ЭН ПОВ, ДЯДЯ!

Кыдзкö шогмис сiдз, что таво тулысбыт ни Миколь Сенялöн сёянын эз вöв эшö чуньпон ыжда яйторок. Картов сёйис, капуста тыткис не öтiк ведра, сола тшак тожö сёйис норматöг, а вот яй — натьтö, куим месяц ни öтiк грамм эз сёй. Эз вöв яйыс сы погребын, нем вöлi сёйнытö. Эшö мартын йöвсялiс мöс ― юр вердiсь, козьналiс хозяинлö бытшöм порозокöс. Сеня вовлiс иньыс одзö, мыктавны пондылiс, что сiйö, порозоксö, позяс и «тожно будичи...». Но сэк жö курччöвтiс кывсö. Иньыс кульыштiс-заваритiс сы кузя сэтшöм плетьöн-дзарнитöмöн, что и баснитöг позис вежöртны: Парася чожжык керас отбивнöй котлетаэз сыись, Сеняись, нежели сосуноксис.

— Гожся донтöм вердас вылын ми быдтам порозейсö арöдз, сэсся вузалам, — висьталiс сылö иньыс. — Челядьлö, да и меным аслым, виль мöдöтчаннэз колöны. Не век жö меным чатрасьны да ошшасьны бырöм фуфайканам. Йöзыс басöк курткаэз небöны.

Усис эта басниыс талун тöдвылö, вöрзьöтiс сьöлöм. Сеня ачыс эз казяв, кыдз пондiс сё частожык и частожык видзöтлыны как раз сiя ладорö, кöдöрын визывтiс кöдзыт шорокыс и кытчö лесник кöсйисис дзимлявны яйсö. Тыр чуманнэз яйöн öнi куйлöны шорыс пыдöсын, видзчисьöны мортöс. Сеня эз вермы терпитны, сувтiс кок йылö, сюйыштiс голенище коласö пурт, босьтiс ведра и иньдöтчис шорыс дынö. Лесник Кузьма Кузьмич мый шуис? Верман пö невна босьтны яйсö. Но дак и босьт, кытшöм корöм эшö видзчисян?

И Сеня босьтiс. Бöрйис сiя медбур, меднебыт яйторрез, сэтшöмöсь, кытöн эз вöв öтiк коска, öтiк жила да болонь. Избушка дынын сiя думайтыштiс невна, нюлiс вартчöм тырппесö и пондiс колдуйтны. Джын яйсö, ыджыт лядьбейтор, кытöн, натьтö, вöлi нёль килося не етшажык, сiя пуктiс аслас чуманö и лэдзис кöдзыт шор пыдöсö, сэтчö, кытöн видзлiс йöлöн туиссö. Остальнöй яйсö миськалiс и пуктiс ведраö, чапкис сэтчö сов, пуктiс кытшöмкö дука туруннэз да вуджжез и öшöтiс ведрасö костёр весьтö: «Тожно, дак, жорита вöлись...»

Костёр дынын пукавтöн Сеня думайтiс. Сiя думайтiс: если Парася кылас, что сiя, Сеняыс, вийис дикöй порсьöс, да локтас татчö, поскотина вылö, медбы невночка ванзыны, то позяс бöрйыны удобнöй момент и тупкыны сылiсь вижлока öмсö кольöм яйторнас. Видзöтан, быдöс и лöсялас.

Чожа ведраын пондiс бульöтны ва, пондiс петны крепыт яй дук. Сiя кöвьяссис поскотина пасьта, сэсся везъясьöмöн кыссис вöрлань, гильöтiс бурундуккезлiсь да туаннэзлiсь нырпыссэз, пырис быд мыр увтö, быд куст коласö, тыртiс чöскыт кöрöн Ошпозъяинсö. Вына вöлi дикöй порсь яйлöн дукыс, лöчыт. Гришка да Макся, кöдна эта кадö бодрöя шагнялiсö тропка кузя, баитчытöг сувтiсö, дыр видзöтiсö öтамöд вылö. Эшö верста мымда, поди, вöлi избушкаыс дынöдз, а нылöн ныррез-локаторрез бергöтчисö ни сы ладорö: сетiс асьсö тöдны чöскыт яй дукыс.

— Босьтöма айö яйсö, абу вермöм терпитнытö, — шуис Гришка.

— Вежöртöм. Лоас миянлö пожива, царскöй сёян, — нюлiс тырппесö Макся. — Важын ме пуöм яйсö эг пешлы, важын. А дикöй порсь яй эшö вöтын эг сёйлы. Натьтö, чöскыт сiя...

Зонкаэз содтiсö оськöввез.

А Миколь Сеня эта коста пукалiс чурка вылын. Сылöн пашмöм юрыс то лэдзчывлiс увлань, то кайлiс бöр вывлань, Сеня сунасис. Крепыт дукыс кыдзкö жагöник, казявтöг, коддзöтiс мортсö, вöрзьöтiс öмас ыджыт дуль, кильöтiс горшын. И пондiс петны он. И морт, конечно, онмöссис бы — привычнöй дело! — но как раз сiя кадö, кöр юрыс жагöник-жагöник лэдзчисис морос вылö, Шарик, кöда öнöдз мирнöя сунасис кусттэз увтын, бöбись унньöвтiс и пуляöн лэбзис вöрö, веретинскöй туёк ладорö. Сеня дрöгнитiс, проворнöя трек-трек керис юрнас, медбы вашöтны дынсис онсö, дзарнитiс перво öтöрö, а сэсся мöдöрö. Кин вылö сiдз уськöтчис ылöстöм пон? Поди, кытшöмкö зверьöс кылiс да? А поди, недобрöй мортöс? Одзжык недобрöй морт йылiсь кыдзкö совсем эз думайтчывлы. Кытiсь сiя татчö, Ошпозъяинö, локтас? А талун, кöр Сеняöс эшö асывсяняс повзьöтiсö кулавтöдз, ковсис берегитчыны быд берсяись — лешакись, недобрöй мортiсь, аслат роднöй инькаись. Сеня казявтöг жмитчис комокö, пондiс кывзiсьны. Колiс бы, думайтiс сiя, босьтны ведрасö би весьтiсь, сайöвтны кытчöкö ылöжык, а то...

Чулалiс минута-мöд, и Шарик локтiс бöр. Сiя мирнöя никсiс и кивыляйтiс бöжнас. Хозяин вылö эз и дзарнит, сразу забгисис кусттэз коласö. Сеня решитiс: бертö Гришка. Если бы вöлi кинкö мöдiк, то понжуг, конечно, пондiс бы вувтны и эрзыны. Пастух пуксис бöр чуркаыс вылö, судзöтiс öжöг и кутчисис вештавны-чукöртны ведра увтö шоммез. И бöра дзарнитiс тропкаыслань: кытöн сiя, Гришкаыс? И — ой тэ, лешаччöй олан! — казялiс пастух: петöны вöрсис морттэз! Öтiк, кык... Кыныма локтöны? Кинöс вайöтö Гришка? Поди, милиционеррез? Видно, норасис сёдаки ёрдöм лесник начальстволö, ветлiс посадö. И вот...

Миколь Сеня перыта, бытьтö öддьöн вына пружинаэз вылын, чеччöвтiс кок йылö, чышкис ки долоньöн синнэсö, пондiс дрöжитны. Зонкаэз ятнöя адззисö, кыдз сiя мыйлöкö пыравлiс избушкаö, минута бöртi петiс бöр, локтiс костёр дынö.

— Повзис, тыдалö, — шушкыштiс Гришка.

— Кыдз не повзьыны, — серöмтчис Макся. — Но и герой тэнат айыт. И вот ме думайта: кабан... Но чёрт сыкöт, дикöйкöт. Чожа ми пондам тöдны, кин сiйö вийис. Веськыта кö шуны — делоыс и не кабанын совсем. Лесниккöт тожö ми артасямö — раз и квас. И лун оз чулав, кыдз разоблачитам сiйö. А вот кыдз мортöдз вайöтны айтö, этö ме нач и нач ог тöд. А вайöтны сiйö мортöдз колö обязательно. Эд пода вöдитiсь öнi, кыдз баитöны правленнёын и кыдз гижöны газетаэзын, колхозын центральнöй фигура. Сы кипод увтын öнi колхознöй богатство. А висьтав веськыта: вермас лоны колхозын центральнöй фигураöн пастух, кöда паршивöй лесниклö нем понда сетö бур поскотина? Оз эд вермы, а?

— Вот буржыка печиктам Кузьмичыс ныр кузя, позоритам сiйö йöз одзын, сэк и айö, поди, ловзяс. Казялас, небось: чочком светас овтöн позьö песняэз сьывны, нем пыр ветлöтны юр öшöтöмöн, — паныт горöтчис Гришка.

Не öддьöн увереннöя горöтчис, но Макся ошкис сiйö: правильнöя думайтан, осьтам ужо айытлiсь синнэсö, дугдас сiя быд срам одзын дрöжитны, кыдз ва вылын шать.

Пастух эта кадö старайтчис чожжыка босьтны костёр весьтiсь ведра. Медбы не сотны калитчöм дужка бердö чуннесö да ки долоньсö, Миколь Сеня нетшкöвтiс юр вывсис гыновöй колпак, кисö сюйыштiс эта колпакö и вöлись кутiс ведра вугсö. Сулавны костёр дынын сiя эз понды. Сiя адззис коккеслö вын чепöссьыны избушка пельöс сайö и мымда прок иньдöтчыны вöрлань. И кин тöдö, поди, и лэбзис бы сувтчывлытöг ылö-ылö, вöра печорскöй крайöдз, Карскöй море дорöдз, но избушкаыс дынын жö Сеня аслас шульга кокöн падмис веськыт кокыс бердö, öштiс равновесие и, кöть паськöтiс киэсö, эз вермы öшшыны кок йылын. Сiя нюжалiс кöчкаэз коласö, инмис нырнас ямаö, кытöн доррезви сулалiс назём ва. Ведра мезмис кисис, жолькнитiс и быгыльтчис тожö ямаö, и быдöс — и чöскыт шыдыс-бульоныс, и небытик яйыс — лэбзисö, кыдз мукöддэс баитöны этшöм трагическöй случай коста, веськыта понлö бöж увтас.

— Тэ мыйлö чепöссин, тять? — гажтöма юалiс Гришка, кöр локтiс айыс дынö.

— Тожно, дак!

— «Тожно, дак...» — нерис сiйö Макся. — Натьтö, лешаккез туйö миянöс примитiн. Сiдз эд?

Кыкнанныс — и Гришка, и Макся — öбидасянь чуть эз горзö, чуть эз кисьтö курыт синваэз. Нiя вежöртiсö, что бура пуöм дикöй кабан яй дöнзис талун не нылö, а некратайтчись зверёккезлö да ашнöй ракаэзлö, кöдна вексö сэтчö и пелитчöны, кытчö пуксьö кöть недырик кежö овны морт. Чöскöтас, натьтö, яйнас öмсö и Шарик, оз кö понды брезгуйтны. Эхма!

Макся сьöкыта ловзисис, лöгöн сöтiс кокнас сипожся паськытжык гöрд гриб кузя, горöтчис Сенялö:

— Но, тырмас тэныт нюрын ныртö кöтöтны. Чеччы, дядя, мунам избушкаö. Делоыс, ачыт тöдан, оз видзчись. Ой ни локтö.

Былись, локтiс ни ой. Шондi важын тарöвтчис пемыт вöрöн веттьöм увал сайö, öтöрын лоис тöдчöмöн ыркытжык. Кöдзыт шорок ладорсянь пондiс вайöтны небытик ульсöтöн, быдкодь турун да багульник дукöн. Пуэз коласын öксис туман — чужöм бердö лякасян уль бус.

— Кöр Кузьмичыс мöдiс локны Морошка гриваыс вылö? — юалiс Макся. Нiя куимнанныс невна сайкалiсö и öнi шагнялiсö костёр дынö. Сеня эз вежöрт нем, и Максялö ковсис сетны вопроссö мöдпöв. Сэк вöлись пастух и вермис горöтчыны:

— Ашын рытнас, будичи. Рыт гöгöрас кöсйисис, медбы ойнас ытшкисьнытö. А тэ кысь тöдан?

— Ме быдöс тöда, дядя, ― сёрöмтчис Макся. ― Кöр тi баитчит сыкöт поскотинаыс йылiсь, ме вийöм кабаныс дынын кусттэз увтын куйлi. И, конечно, кылi быдöс.

— Мы-ый! Да тэ, зонка, будичи...

— Ме сэтшöм! Но тэ эн пов. Умöльыс нем оз ло. Вот локтас лесник гриваыс вылö, ми сiйö сэтöн и ляпкöтамö. Кыдз, шуан? А вот сiдз и ляпкöтам. Локтас сiя, сюра кымöс, пондас иньыскöт ытшкисьны, колхознöй турун гусявны — ми кусттэз сайсянь и фотографируйтам. Вöрöтны ми сiйö ог пондö, мед ытшкисьö, мымда колö. Ми керамö снимок и нöбöтам сельсоветö: вот видзöтö, шуам сэтчин, мый керö лесник Кузьма Кузьмич. Аслас покоссэз тыр, ытшкы да ытшкы турунсö горшви, дак нет, колхознöй поскотина вылö пелитчöма. Клевер да тимофеевка, адззат ли, мöсокыслö колö. Сэтöн лесникыслö и лоас карачун.

— Но эд пишальöс мырддис. Вийöм кабан дынын кутiс... дак!

— А кабансö разь тэ вийин?

— Будичи... Кинкö лыйис и пышшис Гырка йирыс сайö. Бут-бут котöртiс. Ме мöдi вöлi вöтчыны...

— Вот-вот, кинкö кожгис-лыйис и сразу — бегом марш! А тэнö кутiсö, кöть не виноват. И мыля тэ, Сеня дядь, сэтшöм кокнита согласитчин сетны сылö, поганöй мортлö, колхознöй участок? Да ме бы тэ местаын мыччалi сылö куимпöвса дуля, на курччöвт, лёквир. Сiдз и кери бы. А мый?

— Акт гижис... Штраф, шуö, вештан...

— Акт гижис! Да мед кöть тысяча акт гижö. Кытчö сiя нiйöн мунас? Милицияö мунны актнас сiя оз лысьт, сiдз кыдз бура тöдö: зверьсö вийин не тэ. Сэтöн мöдiк кинкö вöлi.

— Бат, сылö веритасö... Сэтшöм морт... Мунас, натьтö, милицияас. Висьталас сэтчинка абусö!

— Но и мед мунö. Тэ думайтан, сэтчин дураккез пукалöны. Сiдз и штрафуйтасö тэнö? Не, Семён дядь, сiдз делоэс оз керсьö. Сэтчин, тöда ме, пондасö думайтны, вöрöтны веммезöн, пондöтасö следствие. Корасö тэнö и юаласö: «Тэ вийин кабансö? — А тэ и шуан паныт: «Нет, не ме сiйö вийи!» Вот и локтас следователь татчö, сiя местаö, кытöн вийисö зверьсö. Да локтас не öтнас, а понятöйезкöт, опытнöй вöралiссезкöт. И синöн кваркыш он ешты керны, кыдз кутасö сiйö, кöда лыйис. Эд кöдзыт шор саяс, кытчö котöртiс браконьерыс, ольсассьö нюр, сэтчин нять. А нятя местаö кöть кöр следдэз кольччöны — ятнöйöсь, пыдынöсь... Мунасö нiя следдэс кузя, кутасö бöб мортсö, а тэныт висьталасö: «Котöрт гортö, уджав поскотина вылын. Тэ не виноват!»

— Басöка петö! — слабöй серöм пыр шуис Сеня.

— Конечно, басöка. А тэ сразу согласитчин лесникыскöт. Кывджын паныт эн горöтчы. Нет, керны сiдз, Семён дядь, некыдз оз лöсяв. Сiя горлопан, дак и тэ горлопанöн ло. Сiя рявзö, дак и тэ тожö рявзы. Да эшö горöнжык рявзы, нежели сiя. Сэк и казялас: ныр сюйны татчö немлö. Сеня ловсö сетас, а колхознöй добро дынöдз некинöс оз лэдз.

Сеня да Макся пукалiсö ордчöн, видзöтiсö биас да баитiсö мирнöя, а Гришка эта коста пизьöтiс чай. Чай шогмис царскöй. Заварка туйö зонка пуктöма котёлö пуягöд кор, эшö кытшöмкö чöскыт кöра туруннэз — и вöлi эта не чай совсем, а кытшöмкö крепыт ароматнöй настойка. Кöр сiя вöлi готов, Гришка котрасис избушкаö и петкöтiс дикöй маöн туис. И вöлись корис Максяöс юны чайсö. Сiя, конечно, эз откажитчы, эз понды тшвакны, а шыасис гажöн:

— Ась яйсö поннэз сёйöны, а ми чай юам. Пхе! Дзирыт часö Макся юис учöтик гульккезöн, не тэрмасьöмöн, кыдз важнöй гöсь. Гришка тожö некытчö эз тэрмась. Быд дзурснитöм одзын сiя пöлялiс кружкаас, вöлись чöсмасис, юис. Öтнас Миколь Сеня пукалiс бокын, чай юны откажитчис, мыйкö думайтiс, юрсö морос вылö öшöтöмöн. Мый йылiсь сiя думайтiс? Поди, сы йылiсь, что былись öддьöнöв чожа согласитчис лесниккöт, а поди, думанас видiс асьсö осьтаöмöн, мыля уськöтiс ведрасö, видiс асьсö кöчöн, мыля полiс быд торсис? Эд морт жö сiя, а не кукань кытшöмкö или паршивöй баля. Пишаль лесниклö сетiс, медбур загонö лесникöс лэдзис, нельки эз и пикнит паныт. А яйсö, яйсö! Эд öмын ни вöлi. И вот — чапкис понлö бöж увтас. А кыдз жö шогмис сiдз, что сiйö, пöрись да опытнöй мортöс, велöтö му вылын овны кытшöмкö зелёнöй сосунок, совсем эшö гöнтöм кайпиян?

Кин тöдö, мый йылiсь сылöн вöлi кузь да крепыт думаыс. И колö шуны, не только сiя жугдiс юрсö. Неöддьöн бытшöма чувствуйтiс асьсö и Гришка. «Ме эд тожö повзи лесниксис. Паныт и шы эг вермы горöтчыны»

Макся, конечно, прав. Натьтö, айсö штрафуйтны вот сiдз, юасьтöг-висьтасьтöг, некин бы эз понды... Перво, натьтö, кутчисö бы кошшыны, кин сэтöн виноватыс. Дак мыля нö сэк Гришка, ыджыт ни детина, чуть весьö эз пöр лесниклöн öтiк дзарнитöмсянь? Мыля сiйö зэлöтiс сэк лёк тресся? Эд сiя, лесникыс, просто босьтiс нiйö айыскöт, кыдз баитсьö, «мушка вылö». Часöт вежöртана ни: сiя, ашнöй гырк, просто нахальничайтiс. Арестуйта, шуö... Кыдз? Мыля? Мый понда? «Сетiс сiя миянлö урок, кувтöдз он вунöт!» — ыш ловзисис Гришка.

Макся юис чайсö кык кружка, сэсся сувтöтiс посудасö пыдöснас вывлань, висьталiс хозяиннэслö спасибо. Миколь Сеня, сё эшö торйöн пукалiкö, вдруг ятнöя шуис:

— Дак... Будичи...

— Вот сiя и эм: будичи, — сэк жö паныт шыасис Макся. — Делоэс сэтшöмöсь, значит, Семён дядь, — думайтны колö. И тэ думайт, кыдз одзлань чочком светас овны. Бура думайт! И эшö: чуть мый, дак сразу отир дынö лок. Вон Гришка правильнöя керис: локтiс деревняö и быдöс юöртiс меным. Думайтыштiм сыкöт кыкöн и решитiмö-постановитiмö мыччавны лесниклö дуля, а сiйö, кин вийис кабансö, обязательно кутны. Ми морттэс сэтшöмöсь. Охо! Пхе! Часöт ми, пожалуй, вот мый керамö. Ми мунам вöрö, Гырка йирыс дынö, кытчö лесникыс яйсö дзебис ва пыдöсö, и лöсьöтам засада. Браконьерсö, кöда ассис адсö даровöй яйöн мöдiс тупкавны, ми кутамö. Думайта, сёравно сiя ойнас локтас. Если локтас, шуам, сiя жö лесник, то ми сiйö, гадöс, фотографируйтам. Чик-чик — и эн ыжмав сэсся, подлöй мужик. Хо-хо! Тэ эн пов, дядя!

Миколь Сеня сувтiс веськыта, паськöтыштiс мороссö: — Ветлыны я мый я ашын асывнас лесникыс дынö? Дак, шуа: вай пишальöс бöр!

Макся думайтыштiс невна, висьталiс: — Пожалуй, оз ков. Арталам делосö сiдз, что ачыс ваяс. Эшö кеймисьны пондас тэныт, медбы некинлö шы эн сет.

И сэтöн жö Макся гогынялыштiс юрнас: мамук тэ менам, маминьöй! И мыля эта засада йылiсь думаыс юрö пырис видзчисьтöг?

Сельсоветын думайтiс-думайтiс, быдöс синнэс пемдiсö, быдöс веммесö бокись бок вылö бергöтiс — юрö нем бурыс эз пыр. А татöн, Ошпозъяинын, сразу бур дума, кыдз каёк, пыркнитiс. Вот эд кыдз! Этö, натьтö. сiйöн, что дикöй маöн ароматнöй чай юис. Да, натьтö, сiйöн.

Вöрö мунiкö, зонкаэз бöбöтiсö Шарикöс избушкаö и тшöктiсö пастухлö, медбы сiя эз лэдз понсö öтöрö.

— Вермас дзугны делонымöс, — висьталiс Макся. Невна думайтiс да содтiс: — А яйторсö миянлö пу. Локтам асывнас, сёйыштамö. Пуан? Он ни сэсся повзьы?

Ох-хо!

— Тожно! Мый баитны? Чичас тыр ведра пуа! Миколь Сеня неважся повзьöм бöрын пондiс син одзын ловзьыны. Чулалас мымдакö кад, и сiя пондас шыннявны.

Дата добавления: 2015-11-16