КЫДЗ ШЫННЯЛÖ АПОСТОЛ 11 страница

Фаина, кыдз вöрмöс кукань, кокнита лэбзьыштiс йöр весьтöт, дзирыта лолалiкö, локтiс Опонько дынö, пуксис ордчöн, жмитчис топ-топ, дзик сылö вöлi кöдзыт. Пукалыштiс сiдз невночка, а сэсся шысеттöг шамыртiс-сывьялiс Опонькоöс, ёна ыжмитiс пым да небыт морос бердас, тыдалö, пöдтыны лöсьöтчис, калькöтны оз позь.

— Поня, сьöлöмшöриньöй!

— Ме тэнö дыр видзчиси.

Фаина эшö ёнжыка ыжмитiс Опонькоöс, шушкыштiс:

— Чожа свадьба?

— Часöт чожа ни. Вот бöрьям выходнöй лун. Окалiс Фаина жöниксö дзирыта-дзирыта да сэтшöм горöн чупнитiс! Сыбöрын эшö.

И колiс жö недобрöй кайскöй чёртыслö как раз эта минутаö чапкыны Эринья Потаповна карчйöрö Куть-Кутихаöс! Важын ни сылö охота вöлi чöскöтны öмсö лукасолöн, важын охота вöлi сёйыштны свежöй кушманiсь да хренiсь окрошка, а летны да нетшкыны аслас гряддэз вылiсь вöлi жаль. Вот и лыддьöтыштiс талун ойшöрнас молтива и решитiс пыравны соседкаыс карчйöрö. Гусьöник кыссис сiя перво баня дынö, сыбöрын сувтiс чибу-чаньöн и кыссис бороздаöт да льöмпуэс бокöт гряддэслань. Ровняйтчис старуха льöмпуэскöт, öшöтiс пеллесö: кинкö шушкö я мый я? Кин? Эшö ёнжыка кывзiсьыштiс. Сiдз и эм: Опонько да Фаина. Старуха сэсся эз ни понды сайласьны, нач вунöтiс, мыйлö татчö пырис, чожа чеччöвтiс кок йылö, берездасис йöрыс вевдöрöт, чепöссис котöртны.

― Ох, согрешеннё! — лёкгоршöн чирöстiс Куть-Кутиха, кöр пырис Эринья Потаповна керкуö.

— Мый, мый сэтшöмыс, сваття? Ог я ни сотчö, али мый, ох!

Не кулöм не ловья чеччöвтiс старуха лабичись, кытöн узис, öтпöвса паськöмока сувтiс грознöй Куть-Кутиха одзö, барöтiс синнэсö, дрöжитiс.

— Сэтчинка... льöмпуэс увтын, ох-ох, грехö пырöны эд, маласьöны. Муна ме этö йöрыс бокöт, нем ог думайт, а кусттэс коласын, кыла, окасьöны, сiдз и шлёпöтöны. Дзарнитi сэтчинка и чуть весьö эг пöр: тэнат зырымöсь Опонькоыт да эта ёрдöм поварихаыс сэтчö пырöмась. Кыдз инö, кыдз инö. Пырöмась стыдтöммес и маласьöны.

— Мый тэ баитан? Да кытöн нiя, кытöн, прости господи! Да мый нö ни эта сэтшöмыс?

Кыкнан старухаыс, öтамöдöс одзалöмöн, чепöссисö öтöрö, котöртiсö льöмпуэз дынö, а сэтчин некинлöн и дукыс абу ни.

Мыйкö гажтöм и курыт, мыйкö дзик могильнöй, поздiсис старухаэз сьöлöмö. Вöвлытöм жар сотiс морос и быдöс вывтыр, юр кольмöтан тревога летiс-вотiс гырк, вем, мырддис садь. Охота вöлi петны öтöрö, сувтны Чöвпан вылö, лэбтыны тöлiсьлань юр и уннявны лёкгоршöн, уннявны сiдз жö, кыдз уннялöны тöвся морознöй ойö тшыг кайскöй кöиннэз, юасьны: «Господи, да кыдз жö сiдзи? Да сöстöм я эстöн делоыс?»

— Сатанинскöй ныв сiя, а не морт пиян, — таинственнöя шушкыштiс Эринья Потаповна. Сiя полiс пантасьны соседкаыскöт синнэзнас, видзöтiс кытчöкö бокö, вирскис нырнас, поиктiс, сотняся унажыкись ни кресталiс кымöссö.

— Анчихрист сiя, городскöй выдера, — змея моз пышкайтiс Куть-Кутиха. — Да начкывны тай сiйö öнi жö колö, поткöтны юрсö пес плашникöн нето öбукöн.

Неладно быдöс шогмö, не сiдз, кыдз вöлi думайтöма да висьталöма. Быдöс курни-верни мунö. Мыля?

— Кынымись ме баитi тэныт, арттöм пасмалö: эн сет чоморытлö волясö, пыркöт сiйö лун и ой бедьöн, пöвсав да гынды нагайкаöн, — дак эн эд кывзы, нельки чальöн сiйö эн вöрзьöт. Вот и курччав öнi гырдззаэтö, казнит асьтö да каитчы, — кöритiс Эринья Потаповнаöс Куть-Кутиха, буравитiс сiйö лöг синнэзöн, пышналiс шучкöп. — Мый часöт керны? Уна веккез тэныт, ылöстöмлö, пусьыны дзирыт смолаын, жаритчыны да кöрчитчыны бесовскöй сковорода вылын. Ох!

Эттшöм перспективасянь Эринья Потаповна перво корчитчис да жмитчис комокö, бытьтö и былись ни вöлi адын, бесовскöй сковорода вылын, сэсся перыта сувтiс пидзöссэз вылö, клёнгис кымöснас джодж кузя, киэз лэбтiс неболань, пондiс причитайтны:

— Батюшко! Кыдз нö сiдз? Ме я эг почитайт тэнö? Куть-Кутиха тожö усис пидзöссэз вылö, тожö клёнгис кымöсöн джодж кузя:

— Эн мырддьы Параськалiсь суженöйсö! Господи, иньды поварихаыс сьöлöмö биа чарньöв, вирдышт ёнжыка да чарöт стыдтöмсö. Да ась жö тэнат святöй воляöн небоыс часöт жö камгисяс греховодница юр вылö, ась муыс ньылыштас сiйö, лёквирöс! Аминь!

Кывзiсьыштiсö-керисö кыкнанныс, öшынокö дзарнитiсö: оз я шумит сэтчин господьыс, оз я лэбзьы биа чарньöв веськыта Фаина сьöлöмö? Поди, небоыс сьöкыт иззэзöн киссьö ни сы юр вылö? Нет, нем сэтшöмыс эз вöв. Öтöрын лöз югдö, Чöвпан мыс весьтын небоыс зоритчыны ни мöдö, петуххез быд пельöсын ылöстöмись горöтлöны, поннэз кинöскö ульöн сёйöны, сыбурна вувтöны да öтамöдöс пурöны. А сэсся нем ни сэтшöмыс эз кыв.

Эз гленитчы эта Куть-Кутихалö, горöтчис бедуйтöмöн:

— Оз кыв молитваэзнымöс угодникыс. А не пыртны я миянлö чуланiсь сiйö, новоявленнöйсö?

Чожжыка иньдöтчисö чуланö, осторожнöя, мед не уськöтны да не жугдыны, босьтiсö угодниксö, ружтöмöн пыртiсö керкуö, ва трепичöн чышкыштiсö бус, бöра öддьöн осторожнöя сувтöтiсö енполка вылö. И бöра кеймисисö, кеймисисö. Некöр эшö сэтшöм дзирыта эз кеймисьö да эз юрбитö старухаэс, кыдз часöт. Нiя кыскасисö пидзöссэз вылын, вылына нюжöтлiсö киэзнысö неболань, горзiсö-уннялiсö, клёнöтiсö чукыра кымöссэзöн джодж плахаэз кузя. Вот и шондiыс дзарнитiс ни öшыннэзö, курöггез пондiсö готсьыны öшын увтын, петух шевкйисис борддэзöн, пастух кынымиськö швычнитiс плетьöн, дзик пишались лыйис, а нiя сё шушкисö молитваэз, синвасорöн корисö енсö, медбы часöт жö чарöтiс распутнöй Фаинаöс, поткöтiс сылiсь бöб юрсö, а Опоньколö чожжык иньдiс бы ыджыт ум да мывкыд. И только сэк, кöр кыкнанныс эзö ни вермö сулавны пидзöссэз вылын, кöр Эринья Потаповна нюжалiс джодж шöрас и эз ни прокмы чеччыны бöр, Куть-Кутиха сувтiс, дыр эд орöттöг видзöтiс чудотворецыс синнэзö и висьталiс, кыдз клятва:

— Мыччала ме эта шырöм кöбылалö жарсö! Сiя эшö касьтывлас менö! Часöт жö муна столовöяс да поткöта зорöн пон юрсö! Оз кö мун миян деревняись бöр аслас городö — поткöта гырничсö!

— Поткöт, матуш, поткöт! Ась тöдлö миянöс, стыдтöм рожа...

Куть-Кутиха котöртiс öтöрö, недырик кежö пыравлiс гортас, кватитiс киас как раз сiйö кыдзовöй бедьсö, кöдö кöдковну колис Гырдзза-Аршин, мунiс столовöйö. И кин тöдö, поди, и поткöтiс бы Фаиналiсь юрсö, орöтiс бы нывкалiсь том олансö, да не сэтöн вöлöма: старухалö аскадö усисö тöдвылас еныслöн заветтэс, усис тöдвылас сiдзжö милиция и сiя, старушеньыс, чурс сьöвзис кок увтас, лöгöн дзарнитiс столовöйыс ыбöсö и сiйöн-сорöн бертiс гортас.

Горесянь сiя усис кок йылiсь.

Куим лун и куим ой куйлiс гор вылын, ружтiс да ойзiс. Но эз жö кув. Нёльöт лунас Куть-Кутиха лэдзчис, ыджыт аппетитöн панялiс кык кашник окрошка, чöскöтiс öмсö том хренöн и вöлись мунiс Эринья Потаповна ордö.

— Велöтiн ни чадушкотö? — юалiс сiя порог дынын кымöссö пернапасавтöн. — Эн эшö? Но и ладно инö, пожалуй. Куйлi ме этö гор вылас, куйлi, кыдз колода, думайтi сякöй берсясö, думайтi, чуть юрö эз пот. И шыасис эд сёдаки Христосыс: виденнё меным бытшöм усис. Мышкыртчис бытьтö бы этадз Христосыс ме весьтö, шушкö пель одзам: «Хитростьöн босьтö Опонькосö, хитростьöн...»

— Хитростьöн пö?

— Кыдз инö. Вот и локтi ме тэ дынö.

Дыр и öддьöн чöскыта баитыштiсö талун кык соседка. Сёр рытöдз нiя пукалiсö ордчöн, эз и петавлö öтöрö, нельки сёян йылiсь вунöтiсö. Шушкöтчисö таинственнöя, орöттöг пернапасасисö да дзарьялiсö öшынокö: оз я ыббез ладорсянь мыччись Опонько. А öтöрас, видзöт жö тэ, пемдöма ни: сьöд гымалан кымöр кайöма небоас, пемыт шальöн вевттьöма мусö, вот-вот öдззас вирдавны да гымавны, кожгыны-зэрны.

— Кылiс, кылiс Христосыс молитваэзöс: адззан, кытшöм нёштöм кымöрыс кайöма, — шушкыштiс Куть-Кутиха. — Слава тэныт, господи.

— Быль эд, быль эд, — радмис Эринья Потаповна. Эшö дзарнитiсö öтöрас, бöра шушкыштiсö. Öшын сайын вöлi дзирс пемыт, кыдз кымöра арся ойö — нем эз тыдав. Но Куть-Кутихалöн лöчыт синнэс сёжö ештiсö казявны, кыдз муныштiс öшын увтас сьöд вуджöр, кылiсö ровно бы кок шыэз.

— Локтö эд, некö.

— Локтас, некытчö сылö воштiсьнытö, — горöтчис хозяйка. — Сараяным öнi узьлö. Полö керкуö пырны. Ме висьталi сылö, мыся, öнджа...

Весь баитiс Эринья Потаповна, нем сiя эз висьтав зоныслö. Да и мый висьталас?

Часöт, кöр посöдзас кылiсö Опоньколöн кок шыэз, сiя чожжык ванйöвтiс ыбöс, корис Опонькоöс дынас.

— Тырмас тэныт асныравны да лöгöтны менö, ноко пыр керкуö. Баитыштны тэкöт колö али оз?

Неохота вöлi Опоньколö пырны керкуас, да кытчö воштiсян?

Пырис, кашляйтыштiс порог дынын, дзик чужöй. Но, сiдз и эм! Куть-Кутиха шлёпкисьöма енугöлас, кыдз квашня, дзуту синнэсö сiдз и сувтöтiс зонкаыс вылö, давай пышнавны сьöлöм да морос. «Ладно, мед пукалö!» — решитiс Опонько.

Мамыс шупыта петавлiс гуямаö, пыртiс гырничын йöв, сэсся вайис пызан вылö свежöй огуреццез, нянь чöвпан.

— Пуксьы да сёйышт, кынöмыт эд сималö. Опонько пелитчис пызан сайö. Мамыс пуксис ордчöн, видзöтыштiс зоныс вылö жалейтöмöн, пондöтiс осторожнöя:

— Вон соседканым городö ветлöма... Опонько лэбтiс юрсö, повзьыштiс.

— Но и мый? — юалiс лöгöн моз.

— Ветлi, ветлi городас, — сярзьöмöн öдззис Куть-Кутиха. — Кывзы менö, эн бергöтлы сэрпöсь чуктö. Пантасьлi сэтчин бытшöм инькакöт, вот тэныт господь, юаси сылiсь, кыдз да мый...

Куть-Кутиха шупыта сувтiс, паськыта и важнöя пернапасасис новоявленнöйыс одзын, кöдö пыртiсö чулансис, горöн лыддьöтiс молитва. Быдöс этö керикö, старуха бöб синнэзöн пышналiс и пышналiс Опонькоöс, ёна повзьöтiс зонкасö. Сiя гусьöн нёджжöвтiс öшынö. Öтöрын вöлi пемыт, дзик ямаын, кöть синö рос мöрт. Неылын шумитiс ни гырись зэр, кытöнкö ылын-ылын кылiс страшнöй гымöтöм, сэтчин жö орöттöг вирдалiс.

— Бур, бур, — шуис Куть-Кутиха. — Не весь юрбитiмö да кеймисимö ен-батюшколö, часöт гымнитас-чаркнитас и киссясö иззэс... Чарньöв инмас моросас. Не весь юрбитiм...

Опонько курччавтöг ньылыштiс быдöс, мый вöлi öмас, чапкис пызан вылö огурец. Сьöлöмнас сiя кылiс мыйкö недобрöйö. Мамыс эта кадö горöтчис:

— Поварихаыс, кывзы жö, тшыкöтöм вöлöма... Вон сваттяным...

— Небытшöм шогöтöн маитчöма, — содтiс Куть-Кутиха. — Вöлi ме городас сы хозяйка ордын, быдöс юаси. Хозяйкаыс и юöртiс... Кыдз инö, кыдз инö. Кагаокöс, шуö, кытшöмкö лешаксянь чужтiс да ловйöн нужникö и чапкис. Вот эд мый! Сiя, выдераыс, каждöй лун больницаö котрасьöма, опорттэз сэтчинка керöма. Мукöд лунö кыкисьöн да куимисьöн котрасьöма. Вот, вот... Каждöй лун... И мороссэс местын, висьталiс хозяйкаыс, выдераыслöн пö вата, вата... Ковтаыс увтö сюйöма!

Опонько, тыдалö, бöбмис: синбугыллес тырисö вирöн, öмыс пиньöвтчис. Сiя пуляся чожажык лэбзьыштiс пызан сайись, бытьтö ашнöй зверь чеччöвтiс Куть-Кутихалань, ош моз нямыртiс сiйö косöттяс, чирзiс:

— Мый? Кытшöм вата? Мый?!

Куть-Кутиха тожö бöбмис, повзис кулавлытöдз, тожö чирзiс, дзик пурт увтын:

— Ви-и-исö-ö! Отсалö!

Эринья Потаповна кыдз вöлi, сiдз и брякнитчис джоджö. Сiя эз вермы и джын кыв горöтчыны, тыдалö, досповна бырис садьыс. А Куть-Кутиха мезмис Опонько киэзiсь, бордпавйöн чеччöвтiс ыбöс сайö и, кыдз бура вердöм вöв, öдззис котöртны гортас. Котöртiс и шушкис: «Христос тэ менам, батюшко, Христос тэ менам, батюшко! Мездiн бедасис! А то эд вийис бы, вийис бы менö торта пельыс, сэрпöсь лешакыс. Господи, помилуй...»

Аслас горт одзын старуха сетiс господьыслö чорыт клятва не сюйны сэсся юрсö сатанинскöй делоö и, кöть ведра понiсь кожгис-зэрис, сiя пуксис йöр бокö шоччöтны ловсö.

А Опонько веськыта вагöппезöт да канаваэзöт эта кадö, зэртöнняс, оськалiс Фаина дынö. Сылö некöр вöлi думайтны, правильнöя керö или нач неправильнöя, примитас сiйö часöт нывкаыс или тойлалас öтöрö, ыбöс сайö. Сылöн умöля уджалiс юрыс, пеллезын орсiс музыка — и зонка эз вермы думайтны.

Сьöкыт сапоггезöн брякöтöмöн, гыма-йирка сiя кайис посöдзö, нетшкöвтiс керку ыбöссö. Ыбöсыс вöлi крючокавтöм, оссис ванйöв. Фаина узис ни, керкуын вöлi пемыт, кыдз гуын.

— Ох! — горöтiс хозяйка, кöр саймис. — Кинöс новйöтö лешакыс? Мый колö?

— Дык! — шуис Опонько и давай жö горöн буткöтны сапоггезнас, тальччавны кокись кок вылö.

Фаина перыта чеччöвтiс аслас паськыт кровать вылiсь, чапкис пельпоннэс вылö одеяло, öзтiс би. Сы синнэзын — он и вежöрт — то ли гаж югьялö, то ли повзьöм. Киэс дрöжитöны, синлыссэс сiдз и ветлöны увлань и вывлань — хлоп, хлоп.

— Мыйкö умöль лоис? — юалiс сiя дыркодь чöлöм бöрын. — Мыйкö шогмис? Да баит тэ, лешачина, мый тувдiн?

— Дык! — вöлись горöтчис Опонько и зэгнитiс юрнас. — Локтiс эта бöра Куть-Кутихаыс и öдззис. Кагаокöс пö ловйöн чапкöма, ковта увтас вата сюйöма...

— Мыйлö сiя ватасö сэтчö сюйöм?

— Тэ пö сюйöмат. Ковта увтö...

— Ох!

Фаина öдва вермис видзсьыны кок вылас. Опонько сулалiс одзас, кыдз столб. Нывка видзöтiс сы вылö кыдзкö жалейтöмöн, гогинялыштiс юрнас:

— И этö ме, этö ме-ту любита тэнö... Эттшöм бöбсö? — дрöжитан голосöн горöтчис сiя и бöра дыр эд нёджжалiс жöникыс вылö жалейтöмöн, дзик сулалiс сы одзын не богатырь кодь детина, а кытшöмкö убогöй инвалид.

Опоньколö мылякö думайтсис, что басöк невестаыс часöт жö нямыртас сiйö юрсиöттяс и пондас гындыны, кыдз гындывлiс кöркö школаын бöб юра зонкаэзсö. Но Фаина вдруг кыкнан кисö пуктiс кадж вылас, öдззис ваксьыны:

— Ха! Вата пö. Колö жö! Ха-ха!

— И эшö...

— Тырмас! — топнитiс сiя кокнас. — Чёрт бы тэнö люкалiс. И ме любита эттшöм куканьсö? Да эд морт жö тэ сёдаки, морт! И кытшöм греххез понда брякнитчин тэ, увья стожар, менам юр вылö? Ноко висьтав веськыта: морт тэ сёдаки али не морт?

— Дык!

— Морт, сiдзкö. Дак мыля жö сэк Куть-Кутиха лысьтö локны тэ дынö? Мыля сiдз тэ дынö пырö, а, шуам, не Сенька Никонов дынö? И кыдз ми тэкöт овнытö пондамö, ежели гöтрасям? Тэ думайтiн эта йылiсь али эн? Ноко висьтав часöт жö!

Опонько пуксис лабичö порог дынас, öшöтiс кудриа юрсö. Сiйö маитiс стыд. Фаина сё эшö сулалiс джодж шöрын, топытжыка шубöвтiс одеялосö, дзик вöлi кöдзыт, сьöкыта ыш лолалiс, видзöтiс гажтöма. Сыбöрын сiя чожа босьтiс кровать юр вылiсь кытшöмкö паськöмок, котöртiс заборка сайö.

Опонько нёджжöвтiс керку пытшксö. Тöдса вöлi горницаыс, а ровно бы и не тöдса. Фаина, удав да чож ныв, ештöма ни бытшöмика мöдпöв белитны потолок, стенаэсö клеитöма басöк обойезöн, джоджö ольсалöма узöрреза половиккез. Опонько вежöртiс: энö половиккесö Фаиналö, видно, козьналiс Миколика баб. Только сiя, добрöй старушка, кыйö сэтшöм басöк узöра половиккесö и сеталö нiйö соседкаэзлö. Одзись стена вылын мыччисьöма фотокарточкаэзöн рамочка, ыджыт гöгрöса зеркало; кровать весьтын — дона ковёр. А кровать дынас, сайись пельöсын, сулалiс свиттялан кöртiсь шуллезöн дорöм сундук. Сы вылын узис пушистöй кань — асыкалöма асьсö кузь бöжöн. И сiйö, натьтö, козьналiс Фаиналö тожö старуха Миколика.

Гажа лоöма керкуас, öддьöн лöсялö. Он сiйö ордчöн сувтöт нылöн керкукöт, кытöн и лолавнытö немöн.

Чожа мыйись заборка сайись петiс Фаина. Сы пельпон вылын вöлi не одеяло ни, а дженытик халат. Ыбöсокыс дынын сiя кыкнан кинас лöсьöтiс лэдзчисьöм юрсисö, öмас видзис шпилька. Халатлiсь вевдöрись кизьсö Фаина, нарочно я мый я, вунöтöма кизявнытö, и Опонько часöт, конечно, вермис аслас синнэзöн казявны нывкаыслiсь не только кузь чочком голясö, но и мороссö. Фаина сералан синнэзöн нёджжöвтiс жöникыс вылö, дзик ехиднöя юалiс сылiсь: но, кытöн сiя, ватаыс, бöбöв?

Сэсся сiя дзарнитiс зеркалоö, мигнитiс ачыс аслыс и чожа уськöтчис сундук дынö — мыйкö усис тöдвылас. Сiя не öддьöн осторожнöя кинас чышкыштiс сундукыс вылiсь каньсö, лэбтiс вевтсö. Опонько сiдз и дрöгнитiс: спина кузя кöдзыт ва воттез муныштiсö — нывкаыс киись сiя вдруг казялiс мича косинкасö, кöдö Фокич дедкöт козьналiсö городскöй столовöйын. Дзугыльтчис Опоньколöн сьöлöмыс, умöль лоис, гажтöм. Тöдiс добрöй молодец кайскöй обычай йылiсь: если невеста бöр сетö козинтö, значит, тарöвтчы син одзись ылöжык. Неужели Фаина часöт жö шупкас чышьяноксö Опоньколö кок увтас?

Кыскис Опонько юрсö пельпоннэзö, синнэсö кунис. Кыдз сэсся овны чочком светас? Кöдöрö юр пиньöвтны?

Но нет, Фаина эз чапкы чышьяноксö. И эз тойлав Опонькоöс ыбöс сайö. Сiя бöра сибöтчис зеркало одзö, кокнита да кужöмöн чапкис чышьянсö пельпоннэз вылö, чикыртiс синнэсö. Сэтöн и любöй бы вежöртiс: гленитчö козиныс, дона сылö чышьяныс.

— Бöбöв тэ, Опонько, ой, кытшöм бöбöв, — горöтчис сiя шынньöв пыр. — И кыдз тэ вермин кытшöмкö арттöм старухаöс кывзыны? Кыдз сылö веритiн?

— Да эг верит ме, эг! — вдруг дзирыта и чорыта горöтчис Опонько. — Меным просто сьöкыт мылякö лоис, кöр сiя нёштöмасьнытö пондiс. И мамö сэтöн жö, кыдз кагаок.

— Мамтö ми кидтамö еныс дынiсь.

— Кидтамö, конечно. Сiдз — не олан. Вот ме и локтi, мыся, колö чожжык решитчыны. Тырмас ныкöт йöзсö смешитны.

— Решитчыны? Мыйö решитчыны? А, вежöртi...

Эз вермы öшшыны Фаина местаас, сiдз и уськöтчис жöникыс морос вылö, гындыштiс сылiсь кудриэсö, окалiс дзирыта.

— Вот вöлись тэ колана кыввез горöтчин, — висьталiс сiя. — Былись решитчыны колö, тырмас старухаэскöт асьнымöс позорас воштыны. И кыдз жö ми пондам овнытö, Опонько! Бура ми тэкöт пондамö овнытö. Только öтiк вот умöль: свадьбатöг ковсьö.

— Лоас и миян свадьба! — бöра чорыта шуис Опонько.

Вот сiя кытшöм вöлöма. А мукöдыс эд думайтiсö, что сiя, Опонькоыс, дундук, кытшöмö эшö светыс эз адззыв.

Нет, Опонько не дундук!

Фаина лöсьöтыштiс пельпон вывсис чышьяноксö, трекнитiс юрнас, дзик вашöтiс дынсис курыт думаэз, юöртiс гусьöник:

— А ме видзчиси тэнö, Опонько. Ме бытьтö кылi сьöлöмнам, что тэ локтан, сiйöн и эг крючокав ыбöссö.

Чожа Фаина лöнис, дугдiс жöдзны джодж шöрас. Сiя пуксис ордчöн жöникыскöт, и нiя дыр сёрнитiсö олан йылiсь, мечтайтiсö, мый пондасö медодз керны, медбы овнытö первöй жö луннэзсянь вöлi бур да гажа. Опонько висьталiс, что аслас киссьöм остожьяö сiя оз ни берт. Фаина ошкис этö решеннёсö и содтiс, что городас уджалiкö сылö удайтчис öктыштны невночка деньга, что Василий Голован, натьтö, согласитчас нылö вузавны этö керкусö, а если оз согласитчы, то нiя кыкöн вермасö строитны и вильö. Отирыс строитöны жö. Да и колхоз отсалас, соседдэз отсаласö.

— Конечно, строитам!

Бур вöлi ны коласын басниыс, öддьöн сэтшöм мирнöй да сьöлöм сьöртi, и некин эз вермы висьтавны, кытчöдз бы сiя кыссис и визывтiс, кöбы Опоньколö эз пыр юрас вдруг юасьны:

— Фай, а мый эта сэтшöм — опорт?

— Мы-ый?

— Опорт. Лёбис тай Кутихаыс, каждöй лун пö керлöмат...

Дзугыльтчис сразу Фаина, кыдз и öнтай, видзöтыштiс жöникыс вылö жалейтöмöн, горöтчис бедуйтöмöн:

— Да тэкöт, кыдз ме видзöта, и быль некöр лоас гажтöмтчыны. Но и жöникöс меным еныс козьналiс. Тьфу!

Но и часöт сiя эз тойлав Опонькосö ыбöс сайö. Сiя чожа кусöтiс свет, топнитiс кокнас:

— Чöвт ассит робатö! И — марш кроватьö!

И Опонько вежöртiс, что сiя крепыта шедiс Фаина киэзö. Öнi бöр он ни бергöт.

Ойбыт кожгис-зэрис дугдывтöг, ва киссис, дзик ведра понiсь, вирдалiс и гымалiс страшнöя. Кайскöй волок весьтöт öт конецсянь мöд конецöдз ыджыт зыкöн тарласисö сьöкыт калитöм иззэз, лöга люкасисö öтамöдкöт, грешнöй мусö сiдз и этадз пöвсалiсö кузь плеттез — чарньöввез. Эринья Потаповналöн керку юр вылын шовкöтiсö тёссэз, нёштöма виксiсö-дзуртiсö стропилаэз, жугалöм öшыннэзöт сьöласис ульсöтöн ыджыт тöв, старайтчис кусöтны копеечнöй масiсьсö, кöда сотчис Николай Чудотворец одзын. Сiсьмöм потолок пыр перво тёпöтiс гырись вотьва, сэсся пондöтчис настоящöй зэр. Горвыв сёрдын, потолок увтас, мыйкö сьöкыта мутшкöтiс, и старухалö кажитчис, что матича пуыс вот-вот мезмас тшупöттэзсис, и потолокыс гиля-голя киссяс сы беднöй юр вылö.

Полöм петiс пукавны эта керкуын, öддьöн полöм петiс. А кытчö воштiсян?

Воштiсьны вöлi некытчö.

И пöрись Эринья Потаповна, досповна ни нырыштöм горенас да повзьöмнас, кыскасис пидзöссэз вылас, дугдывтöг юрбитiс и юрбитiс, кеймисис сэтшöм дзирыта, что, если бы вöлi еныс, то сiя сёравно бы кылiс Макарихалiсь молитвасö и иньдiс мортыслö быдöс, мый сiя корис. Эд корис сiя нач етша.

— Господи! — баитiс сiя нюжвыла, сьöкыта. — Христос-батюшко! Мыля менö сiдзи наказывайтан, мыля менö öтнамöс колин? Макар торксис, зонö чапкис, керкуокö, адззан, киссьö...

Сiя вылына лэбтывлiс киэсö потолоклань, видзöтiс веськыта ликыс синнэзö, видзöтiс гажтöма да корöмöн, кытшöмкö надеяöн, ачыс сё öвтiс и öвтiс веськыт кинас, кöда ветлiс дзик заводитöм, сё юрбитiс. Сэтшöм минутаö, кöр старухалöн бырлiс садьыс, пондывлiсö садейтны пидзöссэс, висьны быдöс суставвез да жилаэс, сiя пуксьывлiс веськыта джоджас шоччисьыштны. И кöть сэтöн вöлi ва, кöть зэрыс керкуас кожгис сiдзжö, кыдз и öтöрас, Эринья Потаповна пукалiс вöрöтчытöг, дзик тувдöм. Сiя сьöкыта думайтiс, старайтчис дзарнитны кольöм кадö и вежöртны, мыля сылöн оланыс вöлi сэтшöм нёштöм да счастьетöм, мыля сiя, пöрись Макариха, пыр и пыр тöдiс öтiк горе, пыр кисьтiс синваэз и почти некöр эз адззыв мича ойлун, некöр сылiсь сьöлöмсö эз шонтлы гаж.

Чужис Макариха вöршöрись учöтик хуторын, чужис ыджыт семьяын, кытöн челядьыс коласын только нывкаэс вöлiсö сизима. Челядьыс корисö нянь, а сiя почти некöр эз вöвлы. Вот и ковсис асывсянь рытöдз масьтыны гырын анькытш гöридз да идзас, ваявны вöрись пипу кач да быдкодь турун. Винерик нылочкаэз öдва-öдва ляшмасисö, часто пыктывлiсö и пыр шогалiсö. Куим соёк учöтик Эринлöн, öння Макарихалöн, кулiсö сэк öтiк ойö. Куим учöтик гроб сулалiсö ордчöн пызан вылын, куим учöтик могила мыччисисö öтiк лунö пемыт вöр шöрын. Кöин моз уннялiс Эринлöн мамыс, пиннесö йирис сылöн айыс, а керны бурсö нем эз позь, колiс думайтны ловьяэс йылiсь — и нiя тшыгöсь эд, вот-вот куласö. И иньдiсö Эринöс пöрисьжык воныскöт чочком свет кузя ветлöтны кортöн.

Ветлöтiсö соя-вона деревняись деревняö, вовлiсö быд öшынок дынö, нюжöтлiсö вöснитик голосоккезöн:

— Криста-а-ра-а-ди-и!

Беднöй отир и рад бы мыйкö сетiсö, но нылöн асланыс нем эз вöв, а богатöйес частожык лэдзлiсö ны вылö поннэзöс и шочажык сетлiсö совет:

— Мунö, мунö татiсь, мунö, горадзуллез. Кеймисьö енлö — сiя отирсö вердö.

Сэк и кылiс первуись Эрин еныслiсь нимсö, сэксянь и пондiс надейтчыны еныс вылö. Но ен-батюшкоыс и сэк ни мылякö косöя видзöтiс соя-вона вылö. Сiя жалейттöг кынтiс кыкнаннысö тöвся туйез вылын, моритiс, тешитчис сэтчöдз, что Эринлöн вонокыс öтпыр сибдiс лым столаö да сэтöн и кынмис, а ачыс нылочкаыс öдва-öдва ловзис кытшöмкö бедняклöн гор вылын.

— Енiньöй! Мыля нö менö томсянь наказывайтiн? Мыйöн ме тэнö öбидитi? — дзирыта юасьö талун старуха и паськыта-паськыта пернапасасьö. — Кузь век тэ менö наказывайтан, кузь век мучитан, енiньöй!

Öтöрын сё зэрис и зэрис, колöтiс ведра понiсь, вирдалiс и гымалiс сiдз, что дрöжитiс Макарихалöн керкуыс.

— Свят, свят... — пернапасасьлiс Макариха и бöра думайтiс аслас олан йылiсь.

Тринадцать годöдз ветлöтiс сiя кортöн. А кöр невна пондiс прокмыны уджавны, сiйö примитiс строшнöявны öтiк богатöй мужик. Пемытсянь пемытöдз уджалiс нылочка мöс картаын, кайöтлiс юись ва, шонтiс сiйö, юкталiс да вердiс подасö, ойезнас пестунничайтiс и — спасибо енлö! — вöлi пöт.

Дата добавления: 2015-11-16