КЫДЗ ШЫННЯЛÖ АПОСТОЛ 10 страница

— Эта бур делоыс! Только, зон тэ менам, а оз я позь музыкатöг? Кыдзкö оз лöсяв...

Григорий Ильич вöлись вежöртiс быдöс, гогинялыштiс юрöн и горöтчис солиднöя:

— Вермам и музыкатöг. Мыйлö шумитнытö?

— И авариятöг?

— Мыйлö сiя, отец Мисаил? Еныс оз лэдз сымдасö!

— Сэк давай! Ужо лыддьöтыштам молитва. Юрий Андреевич судзöтiс кузовись поплiсь рюкзаксö да спиннингсö, чапкис нiйö люлькаö. Поп висьталiс эта понда спасибо. Но пуксьыны люлькаас эз тэрмась, чуньнас корис агрономсö дынас, пильснитiс ехиднöя:

— Вот тi, коммунисттэз, быд вын горöтлатö да доказывайтö, что öння вичкуыс сiдз жö, кыдз и средневековöйыс аслас делоэзöн да теорияöн лоö реакционнöй, только сiйö и керö, что бöбöтлö отирöс, что тойласьö öтместын, нятьын да багын и сiдз одзлань. Дак висьталö жö сэк меным, реакционнöй и безнравственнöй мортлö, мыля миян вичкуö орöттöг локтö отир?

Вопрос вöлi сувтöтöма веськыта и, невна думайтöм бöрын, Юрий Андреевич паныт горöтчис тожö веськыта:

— Да, неетша миян коласын эшö сэтшöммес, кöдна котрасьöны вичкуас. Мыля нiя котрасьöны? Этö ми тöдамö: öтiккез мунöны вичкуас чожажык важ привычка увья, мöдiккез мунöны асланыс бöб увья, а унажыкыс, конечно, котöртöны юрбитны сiйöн, что быд берсяись полöны. Сэтöн, отец Мисаил, интереснöй дело шогмö: быдöн, кин полö, чожжык котöртö сы дынö, кин нiйö повзьöтлö.

— А-а, вежöртi. Но дак мый жö, адззисьлытöдз я мый я? Ло здоров, том детина!

— Бур туй тэныт, отец Мисаил. Висьтав Христосыслö спасибо, что мекöт пантасин. Талун ме добрöй. А вермин бы мöдiккöт пантасьны, и сэк тэныт вермис бы павкны — закон эд дзуган... Локтан гортат, дак висьтав попаддяыслö, что сiдз и сiдз аркмис: Вильва ладорын неважын шумитöмась гожся ыджыт зэррэз, и юас ваыс öддьöн гудыра. А гудыра ваын — этö быдöн тöдö — чериыс оз кокав.

Поп шы эз сет.

Эта гожся шоныт рытыс Куть-Кутиха понда вöлi öддьöн важнöй. Сiя кöсйис старухалö уна вильсö да бытшöмсö. Пöрись морт надейтчис, что сы оланын талунсянь мыйкö вежсяс, лоас оланыс буржык, кокнитжык да мичажык. Надейтчис старуха, сьöлöмыс радъялiс, нельки синваэз петiсö. Но эд не весь жö баитöны: кöр оз понды тэнат йывны, дак оз ни йыв. Сiдз и лоис. Как раз сiя кадö, кöр колiс петны Эринья Потаповна ордö, внучатка Параська вдруг пондiс норасьны юр кольмöт вылö, а чожа мыйись лёк кудоба монлалiс ни беднöй нывкасö. Куть-Кутиха, вежöртана, ёна лöгасис, минута-кык сьöрна сьöласис да матькисис, кыдз кужис, сiдз и видiс Параськаöс. Этасянь невна бурмыштiс сьöлöмыс, и старуха петкöтiс внучаткасö посöдзö, водтöтiс öн увтö, ыркытiнö. И только эта бöрын котöртiс соседкаыс ордö. Локтiс сiя, конечно, сёрмöмöн: керкуас лабич вылын, ордчöн хозяйкаыскöт, пукалiс ни да нöитiс киас чочком запон дорсö кöньöсся кызжык инька — ыджыт голубöй синнэза, чужöмыс гöрд, кыдз помидор. Сiя, кöр казялiс Куть-Кутихасö, сэк жö сувтiс кок йылö и чуть я не муöдз копыртчис старухаыслö, невна юрбитыштiс.

— Ылiсь я тэ, малинтусь? Кин тэнат аймамыт? — лöгöнмоз юалiс Куть-Кутиха. — Деньгасö вайин я? Эн я вунöт?

— А Веретяись ме, — силькан голосöн нюжвыла висьталiс инькаыс. — Митиперика Домналöн роднöй ныв ме. Поди, тöдан сiйö да? Иньдiс татчö тай. Котрась, шуö, да копыртчы отец Мисаилыслö, юрбитышт святöй богородицаыслö, кор аслыт бур олан да ыджыт счастье. А деньгаторсö вайи жö сьöрам, мыля жö сымдасö вунöта, — вот куим руб. Кыдз инö, кыдз инö...

— Пукты енполкаыс вылö. Мыля мамыт ачыс эз лок?

— Шогалö. Кык неделя ни оз вермы чеччыны. Перыта сибалiс висьталöм час. Эринья Потаповналöн керкуö, кыдз и колiс видзчисьны, пондiс ёркöтчыны крещёнöй йöз. Локтiсö кык öддьöн ни пöрись старуха. Нiя пасьтасьöмась важмоз: кышалöмась вывтаныс кузь да сьöд шушуннэз, кöмалöмась гöрд пытшыннэза виль нинкöммез, нямöттэзныс вöлiсö тожö вильöсь, а воннес — гöрдöсь, любо видзöтны. Локтöмась нiя кыкнанныс Ректанiсь, и кузь туйын сыбурна мыдзöмась, что öдва-öдва воджмöвтiсö порогсö, эз и письтö нельки пернапасавны кымöссэзнысö, только дыркодь шоччисьöм бöртi вермисö локны енполка дынöдз да пуктыны деньга. Эшö öтiк баб локтiс Ыджыт Дзимбырись. И сiя öдва ни лолалiс, вöлi дзор, öшöтчöм чужöмбаныс шойöтöм, пымалöм кымöс кучикыс ёна вачкисис скöрöн кокалöм солдатскöй сукно вылö. Порог дынын сiя сьöкыта ойзiс да ружтiс, сэсся шлёпкисис лабичö, корис хозяйкаыслiсь ваок, горша юис да кöтöтiс тырппесö.

— А мый жö тi богородишасö, ашшиным мамнымöс, шо эд пыртö? — юалiс сiя пиньтöм öмнас.

Эринья Потаповна важнöя висьталiс:

— Вот локтас отец Мисаил и вöлись пыртамö. Сiдз сiя тшöктöма кернытö, батюшкоыс.

Эшö кык морт — ыджыт мыгöра кöсыник инька да горбыля учöтик старушка — локтiсö Кöчкок деревняись. Нiя кужöмöн юрбитiсö-керисö порог дынас, ыш ловзисисö и, беддезöн джодж кузя тарскöтöмöн, иньдöтчисö енполкалань, лöсьöтчисö пуктыны мымдаöнкö деньгатор. Эринья Потаповна видзöтiс ны вылö и думайтiс гажтöма: «Этна вот локтiсö, а Зобняыс, Зобняыс... Неужто, быль баитiс Юрий Андреевичыс? Ох!» Дзуркнитiс ыбöс. Пырис татiсь Экся баб, как раз сiя, кöдалöн Петруха зоныс породистöй петухöс закуска вылö жаритöма. Сы бöрын чожа мыйись пырис татiсь жö дед, пöрись Мартын Чивера, вайис кулакас шамыртöмöн куим руб. Пöрись Мартын сувтiс джодж шöрö, копрасьыштiс öтöрö-мöдöрö, горöтчис кыз голосöн:

— Поздравляйта быдöннытö локтан праздникöн, отир!

Эна кыввез бöрын сiя гудыра синнэзöн дзарнитiс старухаыс вылö, копыртчис Куть-Кутихалö, кöда квашня моз пукалiс енугöлас, юрбитыштiс сылö. Мартынлöн копырасьöмыс Куть-Кутихалö öддьöн гленитчис, и сiя корис стариксö пуксьыны ордчöн.

— Дзуртамö эшö невнаöн? — юалiс старуха.

— А мый миянлö не дзуртнытö? — паськöтыштiс пельпоннэсö да гажöн горöтчис Мартын. — Кин енсö почитайтö, сiя, соседушка, дыр олö.

— Сiдз, батя, сiдз... Вöр шöрын оламö. Молитватöг миянлö и оськöв оз туй керны, порогсö оз туй вуджны. И-и-и... — шуис дрöжитана голосöн Куть-Кутиха.

— Пондыв шагньöвт порогсö молитватöг! Сразу кымöсыт кузя зорöн öбыртасö. Вот кывзы-ко, мый таво тöвнас мекöт шогмис. Сэтшöм притча — кувтöдз он вунöт. Согрешеннё да и только! Зородок карчйöрам сулалiс, куим промёжок. И вдруг казялi: кöчоккез велалiсö зородокö дынö, каждöй ой виль следдэз кольöны, тыткöны турунокöс, кыдз мöссэз, зника абу. Но, думайта, розоритасö менö косöй бандиттэз, этадз и вешьянтöг колясö. Вот и пуктi ме турунокö дынö, следдэс вылö, ош кыян капканнэз. А молитвасö эта коста лыддьöтнытö и вунöтi. И мый жö тэ думайтан, дона матуш? Петi асывнас дзарнитны капканнэс вылö, видзöта, а öтiк капканын кöчокыс туйö тапкисьöма пась...

— Ах, пасьтöм?! — чирöстiс Куть-Кутиха, кöда Мартын Чивералiсь висьтасьöмсö кывзiс не только пеллезöн, но осьта öмнас. — Пасьтöм пырöма?

Чивера ёна дивуйтчис, синнэсö барöтiс:

— Мый тэ, мый тэ, матуш, кытшöм сэтшöм пасьтöм вермас капканö татшкисьны? Не, не пасьтöм. А капканас кöчокыс туйö пась тор тапкиссьöма! Э-э, — горöтчи ме аслым, — делоыс эстöн нёштöм эд. Эстöн ойнас лешак тай ыжмалöма! Повзи ме, конечно, кулавлытöдз...

— Повзин сёдаки?

— Кыдз, батя, он повзьы: лешак вовлöма да. Повзи, мыся, ме кулавлытöдз, чожжык кыски бырöм ни пась поласö капкансис, свистнитi сiйö йöрыс вевдöрöт ылöжык вöрö, святöй молитва лыддьöтыштi и капкансö бöр зородокыс бердö сувтöтi. Асывнас бöра петi дзарнитны сы вылö, капканыс вылö. Хо! Как раз сiя капканö сразу кык кöч шедöмась, да сэтшöм кызöсь да госаöсь, истово годовöй порссез. Вот сiя, молитваыс, мый керö...

— Кыдз инö, кыдз инö, — перыта горöтчис Куть-Кутиха и сэк жö дзугыльтчис, нырнас виш-виш керис. — Кытшöмкö нёштöм дукöн тэ дынсянь, сват, вайöтö? Эн я, öнджа, винаок пешлы? Э-ээ...

— Гы-гы... Дак эд ашын петыр лун!

— Юны оз туй! — строгöя висьталiс Куть-Кутиха. — Отец Мисаил терпитны оз вермы сатанинскöй дуксö. Ни-ни...

Мартын Чивера öвтыштiс кинас, шуис:

— Э-э... Ачыс, натьтö, орöттöг тыткö. Поп и вдруг вина оз ю. Некöрись сымдаыс эз вöвлы.

— Оз, мыся! — топнитiс кокнас Куть-Кутиха.

— Ладно, ладно, матуш, эн лöгав. Ме эд просто сiдз. Локтас попыс, дак ме ыбöс дынö сувта, медбы нем эз кыв. И мыйкö öддьöн ни жар лоис керкуас, видзöт, и ловзисьны немöн, пöдтыны пондiс. Ужо петавла посöдзö, лолалышта невна свежöй руöн.

И Мартын петiс öтöрö.

Öтiк ректановскöй старуха пукалiс-керис порог дынiсь лабичын, невна садясис кузь туй бöрсянь, бытшöмика пернапасалiс кымöссö и пуксис Куть-Кутиха бокö.

— Греххез миян, греххез. Шог менö гыжьялö, матуш. Эд согрешеннё аркмис, согрешеннё. Нырöви ни пыри грехас. Ох, ох! Öши ме артсим, пöрись розвальня, — öддьöн гажтöма, мыкталöмöн висьталiс сiя.

Куть-Кутиха эна кыввезсянь, тыдалö, ёна повзьыштiс, шлёп-шлёп керис тырппезнас. «Отче наш» лыддьöтiс. Веськыта старухаыс синнэзö видзöтiкö, сiя юалiс:

— Господь тэкöт, Öкулина! Кыдз жö этö сiдз петiс? Мыля согрешитiн? Мужик я мый я бöбöтiс-ылöтiс тэнö, горбыля кикиморасö?

— Мый тэ, сваття, мый тэ? Мужик йылiсь важын ни и дума абу... Чоморыс дзугис! Характерöс эд тöдан менчим... Не весь жö томсянь поперешнöйöн шуöны. Мунi ме таво тулыснас бригадир дынö, эта арттöм Понъюровыс дынö, вöлокöс кора: мыся, сет жö тэ, Понъюров, вöлоксö, пес невночка кöть вайны вöрись колö. А сiя, Понъюров Левонидыс, контораас пызан сайын важнöй сэтшöм пукалö. Видзöтыштiс сiя ме вылö дзуту синоккезнас да кы-ыдз рявкнитас! Он адззы, шуö, пöрись лешачиха, мый ме кера — бумагаэз гижа! и öдззис, и öдззис. Сякöй нятьöсь кывнас менö видiс, куимпöвса матьöн матькис. А сэсся садясис и горöтчис, ёрдöм кучик: «Простит, бабиньöй, простит, сьöлöмшöриньöй...» Но чоморыс менö сэтöн и дзугис, шушкыштiс пель одзам: «Эн простит сiйö, Понъюровсö!» Ме и горöтчи Левонидушкоыслö: мыся, ог ме тэнö, ёрдöмöс, простит, оскорбитiн тэ менчим быд жылаöс, быд коскаокöс. Мыся, талун жö письмо гижа Москваö, норася тэ вылö. Ась, мыся, тэнö, нятьöсь нырöс, тюрьмаö пуксьöтöны! Мед жö, мыся, тэнат бöб юрыт чижовкаын сiсьмö!

— Сiдз и эн простит тэ сiйö, Понъюровсö? Сiдз и мунiн бöр?

— А кыдз инö. Эг простит, матуш. И вот маитча-шогала. Быдса ойезöн бергала бокись бок вылö, а оныс абу... Мукöдпырся суткиэзöн ог и узьлы чепöль мымда, кöть синнэз бытшкав. Согрешеннё, мыся, ох, согрешеннё. Этадз и кувны недыр.

— Енсö тэ вунöтiн, Öкулина. Сылiсь заветтэсö кок увтат няж-няж тальöмыт, — старухасö осудитöмöн горöтчис Куть-Кутиха и бöра шлёпнитiс невна тырппезнас: — Эд еныс писаннёын мый висьталöма: сöтас врагыс тэныт шульга пельбокат, дак тэ лöсьöт сылö веськыт пельбоктö, ась эшö сэтчö заваритö. Писаннёын гижöма: ов смирнöя, нырышт ассит гордынятö. А тэ, ох! Но да ладно. Часöт сёр ни каитчиныт. Вот локтас отец Мисаил, мыччисяс батюшко-заступник, юрбитыштамö еныслö и бурмас сьöлöмыт. Поди, и проситас тэнö господьыс.

Лолалыштiс свежöй воздухöн Мартын Чивера, пырис бöр керкуö. Сiя казялiс, что Куть-Кутиха бокын местаыс абу ни прос, пуксис порог дынас лабич вылö.

Керны вöлi нем, и Чивера юалiс горöн:

— Отец Мисаил эз на лок?

Нет, отец Мисаил кытчöдз эз на лок.

Öтöрын тöдчöмöн пемдыштiс. Енполка вылын, святöй ликкез одзын, важын ни мигайтiс стеклотöм лампа, а поплöн сё эшö и дукыс эз вöв. Локтiс ыб вывсянь Опонько, осьта ыбöсöт дзарнитiс керкуас и сэк жö саясис бöр, тыдалö, ужнайттöг иньдöтчис сарайö, чöскыт кера турун вылö. А поди, столовöйö мунiс, Фаина дынö. Мый тэ сылiсь босьтан.

А попыс сё эз вöв.

Бабушка Экся пукалiс крещёнöйез коласын, то горзiс, то сералiс, натьтö, дасiсь ни висьтасис, кыдз сылöн зоныс, Петрухаыс, чöскöтöма сэрпöсь öмсö породистöй петух яйöн, сэсся эз ни понды герьясьны, шуис веськыта:

— Вот локтас отец Мисаил, дак горöтча сылö кыв-мöд, ог и понды чуклясьны, горöтча сразу, мыся, тэ батюшко, öнджа!..

Эна кыввез бöрын сiя тöдчöмöн лöнис, бергöтчис аслас соседкалань, кыз веретинскöй инькаыс ладорö, юалiс сылiсь:

— А тэнö, томöс да здоровöйöс, кытшöм лешак миян дынö чапкис? Кытшöм нужда вайöтiс?

Веретинскöй инька стыдитчöмöн лэдзис басöк синнэсö, кыскис моросас унажык воздух, дзик пондiс пöдны, и лоис эшö кызжык. Сiя висьталiс не öддьöн горöн:

— Ог и тöд, кыдз тэныт юöртнытö, баушка. Думайтыштiс невна и сёдаки шушкыштас Эксялö пель одзас:

— Зонöс окота важын ни вайны, а сiя сё абу и абу. Квать год ни мужиккöт ола, а челядь оз шогмö...

Экся юалiс осторожнöя:

— Поди, мужикыт виноват, а совсем не тэ?

— Ме эта делоын виноватыс, баушка, — увереннöя горöтчис паныт том бондяыс. — Мамö совет сьöртi ме проверитчи ни...

Бабушка Экся чожа, дзик заразнöй дынсянь, вешшыштiс бöбöвыс бокись, лöгöн моз, осудитöмöн, шушкыштас:

— Ах тэ, стыдтöм тэ! Йöз мужик дынö котрасин? Ах, ах! Вот ме тэнö, лягуша яйöс! Да позьö разь йöзын сэтшöм срамсö баитны? Ах, сэрпöсь тэ... öнджа!

Мартын Чивера эшö петавлiс öтöрö лолалыштны свежöй воздухöн, а отец Мисаил сё эз мыччись. Куть-Кутиха дзарнитiс аслас воинство вылö, юрнас гогинялыштiс: не уна, не уна... Эзö мылякö грешнöйез кинитчö чудотворнöйыс дынö. Но да ладно. Вот чулöтамö обеднясö, миссьöтам быдöс еннэсö святöй ваокöн, кывсяс эта омöн волок пасьта... Сэк вöлись. Старуха казялiс, что гöссез дугдiсö ни сярзьыны-боньгыны, гажтöмтчыны пондiсö, и горöтчис дзирыта, нюжвыла:

— А не лыддьöтны я миянлö молитва?

— А мый, позьö и лыддьöтыштны... — шыасис кинкö.

Паныт сэсся и кывджын некин эз шу, примитiсö Куть-Кутихалiсь предложеннёсö мугтöг. Мукöддэс сэтöн жö сувтiсö пидзöссэз вылö, медбы клёнöтны джодж кузя кымöссэзöн, мукöддэс чожжык пелитчисö топ енполкаыс дынö, медбы господьыс буржыка кылiс нылiсь молитвасö. Быдöнныс öдззисö öвтны киэзöн, шлёпöтны тырппезöн. Эта коста быдыс старайтчис керны сiдз, медбы вевттьыны öмнас ассис соседкаöс, медбы буржыка петiс молитваыс. Медбура сiя аркмис, конечно, Куть-Кутихалöн. Старуха шлёпöтiс тырппезнас сэтшöм чувствоöн да толкöн, что нельки веретинскöй бöбöвыс, басöк сина кыз бондяыс, кынымиськö ыш ловзисис, а сэсся давай жö сыркьявны да кисьтны курыт синваэз. Вöрзьöтiс, батя, сылiсь сьöлöмсö Куть-Кутиха, горзытöдз воштiс.

Но эд оз понды йывны, дак оз ни тэныт йыв! Первöй жö кыввезсянь эз удайтчы молитваыс, изводассис сiя сразу жö, кöть и пондöтчис сэтшöм ладнöя. Мартын Чивера, кöда öнöдз мирнöя пукалiс порог дынын да горöн пишкис нырнас, тожö сувтiс кок йылö, медбы сетны Христосыслö пояснöй поклон да лыддьöтыштны молитва. И сiя осьтлiс ни öмсö, медбы пондöтны молитвасö, кынымиськö копыртчывлiс ни ликкес одзын, кыдз вдруг ылöстöма барöтiс синнэсö, шатöвтчис перво öтöрö, сэсся мöдöрö, а сэсся паськыта öвтыштас кыкнан кинас, öштiс равновесиесö и, бытьтö кералöм пожум, брякнитчис-усис джодж шöрас.

— Ах! Ух! — бöбись чирöстiсö крещёнöйез. — Отсав миянлö, енiньöй, эн сет смертьыслö, Христос-батюшко!

Эринья Потаповна öдва видзсис кок вылас, киэзнас перыта кутiс юрсö, кöда пондiс потласьны; веретинскöй кыз инькаыс бöбсялiс досповна и урся шупытжыка лэбзьыштас пöлатьö; кынымкö старуха, ойзöмöн да пернапасасьöмöн, сэтчö и нюжалiсö-усисö, кытöн сулалiсö. Только öтнас Куть-Кутиха — ачыс чёртыс сылö завидуйтас! — кваркыш синнас эз кер, эз öш, эз понды чирзыны да лёкшöритны. Спокойнöя, бытьтö не сылöн и дело, локтiс сiя Мартыныс дынö, мышкыртчис сы весьтö, кужöмöн пешлiс Чивералiсь сьöлöмсö. Нем сэтшöмö умöльсö сiя эз казяв, Чивералöн сьöлöмыс уджалiс, кыдз часы, если не лыддьыны сiйö, что брякöтiс öддьöнöв ни горöн — бут-бут-бут... Дзик наковальня кузя сьöкыт молот сöталiс. Куть-Кутиха эшö малалыштiс Мартынлiсь мороссö, бытшöмика сюйыштiс кисö сылö пиас. Хо... А эта кытшöм нö сэтшöм предмет, чорыт да волькыт, дзик стеклоöн зыртöм быгрöтчан, куйлö горöн буткöтан сьöлöмыс дынын? Галя я мый я новйöтö шабур увтас? Вот чоморыт! Дивуйтчис-керис пöрись старуха, мыйкö шушкыштiс ас кежас и вöлись кыскис Мартыныс конувтiсь, шабурыс увтiсь, быдöнлö öддьöн тöдса предмет — вина увтiсь пустöй бутылка. Быдöнныс, кин вöлi сэтöн, кокнита ловзисисö. Быдöс лоис вежöртана. Эта лешаччöй старикыс, адззатö, не весь петавлiс посöдзас свежöй воздухöн лолавнытö — быдса бутыль сэтчин гусьöн ректöма.

Куть-Кутиха сыбурна лöгасис, что öдва чушыктiс, но чожа ловзис, топнитiс кокöн и тшöктiс öнi жö чапкыны кодульсö порог сайö. Старухаэз тожö вöлiсö лöгöсь, нiя эз пондö сунасьны да споритны, а уськöтчисö Чивера дынö, кутiсö сiйö кин кокöт, кин юрöт да киöт и кыскисö-петкöтiсö сiйö, кыдз кряжöс, öтöрö. Чапкисö старикöс лог дынас йöр увтö: повзьöтлы сэтöн лешаккесö, каналья!

А отец Мисаил сё эз вöв.

Паськыт öма дзимбыровскöй петуххез куимись ни китсасисö лёкгоршöн — юöртiсö ойшöр кад, деревняас, а сiдзжö видззез вылын и вöрас важын ни эз кылö некытшöм шыэз, Эринья Потаповна керкуын старухаэз кулавлытöдз ни мыдзисö, а отец Мисаил сё эз мыччась.

Быд пельöсын, и полатьын, и горвылын кылiс сьöкыта ыш лолалöм, кылiс ружтöм:

— Ох греххез, греххез...

— Оланыс, кума, повзьöтчана лоис, повзьöтчана. Лолав, да эн вунöт бöрат видзöтлыны: он и казяв, кыдз юрвоманö чарньöв жаритас.

Лэдзчис пöлатьсис веретинскöй ичмонёкыс, позевайтiс-керис чöскыта, нюжöтчис киэсö лэбтöмöн и горöтчис небытик бархатнöй голосöн:

— Он пондiс петны. О-а-х-ха-ха-хо...

Пуксис öшын дынö, дыр видзöтiс öтöрас, бöра шуис:

— О-а-х-ха... Узьыштны бы...

Сылö паныт некин и шы эз сет. Эз ештö шыасьнытö: быдöнныс дрöгнитiсö, кресталiсö кымöссэз. Вöлись, вöлись... Нiя кылiсö, кыдз кинкö осторожнöя тарснитiс чунь козонокöн öшын стекло кузя, кинкö кашельнитiс öтöрас. Вöлись, вöлись локтiс батюшкоыс. Ах, ах!

Кокнита, бытьтö борддэз вылын, Куть-Кутиха чепöссис посöдзö, дрöжитана киэзöн кыскис калич, ванйöвтiс ыбöссö. И чуть эз усь гатш, öдва вермис петитчыны ылöжык: ыбöсыс сайын поспу вылын сулалiс совсем не поп Мисаил, а быдöнлö тöдса згальник — колхознöй шофёр Сенька Никонов.

— Мый тэныт колö, лёквир? Кытчö сэрпöсь чуктö пелитан? — лöгöн юалiс старуха.

Сенька эз öбидитчы. Эна нёштöм кыввезсянь сiя легöтыштiс чуньнас, шуис гусьöн:

— Важнöй делоöн локтi тэ дынö. Ачыс городскöй поп отец Мисаил иньдiс...

— Ах!

— Ветлi ме талун важнöй грузла районö, но и сувтчи столовöй дынö — тыткыны охота лоис, ноко, мыся, пыравла да жорита кöть курöжок я мый я. А сэтöн вдруг, столовöйыс дынын, крöмликтö ме дынö симпатичнöй сэтшöм дядь, тошыс читкыля, паськыт, дзик корось, юр вылас шляпа пелитöма.

— Этö сiя!

— Локтiс ме дынö топ, значит, юалö: «Не дзимбыровскöй ли тэ, зонка?» Но, дзимбыровскöй, мыся. А мый колö? Сiя и кыскис кармансис виль пятёрка, сюйыштiс меным киам и баитö: «Тырт менчим öтiк ыджыт порученнё, висьтав гражданка Кутихиналö сэтшöм кыввез: «Поп Мисаил пö оз вермы локны Учöт Дзимбырас, сiя, адззан ли, машина вывсянь лэдзчикö, дойдöма коксö».

— Ах! Да баит жö тэ перытжыка, сэрпöсь ныр. Мый вöлi одзлань-ту? Мый этö сiя...

— А сэсся нем эз и вöв. Эта дядьыс, попыс, содтiс, что гражданка Кутихина — старуха умнöй: ачыс быдöс вежöртас. Поп, шуö, шогавнытö дыр пондас, месяцся унажык, и вичкуас мирянаыс ась пö кытчöдз оз и вовлö, нем пö сэтöн кернытö. Вот сiдз.

— Сэсся нем эз и висьтав?

— Öтiк кыв сэсся эз горöтчы. Вот и быдöс, мый сiя тшöктiс юöртны. Адззисьлытöдз, бабушка, узь бытшöмика!

...Джын час бöртi Эринья Потаповналöн керкужугыс вöлi пустöй. Старушкаэз ойзöмöн да ружтöмöн, беддез вылö нырыштсьöмöн тюкöтiсö-мунiсö асланыс деревняэзö да хуторрезö. Мича чужöма веретинскöй инькаыс вдруг гажтöма вак-вак серöмтчис, öдззис шыннявны и котöрöн иньдöтчис деревня сайö, только лэбзис мылякö не Веретя ладорö, а нач мöдiклаö — Кöчкок деревняö, этö бöбувьяс, натьтö. А поди, мöдiк мог сылöн вöлi, поди, бöра проверяйтчыны мунiс... Кин тöдö.

Бабушка Экся петiс медбöрын, порог дынас сувтчывлiс недыр кежö, шуис лöгöн, грöзитчöмöн:

— Эз лок, сiдзкö... Жаль. Видзчиси сiйö, думайтi тшыкöтны настроеннёсö, да эз удайтчы. Уж ме мыччалi бы сылö, проклённöйлö, петырлун. Зонö сы увья прохвостöн лоис, винагагöн.

Эринья Потаповна шлёпкисис лабичö, кыкнан кинас бöра кутчисис юр бердö, кöда, кыдз и öнтай, готов вöлi потны шöри:

— И-и-и... Бöра горе да шог меным. И-и-и...

— Эн унняв! — рыкнитiс сы вылö Куть-Кутиха. — Эн лысьт енсö лöгöтны! Веськалас отец Мисаил, брызгайтас быдöс угодниккесö святöй ваокнас, чулöтас обедня и юрбитан керку осьтас. Вот шоччисьышта лун-мöд и асьным венчайтам Опонькосö да Параськасö. Отец Мисаилтöг и арталамö делосö святöй чуланын! Деньгаоксö, слава Христослö, миянлö талун диво вайисö, тырмас небны Параськалö подвенечнöй платьеок, сапожоккез небам, да и Опоньколö кольччас — кушак сылö небамö, зырымöсьлö. А Эксяыс, Эксяыс! Копейка эд эз вай. Гордöй лоис, этта, кытшöм гордöй. Кыдз жö, зоныс вичкуын уджалö. Ох-хо...

Сiя чожжыка шамыртiс киас енполка вылiсь быдöс деньгасö, ружтöмöн мунiс гортас. Сэтчин Куть-Кутиха кайис гор вылö и кык лун да кык ой узис садьтöг, öтпыр эз и петавлы öтöрö. Эринья Потаповна эта кадö орöттöг думайтiс аслас киссьöм керкуок йылiсь, юрбитiс енлö да сыркьялöмöн горзiс. А сэтöн и виль событиеэз ештiсö. Оланыс эз сулав, сё лэбзис да лэбзис одзлань.

Опонько, кыдз пыр, локтiс ыб вывсянь сёрöн рытнас, посöдзын чöвтiс комбинезон, сэсся котöртiс логас, кöда пыдöсын больгис кöдзыт шорок. Сэтöн сiя джын час сьöрна зыртiс да гывьялiс асьсö, быдöс ньылöмöсь вывтырсö, киэсö, солярка дукöн боссьöм кымöссö. Шорокын ваыс вöлi ключевöй, кöдзыт. Кисьтан сэтшöмсö вылат быдса ведра и долыт лоö, бур, сьöлöмыт песняэз сьылö.

Гортас Опонько пасьталiс виль йöрнöс да вешьян, бытшöмика сыналiс юрсисö да, медбы солиднöйжыкöн лоны, бура путшöтiс кудриэсö. Ассис кирзовöй сапоггесö Опонько сыбурна зыртiс важ гуня полаöн, что нiя пондiсö свиттявны кыдз генеральскöйöсь. Эта бöрын дзарнитiс порозлöн син пасьта зеркалоö и серомтчис: мыйöн не жöник, мыйöн не кавалер!

Дыркодь сiя мигайтiс да шыннялiс аслыс, сэсся петiс öтöрö. Медбы не пантасьны мамыскöт — сiя мыйкö гуддисис öшын увтас, — Опонько пелитчис неыджыт калиткаö, кöдаöт ветлiсö карчйöрö, карта бöрöт мунiс паськыт льöмпуэз дынö, пырис тшöка быдмöм пуэс коласö. Эстöн вöлi кыдз настоящöй шатёрын — пыран, дак некин тэнö, нельки асьныс поннэз, оз казялö.

Сьöкыт лунся удж бöрын Учöт Дзимбыр жагöника лöнис: дугдiсö баксыны мöссэз, жольöтны колодец дынын ведраэз, ёркöтны калиткаэз. Сенькалöн гармоння, кöда деревняыс сайын орсiс частушкаэз, тожö мыдзис, дугдiс шыасьлыны. Только Чöвпан дынiсь ыб вылын гурöтiс трактор да неылын, лог саяс, ошшасис аслас дзуртан голосöн герскан. Деревня конецын тявзыштiс понжуг и виньдiс — и сiйö ньылыштiс вына он.

Опонько пукалiс льöмпуэс увтын, нямлялiс пиннес коласын курыт турун за, лыддис минутаэз. Кузьöсь нiя вöлiсö, дзик резиновöйöсь. Сьöлöм токöтiс моросын сьöкыта, пиксiс гажтöма, тöждiсьöмöн, а сёравно дзик сылiс, сотчис. Локтас я? Поди, сералö да? Локтас! Не сэтшöм сiя нывкаыс, медбы серöм могись кутчисьны зонкаэскöт. Тöн вовлiс — асылöдз пукалiс ордчöн, некыдз янсöтчыны оз вермы. Окасисö сэтчöдз, что тырппез сё эшö биöн сотчöны. Вот эта нывка!

Паськыт чужöмбана тöлiсь öшалiс ылiсь вöр ладорын, Кайскöй волокыс весьтын. Герскан любуйтчöв-керис аслас голосöн и лöнис. Вот и лягушкаэз озö ни вежмасьö, кöбывкаэз дугдiсö чирскыны лысваа турунын. Онмöссис карчйöр сайись вöрыс, быдлаын шы не тöв. Но — чу! Дзуркнитiс кытшöмкö калитка, чожа мыйись оськöв шыэз пондiсö кывны. Этö сiя!

Дата добавления: 2015-11-16