МÖДÖРА КУЧИК

Векнитик юок, чукыля-викыля Веретя, визывтö вöр дорöт. Джуджыт берег вылын поздiсьö деревня Веретя. Гожся жар погоддяö юыс косьмывлö чуть я не пыдöсöдз, и сэк веретинса, томмез и пöриссез, висьтасьöны серöмсорöн:

— Миян матушка Волгаын — хо-хо! — и шырпиянöс он вöйöт!

— Курöжок вуджас сiйö подöн, кок пятаэсö оз вад!

Учöтик юокыс, нач некодя. И кымöра кытшöмкö, дзик часöт только саймöма кыз онiсь да вунöтöма волькöтыштны чужöмбансö, сё сунасьö. Дзарнитан мукöдпырся и не сразу вежöртан, кöдöрö «матушкаыс» визывтö-котöртö.

Этö жар погоддяö, засуха коста.

А вот неважын Веретинскöй сельсоветын куим лун и куим ой кожгис-зэрис ведра понiсь, и юокыс син одзын ыждiс, казявтöг пöльтчис и, бытьтö тулысся кадö, пондiс ковгыны-пизьны, мукöдлаын нельки кырöтiс береггез и вöтьöтiс видззез.

Этö только и видзчисис веретинскöй челядьпöлöс. Бöбсялiсö радувья карапуззэз, нач вунöтiсö ягöд да тшак йылiсь. Одз асывсянь и сёр рытöдз тульöтчöны ваас, купайтчöны садь быртöдз. Мукöдыслöн и кымöс кучикыс вевттисяс «дзодзог пупыррезöн», пиннес важын сяткöтöны, а сiя, ёршпиян, сё вартчö и вартчö киöн и кокöн, дзик век васö абу адззылöма.

Да только разь челядьыс кульмис! И гыриссез тожö бокын эз сулалö, мыччалiсö чож-бурнысö нысся не умöльжыка. Оз ештö покос вывсянь локны, а котöртöны ни ю дорö, чожжык гыжтöтны вывсиныс ньылöмöн боссьöм паськöмок и уксöмöн-ванзöмöн чеччалöны шоныт и небыт ваö, вартчöны тожö киöн и кокöн, ныряйтöны пыдöсöдз — видзöтны любо. Сэтöн жö койöны и нывкаэз и зонкаэз. Локтасö видз вывсянь, перво-наперво купайтчасö пöттöдз, гывьяласö ас бердiсь лунся мыдз да поснитик турунчиррез и вöлись только петасö деревня сайö, кытöн ой шöрöдз сьылöны частушкаэз да йöктöны кадриль.

Висьтасьны, нельки сто годся дед Митипер абу вермöма öшшыны гортас, тожö лэдзчöма вадорö, онняюрöн нырнитöма Пихтовöй йирö и öдва бöр петöма: сылöн гынмöм тошыс да перна гайтаныс, сералöны веретинса, кышасьöмась увья кокора бердö. И примитiс бы пöрись морт нёштöм смерть, кöбы томсянь эз вöв сэтшöм удав да прока. Старик сразу вежöртöма: колö пессьыны да вартчыны, колö вöрзьöтны кокорасö. И давай жö пессьыны-чепсасьны, давай жö кидласьны вугыр вылö крюкасьöм щука моз то öтöрö, то мöдöрö. И вöрзьöтöм сётаки кокорасö, петкöтöма тош бердас берег вылö. И этö висьтасьöма йöзыслö:

— Косьмас увья колода, и лоас тiянлö тöвбыт кежö баня пес!

Гажа вöлi берег дорын, дзик праздник ымьялiс. Шум сулалiс сэтшöм, что ю сайись вöрын волнаэзöн ветлiс говк, дурмöтiс зверрезлiсь пеллез. Веретинса бура тöдiсö: гожумся ыджыт ва öшсьö лун-мöдся не дыржык. Не талун, дак ашын Веретя бöра косьмас пыдöсöдз, и сэсся таво он и купайтчы. Вот и старайтчисö, кыдз баитiсö нiя, примитны эна луннэзö пöттöдз «воднöй процедураэз».

Эз пукав керкуын седун моз и Макся Ошканов, гöрд чужöмбана, крепыт вывтыра абыз, кöдö деревняас том и пöрись шуисö Чоморöн, мöднёж висьтавны — кульпиянöн. Этö, конечно, сiйöн, мыля бöб вöлi зоночкаыс, кужис мыччавны йöзыслö сякöй берсясö. Восьмилетка кончитiс сiя таво, мöдiс гожумбыт чатрасьны Веретя дынiсь деревняэзын да хуторрезын, мöдiс лоны чож борда кайöн, медбы пöттöдз шоччисьны, кыдз этö мукöддэс керöны. Но пондыв, ло вольнöй мортöн! Аймамыс бура тöдiсö зоныслiсь мывкыдсö да характерсö и шуисö керны ас мознас. Нiя висьталiсö Максялö чорыт кыв: кин олö весь, лун-лун чужьялö тöв да згальничайтö, сысянь бурсö нем ни видзчисьны, сэтшöмсис петö не морт, а ачыс супоней, веськыта шуны — мöдöра кучик; а кин учöтсянь уджалö, кöть невночка, да вайö отирлö польза, сiя — кыдз баитöны мудрöй стариккез — чожа лоö бур мортöн, аймамлö отсалiсьöн, кодя юр вердiсьöн. Сэтшöмыс не весь тшынöтö небосö, и олö му вылас тожö не весь. Горöтчисö этадз айыс да мамыс и кипöлöт нуöтiсö зоннысö сельсоветö:

— Колö пö сэтчин ыджыт начальник: то ли гармонист клубö, то ли киномеханиклö отсасись, — сералöмöн горöтчис мамыс.

— А веськыта кö шуны, дак гожся страднöй луннэз кежö сельсоветас колö посыльнöй. Кытчö иньдасö, сэтчö и котöрт, — содтiс айыс. — Коккез тэнат, Максю, крепытöсь, чожöсь, котрасян невнасö. Оклад, пö лоас чуть я не министерскöй. Видзöтан, арöдззас деньга тыр карман шедтан.

Макся мугны эз понды. Деньгаыс сылö и быль колiс: зонка важын ни мечтайтiс небны аслыс подростковöй мотоцикл или кöть бы мопед — шöрöт школаыс районнöй посадын, сэтчинöдз двадцать километр. Не подöн жö сы ылынаас котрасьны.

Сельсоветiсь председатель Исай Сергеевич Вольлапин панталiс нiйö приветливöя, рочалiс пуксьыны матöжык пызан дынö. И, медбы буржыка тöдсасьны виль подчинённöйкöт, пондöтiс сыкöт деловöй басни: перво висьтасис, мый öнi керсьö сельсоветын, а сыбöрын юасис, кытшöм книгаэз да газетаэз радейтö лыддьöтны Максяыс, кин öнi колхозын медодзын мунiсь, уна я колö сетны государстволö йöв да яй и сiдз одзлань. Басни артасис интереснöй, Макся видзис асьсö солиднöя, быд вопрос вылö сетiс обстоятельнöй ответ. Председатель шуис радöна:

— Лöсялö! Сразу тöдчö: грамотнöй мужикыс, уна авйö-тöдö. И баитö — любо кывзыны. Дзик книга лыддьöтö. Вот Чомор! Миянлö сэтшöм и колö. Только öтiкö пыр тöдвылын видз, Максим Максимыч: «начальник ме öддьöн строгöй, кыкись öтiксö висьтавны ог радейт. Горöтчи кыв — и котöрт, мымда прок. Адззан, кытшöмöсь нiя задачаэс?

— Эшö бы не адззыны.

Максялöн и айыс, и мамыс кольччисö стрась кытшöм довольнöйöсь. Нiя висьталiсö председательлö куимпöвса спасибо и вöлись только мунiсö видз вылö ытшкыны турун. А Макся öшöтiс юрсö, пондiс паникуйтны: адззисьлытöдз, чочком свет, сюйыштас менö, беднöйöс, могилаö эта подöн ветлöтана должность, ох-хо! Но чожа казялiс, что паникуйтны да мыйиськö повны абу и колöма. Лун-мöд бöртi сiя шыннялiс ни: сельсоветын уджыс... — эта некытшöм и не удж, а öмидз-малина. Председатель кабинетö неважын сувтöтiсö телефон, и эта чудеснöй аппаратын вöлi быдöс делоыс. Колö, шуам, районö мыйкö юöртны, дак и юöрт телефон отсöтöн; колö тэныт кинöскö сельсоветö корны, шуам, выговор сетны, дак и кор сiйö бöра жö телефон отсöтöн. Исай Сергеевич Вольлапин быдпырся сiдз и керö. И репöтлö зонкасö деревняэзö да хуторрезö только разь сэк, кöр кытшöмкö öддьöн ни важнöй, кытшöмкö, сiдз и висьталам, нач ни исключительнöй дело некыдз оз позь артавны Максялöн крепыт коккезтöг. А кытшöм жö сэтшöм важнöй да эшö исключительнöй дело вермас шогмыны öнi Веретинскöй сельсоветын, кöр сулалö пыль-страда, сулалö сенокос, и быдöн, кин прокмö ытшкисьны да куртны, лун-лун одз асывсянь сёр рытöдз мисулитö видз вылын? Кинлö керны сякöй «исключительнöй» делосö? Некинлö öнi бöбавны деревняас. Сiдзкö, и Максялö керны тожö вöлi нем, нöитны коккез почти эз и ковсьы; куйлы пемытсянь пемытöдз чуланын да сьöлав, гленитчö дак, потолокö. Сымда и удж тэнат.

Весь олöмсянь Макся тöдчöмöн ёнмыштiс, кынымкö неделя бöртi чужöмбан йыввес пондiсö биöн сотчыны. И эшö. Зоночка сiдз дышмис, что öтпыр нельки ачыс повзис: вунöтiс асывнас рукомойник дынö вовлыны, миссьытöг и мунiс государственнöй учрежденнёö. «Вот эд шогмис жö, — дивуйтчис сiя. — Да эта эд настоящöй беда: чожа лоа, пожалуй, знаменитöй сэрпöсь бонöн, адззывлытöм нятьöсь дзутуöн».

Гажтöм бöра лоис зонкалö, моросын быдöс гудрасис. А сэтöн — мам тэ менам, маминьöй! — ыджыт зэррезсянь Веретя польдöма, Волгася паськытжык пö лоöма. Öнi кытшöм бы тэ ыджыт пост вылын эн сулав, ло кöть му вылас медглавнöй начальникöн, а местаат он ни öшшы. Некыдз он öшшы!

Позьö или оз, а öнi лоан чож борда кайöн. Кыдз и тöвся кадö, позяс бöбалыштны, сьöлöм бурöтны.

И сылö усисö тöдвылас тöвся "штукаэс", вывтырнас сiдз и öзйыштiс-пыкнитiс. Ох-хо! Доддялас, вöвлi, дадёкас дас кыным понöс, кöдна, хозяинтöммез, утугаöн котрасьлiсö деревня улицаэзын, ачыс этатшöм баринöн пуксяс плетёнкаö и — э-э-э-эгей, донаэз, эд срамитö менö, биа-бордаэз! И лэбзьöны нiя тöвчикöн, нöбöтöны «баринсö» веськыта лым столаэзöт, только шапкатö видз. А эшö, вöвлi, конёккезöн ысласьлiс. Кöрталас куканься ыджытжык Бусколöн ошейник бердö гезок, ачыс кутчисяс гезокыс мöд конец бердö — и радуйтчы бöра! Буско — пон вына, кыдз чёрт, сiдз и лэбзьö веретинскöй гора да нильыг йы кузя, бытьтö тöвчик. А коккес — мельк, мельк, мельк! — кажитчö, не нёля нiя, а дасся унажык. Пон радувьяс камгö-вувтö лёкгоршöн, а Макся ваксьö-сералö: долыт сылö, бур.

Усис быдöс эта тöдвылö, и зонка ачыс эз казяв, кыдз петiс сельсоветiсь, öдззис котöртны ю дорö. Берег вылын сiя бöрйис крепытжык пыж, горöтiс зоночкаэзлö, кöдна, йöрнöстöмöсь-вешьянтöмöсь, гайзiсö да тульöтчисö гудыра ваын:

— Э-эй, дзутуэз-ёкышшез, петö васис. Локтö чожжык, а то!

— А мый-й?

— Котöртö, мыся! Гажöтчыны пондам. Ноко кытсалö татчö деревнясис пон табунöс, гезоккез сьöраныт босьтö. Пыжын ысласьны пондамö. Хо-хо! Пхе!

Натьтö, и дас минута эз чулав, кыдз куш кынöма зоночкаэз ылöтiсö ю дорö не öтiк дамкаöс и тузикöс. Гезоккез тожö адззисисö. Мый керны одзлань — Максяöс велöтны эз ков. Сiя некой пору арталiс пон сбруя: лöсьöтiс ошейниккез, ны бердö домалiс гезоккез, а гезоккеслiсь мöд конеццесö домалiс кöртовой скоба бердö, кöда вöлi дорöма пыжыс нырö. Сымда и дело. Öнi уяв да уяв, гажöтчы, кульпиян, кытчöдз мылаыт оз быр. И сiя эз понды öштыны кадсö весь, сетiс дружоккеслö команда:

— Бöбöтö кöин öбеддэсö ваö!

Поннэс вöлiсö рамöсь, видзисö асьнысö спокойнöя. Кöр карапуззэз только невночка зэлöтiсö ошейниккез, нiя мугтöг, бытьтö сiдз сiя и колö, пырисö юокас. Макся босьтiс киö крепыт бедь, тойыштiс пыжсö.

— Перво öтнам ысласьышта, вöлись и тiянöс пуксьöта, — висьталiс челядьыслö.

И сiя чеччöвтiс пыжö, кынымиськö трекнитас юрнас и горöтiс бускоэз вылö. Поннэз, тыдалö, вежöртiсö ни: пыртiсö ваас не весь, чожа пондöтчас мыйкö видзчисьтöм. Медбы чожжык петны бöр кöсiнö, мездiсьны: ёрдöм лямкаэз бердiсь, нiя перво негорöн вувтыштлiсö и никсiсö, а сэсся öдззисö чепсасьны то öтiк, то мöдiк ладорö. Пыж öвтчис и дюттясис, вот-вот кыминьтчас öтлаын Максякöт.

— Э-э-эй! А ноко, менам дзирыт сьöлöмаэз! — горöтiс Макся и, медбы артавны табунас колана порядок, сöтiс öтiк тузиклö госа кадж кузя бедьöн: видзöтлы менам! Пон унньöвтiс лёкгоршöн — зубыт! Сылöн дружок, кöин кодь ыджыт барбос, кöть и эз вачкö бедьöн, тожö унньöвтiс, бытьтö пурт увтын, и, порсь тöдö мыйсянь, мöртiс лэчыт пиннесö мöдiк барбослö бокас. И эта, мöдыс, тожö эз кольччы долгö — зубыта пурис куимöтöс. И мый сэтöн пондöтчис! Пыж бергалiс öтiк местаын, кыдз кольмöм, и вöлi невежöртана, мыля сiя öнöдз эз кыминьтчы. Макся сулалiс кок йылын, öвтiс бедьнас и, дзик садьтöм мужичок, шатласис то öтöрö, то мöдöрö. Сiя вежöртiс: «штука» талун эз лöсяв. Пон табунсö часöт он ни бурöт. Но пöрччавны гезоккесö эз тэрмась — поди, и аркмас эшö мыйкö.

А берегын пасьтöм кашкавда радуйтчис: öтiккез йöктiсö, чеччалiсö кокись кок вылö, мöдiккез бöбись сералiсö и чирзiсö, мымда вын. Нiйö позис вежöртны: нем эшö сэтшöмсö векын эз адззылö. Поннэс сё уннялiсö и эрзiсö, старайтчисö сёйны öтамöдöс. Медбы не берездасьны пыжсис, Макся пуксис пöв вылö, öт кинас кутчисис пыж дор бердö. И только сэтöн казялiс, что берегыс вылын пондiс öксьыны народ. Кылöмась поннэзлiсь дьявольскöй уннялöмсö и чепöссьöмась вадöрö стариккез да старухаэз, кöдна асланыс годдэз увья эз ни петавлö ытшкисьны. Öвтiс киэзöн и чеччалöмöн котöртiс кысянькö сельсоветiсь председатель Исай Сергеевич Вольлапин. Ылiсянь казялан: öмыс пиньöвтчöма, синнэс кайöмась кымöс вылö. Повзьöма мортыс, натьтö, думайтö: мый сэтöн шогмö, эз я кинкö вöй? А поди, ош локтiс? «Мам тэ менам, маминьöй! — повзис Чомор. — Ачыс председатель лэбзьö. Беда...»

Сiя тэрмасьöмöн пöрччалiс лямкаэсö, мездöтiс нiйö скоба бердiсь. Поннэз сэк жö вежöртiсö этö, чожжык уйисö берегö и котöртiсö шакардаöн кинлö кытчö туй. Öтiккез пырисö асланыс посöдззез увтö, мöдiккес, беспризорнöйес, пышшисö вöрö. Быдöнныс нiя забеднöя тявгисö, но и öтiк нельки бöрас эз дзарнит, медбы мыччавны Максялö кузь лэчыт пиннез.

Дзор стариккез да старухаэз öтiк öмись тшöктiсö Максялö часöт жö петны васис, кайны берег вылö. «Лоас меным баня», — гажтöма думыш керис Макся. Но воштiсьны вöлi некытчö. Сiя кывзiс пöриссесö, жагвыв петiс берегö, мышкыртас бöб юрсö.

— Кин тэ сэтшöмыс? Э? — строгöя юалiсö стариккез. — Висьтав тэ миянлö веськыта: кöрсянь лоин пон кулисьöн?

Макся чеччалiс кокись кок вылö, пыркöтiс кузь юрсисö да вирскис нырöн. Сiя решитiс кытчöдз не пиньгисьны пöриссескöт, паныт не юрöтчыны и öтiк кыв. Вот если öшöтчасö юрси бердö да лэбтасö киэз, мед буржыка сотны небыт места кузя, кöр пондöтчас экзекуция, — сэк и лоас мöдiк басни...

— Балда тэ али кин? — горöтлiсö стариккез. — Нем и нем оз вежöрт! Да кытчöдз тэнö терпитнытö?!

— Не весь жö нимкодьыс сылöн — Чомор!

— Чомор и эм. Дьявол! Колö жö поннэзöс сiдз маитны. Кульны бы ассис кучиксö. И кытчö этö аймамыс видзöтöны?

— А вот ми часöт нытöг и велöтыштамö, вежöмöс. Макся шедiс кытшö? Сто годся Митипер команда увтын стариккез лöсьöтчисö решительнöй атакаö. Зонка тöдчöмöн рушмис, перыта дзарьялiс öтмöдöрö, тыдалö, думайтiс, кыдз бы этö боёкжыка мыччавны пöриссезлö кок пятаэз. Эд быд старик киын вöлi кыдзовöй бедь...

Исай Сергеевич вежöртiс: сылöн том подчинённöйлö вермас неумöля павкны, и чепöссис сы дынö отсöтöн. Шульга кинас сiя нёкыртiс Максялiсь юрсö, веськытнас лöсьöтчис малыштны косысся невна увтiжык, как раз сiйö местасö, кытiсь коккез быдмöны. Но эз малышт, а горöтчис:

— Вот добрöй морттэз юалöны тэнчит: кöрсянь пö лоин пон кулисьöн? Юалöны — кин тэ сэтшöмыс? А тэ, Максим Максимыч, дона менам сьöлöмгажиньöй, шы он сет. Но дак тэ туйö ме висьтала: мöдöра кучик тэ, Максим Максимыч. Вот тэ кин!

Макся, кöр кылiс этö, дугдiс вирскыны нырнас. Сiя достоинствоöн горöтчис паныт:

— Может, ме и мöдöра кучик. Гы-гы... Ой-ой, да дзимляв тэ ош лапатö менам юр вылiсь. Зубыт эд!

И председатель кончитiс экзекуциясö. Сiя шуис:

— Марш аслат местаö, тöд службатö. А то — видзöтлы!

Пöрись сельчаналö Исай Сергеевич сетiс чорыт кыв:

— Ашын жö вашöта сiйö, Чоморöс, сельсоветiсь. Дыв вашöта!

Сiя бура тöдiс, что Веретяын, кыдз и быдлаын, пöрись йöзыс небыт сьöлöма. Минута-кык бöртi, видзöтан, стариккез дугдасö лöгавны Макся вылö, эшö, поди, ошкасö зонкасö згальничайтöм понда. И эз сорась Исай Сергеевич. Митипер дед нюлыштiс-керис тырппесö, сöтiс бедьнас му кузя, сэсся малыштiс гынмöм тошсö и висьталiс:

— Стыдитыштiмö невночка супонейöс — и тырмас. Оз ков чапкыны сiйö удж вывсис. А то Макся, тöдамö мийö, мортыс ушлöй, юра. Вермас эшö мыйкö панны. Ась уджалö. Мортöн, поди, лоас. Ме, вöвлi, томнам тожö... Э-э!

— Ась, ась уджалö, — горöтчисö и мукöддэс. — Аскадö сiя понтельöпсö велöтiс, ха-ха-ха! А то котрасьöны деревня шöрöт, уннялöны кöиннэз моз, мукöдпырся коколюкатöг и öтöрö петны полан. Öнi öвсясö, поди.

«Но и но! — шынньöвтiс Макся, кöда сельсоветö оськалiкö, бура кылiс этö баснисö. — Öтiк бöбöвöн менö шуö, мöдiк — ушлöйöн. Сiдзкö, ме — ушлöй бöбöв. Ха-ха...»

...Эта вöлi тöн. А талун, кöр Макся локтiс сельсоветö, сэк жö казялiс, что Исай Сергеевич лöсьöтчöма походö: кöмалöма кузь голенищеа сапоггез, пасьталöм важ брезентовöй куртка.

— Ытшкисьны мунан, Исай Сергеевич? Нюр сайö?

— Не, Максим Максимыч, не ытшкисьны. Мöда, адззан, ветлыны отгоннöй поскотина вылö. Тэ давай, дружок, вот мый: пукав лунтыр телефон дынын, некытчö эн петав. Сельсоветын öтiк морт абу, быдöн мунiс отсасьны колхозлö заптыны турун. Вот и лоан тэ главнöй туйö. Кин юалас менö, дак висьталан: пастуххез дынö мунiс...

— Сiдз и кера быдöс, кыдз тшöктан.

— А сельсоветсис ылö некытчö эн мун. Вермас кытшöмкö покась шогмыны. Шуам, орöтасö телефоннöй аппаратсö и гусяласö. Вунöтiн, мый мöйму вöлi? Почтовöй ящик горшалiсö.

Быль эд! Макся эз на вунöт этö случайсö. Кытшöмкö умöлик морток, кайскöй вор, яйсорöн нетшкöвтöма сельсоветскöй стена бердiсь почтовöй ящик, нöбöтöма мыйлöкö. Кык неделя веретинса кошшисö сiйö, быд деревняö и хуторö ветлiсö, юасисö, висьтасисö, норасисö — некытшöм толк. Дзик му пытшкö зангисис эта ящикыс.

— Ладно, некытчö ог мун, — добрöя шуис Макся. — И телефоныс дзонь лоас.

Исай Сергеевич сюйыштiс пызан ящикö кытшöмкö бумагаэз и, сьöкыт сапоггезнас ёркöтöмöн, петiс öтöрö. Макся юрнас гогынь-гогынь керис: вот чудакыт. Эн мун пö некытчö. Пхе!

Дата добавления: 2015-11-16