Кузьма Кузьмич — таёжнöй кöин

Öдва Исай Сергеевич ештiс петны ыбöс сайö, кыдз Макся важнöя пуксис пыдын председательскöй креслоö, поздравитiс асьсö бур асылöн. Эта бöрын Чомор чикыртiс шульга синсö, паськыта шынньöвтiс и веськыт киись ыджыт чуньсö мöртiс кымöсас: эн тöждiсь, ушлöй абыз, эн кисьт курыт синваэз. Радуйтчы! Кольччин тэ, счастливöй балбес, сельсоветас хозяин туйö. А хозяин мый вермас керны?

Мый тöдвылас усяс, сiйö и керас.

Верман тэ, шуам, эта жö минутаö петны чуланö да нюжöтчыны-водны топчан вылö, куньны синнэз, а сэсся пондöтны господин Храповицкийкöт интереснöй деловöй сёрни; верман тэ, кöш кымöс, часöт жö котöртны ю дорö да, кыдз и тöн, купайтчыны, медбы и вывтырлö и душалö лунтыр вöлi долыт. А эшö верман тэ туплясьны небыт туруна луд вылын, сотны дзирыт шондi увтын и кынöмтö, и спинатö. Мый колö, сiйö и кер. Некин тэныт паныт и кывджын оз горöтчы.

Бур дело — начальникöн лоны!

Но веськыта висьталам: и медсчастливöй мортлö мукöдпырся оланыс не öддьöн шыннялö. Только ештiс Макся думайтыштны начальстволöн бур да кокнит олан йылiсь, кыдз пырис сельсоветö лесник Кузьма Кузьмич, кöда олiс Ректан нима деревняын. Эз и ёркöтчы лесник, юасьтöг пелитчис кабинетö, ёна нюмыртчис, кöр председательскöй креслоись казялiс бöб Максяöс.

— Öтнат я мый я?

— Чунь öтнам.

— А ачыс кытöн?

Макся юöртiс, кытчö талун мунiс Исай Сергеевич. Кузьма Кузьмич бöра нюмыртчис, но нем эз висьтав. Максялö мылякö кажитчис, что лесник часöт жö шымыртас бöжсö и петас сельсоветсис. Сэк сiя, «хозяин», вермас вöлись керны быдöс, мый охота лоас. А лесник мунны, тыдалö, эз и думайт. Сiя сьöкыта шлёпнитчис öшын дынiсь стул вылö, не тэрмасьöмöн кыскис кармансис махоркаöн кисет. Макся думанас öвтыштiс киöн: но и пон сыкöт, ась пукалö. Поди, коланаö мыйкö висьталас.

Кузьма Кузьмич вöлi паськыт пельпоннэза, топыт вывтыра морт. Бурöй чужöмбаныс сылöн пöльтчöма, нырыс, кöда вачкисис нестандартнöй огурец вылö, тожö вöлi бурöй рöма и кыз, пöльтчöм. Новйис Кузьма Кузьмич дженытик усоккез, кöдна махорка тшынсянь вежöтöмась шучкöп. Эстöн особеннöйыс, конечно, эз вöв. Чужöм кыдз чужöм. Син вылö усис öддьöнжыка вот мый: лесниклöн кымöс вылас, как раз синкыммез коласын, красуйтчис чуньпон ыжда лöз бородавка. Кынымись бы эн дзарнит эта бородавка вылö, быдпырся мылякö думайтсис, что сiя, бородавкаыс, эшö томыник, чужис только неважын и, если сiдз, то чожа мыйись öктас колана вын да вöлись öдззас перыта быдмыны. И сэк — пхе, пхе! — лесниклöн аслас лоас басöк сюр. Крепыт сюр лоас, уна вожа, сэтшöм ладнöй, что и лось завидуйтас. А часöт, сюрыстöг, лесниклiсь чужöмсö интереснöйöн некин оз шу. Гудыраöн кажитчис сiя, пильтыраöн. Векнитик синнэс видзöтiсö морт вылö ехиднöя, бытьтö адззисö мыйкö сэтшöм тор, кöдö адззыны сэсся некин эз вермы. Нiя шучкöп бытшкалiсö любöйöс, кин шедлiс паныт. И тырппес Кузьмичлöн мылякö вöлiсö вексö нюмыраöсь, тожö ехиднöйöсь, дзик брезгуйтiсö мирсö.

Одз тулыссянь, кöр ештас только сывны лым, и сёр арöдз, кöр усьлiс ни виль лым, Кузьма Кузьмич, кыдз сiя ачыс баитiс, лешачитiс пемыт вöрын, керис некокнит таёжнöй удж. А Макся завидуйтiс сылö. Вольнöй казак! Ветлöт да ветлöт мымда колö паськыт веретинскöй вöрöттяс, кöдö шуöны Ошпозъяинöн, любуйтчы природаöн, кывзы, кыдз сьылöны кайез, видзöт, мый керöны зверрез. Нем он шу, бур места аслыс бöрйöма мужик. Натьтö, этасянь видзö асьсö йöз коласын солиднöя, важнöя, некинлö оз копырась — гордöй.

Кузьма Кузьмич, кöр сылöн бур вöвлi настроеннёыс, шуис асьсö таёжнöй кöинöн. И быль — таёжнöй кöин. Кокас сылöн крепыт яловöй сапоггез, вывтас — чорыт брезентiсь куртка. Лесник асыкавлiс асьсö паськыт ременьöн. А ремень бердас видзöт мый öшалö, ого! Кучиковöй пуртöс. А пуртöсас — пурт. Настоящöй охотничöй пурт. Морт öддьöн вачкисьö сказочнöй витязь вылö, герой вылö. И вайöтö сы дынсянь мыйöнкö таёжнöйöн, скипидарöн, шучкöп боссьöма лыс дукöн, нюр турунöн — багульникöн.

— Таёжнöй кöин, лешак.

Оглобля кыза чигарка лöсьöтiкö, сiя юалiс:

— Важын ни мунiс председательыс?

— Только-только, Кузьма дядь.

— Кöда поскотина вылö?

— Этö эз баит.

Кузьма Кузьмич пыравлiс сельсоветö часто, чуть я не быд лун. Тöн вöлi, удерлун вöлi. Пукалiс эстöн жö, баитiсö председателькöт быдберся йылiсь. Унажыксö, конечно, лесник висьтасис паськыт вöр йылiсь, зверрез да пöтка йылiсь. Сiя тöдiс уна, кузь лун вермис бы висьтасьны, кыдз олöны вöрас кöиннэз, руччез да туаннэз, кытöн нылöн нораэз, кыдз велöтöны пияннэзнысö кошшыны кынöмпöт, кыдз керöны сiдз, медбы не шедны вöралiсьлö паныт. Кузьма Кузьмич вöлi не только лесник, но и егерь, опытнöй вöралiсь, и бура тöдiс, кытöн пöжсьöны да токуйтöны дозмöррез, таррез. Неважын, кöр сылöн настроеннёыс вöлi бур, босьтлiс Максяöс сьöрас, кыкöн ветлiсö Чуашор сайö, Ошпозъяинö. Мыйсö только эз адззылö сэтчин!

Эстöн колö висьтавны, что Кузьма Кузьмич — мужик строгöй, деревенскöй бöб челядьöс сiя синöн оз адззы. И вöрö сiя Веретяись челядьсö некöр оз нуöтлы, некинöс оз босьт сьöрас. Некинöс! А Максяöс нуöтлiс. Этö, натьтö, сiйöн, мыля зонкаыс уджалö сельсоветын. Государственнöй служащöй! Босьтiс сьöрас, отсалiс керны неетша интереснöй снимоккез. Макся фотографируйтiс, например, осторожнöйся-осторожнöй кайöс — дозмöрöс, сэсся бурундукöс. А кöкöс, кырöс, уркайöс сiя фотографируйтiс, кыдз баитöны, и одзсянь, и бöрсянь. Öддьöн охота вöлi фотографируйтны и ошöс öтлаын пияноккезнас, но осторожнöй мам орддис нiйö боки, матö эз сибöт.

— Эн тöждiсь, зонка, — шуис сэк лесник. — Ошыстöг буржыка овсьö. Пантасян окаяннöйкöт не аскадö, дак не рад лоан. Вунöтiн, мый аркмис мöйму Исай Сергеевичкöт? Вот сiя и эм.

Макся, конечно, эз вунöт этö случайсö. И, натьтö, век оз вунöт. Эшö бы! Кыдз висьталöны шутниккез и ачыс председательыс, вуграсис сiя мöйму вöрын, Пуртымка ю дорын, пукалiс чурка вылын, умöльсö керны нем эз думайт, вуграсис и вуграсис. Чери кокалiс бура. Окунёккез да кельчиэз, кыдз тшыг поннэз, öтамöдöс одзалöмöн, чепсасисö вугыр дынö. Нельки гаг эз корö. Джын час эз чулав, а Исай Сергеевич ештiс ни кыйны вит килограммся унажык. И сiдз сiя ылалiс вуграсьöмнас, что поплавокысся нем оз адззы и нем оз кыв. Эта коста и локтас сы дынö гусясьöмöн öтiк шутник: локтас бöрсяняс да кы-ыдз нопкас горбас кулакöн! Исай Сергеевич перво лэбзяс воздухö, а сэсся шогдiöн тыртöм мешöк моз клобыснитчас ю шöрас. Петас сiя мöд берегас, видзöтö, а сэтöн, кытöн вуграсис, Топтыгин хозяйничайтö: öмтырнас жоритö кыйöм черисö — чавк, чавк... Эз гленитчы эта Исай Сергеевичлö. Дзарнитiс-керис ыджытжык увья кöз вылö, босьтiс галя да шентiс ошыс ладорö. Ош дугдiс шляпкыны öмнас. Сiя дивуйтчöмöн видзöтыштiс чериалiсьыс вылö, кöритöмöн гогинь-гогинь керис юрнас, эрзöмöн мыччалiс кулаксö, сэсся сiйö чуркасö, кöда йылын пукалiс мортыс, да ыджыт эд вынöн свиснитiс-чапкис юыс вевдöрöт. Чурка лэбзис, кыдз ракета, шумöн-зыкöн. Но боки. И бур, что эз инмы чукыля кокыс, а то бы!

И сёдаки стрöймöма Исай Сергеевич, кöр сiя сьöвзьöм ошыс ладорö да пондöма оськавны гортас, сэк и казялöм: веськыт кок пидзöсыс биöн сотчö, сiдз и поткöтö-висьö — сулавны оз позь. Ваас усикö, тыдалö, сидзöма кокнас топляк бердö...

— Оша-миша — опаснöй зверь! — шуис Максялö лесникыс, кöр ветлöтiсö вöрас. — Но сiйö вакрамешö.

Зонка согласитчис сыкöт. Но ас кежас думыш керис; не ме лоа, ог кö кер и ошыслiсь портрет. Вот завидуйтасö дружоккез, кöр местнöй газетаын карточкасö печатайтасö. Поди, и центральнöй журнал примитас...

Нем он шу, бура сэк гажöтчисö вöрас, адззылiсö сякöй кайсö и зверьсö. Вот бы и талун иньдöтчыны Чукашор сайö, ветлöтыштны одз да бöр. Пантасис бы сэтчин Гришкакöт, школьнöй ёрткöт — видзöтан, басни сайын луныс чулалiс бы казявтöг. Корны я мый я лесникöс, мед босьтö сьöрас? Вон пукалö сiя, лöсьöтö аслыс öмчöскöт — чигарка. Сылö и горе абу: кытчö охота, сэтчö и мун. А сё жö мыйлö сiйö вöр дядьыс эта одза сельсоветö чапкис? Важнöй делоöн, поди?

Чигаркасö öмö пешалiкö, Кузьма Кузьмич сьöкыта дзарнитiс Макся вылö, дыр пышналiс зонкасö лэчыт синнэзöн, пильтыралiс ехиднöй тырппесö сiдз и этадз, вöлись юалiс:

— Висьтасьöны, тiян гажа да гора Веретяын тöн рытнас кинкö пишались лыйсьöма. Охота бы тöдны, кин этö сiдз бöбалö-гажöтчö? Небось, бöра Исай Сергеевич? Кинöс сiя вийис?

А, вон мый вöлöма! Тöння лыйсьöмыс сiйö маитö. Вöлi сэтшöм дело, вöлi. И суськыны сэтöн нем. Макся шынньöвтiс, висьталiс веськыта.

— Медбöрья петушоксö жогнитiс. А сыбöрын, Кузьма дядь, и ме сы пишались кожнитi. Важ баня ыбöсö лыйи. Пятьдесят кыным оськöв вöлi баняыс дынöдз, а бура инми пятнаö. Двадцать дробь мымда крапкöмась пятнаас. Вот эта пишаль дак пишаль.

— Шедат тi бедаö, кык дружок-начальник, шедат, — ас кежас мыйкö думайтiкö, негорöн шуис Кузьмич. — Исай Сергеевич народ дырни чорыт кыв сетлiс — не ыжмавны сэсся, не лыйсьыны, кытöн оз ков. А вот видзöт тэ. Бытьтö учöтик зырымöсь бедь, сапучей. Нет, кин заразитчис пишальöн, сiйö он ни веськöт. Этö пöрись отир сiдз баитлiсö кöркö. Быль баитлiсö.

Паныт Макся висьтавны нем эз вермы. Лесник вöлi прав. Аслас пишальöн Исай Сергеевич неетша ни ыжмалiс-бöбалiс. Кин бы эз лок деревняö, а веретинса быдöнлö сералöмöн юöртлiсö, кыдз этö нылöн солиднöй председатель вдруг лоис отчаяннöй лыйсисьöн. И Макся аслас дружоккезлö тожö висьтасьлiс.

...Сыбöрын, кыдз Исай Сергеевич пантасьлiс ошокыскöт, сiя быдса месяц куйлiс больницаын, нельки операция керисö. И решитiс сэк: «Мый бы эз ло, а вештiся ошыскöт, ужо иньдöта сы кымöсö пуля-жакан. И вöрö сэсся пишальтöг некöр ог мун». Висьталöм — керöм. Сразу жö, кыдз петiс больницаись, сiя кежис магазинö, тöдса вöралiськöт бöрйис аслыс медбур двустволка, сэтöн жö небис колана провиант. Гортö шагнялiкö, Исай Сергеевич чарöтiс-берездöтiс ракаöс, кöда пукалiс телеграфнöй столб вылын. И сiдз эта сылö гленитчис — лыйсьыны!

Ракаыс вöлöма не простöй, а кытшöмкö волшебнöй я мый я. Эз сетлы мортлö не он, не спокой. Мый эз кер öнi сельсоветiсь председатель, а син одзас сiдз и мелькайтiс сьöд карзiсьыс, бытьтö ыджыт галя, усис столб вылiсь. Чожа Исай Сергеевич локтiс сэтчöдз, что онмöссьыны эз вермы, оз кö уськöт пу вылiсь кытшöм-нибудь каёкöс. Охотниччöй опыт сылöн, конечно, эз вöв, лыйлыны дозмöррезöс да таррезöс эз письты, а вот кöрымкайезöс, малиновкаэзöс да мöдiк каёккезöс пизьдiс неетша. Мунас, вöвлi, вöрö и лыйсьö, кытчöдз сьöлöмыс оз бурмы. И лыйсис гусьöник, кытчöдз сельсоветö эз лок Кузьма Кузьмич. Локтiс, висьталiс строгöя:

— Кöть тэ и председатель, а вермам и накажитны. Эн я мый я лыддьöт виль законсö, кöда тшöктöма природа берегитны? Муна тöн Нитша логöт, а сэтöн гöрд голяа кыр валяйтчö. Мыйлö тэ сiйö вийин? Добро бы — кöинöс нето кырнышöс...

Грубöйкодь морт вöлi председатель, темпераментнöй, и вермис бы öмавны лесниксö, висьтавны сылö, мед эз сюй кузь нырсö, кытчö оз ков. Но сэтöн гöрдöтiс, кыдз зоночка, кöдö пельöттяс петкöтiсö йöз карчйöрись. Бобгыштiс:

— Лыддьöтi ме законсö, лыддьöтi. И ог сэсся вий öтiк каёкöс. А ошсö, сiйö дураксö... Колiс бы заваритны кымöсас пуля. Пондiс бы тöдны, кыдз отирлiсь чери мырддьыны. Да!

— Ошсö öнi тожö дорйö закон.

— Тöдам! Но и сылö, чёртлö, оз туй вöрас бöбавны. — Адззöм кинкöт воюйтны. Ылöстöм зверькöт. Тэ жö морт!

— Вот сiя и эм, что морт. Природалöн царь! Лесник öвтыштiс кинас да мунiс гортö — лыйсьы, кöть лун и öй. Но Исай Сергеевич вöрын сэсся эз лыйсьы. Вежöртiс: шутитны оз лöсяв. Закон эм закон. А мый керны, кöр пишальыт спокой оз сет? Кытчö бы эн мун, а сiя сё тöдвылын. Локтан гортö, а пишаль, знаменитöй тулка-двустволка — вот сiя, öшалö кровать весьтын, сiдз и корсьö киö. Мый сэтöн керны?

Öтпыр рытнас, висьтасьöны соседдэс, Исай Сергеевич юалiс иньыслiсь:

— Тэ, Марья, бöра окрошка лöсьöтан? Бöра öтiк квасок?

— Да мый тэ, Исаюшко? — шыасис иньыс.— Кин жö öнi окрошкасö оз сёй? Огуреццез свежöйöсь, быдкодь зелень. А ме вот эшö кушманок тёрита, хрен невна пукта...

— Кушманок, хрен! А мыля бы яйтор не крöшитны?

— Тэнчит ракаэтö?

— А типоккез петалiсö тулыснас? Петалiсö. Петушоккез эмöсь? Эмöсь. Дак öтiклiсь юрсö позьö и мургыльтны...

И вдруг Исай Сергеевич бöбись макнитiс кинас, кыдз вöлi, сiдз и чепöссис пишаль дынö:

— Марья, лоас тэныт яй!

Минута бöртi сiя öвтчис ни пишальнас öтöрын, вöтлiсис типоккез сьöрын, старайтчис вашöтны нiйö ылöжык керку пельöс сайö. А кöр öтiк петушок торйöтчис воннэс да сойес дынiсь, öдззис котöртны забор пöлöн. Исай Сергеевич метитчытöг лыйис сы ладорö. Петушок кык метрася вылöжык лэбзис воздухö и вöлись усис петшöрьяинö. Рытся воздухын павьялiсö кокнитик гöноккез.

Вот сiдз и пондöтчис. Кыдз рыт, Исай Сергеевич керку дынын горалiс пишались лыйсьöм: хозяин жогйис петушоккезöс. Марья только клопöтiс киэзнас боккез кузя, котöрöн вовлiс соседдэз дынö и норасис синвасорöн:

— Бöбсялiс! Добрöй отир, бöбсялiс!

А паныт сылö соседдэс мый висьталасö? Исай Сергеевич абу кагаок, ачыс тöдö, мый керö. Сэтчö жö — начальство. Висьтавны сылö, что öддьöнöв лякасин пишальыс бердö? Кыдзкö оз лöсяв. Да и ассис эд петушоккесö пизьдö, не йöзлiсь. А хозяин — барин. Вермас быдöс сразу вийны да сёйны куштытöг-потрошиттöг. Кинлö кытшöм дело?

— Бур петушоккесö пизьдыны? — кыдзкö юалiс Кузьмич.

Исай Сергеевич мыччалiс сылö певсö:

— Во! Лыян и кажитчö, бытьтö куропаткаöс уськöтiн, а совсем не петушокöс. И шыдыс чöскытжыкöн кажитчö, романтичнöйжыкöн я мый я. Паняла-вызга тöн кашникись, чöскöта öмöс. И друг — хруп! Пинь увтам мыйкö чорыт шедiс. Дзарнитi, а сэтöн дробь. Хо-хо! Мыйöн не вöр пöтка сёя!

— Быль эд! — вак-вак серöмтчис и Кузьмичыс....Шочыника öтöрö дзарьялiкö, Кузьма Кузьмич чöскыта нималiс кыз чигарка, тыртiс кабинетсö юр кольмöтана махорочнöй тшынöн. Медбы не пöдны, Макся чеччис пызан сайись, ванйöвтiс öшын. Сьöкыт дука лöз тшын пондiс везъясьöмöн кыссьыны öтöрö. И кöбы эта кадö сельсовет дынöт оськалiс морт, сiя непременно думайтiс бы, что сельсоветiсь председатель кабинетын кытшöмкö супоней жарöтöм ыджыт костёр. Но öтöрöт часöт некин ни эз ветлöт: ыджыттэс ештiсö ни мунны видз вылö, а челядьпöлöс эшö узис да видзöтiс быдкодь вöттэз.

— Медбöрья петушокöс жегнитiс, шуан? — синнэзö видзöттöн шынньöвтiс лесник. — Эта и буржык, пожалуй. Часöт, колö думайтны, дугдас ни ыжмавны, лöньсяс. А то беда эд!..

Дата добавления: 2015-11-16