Æнахуыр уазал зонд фæцайдагъ и мæ удыл, —
Уый кары нысан у, гъе афтæ у нæ цард?
Тызмæг цæстæй кæсын, — цы-иу мæм касти худæг,
Æрхæндæджы хос у — цы мыл æфтыдта зард.
Кæс-ма: нæ алварс хъæд сырх дидинæг æфтауы,
Фæйлауы денджызау, дзагъырдзæстæй кæсы.
Фæндаджы хъæбæрыл лыстæг æртæхтæ хауы,
Фæлмæн рыджы тæф мæм æхсызгонау кæсы.
Ныллæууыд хурхæтæн — мæ цæугæ царды карæн,
Кæны дзæгæрæг уд, æмæ йæм нæй ысдзырд:
Цы фæци уыцы ныфс, кæнæ гъе уыцы хъару,
Мæ нысанмæ цæугæ, мæн чи кодта æвзыгъд?!
Кæй фæрцы-иу мæм каст зындоны дæр мæ цæрæн
Хæрзаив, галуанау, — хуымæтæджы мæ рис;
Кæй фæрцы баззадтæн æгуыдзæгæй, æвзæрæй:
Æнæхай — амондæй, мæ хус къæбæр — къæрис!
Фæлæ мæ иу хъуыддаг уæддæр нæ баззад рохы:
Мæлæт æцæгæй кæд у иу хуызы рæсугъд, —
Дæ нысанмæ цæугæ, æрдынæлвæстæй тохы,
Дæ мидбылхудгæйæ, куыд басудза дæ уд!
Дата добавления: 2015-09-05; просмотров: 54 | Нарушение авторских прав
| <== предыдущая страница | | | следующая страница ==> |
| СОНЕТ КАДЫ ТЫХХÆЙ | | | УАЛДЗЫГОН РАЙСОМ |