй феккуырсы уæддæр,

Фæстаг улæфтмæ иунæг хъуыддаг зоны:

Хуыцауæн дæр-иу ма бакæ лæгъстæ,

Дæ хурхмæ дын куы ныддарой кæрдтæ,

Пахуымпарау сæрыстыр у дæ номæй!

МÆ ХОМÆ

Цæуыл у дæ катай...

Мæ хо Ксенияйы ныхæстæй

Кæддæры хъару мауал дом мæнæй,

Мæ рæсугъд хо! Цъæх айнæг дæр нырризы.

Ныффæллад дæн... Кæмæй æмæ цæмæй —

Нæ зонын, фæлæ рог уæныг нæ хизы

Фæсхуым цъæх кæрдæгыл... Æмæ фæнда

Æви нæ фæнда мæн, гъе уæддæр

Фыдох æмæ фыдрыныл у мæ фæндаг,

Æмæ йæм хъуамæ макуы уон æдзæттæ;

Уый нæй — нæ дæ къæбысмæ дæр нымады,

Æмæ кæмæ фæцæудзынæ хъæстмæ?

Æхсины лæг йæхи нæ мары кадыл,

Уæййаг — йæ ном, йæ райгуырæн бæстæ.

Æз та — поэт. Мæн у зæгъæг мын нæй,

Фыдгæнæгау, фæлæ хъæцын мæ зыныл:

Зæгъæм, Къоста æрыздæхти мæрдтæй,

Уæд ма йæм æз цы цæсгомæй кæсдзынæн!

Æниу Хазби æмæ къуыдайраг Бега,

Цы охыл хъуамæ рахоной мæн лæг,

Сæ фæдон кæд пайда агургæ фегад, —

Бæрзонд фыдæлтæм нал кæны хæлæг?!.

Хатыр, мæ хо! Æнамондæй уа, низæй

Тæрсыс мæнæн... Фæлæ цы сты лæгæн?

Адзалы онг мæ чысыл Иры ристæ

Нæ барын æз — цæргæ уа йе мæлгæ!

Дата добавления: 2015-09-05