Фыды хъарæг цæрынхъуаг хъæбулыл

Гаглойты Валодяйæн

Ехх,

Мæнæ дунейыл цæй рухс бон

Ныккодта, —

Хур зæхмæ æлвасы йæ сызгъæрин

Тынтæ!..

Æз ницыуал хатын, мæгуыргурау,

Сонтау, —

Ды

Сыджытмæ цæуыс, мæ хъæбул!..

Мæ зынтæ

Æз нал кæнын диссаг... Нæ мæрддзыгой

Адæм

Сæргуыбыр, къуытты сты. Кæд алкæмæ

Хъары:

Мæ цард мын æнæ дæу кæй нал уыдзæн

Адæн,

Мæлæт нын цæлхдурау кæй ыскодта

Арæн!..

У,

Ног чындзы уатау дæ ингæн

Нывæфтыд:

Йæ къултæ — æрмæйлæгъз, зæдбадæнау

Хъарм у...

Ды нал æрцæудзынæ æнустæм

Мæ тæфтыл, —

Хъысмæты тæрхонæн лæг алцыдæр

Бары.

Фыццаг хатт уынын æз мæ дунейы

Диссаг:

Дæ тæлфгæ æнгуылдзтæ — æндзыгæй

Дæ риуыл.

Кæд æрдз дæр фæзоны хуыздæрæн

Цы иса...

Цæссыг мæ нæ хауы, мæ зæрдæ дыл

Ниуы!..

Адзал та кæм хъæцы йæ иударон

Зиуыл, —

Дæ сырх уадултæ мын ныр адардтой

Цикъæ...

Зæрондæй мæ уадзыс уæлæуыл,

Мæ иунæг, —

Хъæбулæй ыскæуæг мыл нал уыдзæн,

Никуы!..

Дата добавления: 2015-09-05