Чеселты

Нывгæнæг Коцты Паулейæн

Тæригъæддаг у ацы бон, —

Æппын дзы рухсы тæфаг нал и.

Ныссабыр арф рæбынты дон,

Мылазон мигътæй хъæу ысмал и.

Æгуыдзæг уавæры хызæй

Нæй ирвæзæн, нæдæр ын хос и, —

Æмæ уæд рох хъуыдыты зæй

Ныккæлы рагсагъæсы ностыл.

Кæсы дæм: а зæххыл, бæгуы,

Æппæт дæр бавзæрстай дæ зыны,

Дæ уды фарнæй та, мæгуыр,

Дæ цардыл иу мисхал нæ зыны

Хæрзæрдæм. Базыдтай дæ бон

Цы уарзтай, йе нæ уарзтай, уымæй:

Дæ нысан ма — дæ ис, дæ бон, —

Фæллад галау нæ хизы хуымæй.

Кæй бахъуыди дæ ном, дæ рыст? —

Дæ цардæй дæ фæрсæг дæр нал и,

Æмæ уæд кæ пайдайы куыст, —

Сæрæндзинад у уый, амал у.

Гъе-гъей, мæ ницæйаг зæрдæ! —

Нæ ивын урс æхсыр сылыйæ:

Мæ хъал бæхы ызнæт фæдтæ

Кæсут, — сызгъæрины æвдылынц!

НЫФС

Æнусонæй ницы ис а зæххыл, уый

Цæмæйдæрты саби дæр зоны:

Рæстæгмæ кæй зилы нæ царды æлхуый,

Кæд уымæн рæсугъд у, мæ боныл?!.

Кæд уымæн æхцон у йæ зын уа, йæ цин,

Йæ дудаг нæ удмæ нæ хъары:

Фæлдисæг æрдзæй дæ цы рæсгæг фæци,

Хъæлæсыдзаг сис уым дæ зарæг.

Цæстысыг поэзийæ никуы кæлы,

Йæ уаз мырты зарæг йæ мæт у.

Куы райдайы иугæр тæригъæд кæнын

Йæхицæн — поэтæн мæлæт у!..

Нæ базыдтон цардмæ хæрам кæнын æз,

Цыфæнды фыдудæй куы мæлон, —

Ыссардзынæн цъитийы цъуппыл фæрæз,

Фæхæсдзынæн уырдæм мæ зæронд.

Цæудзысты мæ рухс дуджы афонтæ уæд

Мыды къусау — изæр уа, боны.

Цæргæйæ нæ удæн цы тас у мæлæт —

Æгас кæй уыд, мард уый нæ зоны!..

Дата добавления: 2015-09-05