КЫДЗ ШЫННЯЛÖ АПОСТОЛ 1 страница

ПОВЕСЬ

(ордч.: висьт Макарихалöн счастье)

Таво тулыснас, гажа масленицалöн медбöрья лунö, Гундыр нима неыджыт деревняын, кöда сулалö Кайскöй волоканым нач ни вöр пыдöсын, аркмывлiс сьöлöм гажöтан событие, буржык бы вöлi шуны — адззывлытöм сабантуй. Пондöтчис быдöс сысянь, что Дзимбыровскöй сельсоветiсь председатель Григорий Ильич Черепан эта праздничнöй рытö, медбы отирыс етшажык тыткис вина, решитiс лыддьöтны гундыровскöй клубын лекция, мöдiс невна висьтасьны сы йылiсь, кыдз пондас одзлань развивайтчыны миян вöра ладорным. Гундыровчи — народ мывкыда, вежöра. Висьталöм час кежö почти быдöнныс локтiсö клубö. Григорий Ильич öшöтiс сцена вылö ыджыт карта, босьтiс киас базарскöй указка и, кыдз дошлöй лектор, эз понды кыскыны кадсö — видзöтыштiс залас, кöтöтiс горшсö да тырппесö кöдзыт ваöн и сэк жö шлёпнитiс-горöтчис:

— Медбöрья кадö ме, дона дружоккез, кынымкö сутки ончир эг кер, сё думайтi асланым Кайскöй волок йылiсь. Старайтчи ме, ёрттэз, вежöртны, кытöн волокным поздiсьö, кытöн ми оламö. Дыр думайтi, уна книгаэз лыддьöтi и локтi то кытшöм логическöй выводöдз: кайскöй му, миян зелёнöй парманым, — этö не кытшöмкö ошпозъяин, кыдз любитöны баитны мукöддэс, а веськыта шуамö — настоящöй центр!

Саймисö залын пукалiссез, зэгнитiсö праздничнöй сьöкыт юррезöн, быдöнныс öммез осьтiсö:

— Центр?! Кытшöм эшö центр!

— Мый тай и монлалö кывсö. Öмас дзик иззэз тапкöмась!

А пöрись старичок Кушман Егор, кöда эта вотöдз ныргорöн узис ыбöс дынiсь пельöсын, узис и вöтасис, бытьтö кыскö сельпоö быдса додь бадь нин — дубкорьё, — чеччис местасис, ылöстöма кваркышалыштiс люммöм синнэзöн, юалiс:

— Кыным центнер, шуан? Он я бöбöт?

Григорий Ильич Черепан эз понды пиньгисьны пöрись Егоркöт, баитiс одзлань ровнöй, спокойнöй голосöн, кыдз быльнöй профессор:

— Миян Кайскöй волок, мыся, не вöр пыдöс, а лоö центрöн сiя паськыт географическöй пространстволö, кöдö аркмöтöны куим ыджыт му. Да, да! Кыдз баитлiсö, важын, куим великöй му: Пермь Великöй, Вятка Великöй жö, да эшö нысся великöйжык паськыт Зырянскöй край!

Мый сэтöн пондöтчис! Быдыс, кин пукалiс залын, сразу жö чеччöвтiс кок йылö. Быдöнныс утугаöн уськöтчисö трибуна дынö, тэрмöтiсö лекторсö:

— Григорий Ильич, да баит тэ морт моз, эн чеглав кывтö!

— Кытшöм центр?

— Мыля центр?

Важнöй лектор видзчисьыштiс, кöр лöньсис отирыс, гыж-гыж керис указка йылöн юрбöрсö, а сэсся чуткис ыджыт картаö:

— А вот видзöтö, од веритö дак. Кытöн миян волокыс ольсассьö? Ольсассьö сiя, дона друггез, как раз эна великöй муэз коласын, шöраныс. А раз сiдз, то лоö центрöн.

Локтiсö гундыровчи картаыс дынö топ, адззисö вöра ладорнысö и синнэз барöтiсö. Быль баитö Черепан! Куим му коласын поздiсьö волокыс!

— Григорий Ильич, вот эд кытшöм делоыс, а?

— Не пемыт волок вöлöма, а паськыт муыслöн настоящöй гöг! Сiдзкö, олам ми не ошпозъяинын, а муыслöн гöг вылын! Ура!

Чикнявны пондiсö гундыровчи, радмисö, что олöны сэтшöм интереснöй местаын, сэтöн жö шуисö Григорий Черепанöс великöй географöн, дзирыта поздравляйтiсö öтамöдöс, ванзiсö быд вын. Сэсся асьныс эз казялö, кыдз лэбтiсö лекторсö воздухö и давай жö чапкавны потолокöдз. Сьöкыт вöлi Григорий Ильич, кыз да топыт тушаа морт, а мелькайтiс воздухас, дзик кокнитик футбольнöй мяч.

Потолокас и отир юррез коласын лэбалiкö, Григорий Ильич, конечно, вежöртiс, что öддьöнöв бокö кежис, но öвсьыны эз ни вермы. Кытшöмкö бöб и лукавöй бес гильöтiс сiйö сё ёнжыка и ёнжыка. И сiя — не бесыс, вежöртана, а Григорий Ильичыс, — кöр кайис бöра трибуна сайö, кольмöтiс гундыровчиöс эшö öтiк юöрöн:

— Тырмöмви дзарнитны эта карта вылö пöвсинöн, кыдз любöйлö и каждöйлö лоас вежöртана: тiян деревняныт, Гундырныт, поздiсьö Кайскöй волокын самöй шöрас. Сiдзкö, центрыс, куим великöй мулöн гöгыс, татöн и эм, тiян деревняын!

— Ура-а!

— Вот эта дело!

Оратор бöра видзчисьыштiс, кöр лöньсяс йöзыс, важнöя чышкис кымöссö чышьянокöн и вöлись кончитiс лекциясö сэтшöм кыввезöн:

— Ме думайта, тiян Гундырлöн перспективаыс, веськыта шуны, замечательнöй и, бöра жö веськыта шуны, стрась завиднöй. Ме верма чорыта висьтавны: абу ни ылын сiя кадыс, кöр важ деревня Гундыр лоас ыджыт городöн. Эд мый бы эн шу, а куим великöй му коласын сэтшöм городыс беда кыдз колö. Сiя сетiс бы йöзыслö вöвлытöм возможность эшö ёнжыка дружитны öтамöдкöт, частожык пантасьлыны и керны уна бур делоэз. Да, да! Город сетас вöвлытöм возможность частожык пантасьлыны öтамöдкöт каждöйлö, быдöнлö, кыдз баитлiсö важын, — и пермиччезлö, и вятиччезлö, и зыряналö!

Старик Кушман Егор бöра чеччис местасис, шуис чорыта:

— Оз ков городыс, Григорий Ильич! Оз ков!

— Мыля оз ков, дед?

— Мыйлö сiя? Локтасö татчö чужöй отир, талясö быдöс видззез и нюррез, кераласö баддез. А сэсся мый? Кытiсь пондам ытшкыны турун, кульны дубкорьё?

Пöрись морт эшö мöдiс мыйкö висьтавны, но гора голоссэз тупкисö сылiсь öмсö:

— Мун тэ вакрамешö аслат дубкорьёöн!

— Лоас миян Гундыр ыджыт городöн!

— И метро асланым лоас!

И пондöтчис сабантуй! Ойшöрöдз чатрасисö гундыровчи асланыс виль клубын, радуйтчисö, что пондасö овны городын, сьылiсö да сералiсö. Визыв вира мужиккез, кöдна масленицаыс увья эшö асывнас чöскöтiсö öммезнысö бур винаöн да виа блиннэзöн, сiдз топöтiсö-йöктiсö, что джоджыс чуть эз чег; дзирыт сьöлöма ичмоннез чупöтiсö-окалiсö Черепанöс тырппезас; томыник да басöк нывкаэз тöдiсö, что Григорий Ильич куритö трубка, и козьналiсö сылö öддьöн бытшöм стариннöй кисет, кöдö гусьöн кыскисö клубнöй бутафорияись.

Стрась кытшöм гажа да интереснöй вöлi сабантуйыс — век он вунöт.

Да и мый баитны! Эта Кайскöй волокись деревняэзын да хуторрезын овлöны и не сэтшöм делоэз. Мукöдпырся юасьтöг-висьтасьтöг сэтшöм юркольмöтан, сэтшöм чемер лякасяс — кöть кымöстö асыкав.

Семьдесят годся дыржык ни олiс чочком светас гундыровскöй старичок Кушман Егор, а здоровьеыс вылö эз норасьлы: сьöлöмыс ёткöпалiс ровнöя, кыдз виль часы. Некыт эз вись и эз дзурт, тошас öтiк дзор тылöп эз вöв, пиннес быдöс дзоньöсь да крепытöсь — сет сылö воля, дак телеграфнöй проволока только гыч керас. Аслас кузь векö больницаын Кушман Егор эшö öтпыр эз вöв, нельки оз и тöд, мый сэтшöм больницаыс, быдöс враччесö да фельдшерресö лыддис арттöм неколана отирöн. Конечно, мукöдпырся и сiйö зэлöтлiс шог, тожö пондывлiс курзыктыны, но веськöтчывлiс пыр öддьöн удачнöя и кокнита: юрбитыштас невночка енлö, четушка джагöтас, жар баняын коросьöн кулавлытöдз вурас асьсö — и шогыс бытьтö эз и вöвлы.

Крепыт вöлi старик, настоящöй вöр пороз, а видзöт жö мый сыкöт шогмис! Мунiс тöн Кöкпозъяинö, не öддьöн зыбуна нюрö, дубкорьё заптыны, бадь нин кульны. И перво нем сэтшöм умöльыс эз аркмы, уджалiс, натьтö, джын час сьöрна, нёль вязанка кулис, радуйтчис — вит пуд лоас, поди! Часöт кут да лыддьы: вит пуд — этö восемьдесят килограмм. А быд килоыс понда сельпоын сетöны кык гривенник.

— Лöсялö! — кымöс вылiсь сир ньылöм чышкикö горöтчис Егор и нёльнан вязанкасö кокнита чапкис пельпон вылас.

Мöйму гожумбытöн квать тонна бадь нинсö сiя кыскис сельпоö. Таво нёль тонна мымда бöра нöбöтiс ни.

— Гожумыс только пондöтчö, — баитiс аскöттяс Кушман Егор. — Ен отсöтöн арöдззас дас тонна запта, натьтö. Хо-хо, медбогатöй мортöн лоа деревняаным! А мый, если не öтнамлö нюрас ниртны, а доддявны, шуам, и инькажугöс? Старуха сiя вына, кык-куим пуд нöбöтас горб вылас. Не весь жö томсянь Лешачихаöн сiйö шуöны. Хо-хо! Бöбöта ашын сiйö, кыкöн нюрас пырамö. Вот бадясниксö павтыртамö кыкöн-ту! Хо!

Оськалiс Егорыс нюрöт гортö, кыскис сьöкыт ношасö, дзик кöдзыв, ньылöм визывтiс сы вывсянь шороккезöн, люзь пымалiс, ружтiс. Верста да джын шагнялiс сувтчывтöг, чожа и нюрыслö конец локтас. Но сэтöн вдруг падмис кöчкаок бердö, коккес летки-петки мунiсö, Егор ойнитiс сьöкыта и сэк жö нюжалiс му вылас — пакö бытьтö лэчыт зор мöртiсö, сэтшöм зубыт — не ловзисьны, не горöтны оз вермы, косас дзик чер öбукöн сöтiсö, тожö зубыт — зника абу. «Жила кытшöмкö орис, тыдалö...»

Валяйтчис кöчкаэз коласын Кушман Егор джын час мымда, кыдз биа öгыр вылын, пиннезнас гырчиктiс, быдкодь кыввезöн нёштöма видiс асьсö садьсö öштöм понда, а зубытыс эз чулав, эшö ёнжыка пакас писькöтны пондiс, юрвоманас нельки бытшкис мыйкö лöчыт да чорыт, бытьтö пыжьян. Но старайтчис сёдаки не вачкыны нюрас оча кок, бодритiс асьсö: «Нидзыв моз кыссьыны понда... И нинсö ог чапкы, гортöдз вая...» Крепыт вöлi старикыс, эз кув кöчкаэз коласын, кыссис жагвыв гортöдз.

Гортас Кушман Егор сразу жö кутчис веськöтчыны: тшöктiс старухаыслö бытшöмика лонтны баня, магазинö четушкала котрасьны. Жаль вöлi вина вылö деньгасö видзны, эз радейт сэтшöм делосö, да кытчö воштiсян. Сёрöн ни рытнас кыдзовöй песöн лонтöм баняын старуха жалейттöг вурис сiйö калитöм коросьöн, не öтiк молитва лыддьöтiс. Кокнитжык бытьтö бы лоис старикыслö. А сыбöрын, кыдз четушкасö ректiс да тёритöм хренöн ниртчис-мавтчис, совсем лöсялiс делоыс. Да пондыв ошшасьны! Асывнас бöра нырыштiс зубытыс, нельки синнэзын пемдiс, кöть ош моз рявзы. «Кила!» — вежöртiс сiя. И медбöрья садьыс чуть эз быр: «Не кульны сэсся бадь нинсö! Тыдалö, и меным не орддьыны больницасö. Ковсяс, тыдалö, и меным пельшöрыслö копыртчыны...» Думайтыштiс этадз Егорыс, и синваэз чужöм кузя визывтны öдззисö. Колiс жö сiдз лоны...

А старухаыс сылöн герьявны эз и думайт. Нельки синöн кваркыш эз кер. Сiя лöсялана совет сетiс:

— Куть-Кутиха тöн пантасьлiс, бур юöр вайис:

Учöт Дзимбырас, чуньтöм Эринья керкуокын, öбедня пö артассьö. И ачыс поп пö локтö. Кывзы-ко, богородичаыс, часовняас кöда медглавнöй енполка вылын сулалiс, адззисьöма эд. Кыдз инö, кыдз инö... Ветлы Кутихаыс дынö, кеймись. Медбы святöй ваокöн брызгайтiс тэнö. Эта делоын сiя тöдö толксö. Чудотворнöйыслö копрасьышт тожö, отсалас, поди. Да племянникыт ордö, Юркаыс ордö, пыравлы, дозирайтышт: Нинкажугыс, висьтасьöны, важын ни больницаын, поди-ко челядясис ни. Да святöй ликыс йылiсь некинлö нем эн лёб. Куть-Кутиха строгöя закажитiс: одзöв пö троньгынытö сы йылiсь, одзöв.

Эз понды конецöдз кывзыны ассис старухасö Кушман Егор, чожжык босьтiс киö кыдзовöй крепыт бедь и, коккесö му кузя кыскöмöн, иньдöтчис Учöт Дзимбырö.

Туй вöлi кузь, буса. Луныс сулалiс жар, асывсянь пöжис. Егор, кыдз и тöн нюрас, пымалiс люзь, йöрнöсыс лякасис спина бердö, кымöсыс рушмис, дзик пöжассис. Бöра баитiс аскöттяс, старайтчис вежöртны, мыля сiйö вöтiс сэтшöм бедаыс, кин эстöн вöлi виноват:

— Годдэзö я мый я горшам тарсасисö, нiя нырыштöны? Да одзöв бытьтö бы. Важын ме коддес эшö — гы-гы! — соседкаэз дынö маласьны ветлывлiсö! Не, не годдэс эстöн виноватöсь, а мöдiк мыйкö пелитчö. А мый?

Вöрöтыштiс невна юрвемöн, быдöс ассис думаэсö да делоэсö казьтiс да бергöтiс, быдöс сiйö, мый нюрас керис, тöдвылö уськöтiс. Кажитчö, нем сэтшöм умöльыс эз вöв, быдöс бур да ладно, кыдз и колö. Дак мый нö сэк мыжйис? И сэтöн вдруг öбыртiс бедьнас му кузя, сувтiс тран, бытьтö биа гым жвангис юрвоманас. А старухаыс! Аслас Лешачикаыс! Мый сы йылiсь думайтiс? Сьöрас эд мöдiс нуöтны нюрас, мечтайтiс бадь нин кышавны пельпоннэс сайö! И быль! Эз на вунöт: только ештiс нюрас думыш керны иньыс йылiсь, кыдз сэк жö падмис и брякнитчис кöчкаэс коласö, сэк жö и нырыштiс сiйö бадь ниныс, нельки пикнитны эз ешты!

— Ах тэ, ёрдöм коска! — синваэс петтöдз лöгасис часöт Кушман Егор. — Колö жö, а? Эт, горба колдунья, мый арталiс! Да вот ме тэнö! Неохота Лешачихалö бадь нин кульны, вот и лэдзис ме вылö порча да шог, ассис мужиксö эз жалейт! Ах, ах, мöдöра кучик, но жö Лешачиха!

Дыр бедуйтiс да видчис Кушман Егор. Туйыс вöлi прос, некин эз мешайт видчынытö. Вот и ёрдiс иньсö, кыдз кужис, каждöй коскаоксö и жиласö сылiсь казьтiс да матькис. Мöдiс часöт жö бертны гортас, гындыны ведьмасö кыдз колö, чувйыштны боккесö бедьöн, но аскадö вежöртiс: джын туйыс кольöма ни бöрö, бергöтны оглобляэсö кыдзкö оз ни лöсяв.

— Чöв! Ме эшö мыччала тэныт жарсö. Ме эшö волькöта горбтö, шёлковöй лоан. Неохота вöлi куим пудöн нюрись бадь нин петкöтлыны, дак ашынсянь жö вит пудöн петкöтлыны пондан! — рявзiс Егор.

Кöр эта чорыт кыв вöлi висьталöма, стариклö тöдчöмöн лоис долытжык, нельки пахас зубытыс чинiс и косас дугдiс писькöтны. Повзис, тыдалö, старухаыс, öвсис, эз ни понды издевайтчыны жöникыс вылын, быздöм кикимора.

— Ох, ведьма, ведьма...

Егор локтiс кöдзыт ваа шорок дынöдз, шоччисьыштiс сэтöн джын час мымда, кöтöтiс горшсö ключ ванас и вöрзис бöра туйö, Учöт Дзимбырö.

Учöт Дзимбыр, кытчö сыбурна тэрмасис Кушман Егорыс, деревня вöлi ыджыт, уна отира да гажа. Сулалiс сiя лысöй Чöвпан мыс дынын, таёжнöй Вильва ю дорын. Уна быдкодь керкуыс вöлi эта деревняын: и вильыс и важыс, и ыджытыс и учöтыс. Но медприметнöй вöлi, конечно, Эринья Потаповналöн, лöнь да кöсыник старушкалöн, гортыс. Сулалiс сылöн избушкаыс мöд керкуэс дынсянь торйöн, пыдын да гигинь-гогиня лог сайын, öшыннэзви ни пырöма муö, кыдзкö хитрöя пöлiньтчöма сразу нёльнан пельöс вылö, вот-вот пöрас и киссяс, кыдз важ остожья.

Разьсьöм гид, а не керку. Быдсöн деревняыслö сiя — кыдз синын бельмо.

Ачыс Эринья Потаповна эшö котрасис невночкаöн, кöть медбöрья годдэзö и ёна ни рапмис: сякöй бедаыс уськöтчис старушка вылö, сiдз и нырыштö му бердö, спокой абу.

— Ох, греххез, греххез миян, — почти быд лун норасьлiс сiя аслас соседкалö, Марфа Спиридоновналö. — Лöгöтiмö ен-батюшкосö, лöгöтiмö-ö!

Соседкаыс сэтшöм минутаэзö старайтчис бурöтны подружкасö, пыр баитлiс сьöлöмöдз йиджан кыввез:

— Кыдз и овнытö пондамö. Арталö миянлö господьыс страшнöй суд. И-и... Вот шедам быдöнным адö.

Марфа Спиридоновна Кутихина, а шуны кö народыс моз, Куть-Кутиха, — морт абу ни том, öкмысöт десяток джыннялiс. Старухаыс сiя кыз и важын ни рушмöм, дзик мöймуся кушман. Мунö деревня шöрöт — истово турун додь вöрö. Пырас Эринья Потаповна ордö, шлёпкисяс квашня моз лабичö — быдöс пельöссö и тыртас аснас. Кыз вöлi старухаыс, ой кытшöм кыз. И сэтшöм уна басниа! Пырис талун соседкаыс ордö эшö луншöр кадö, кöр шондiыс самöй Чöвпан весьтын öшалiс. И не пустöй киэзöн пырис, быдса коробья сякöй берся юöрсö вайис. Пукалiс лабичын, енполка увтын, нетэрмасьöмöн висьтасис Эринья Потаповналö:

— Ветлi неважын городö и панталi сэтчин öтiк странницаöс. Öтлаын сыкöт, кодя морткöт, вичкуас сулалiмö. Амвон дынас ордчöн и сулалiмö. Висьтасьö странница, бытьтö бы виденнё сылö усьöма. Лэдзчи, шуö, колодец дынö, а делоыс сёрöн рытнас ни вöлöма, да и дзарнитöма сэтчин, колодецас-ту. Ах, ах! Югыт, шуö, срубас-ту, дзик Христос керкуын, хрустальнöй люстраэз, шуö, сiдз и югьялöны, сiдз и югьялöны, бытьтö царскöй палатаын. А пыдöсас-ту, матуш тэ менам, и не ва совсем, а чёрт тöдö мый: бытьтö пö луд ольсассьö, а туруныс кузь да небыт, кыдз бы шёлковöй. И пукалö пö луд вылас, небыт турунас, русалка басöкся-басöк да сэтшöм гажа. А русалкаыс гöгöр, висьтасьö странницаыс, мужиккез-вакуллез кытш керöмась! И быдöнныс нiя, вакуллес, пасьтöмöсь. Нач и нач пö пасьтöмöсь, некöда вылын нельки трепич тор абу!

— Ох, ох! — гöстясö кывзiкö быдöс вывтырнас дрöжитö Эринья Потаповна. — Вот кытöн нятьыс да срамыс! Вот стыдтöммес!

— Нач стыдтöмöсь! — горöтчис Куть-Кутиха, дзик кöрттув молотокöн вартiс. — Не бур одзын эта. Вот касьтылан менчим кылöс — не бур одзын. И-и-и... Да мый ни и баитнытö. Странницаыс, беднöйка, кулавлытöдз повзьöма, сiдз и дрöжитö, кыдз ва вылын шать, гладь шойöтöма.

— Господи, господи, мыйлö бы сэтшöм виденнёыс? Куть-Кутиха и этö бура тöдö. Дзарнитiс святöй лик вылö, висьталiс:

— А сэтöн, матуш, и думайтны нем. Этö еныс, ен-батюшкоыс, странницаыс пыр юöррез миянлö, грешнöйезлö, иньдö: видзöт керö, вельмöм йöз, кытшöм срам да нять тiянöс видзчисьö, вунöтасö кö менчим нимöс. Вот эд мый, матуш! И-и-и...

Эттшöм интереснöй басни сайын кадыс визывтö, дзик тулысся шор. Соседкаэс эз и казялö, кыдз гусясьöмöн рыт сибалiс. Куть-Кутиха только киэзнас боккес кузя клоп да клоп вачкис:

— Матуш тэ менам, матушиньöй! Видзöт, и мöссэз поскотина вывсянь локтöны ни! Вот эд мый дырна тэ ордын шöмалi!

— Баитыштiн бы эшö, кытчö тэрмасьны-ту? — нюжвыла шыасис хозяйка. — Гажтöм меным öтнамлö. Опонькоö кöр эшö и локтас.

— Тырмас, пукалыштi! Гортын тожö эд делооккес эмöсь!

Сувтiс старуха кок вылö, зыртöв-керис коссö и сэк жö бöр шлёпнитчис аслас шоныт местаö: öшынö кинкö тарснитiс бедьöн и кашельтiс кынымиськö. Кыкнанныс перыта нёджжöвтiсö öтöрö, дивуйтчисö: öшын увтас гынмöм тоша старик сулалö, бедь вылö нырыштсьöма. Кин сэтшöмыс? Мый сылö колö?

— Кушман Егор, некö, — шушкыштiс Куть-Кутиха. — Кытшöм могöн сiйö кульыс чапкис татчö?

Кöть вöлi мыдз и ёна писькöтiс пахас да косас, Кушман Егор пырис керкуö бодрöя, чатыра юра, мымда прок гымöтiс сапоггезöн, тарскöтiс бедьöн. Порог дынын сiя пернапасалiс кымöссö, кыкнан старухалö — перво öтыслö, а сэсся и мöдыслö — копыртчис муöдз, шыасис не öддьöн горöн:

— Ох, греххез, греххез! Кöть часöт жö петляö пыр... И сэк жö висьталiс быдöс, мый маитiс сiйö, кытшöм беда вайöтiс видзчисьтöг-юасьтöг учöт Дзимбырö.

— Вот тай эшö мый! — чирöстiс Куть-Кутиха.

— Ох, ох! — отсалiс сылö Эринья Потаповна.

— Беда, адззывлытöм беда, — чуть я не синва сорöн ни одзлань баитiс гöсь. — Тi ужо отсалыштö меным, эд кольö сiдз, эд чапкö вынтöмсö-садьтöмсö. А ме тiянкöт вот... Нем ог жалейт... Куим полтинник вайи сьöрам. Ачыс Христос адззö. Вот... Да!

Дело вöлi сэтшöм видзчисьтöм и адззывлытöм, что старухаэз недырик кежö паймисö, но Куть-Кутиха чожа садясис, чеччöвтiс лабичись, горöтчис строгöя:

— Пукалышт эстöнка! Не аскадö тэ локтiн, да ужо мый-нибудь арталамö. Висьталi эд иньытлö, мыся, петырлун панытö чукöртамö, петырлун панытö.

— Беда, сваття.

— Эка тэ! Петавлам, Потаповна, чуланат, думайтыштам. Тэ, Ёгорушко, полтинникетö пукты божничаыс вылö...

Петiсö кык старуха чуланö думайтыштны. Сэтчин чожа баитчисö лöсьöтны святöй ва, отсавны мымда позяс беднöй стариклö, кöда вайöма сьöрас куим полтинник, деньга öння кад сьöртi не сiдз етша. Куть-Кутиха зубыта кодь чуньнас чувйыштiс соседкаыслö бокас, шушкыштiс:

— Адззан, мый керсьö? Пондöтчö делоным...

Сiя перыта гывьялыштiс чуланас кытшöмкö святöй апостоллiсь чужöмсö, васö сэк жö кисьтiс туисокö. Эринья Потаповна отсалiс Куть-Кутихалö ликсö бöр сувтöтны джаджок вылö, кузь чышкöтöн вевдöрсяняс вевттис. И, молитваэз шушкикö, петiсö чулансис.

Керкуын, порог дынас, хозяйка сувтчис, дзик öшис, а Куть-Кутиха сразу жö иньдöтчис Егорлань, мöдiс сетны сылö святöй ванас туисоксö. И сэтöн вдруг унньöвтiс-кивнитiс лёкгоршöн, дзик моросас затшкисö кузь пуртöн нето лэчыт öжынöн. И вöлi мыйсянь унньöвтнытö: Кушман Егор, öтмöдöрö перыта дзарьялiкö, стыдитчöмöн пöрччалiс вешьян кизь, лöсьöтчис лэдзны вешьянжугсö.

— Ох! — чирöстiс Эринья Потаповна. — Срамыс!

— Матушшез! — кеймисис Кушман Егор. — Отсалö, мездö менö лёк бедаись. Брызнитыштö вот этчö, пакам...

— Брысь, брысь, ёрдöм лешачика тэ! Ох, да мый нö ни эта сэтшöмыс! — öшис Куть-Кутиха. — Честнöй инькаэз одзын вешьянсö лэдзö. Вот стыдтöмыт. Согрешеннё!

Старухаэз асьныс эз и казялö, кыдз бордпавйöн лэбзьыштiсö öтöрö, лог дорö. Сэтчин нiя юрбитыштiсö лысöй йыла Чöвпан вылö, полöмöн дзарнитiсö öтамöдлань.

— Вот варнакыс, а? — шушкыштiс Эринья Потаповна.

— Лёквир сiя! — согласитчис Куть-Кутиха. — И ладно я ми керамö, соседка? Колiс бы перво-наперво...

Строгöй старуха эз вермы досповна садясьны, но решительнöя пырис бöр керкуö, шысеттöг кутiс гöсьсö сикöджöт, тойлалiс сiйö порог сайö да эшö желайтiс Егорушкалö часöт жö берездасьны вакрамешö. И вöлись лöсьöтчис гортас.

— Городö ашын гöняйта, — висьталiс сiя. — Баитыштны колö батюшкоыскöт, юасьны-висьтасьны, кыдз одзлань овны, мый керны. О, господь праведнöй эн сет смерться одзжык кувны. Аминь!

Юрий Андреевич Кушманов, Егорыслöн роднöй племянник, морт эшö том, лöсьыт высина, рожабаннэс биöн öгралöны. Уджалö сiя колхозас агрономöн. Кöть неважын уджалö, первöй год вöлись, но деревняын фигура заметнöй ни. Отир уважайтö сiйö кыдз ыджыт грамотейöс, величайтö нимöн и айнимöн.

Первöй луннэзö, кöр только локтiс колхозас, Юрий Андреевич неетша дивитiс отирсö: щеголяйтiс чим гöрд свитерöн, кöда морос вылын тышкасисö ыджыт лöг петуххез; кепка козырёксö пуктывлiс не кымöс вылас, а юрбöрлань. А кöр председатель Пётр Парамонович предложеннё сьöртi колхозниккез бöрйисö сiйö правленнёö членöн, детина пондiс новйыны чочком йöрнöс галстукöн, басöк моднöй куртка. Ассис не öддьöн серьёзнöй свитерсö агроном свистнитiс чуланö и кепкасö эта кадсянь новйö правильнöя: козырёксö пуктывлö пыр кымöс вылö.

Мый эшö сы йылiсь? Только сiйö разь, что Юрий Андреевичлöн аймамыс, кöдна олiсö öтлаын Кушман Егоркöт Гундырын, мыйкö эз пондö лöсявны колхознöй начальствокöт и дас год ни кыдз мунiсö районнöй посадö, кутчисьöмась сэтчин коммунальнöй хозяйствоö. Кывсьö, бертны бöр роднöй Гундырö нiя пö оз и думайтö, видно, эд бура сэтчин олöны. А зонныс кончитiс сельскохозяйственнöй институт и, кыдз адззам, бертiс роднöй крайö. Учöт Дзимбырын сылö сетiсö колхознöй квартира. Зонка эз понды думайтны дыр: босьтiс ас саяс местнöй горадзуль-аканьöс и вот, пожалуйста, — чожа айöн лоас, удерлун кыскис иньсö районнöй центрö, матöжык родильнöй дом дынö.

Талун Юрий Андреевич локтiс ыббез вывсянь гортö сёрöн ни, посöдзын гыжтöтiс коккезiсь сапоггез, чапкис стул вылö моднöй курткасö, думыш керис: мыйöн кадсö вийны? Инь гортын абу, сёрнитыштны нач некинкöт. Клубö ветлыны? А мый сэтчин кернытö, кöр важ кино мыччалöны — Фантомас пö, адззатö ли, бöбмöма, бушуйтны пондöм...

Ужнайтыштiс Юрий Андреевич няньöн-солöн, чай стакан-мöд юис и босьтiс киас важ журнал, дзарнитiс пытшкас. Нем вильыс, конечно, сэтöн эз вöв, важын ни лыддьöтöма коркасянь коркаöдз. А вот медбöрья страница вылын кроссворд абу на вöрзьöтöм, видзчисьö, кöр решитасö. А ноко, мый сэтчин сэтшöмыс? Хитрöй автор пондiс сетавны быднёж дзугöм вопроссэз, Юрий Андреевич отвечайтiс ны вылö, бобгис ныр увтас. Прибрежнöй плаваннё? Хе-хе, кöть море вылын эгö на вöлö, а тöдамö, мый эта сэтшöмыс. Этö — каботаж. Древнеримскöй государственнöй деятель? Тöдамö и сiйö — этö, натьтö, ачыс ёрт Цезарь. Правильно, лöсялö. Цезарь и эм. Дзарнитамö, сiдзкö, одзлань. Австралийскöй сумчатöй животнöй? Этö, колö думайтны, нельки Сенька Никонов, колхознöй шофёр, тöдö...

Ылалiс жагöник Юрий Андреевич эта интереснöй делоöн, да сэтшöм крепыта ылалiс, что нельки дрöгнитiс, кöр дзуркнитiс ыбöс и порог дынын мыччисис дядьыс, Кушман Егор.

— Здорово, племяш! Позьö пырнытö?

Юрий Андреевич вештiс одзсис журналсö, сувтiс кок йылö:

— Пыр смелöйжыка, Егор дядь. Лок пуксьы татчö, пызан дорас.

Шынньöвтiс том хозяин, чепöссис котрасьны то öтöрö, то мöдöрö. Не аскадö локтiс гöсь и не öддьöн сiя важнöй-желаннöй, но сёдаки...

— Кытчö нö сiдз, дядя? Мыля ой кежö?

Кушман Егор маласьöмöн сувтöтiс бедьсö ыбöс косяк бердö, курыта ойзыштiс, пондiс причитайтны чуть я не синва сорöн:

Дата добавления: 2015-11-16