КЫДЗ ШЫННЯЛÖ АПОСТОЛ 4 страница

— Дыр ми вичкуас батюшкоыскöт сёрнитiмö. Важнöй делоэз йылiсь сёрнитiм.

Эринья Потаповна вевттис öм дорсö запон конецöн, ачыс быдöс жмитчис комокö, юрсö кыскис пельпоннэзö, кöдна дрöжитiсö, спинаыс кузя кöдзыт мурашшез котöртiсö. Мый этö соседка висьталас? Поди, садь бырас сы юöрсянь?

— Радмис отец Мисаил, уж сiдз сiя радмис, кöр святöй ликкес йылiсь кыв-мöд горöтчи, — тронгис одзлань Куть-Кутиха. — Кузь век вылö тэнö благословитiс. И менö тожö. Святöй дело, шуö, тi керитö, и еныс оз вунöт тiянöс, оз коль милосттезтöг. Берегитны сiя тшöктiс ликкесö, синнэзся ёнжыка берегитны. Медбы, шуö, враг киэзö эз шедö, медбы некин ны йылiсь нем и нем эз тöд.

Хозяйка кывзiс соседкасö лолавтöг, видзöтiс орöттöг веськыта сылö öмас. Сэтшöм сiя бытшöма кывзiс Куть-Кутихасö, что, кажитчö, нельки ятнöя адззис, кыдз чеччалiсö старухаыслöн кыз да лöзöтöм тырппез вывсянь кыввес. Интереснöйöсь вöлiсö эна кыввес, öддьöн интереснöйöсь.

— Деревняаным юрбитан керку сiя мöдö осьтны! Вот ештöтча, шуö, быдöс делоэзöн, невна веськöтчышта, шуö, — сiя, юр вердiсь миян, мыйкö шогавны пондöма — и дзарнита, шуö, тiян ладорö, кежавла лун-кык кежö. Кыдз и мöдiмö ми одзжык кернытö, святöй петырлун панытö кöсйисис миянö вовлыны. Локта, шуö, аслам святöй ваöн брызгайта Потаповналiсь керкусö, угодниккесö тожö брызгайта быдöс, молебен служитыштам — и вöлись юрбитö, кыдз колö християналö, кыдз колö добрöй отирлö. Да не öтнаныт юрбитö, а корö быдöнöс, кин желайтö юрбитнытö: корö йöзсö Учöт Дзимбырись, Ыджыт Дзимбырись, Гундырись, Веретяись, быдöс кайскöй деревняэзiсь да хуторрезiсь. Ёнжыка, шуö, том йöз бердö кутчисьö, нiйö велöтö енсö почитайтны. Вот эд мый! Видзöтан, и вичкуок миянлö осьтас.

— Ох, ох! А избушкаö менам — куш осьта.

— И сы йылiсь миян басни вöлi, — важнöя шуис Куть-Кутиха. — И керкуоктö эг вунöтö. Избушкасö, шуö, ми дженыт кадö вочамö, деньга, шуö, эта дело вылö мымда колö ми адззамö. Бур, шуö, что Эринья Потаповналöн керкуыс сулалö деревняыс дынсянь торйöн, лог сайын. Эта öддьöн бур. И эн тöждiсь, чожа югыт теремын овны пондан. Барыняöн лоан. Пондас локны миянö народ. И быд мортыссянь ми пондамö босьтны руб. Вот эд кыдз делосö арталамö. А тэ юртö öшöтöмат...

Эта кадö Куть-Кутихалö мыйкö усис тöдвылас, сiя лэчыт синнэзöн видзöтöв-керис соседкаыс синнэзö, юалiс перыта:

— Полтинниккес дзоньöсь я? Кöднö Егорушкоыс вайис? Эз я нiя кытчöкö нильдö?

— Мый тэ, мый тэ, кытчö нильдасö. Вон енполка вылас. Некин эз вöрöт.

Чепöссис Куть-Кутиха енполка дынö, кималасöн адззис полтинниккесö, жолькнитiс нiйöн:

— Вот кытöнöсь, донаэс! Ох, бöбасимö ми сэки, ылöстöмсялiмö да. Колiс брызнитны, окаяннöйлö, пакас, нем бы умöльыс эз ло. Брызгайтiмö бы, корим бы вöр лешаклiсь эшö дас полтинник. Сетiс бы, пöрись кöин, кила эд петöма.

Эринья Потаповна нем эз горöтчы, сiя только думыш керис: а бур я йöз беда вылын нажитка керны. Еныслö эта гленитчö разь?

А Куть-Кутиха дзебис полтинниккесö кытчöкö пиас, бобгис одзлань ровнöй голосöн:

— Ыджыт ванырöн пондас визывтны миянö народ. Ми быдöнсянь босьтамö куим рубöн, а поди, и унажыкöн. Йöзыс öнi богатöя олö... Вот и ми тожö богатсялам. А тэ мöдiн виль керку бердö кутчисьны. И вежöртiн я, мыля господьыс эз сет тэныт керкужугтö чапкыны, мöдiклаö мунны? Святöй местаын сiя сулалö, избушкаыт. Вот эд кыдз. Неужто öнöдз нем эн вежöрт? Поди, сё эшö Ыджыт Дзимбырö тарöвтчан бы, рака öм?

Эринья Потаповна уна ни вежöртiс: этö угодниккес увья керку местаыс, быдöс лог сайыс святöйöн лоöма... Ах, ах!

— Только вот мый, сьöлöмшöриньöй, — мыйкö думайтiкö гусьöнмоз шуис Куть-Кутиха, — Опонькоыт тэнат медбы öмсö эз пильтырав. Тэ сiйö, пожалуй, велöтышт, окаяннöйöс, невна пöльт бедьöн. Мед ассис поганöй кывсö пиннес сайын видзö. Вежöртiн я менö?

— Кыдз не вежöртны, матуш? Делоыс эстöн сэтшöм... Тэ эн пов, быдöс ладно лоас. Опонькоыс, ачыт тэ тöдан, вежöра менам, сiя кужö чöвнытö. И кывзiсьö, паныт некöр и кывджын оз шу.

— Вот, вот! Велöт сiйö Христоссö почитайтны. А медбы надёжнöйжык быдöс вöлi, дак гöтравны детинасö колö. Ужо петырлуныс кежö и арталамö этö бур делосö. Отец Мисаил веничайтас нiйö святöй чуланат, гöрöдалас век кежö богородичаыс одзын — вот и быдöс сэтöнка.

Гортас ни мунтöн Куть-Кутиха эшö öтпырись строгöя закажитiс:

— Дак тэ эн вунöт, велöт невночка ассит сибирскöй ректантö. Колас, дак плетьöн шöрав öтпырись-кыкись. Нето юрсö жамнит коккет коласö да и куль небыт местасö нагайкаöн, ньöрöн. Эта еныслö öддьöн сьöлöмви лоас. Видзöтан — бытшöм мортö пöрас. Да эн сунась менам, эн уськöт осьта öмсит счастьетö, умöн-толкöн быдöс кер.

Пернапасалiс старуха кымöссö да мунiс гортас. А Эринья Потаповна дзор юрсö кыкнан кинас кутiс, медбы эз пот сякöй думаыссянь: ох, ох, делоэс кытшöмöсь. Öддьöн важнöй делоэз пондöтчöны. Только быдöс я бур да ладно? Кылö сьöлöмыс: öдззас бергавны-гольöтны колесоыс, а кытшöм сiя, кинлöн эта колесоыс — енлöн или чёртлöн, добрöй колесо или сатанинскöй — мун да кошшы артсö.

Сёр рытöдз пукалiс öшын дынын Эринья Потаповна, сё думайтiс, думайтiс. И мöд лунас думайтiс, юрыс потласьны пондiс, кöть асыкав нето симöтöн, кыдз потöм гырничöс, каттьы. А Куть-Кутиха весь, кажитчö, и öтiк минута эз öшты. Керис öтiк бур дело, повзьöтiс кулавлытöдз соседкасö, и сэк жö мöдiк бур дело бердö кутчисис: отец Мисаиллöн совет сьöртi кык неделя сьöрна талис ыджыт да учöт туйез ылiсь да матiсь деревняэзö, не етша йöзкöт сёрнитыштiс öтi-мöдi йылiсь. Уна стариккез да старушкаэз, сэтшöм жö пöрисьöсь, кыдз и ачыс Куть-Кутихаыс, панталiсö сiйö няньöн-солöн, чиннöя да приветливöя, быдöнныс шуисö хитрöй бесöс матушöн, сьöлöмшöрöн, чуть я не святöй мортöн.

— Ачыс отец Мисаил локтас. Вежöртiт? Эд дышöтчö, котрасьö миянöдз, внучоккезнытö сьöрö босьтö.

— Эн тöждiсь, матушка, локтамö. Миянöс нем оз видз, быдöнным локтам.

— И медбы шы не тöв, медбы некин эз ванзы öддьöнсö! Деньгатор тожö сьöраныт босьтны эд вунöтö: попыслö дона козин небны ковсяс, öнi быдлаын сiдз керöны.

— И миян вежöрным кытчöдз эм эшö. Тожö тöдамö, кыдз да мый. Ваям деньгатор!

Кöр старуха бертiс гортö, сiя бытшöмика пывсис жар баняын, бура шоччисис-узис гор вылын. Ашынас, бодрöй да весёлöй, сiя иньдöтчис Эринья Потаповна ордö. Куть-Кутиха бура тöдiс, что кöртсö дорöны пымнас, и сiя мунiс соседкаыс дынö не öтнас, кыдз пыр вöвлi, а босьтiс сьöрас и Параськаöс.

Внучаткаыслö мöймуся покровсянь мунiс двадцать пятöй год ни. Вöлi сiя лöсьыт вывтыра, мича чужöмбана, новйис кузь сьöд чикись, пасьтасис скромнöя: сьöд ситецись сарафан — кузь, чуть я не кок пятаэзви, — юрсö вевттьылiс скромнöй жö руд чышьянокöн, кöдö лэдзлiс синнэсви. Ладнöй, кажитчö, быдмис невеста, характернас лöнь да небытик, некинкöт оз пиньгись, паныт чорыт кыв оз висьтав, а вот шогмас жö — öтiк жöник кытчöдз эз вовлы Параська дынö, некин эз йоркöтчы сы посöдзын.

Натьтö, пятнадцать год гöгöр чулалiс ни сэксянь, кöр Параськаыс велöтчис начальнöй школаын, и öтпыр учöтик варнакпиян, зырымöсь бедь, кöдакöт нылочкаыс пукалiс öтiк парта сайын, юалiс:

— Параська, мунан ме сайö? Иньöн лоан... Ответсö Параська висьталiс нач ни видзчисьтöмö:

— А копейка сетан?

Уна ни визывтiс сэксянь Вильва юöт ваыс, учöтик варнак важын ештiс лоны колхознöй шофёрöн, Сенька Никоновöн, а Параськаыс юрын, висьтасьöны, умокыс и чепöль мымда абу содöма.

Эта бы, конечно, и джын беда, не быдöнлö жö лоны Василиса Премудраяöн, да мöдiк, этасся эшö ыджытжык, изъян öшалiс Параськаыс пельпоннэз сайын — шогалiс нывкаыс, лёк кудоба сiйö часто монлалiс. Старичок Гырдзза-Аршин кыдзкö рассуждайтiс эта тема вылö магазинын:

— Важын ни йöзыс казялöма, что кликушескöй семьяэзын пыр сэтшöм челядь быдмö. Этö, конечно, сiйöн, мыля баббезныс томсянь юкталöны нiйö не лекарствоэзöн, а сякöй срамöн, кöдö асьныс пуöны ядовитöй туруннэзiсь.

Дыркодь сёрнитiс Гырдзза-Аршин, вöлись керис итог:

— Кытшöм турун шедас ки увтö, сыись и настойка керöны, думайтöны — сiдз сiя и колö. Дикöй йöзлö быдöс лöсялö, — öвтыштiс сiя кинас.

Куть-Кутиха унаись нуöтлiс внучаткасö вичкуö, дошлöй тöдiсьлö мыччалiс не öтпыр — некытшöм толк эз ло. Вежöртана, Параськаыс аслас лёк кудоба увья колхозын эз вермы керны некытшöм серьёзнöй удж, только сiйö и тöдiс, что мукöдпырся летiс колхознöй гряддэз вылiсь ёгтурун, дезинфицируйтiс мöскартаэз да гиддэз, белитчис сэтчин, мукöдпырся бригаднöй керкуын да клубын миськалiс джоджжез. А сэсся нем эз письты керны.

Талун, соседкаыс дынö лöсьöтчикö, Куть-Кутиха дыр видзöтiс сы вылö тöждiсьöмöн, сэсся гогынялыштiс юрнас, шуис чорыта:

— Жöник сайö тэныт кад ни петны. Не век жö менам сиви вылын тэныт öшавнытö!

— Кин сайö, бабу?

— А эта йылiсь не тэныт ни, бöбöвлö, думайтнытö. Ноко, пасьтась! Да эн лёкшöрит, а то...

Эринья Потаповна примитiс нiйö приветливöя, кыкнаннысö лабичö пуксьöтiс. Куть-Кутиха да внучаткаыс перво, обычай сьöртi, енполка одзын Христослö поклоннэз тэчисö, юрбитiсö пöттöдз и только вöлись лабичыс вылö пуксисö. Пукалыштiсö-керисö, сэсся

Куть-Кутиха сюйыштiс кулакнас Параськалö бокас, шуис строгöя:

— Котöрт, сьöлöмшöриньöй, карчйöрö! Оз лöсяв тэныт миянлiсь сякöй баснисö кывзыны. Котöрт, котöрт, весöт сэтчин гряддэсö, лет быдöс йöнсö. Опонюшко оз вежöрт мамыслö отсавны, а гряддэс нач тырöмась ёгтуруннас.

Параська петiс, паныт и кыв эз шу. Хозяйка да гöстя невночка сёрнитыштiсö погоддя йылiсь, радуйтчисö, что карчйöрын таво путриктöмöн быдмöны капуста, картов да кушман, а сыбöрын, кöть эзö и баитчö, тэрмасьöмöн петiсö чуланö. Эстöн нiя дыр и дыр, кытчöдз, сьöлöм эз бурмы, юрбитiсö, кужöмöн ыш лолалiсö и, кöр вынныс бырис да и кок садь нач орис, пуксисö лабичок вылö. Басни арталiсö Опонько йылiсь. Быдмис детина, нюжалiс, кыдз кайскöй пожум, кад и гöтравны.

— Гöтралам, матуш, вот святöй пернапас пукта, — бурöтiс гöстясö Эринья Потаповна. Сiя чорыта решитiс: отец Мисаил эшö ремонтируйтас керкусö или оз, а овнытö кытöнкö колö. И петö — ёртавны Опонькоöс да Параськаöс самöй раз. Куть-Кутихалö чожа восемьдесят год тырас, куим век оз понды овны, вот-вот нюжöтас коккесö, а керкусö сьöрас оз эд нöбöт. Вот и дöнзяс миянлö, вот и шоныт поз лоас.

Сiдз думайтiс Эринья Потаповна. Куть-Кутиха мыйкö тожö зыртiс кымöссö, мыйкö тожö вöрöтiс веммезöн. Сiдз, ыджыт думаэз думайтiкö, петiсö нiя чуланiсь, жагöник иньдöтчисö карчйöрö. Шондiыс вылынкодь ни сулалiс, пöжис мымда прок. Дзарнитiсö, а карчйöрас некин абу. Кытöн пö Параськаыс?

— Кытчö сiя шыбыльтiс, арттöм? — повзис Куть-Кутиха.

— А воно бороздаас мыйкö сьöд видзö.

— Неужто сiя? Узьö я мый я?

Коссэзнысö зыртiкö котöртiсö нiя бороздалань. И быль — Параська куйлö, киэсö паськöтöма, öмсис быг петö.

— То тай! — паймис Эринья Потаповна. — Вот кытöн бедаыс!

Куть-Кутиха перыта кыскис писис неыджыт склянка, мышкыртчис внучаткаыс весьтö, молитва лыддьöтiс да сетiс Параськалö нюкайтны склянкасö — сюйыштiс сiйö чуть я не öмас. Параська трекнитiс юрнас, осьтiс синнэсö.

— Умöль меным. Сотö шондiыс, — шуис гусьöник.

— Бедаыс кытшöм, ох! — öдззис бöра причитайтны Эринья Потаповна, кöдалöн тожö садьыс бырис, кикокыс орис. Старуха эз и тöд, мый керны, мый думайтны.

Куть-Кутиха кöин синнэзöн дзарнитiс сы вылö, чуньнас грöзитiс:

— Öдззис карзыны, бордтöм рака: ка-ар-р, ка-ар-р! Вон кок йылö ни сувтö нывкаыс, а тэ — беда, беда! Шондiыс сiйö öддьöнöв пöжöм, быдöнкöт сэтшöмыс вермас шогмыны.

Кыдз только петiсö карчйöрсис, Куть-Кутиха варыш моз уськöтчис соседкаыс вылö, готов вöлi синнэсö гарйыны:

— Велöт ассит ректантö бытшöмика, эн сет сылö волясö!.. Следитö тэ сьöрын Христосыс, следитö. Виденнё меным талун вöлi, вот кытшöм виденнё. Бытьтö бы этö... Вежöртiн?

Эринья Потаповналöн синнэс пемдiсö, кымöсыс сразу вазис.

— Вежöртi, матуш, вежöртi! И Опонькосö ужо пöвсала ньöрöн. Кыв менам чорыт — гöтрась и быдöс сэтöн! Тэ эн тöждiсь, сваття, ёрталам ен отсöтöн.

Вот кытшöм кыввез горöтчис повзьöмыс увья Эринья Потаповна. А мый эшö сiя вермис горöтчыны?

Мöйму гожумнас, эттшöм жö шоныт да гажа лунö, аслас карчйöрын гуддисикö, старичок Гырдзза-Аршин, кöть нем эз и видзчись, нем эз думайт, вдруг кöртзыр йывнас гарйыштiс кытшöмкö неыджыт таинственнöй предмет, кöда ёна вачкисис аллюминиевöй бекöр вылö. Вевдöрсяняс и увтсянь сiя сваль вöлi вевттьöма сякöй рисуноккезöн, басöк узöррезöн да грознöй воиннэзлöн фигураэзöн. «Клад, клад эд адззи», — сэк жö вежöртiс Гырдзза-Аршин, дыр советуйтчис аскöттяс, мый керны кладнас, и сiя жö лунö попутнöй машина вылын гöнитiс городö, краеведческöй музейö. Музейись дошлöй сотрудниккез дзарнитiсö кладыс вылö и сэк жö висьталiсö, что рисуноккез да узöррез сьöртi позьö сорасьтöг шуны: этö чашасö стариннöй мастеррез керöмась Византияын, что сiйö мастеритöмась чистöй сереброись и что сылö, вежöртана, цена абу. И эшö бы! Колö жö вежöртны: мастеритöмась сiйö важынся-важын ни Византияын, а адззисис двадцатöй век конецын Учöт Дзимбырын, кöда поздiсьö Кайскöй волокын, пермяцкöй му вылын.

— Этасянь позьö керны вывод, — висьталiсö музейнöй сотрудниккез, — что миян предоккез ветлiсö торгуйтны восточнöй муэзö, вöвлiсö Византияын.

— Вот тай эшö! — дивуйтчис Гырдзза-Аршин. — Вот тэныт и на!

Сiйö дзирыта благодаритiсö, сетiсö кладыс понда деньга. Старикыс радувьяс гожумбыт и арбыт карчйöрын ош моз бергöтiс кöртзырöн сир глина — кошшис виль клад. Но гарйыштiс только кынымкö фарфоровöй торок да кык сiмöм кöрттув. И сё жö музейкöт сылöн деловöй отношеннёэс эзö дзугсьö. Старичоклö чуть да и бöра вовлiсö сэтчинсянь казённöй депешаэз, кöднаын музейнöй работниккес тшöктiсö кошшыны да öктыны быдöс, мый сылö кажитчас интереснöйöн: важ пуовöй посуда, симöтовöй пешоркаэз, пестеррез, сапоггез, солонкаэз, сякöй документтэз-манускрипттэз, важ книгаэз. Гырдзза-Аршин, кöда одзжык эз тöд, кытчö воштыны ассис пенсионнöй кадсö, ловзис. Неетша ни кыскис музейö сякöй добросö: печканнэз, каббез, кöдна отсöтöн кöркö пермяккез катайтiсö пимиэз да кыйисö нинкöммез. Нöбöтiс пуовöй паннез, аскерöм гырниччез, сусаэз, поталяннэз, чöрссэз, лузаннэз да эшö уна мöдiк барахло.

Талун, как раз сiя кадö, кöр Куть-Кутиха да Эринья Потаповна карчйöрын ловзьöтiсö Параськаöс, Гырдзза-Аршинлö вайисö городiсь виль депеша. Краеведческöй музейись директор öтi-мöдi коласын гижис: «Миянöс öддьöн интересуйтöны не только гортся обиходiсь предметтэз, но сiдзжö и изящнöй искусстволöн произведеннёэз — знаменитöй мастеррезлöн картинаэз да мый да, интересуйтöны миянöс стариннöй угодниккез-ликкез...

Гырдзза-Аршинлö сэк жö тöдвылас усис Куть-Кутиха. Öддьöн бытшöм святöй угодникöс адззылiс öтпыр сы енполка вылiсь. Этатшöм важнöй старик сулалö джаджокыс вылын: öт киас босьтöма крест, пельпоннэс вылö чапкöма парчаись вурöм кузь да басöк шабур, тошыс паськыт, бура сыналöм. А мый самöй главнöйыс, дак этö, конечно, синнэс: строгöйöсь, сiдз и ветлöны öтмöдöрö, дзик ловьяöсь. Сувтан енполкаыс одзö веськыта — сiя тожö тэ вылö веськыта видзöтö; невночка вешшан шульгалань — сылöн синнэс сэк жö казявтöг бергöтчöны шульгалань; веськытлань сувтан, топ стенаыс бердö — пожалуйста, святöй угодник бöра тэнат синнэзö видзöтö. И бытьтö баитö, чуньнас тэныт грöзитö: не, он пышшы ме шогья некытчö, он мун вакрамешö, пöрись кöин тэ и грешник, сёравно шедан тэ меным, ужо берездöта адас.

Усис эта хитрöй сина угодникыс Гырдзза-Аршинлö тöдвылас, сьöлöм вöрзьöтiс. Старичок перыта кышалiс вывтас походнöй пиджак, петiс öтöрö. Вöлi сiя кок йылас öддьöн кокнит, котрасис шупыта, но медбы мунны эшö шупытжыка да кажитчыны важнöйжыкöн, киас талун босьтiс крепыт кыдзовöй бедь, кöдö шуис пон гажöтöн. Некой пору старичок сибалiс Куть-Кутихалöн керку дынöдз. Öшын увтын сувтчис, невна кывзiсис. Керкуас ятнöя кылiс кинлöнкö жеркöтчан кыз голос, кинкö сэтчин кашляйтыштлiс. Öшöтiс Гырдзза-Аршин пеллесö чуть я не муöдз, стена бердö сiдз и лякасис: не Экся соседкалöн я зоныс? Вичкуись сторож Петруха? Сiя и эм!

— Строгöй наказ меным сетiс, — баитiс Петруха.

— Тарöвтчы! Ог сет ме тэнат поганöй киэзö некытшöм святöй тор!

Этö Куть-Кутиха отвечайтiс сiдз гöсьыслö.

— Но тшöктiс эд!

— Тарöвтчы, мыся! Ноко пет часöт жö, кабак пыкöт!

Дзуркнитiс ыбöс. Гырдзза-Аршин сэк жö чеччöвтiс пельöс сайö, дугдiс лолавны. Кодуль Петрован, пашмöм юра, пыктöм чужöма, петiс керкусис, вирскис-керис нырнас и, öтмöдöрö дзарьявтöн, иньдöтiс коккесö магазинлань. Мый сiя корис старухаыслiсь?

Эх, да кватитчан разь?

Кöр Петрухалöн спинаыс саясис магазин ыбöс сайö, Гырдзза-Аршин картузнас чышкис пимиэз вылiсь бус, полöмöнмоз кайис посöдзö, дыркодь сулалiс сэтöн, думайтiс, пырны я не я. Но сэсся решительнöя öвтыштiс кинас, тойыштiс ыбöссö. Старуха, сьöкыта лолалöмöн, пукалiс осьта öшын дынын, поиктiс. Параська ыбöс дынiсь пельöссянь кваркышалiс ыджыт синнэзнас, нималiс чуньсö. Гырдзза-Аршин сувтöтiс бедьсö косяк бердö, петiс полать увтiсь да хитрöй сина святöй угодникыс одзын кынымиськö пернапасалiс мороссö и кымöссö, муöдз копыртчис перво ликыслö, а сэсся и Куть-Кутихалö.

— Здорово олан, добрöй соседка, здорово, менам матуш!

«Матушыс» кöин синнэзöн дзар керис сы вылö, эз висьтав паныт öтiк кыв. Öтöрын горöн готсисö курöггез, лёкгоршöн летiс адсö петух, öшын увтын мунiс автомашина, жольöтiс да дзуртiс быд кöртокöн, базанитiс, медбы повзьöтны петухсö, тыдалö, тэрмасис ыджыт грузöн районö. Старуха сё пышналiс стариксö лэчыт синнэзнас, вöлись юалiс лöгöн:

— Кытшöм могöн лешакыс пыртiс?

— Матуш тэ менам, сьöлöмшöриньöй! — öдззис сярзьыны Гырдзза-Аршин. — Делоöн пыри, вот кытшöм важнöй делоöн. Беда менö вöтiс, дона и добрöй сьöлöма соседка, уж сэтшöм причча! Лэдзчи ме талун колодецö дынö ва гумыштны, локтi топ колодецыс бердö, дзарнитi пытшкас, а сэтöн...

— Не пасьтöмöсь я?! — чирöстiс Куть-Кутиха. — Ох!

— Мый тэ, сваття, кытшöм пасьтöмöсь? Не, не пасьтöмöсь, а шыр уялö! Сэтшöм шырок неыджыт, пияновöй я мый я страм, да ась жö сiя трижды-трою! Чеччöвтöм бöбувьяс колодецам, уялö, бытьтö не сылöн и дело, бытьтö мöдiк места абу адззöма. Поди, долыт, ёрдöмлö, сэтчин, а меным-ту кытшöм. Синваэз обидасянь петöны! Тэ, небыт сьöлöма мортiньöй, отсав меным, беднöй сироталö, сетлы недырик кежö кытшöм-нибудь святöй лик. Верма и этö босьтлыны, енполкаыт вылiсь, крестсö кöда киас видзö. А ме, матуш...

— И тэныт святöй лик ковсис?! Ах тэ, ирод!

— Ме эд тожö пыртöм, голяам тожö перна новья. И вежöрö тожö эм. Ме только недырик ликтö видза, только гывьялышта колодецсим ваокöн чудотворнöйтö и сiйö васö бöр колодецам кисьта. Видзöтан, сiя, колодецö-ту, оз ло сэрпöсь. А то пыр эд...

— Шыть, пон гöн, шыть! Да петан тэ, ёрдöм коска, часöт жö али он? Шыть!

— Ог мун, матушка, кытчöдз чудотворнöйтö он сет. Старуха жагöник чеччис лабичись, киэзнас боккес кузя хлоп вачкис, öшöма нёджжöвтiс старичокыс вылö.

— А вот и петан жö тэ, кöин рожа. Вот часöт и петан. Параська, Параська, мыся! Кулiн я мый я сэтчинка? Вай чожжык гормöччан! Часöт жö поткöта юрсö. Эт, кытшöм басöк адззисьöма! Святöй лик сылö ковсьöма! Тöда ме сэтшöммесö. Сет сылö чудотворнöй угодникöс, а сiя, поганöй старик, и чапкас угодниксö колодецас. Ужо! Он мун добром?

— Пондыв только тышкасьны! Только пондыв! Сэк жö тюрьмаö нильдан, судитасö двадцать год кежö, — дрöжитан голосöн шуис Гырдзза-Аршин.

— Суд менам öтiк: кин сувтö паныт, сылiсь поткöтны юр! — бöбмис досповна Куть-Кутиха. Сiя вежöртiс, тыдалö, что Параська гормöччансö ваяс только час-мöд бöртi, некыдз не одзжык. И дзарнитiс омöн керкуыс пасьта, старайтчис казявны мыйкö сэтшöмö, мыйöн позис бы сöтны старикыс юр кузя. Сэтöн сiя и казялiс Гырдзза-Аршинлiсь кыдзовöй бедьсö, пон гажöтсö, кöда мирнöя сулалiс ыбöс косяк бердас. Гырдзза-Аршин вемöт чардби чывкнитiс, синнэс чуть эз пемдö: «Вияс эд лешачиха, мый сылiсь босьтан?..» Опаснöй вöлi минутаыс, критическöй. Старичок öдва ештiс босьтны лабичись картузсö, уськöтчис ыбöсö. Старуха тожö эз сунась, кватитiс бедьсö. Мыйкö öддьöн пымö да зубытö старик кылiс сэк, кöр вöлi ыбöс коласас. Ёрдöм старуха ештiс сёдаки заваритны сы горб кузя бедьнас, да сэтшöм вынöн, что пöрись мортлöн синнэс бöра пемдiсö, юрас öдззис базанитны эстраднöй музыка. Гырдзза-Аршин оз и тöд, кыдз быгыльтчис посöдз вывсянь, мымда вын котöртiс улица шöрöт. Котöртiс сiя перыта, нельки öтпыр эз дзарнит бöрас. И только аслас керку öшын увтын сувтiс, шоччöтiс ловсö, вуджис шаг вылö. Куть-Кутиха торжествуйтiс победа. Гырдзза-Аршин бергöтчис сылань, грöзитiс кöсыник кулакнас:

— У-у, ядовитöй лешачиха! И мыйсянь сiдз бöбсялiн, нечистöй дук? Вот ужо. Эшö видзöтам кин кинöс...

А мый эта бöбмöмлiсь корис варнак Петруха? Да тöдан разь этö? Кысь сымдасö тöдан!

А умöлик сёдаки Эринья Потаповналöн керкуыс, беда кытшöм умöлик. Видзöтыштан сы вылö öтöрсянь, и сьöлöмыт повзьöмсянят пот мунас, спина вылö бытьтö кöдзыт ва койыштасö. Этö öтöрсянь сэтшöм. А пытшксяняс, думайтат, буржык? Эшö умöльжык! Джодж плахаэс гиля-голя ветлöны: öтiккес шыгыртчöмась да лэбтiсьöмась, мöддэс сiсьмöмась да увлань лэдзчисьöмась. Öшын подушкаэз увтiсь керрес шучкöп тожö сiсьмöмась, сэтшöм осьтаэз аркмöмась, кöть арканöн ошöс кыскы. Нёштöм дук кöвьясьö керкуас. Кытшöмкö юркольмöтан, сьöкыт пöдöм ульсöт петö гор увтiсь, нырвудж пиньöвтö. А быд пазын да щельын тараканнэз кышöтöны, уссэзнаныс сiдз и öвтöны öтмöдöрö, зника нысянь абу.

— Ох, олан тэ, олан менам! — ыш лолалö Эринья Потаповна.

Пукалö сiя аслас любимöй местаын, öшын дынын, вочö киссьöм шабур, гыжьясьö кадiсь кадö. А юрас сьöкыт думаэз ветлöны. Керкужугыс спокой оз сет, Параська тожö сьöлöм косьтö. Нездоровöй сiя, веськалас я? Беда, оз кö веськав. Кытшöм сысянь отсöт? И шогмö кытшöмкö невежöртана лешаччöй круг: петны колхознöй квартираö, шоныт да гажа керкуö — ен-батюшко оз тшöкты, а аслас керкуокыс ляп-ляп сiсьмис. Да эшö сэтчö жö любимöй зон сайö шогалiсь Параськаöс босьтны ковсьö. Мыля нö сiдз аркмö? «О, господь великöй, сет меным, грешнöйлö, ум, велöт, кыдз му вылас овнытö...»

Нёджжöвтiс Эринья Потаповна енполка вылö, кытöн сьöд видзис öтiк святöй лик, кокнитжык бытьтö бы лоис. Сэтöн и случай öтiк тöдвылö усис.

Олiс кöркö Учöт Дзимбырын нывка, Христофор Чивералöн пияныс. Тожö Параськаöн шуисö. Уж сэтшöм ни сiя нездоровича вöлi. Пуксяс, вöвлi, беднöйка, лабичокö, пукалö сэтöнка, а юрыс, кыдз заводитöм, сiдз и ветлö то вывлань, то увлань, то вывлань, то увлань. Беда — и сэсся нем. А вот петiс жöник сайö — и кыдз киöн быдöс босьтiс, некытшöм шог эз ло. Олö öнi Ыджыт Дзимбырын да песняэз тонньöтö-сьылö, челядьсö быдса груда ни чукöртöма. Ен сетас, и Опоньколöн невестаыс веськалас.

Шабурокыс Эринья Потаповна киэзын, кажитчö, стогодся ни, куш домас, трекнитан буржыка, дак киссяс тороккез вылö. Вочны сэтшöмсö — öтiк мука. Буржык ни вöлi бы чапкыны сiйö горшковик туйö, не вочны бы совсем, да кернытö сэсся нем. А гожся луныс нач конецтöм, кузься-кузь, кыдз и юрын думаэс.

Дата добавления: 2015-11-16