АДЗЗИСЬЛЫТÖДЗ, ГАЖА ПЕЛЬÖСОК

Асывнас соя-вона коласын вöлi немöй война. Кöр ми Васькакöт пырим амбарись керкуö и лöсьöтчимö сёйыштны, аслас комнатаись петiс Настя. Сiя поздравитiс менö добрöй асылöн, а воныс вылö дзарнитiс сiдз, что добрöй морт пышшис бы вакрамешö. Но не сэтшöм морт вöлi Васька. Сiя спокойнöя пуксис пызан сайö и босьтiс киас медыджыт нянь шöрöм. Öт син дорнам ме казялi, кыдз сiя хитрöя мигнитiс сойыслö, мыйсянь Настя гöрдöтiс, кыдз мак. Ыджыт голубöй синнэс сылöн койыштiсö быдса кольта бичиррез и, кажитчис, вот-вот чарöтасö вонсö. Но Васька терпитiс и этö. Сiя кисьтiс кружкаö йöв и сёйис сэтшöм аппетитöн, что шутнялiс пель йыввес сайын. «Мыйкö бöра уджалöма», — думыш кери ме, но юасьны эг понды.

Керкуын горöн баитны эз туй. Марфа Демидовнаöс эшö тöн рытнас чапкöма кудобаö, и сiя куйлiс аслас паськыт кровать вылын, кыдз настоящöй покойник. Марфа Демидовна только недыр кежö и осьтлiс синнэсö, — этö сэк, кöр ме сетi сылö квартира понда деньга. Медбы керны эта мортлö кöть кытшöмкö бур тор, ме козьналi сылö ассим котелокöс, а фляжкасö тшöктi нöбöтны Демидлö, мыся, пригодитчас, может, стариклö вöррезöт ветлöттöн.

И вот кузь шаггезöн оськала деревня шöрöт, Васька котöртö одзам. Сiя лöсьöтчис кольлавны менö пос дынöдз, а сэсся мунны айыс дынö.

Правленнё дынöт мунiкö менö кытсöвтiс Илья Сергеевич:

— Пырав, дружок, виль юöррез эмöсь...

Сы сьöртi, кыдз председатель шыннялiс, дзик виль пятак, ме вежöртi, что юöррес бурöсь.

— Ловзьöм эд кагаокыс! — панталiс менö Илья Сергеевич.

— Н-о-о-о!

— Быль. Эшö асывнас Надяыс звонитiс, подвода корис. И тöдан, кин ямщикнас мунiс? Заклад понда песся, некöр он тöд! Зоночкаыслöн айыс, Петькаыс. Локтiс ачыс правленнёö и корис вöв, кайöта, шуö, и сразу гортö кежöта, гöтрася, шуö, талун жö. Вöрзьöма сьöлöмыс. Тожö эд морт, не кöин...

— Эта сiдз. Только примитас ли Надяыс? Лöг сiя.

— Но этö арталамö кыдз-нибудь. Ловья эшö Ананикаыс, лöсьöтас сiя быдöс. Сiя лыддьöтöма Петькаыслö лекциясö, осьтöм синнэсö, вежöртöма мöдыт, что оланыс не шутка.

— Да, эм мый вылын думайтны.

— Вот ме и шуа: эм мый вылын, — согласитчис председатель. — Кужам решайтны öддьöн сьöкыт и важнöй хозяйственнöй вопроссэз, лыддисям неумöль коммунисттэзöн, а кык морт коласiсь отношеннёэз эг вермö артавны. Ог эшö кужö уджавны отирыскöт.

— А кыдз тiян партийнöй секретарь? Сё тай эз лок!

— Умöль сылöн делоыс, — ыш ловзисис председатель. — Важын ни войнаыс чулалiс, а следдэс сё эшö тöдчöны. Оссьöмась миян секретарьлöн важ ранаэс. Городскöй больницаö иньдыны мöдöны. Ковсяс пыравлыны райкомö, корны виль секретарьöс. Вот кыдз тэ думайтан, Анань Данько лöсялiс бы?

— Славнöй мужик, бур секретарь лоас...

Председатель висьтасис, что сенокос чожа лоас кончитöма, лун-мöд бöртi петасö вундыны. Бухгалтер пукалiс аслас пызан сайын, шваткöтiс счёты вылын, куритiс трубка, гижис мыйкö перыта-перыта и кöть бы öтiк кыв шуис. Этö мортсö интересуйтiсö только цифраэз, а сэсся кöть быдöс мун вакрамешö. Сухарь. Председательлö усис мыйкö тöдвылас и шынньöвтiс:

— Егорыс, Егорыс! Бöра эд соровтöм ассис. Не весь, ох, не весь народ сiйö шуö мутэйöн.

— Мый сiя керöм?

— Кыскöм кикиморасö. Доддялöм ойнас вöв, пуксьöтöм Матренсö и — аллё посадö. А сэтчинсянь Кривöй Матренлöн веськыт туй — вичкуö.

— И тэ жалейтан?

— Кытшöм жалейтöм! Мед мунö. Но эд Егорыслöн сознаннёыс сэтшöм жö вöлöма, кыдз и кикиморалöн. Сiя эд думайтöм мездыны Матренсö судiсь. Вот эд мый. Штрафуйтi талун сiйö волыс понда, а лун-мöд бöртi ковсяс собраннё вылын кеслыштны. Если оз öвсьы, дак висьталам чорыт кыв, мед ас вылас бедуйтö, тырмас сыкöт. Тэ талун кытчö? — вдруг юалiс Илья Сергеевич.

— Гортö иньдöтча. Олi татöн кык неделя, колö и честь тöдны.

— Подöн? Посадöдз подöн? Да сулав, ме тшöкта доддявны жеребецсö, сулалö весь, совсем дышмис...

— Оз лöсяв меным вöввезöн гöняйтны, — шыаси сылö паныт. — Кыдз не кыдз, а отпускник, турист, позьö шуны. Туристтэз унажыксö подöн.

Председатель дыр видзöтiс веськыта чужöмам, гогинялiс юрнас и шуис, менö осудитöмöн:

— Вольнöйлö — воля...

Ме сетi сылö ки, лöсьöтчи мунны. Илья Сергеевич, тыдалö, эз вермы овны баиттöг, юöртiс эшö, что талун петыр лун, а народыс удж вылö мунiс, «вот рытнас разь бöра юыштасö». Ме кывзi и баитi тожö, что колö чулöтны отирыс коласын политическöй удж. Председатель согласитчис, и ми янсöтчим.

Ме оськалi плотина вылöт, думайтi колхознöй олан йылiсь, знакомöй отир йылiсь. Бур сёжö татöн народыс, уджалö. И если бы не кикимораэз, совсем бы гажа вöлi овны. Кöр нiя орасö, кöр дугдасö маитны асьнысö и бöбöтлыны отирöс? И хитрöй жö эта кикимора, ох, хитрöй! Кужöмöн бöрйöма кадсö аслас нятьöсь удж понда: колхозын мунö пыль страда, быдöс активисттэз югдандорсянь сёр рытöдз уджалöны видз вылын, гортын только стариккез да старухаэз — уджав ныкöт. Сэтчö жö председатель пöдналöма клуб, партийнöй организацияись секретарь шогалö, райкомись гожумбыт некин оз вовлы, лекцияэз оз лыддьöтö. А мый сэсся колö кикиморалö? Простор! Электростанция дынын ме бергöтчи Ошпозъяинлань, медбöрьяись дзар кери Чöвпан вылö, тайгаыс вылö, каждöй керку вылö и шуи думанам: «Мир тэныт, гажа пельöсок». Гажтöм вöлi янсöтчыны деревнякöт, бура ме йитси сы судьбакöт эна луннэзö.

Пос дынын видзчисис менö Васька. Зонка пукалiс перила вылын, юрсö öшöтöма: гажтöм, тыдалö, и сылö. Кык неделя коста лякасис ме бердö и дыр, натьтö, оз вунöт, кыдз ветлöтiм кыкöн вöррезöт, кайлiм Чöвпан вылö, баитiм быд торыс йылiсь. Ме пукси ордчöн сыкöт, кери куритны и юалi:

— Но, Васька, давай висьтав, мыля тэ вылö сойыт лöгасис?

Васька öзйыштiс и дзик дрöгнитiс, видно, эз видзчись этö вопроссö. Но минута бöртi мигайтiс шульга синнас.

— Адззылi тöн рытнас öтiк дело. Только локтi гортö, а сэтöн льöмпуэз увтын, лабичок вылын, пукалöны Настя да Гриша. Думайтöны, пемыт дак некин нiйö оз адззыв. Кыдз бы не сiдз! Пуксьöмась ордчöн и сёрнитöны мыйкö гусьöник. Но ме и шупки льöмпуэс увтö му комок, сэсся серöмтчи...

— Эх, Васька, Васька, — öмалi ме сiйö. — Öбидитiн тэ менö, вот кыдз öбидитiн аслат висьтасьöмöн. А ме тэныт эшö спиннинг мöдi козьнавны. Умнöй тэ зонка, вежöра, а вот керан мукöдпырся сiдз, что сьöласьны охота. Мамыт тэнат пемыт, неграмотнöй инька, сiйö Кривöй Матреныс бöбöтöма ни начöдз, вот и пырö юрас быдкодь думаыс, а тэ пряниккез понда готов сылiсь ылöстöм порученнёэз тыртны. Вежöрт тэ сiйö: Настя и Гриша любитöны öтамöдöс, а тэ мешайтан нылö.

Стыд лоис Васькалö эна кыввезсянь, дзебис синнэсö, гöрдöтiс. Минута мымда чöлöм бöрын сiя шуис:

— Ог сэсся понды, дядя. И арифметика сьöртi арнас отлично получита, вот адззылан, отлично пуктасö. Ме эд, дядя, аслам бöб кузя умöль отметкасö заробитi. Задачасö кужи решайтны, а вот эг решайт...

― А мыля?

― Да мамö кузя тожö.

― Интересно. Ноко висьтась!

— А вот. Эшö тöвнас Мария Сергеевнаыс, миян учительницаыс, шуис, что нылö, кин бура пондас велöтчыны, сiя сетас кроликкез. Председатель пö миянлö кроликкез кöсйö, отсалат пö колхозыслö яй вылö быдтыны. А кроликкесö ме öддьöн радейта, но и пондi старайтчыны, медбы табелям только отличноэз лоисö. Да весь быдöс. Кöр гортын висьталi, мыся тулыснас меным кроликкез сетасö, понда, мыся, нiйö быдтыны, дак мамö быдса шать бердам чеглалiс, сiдз вартлiс. Только кутчись, шуö, кроликкез бердö, сразу пö гортiсь вашöта. Нiя, шуö, кроликкес, мортлiсь счастье пышшöтöны, примета пö сэтшöм эм. Мый меным кольччис керны? Понда кö бура велöтчыны, кроликкез сетасö, сэк мамö вашöтас гортiсь да эшö вартлас, сэтчö жö думайтi, мыся, может, быль примета сьöртi шогмас...

— Сiйöн и юасин тэ приметаэс йылiсь?

— Мыйнö.

— А пионерас мыля эз примитö?

— Мамö эз тшöкты гижсьыны. Нарочно получитi умöль отметка и эз сетö кроликсö и пионерöн эг ло. Бöбöтi Мария Сергеевнасö...

Ме вежöртi, мый маитiс зоночкаöс, мыля сiя дзеблiс пыр синнэсö, кöр пондöтлi кроликкез йылiсь басни. Жаль лоис этö мортсö, учöт эшö сiя и оз на куж торйöтны бурыс дынiсь умöльсö. Сёжö осудитi Васькасö и решитi баитыштны сыкöт серьёзнöя, кыдз ыджыт морткöт, мыся, осьта, может, сылiсь синнэсö.

— Учительницаöс, шуан, бöбöтiн? Нет, не сiйö, а асьтö, Васька, бöбöтiн. И эшö, тöдан, кинöс бöбöтiн? Государствоöс! Да-да, государствоöс! Медбы тэ вермин велöтчыны, государствоыс аслас деньга вылö строитiс Ошпозъяинö школа, и учительницаыслö, кöда тiянöс велöтö, государство жö сетö уджыс понда деньга. И думайтö государствоыс: вот быдмас Васька, настоящöй мортöн лоас, коммунизм строитны пондас, колхозлö отсалас, А Васька кутiс да и бöбöтiс государствосö!

Васька паймис совсем, эз тöд, мый висьтавны, и только кваркышалiс синнэзнас.

— Ог сэсся, дядя, некöр сiдз ог кер. Вот местаись не вöрзьыны, честнöй кыв сета.

Но ме решитi вайöтны пондöтöм делоöс конецöдз и шуи:

— Нет, Васька, этö не быдöс. Тэ кер вот эшö мый: кöр локтас учительницаыс гортö, висьтав сылö, кыдз бöбöтiн и мыля бöбöтiн государствосö, ась сiя и мамыткöт невна уджалыштö.

— Висьтала, дядя, быдöс сiдз и кера, — кöсйисис зонка. — И мамöлö висьтала, мыся, некытшöм тэнат приметалö ме ог верит. А Илья Сергеевичлö тöдан мый, дядя, висьтала?

— Мый?

— Мыся айö лосьпияноксö начкывны мöдö. Öтпыр ачым кылi, кыдз мамöлö баитiс: начкыла, шуö, куканёксö, а отирлö юöрта, что вöрö пышшис. Хитрöй айö...

— Ах, вон мый сэтöн вöлöма! Да, дело. Давай, Васька, кер быдöс, медбы куканёкыс ловья кольччис. Тэ, пожалуй, вашöт сiйö вöрö, мед мунö мамыс дынö.

Ме козьналi Васькалö спиннинг и кöсйиси локны мöдчид, медбы проверитны, кыдз сiя тыртас честнöй кывсö. Васька радувьяс эз вермы баитны, только кваркышалiс синнэзöн да тулис нiйö кулакнас. Спиннинг! Лоас мыйöн ошшасьны Петька дружокыслö. Деревняын некинлöн сэтшöм спиннингыс абу. Ме висьталi аслам том приятельлö адззисьлытöдз и петi туйö. Зонка сулалiс пос вылас и, кытчöдз эг саясь, сё горöтлiс:

― Дядя, мöдчид лок миянö! Ми бöра Чöвпан вылö кайлам, чери кыйны пондамö! Дядя, лок!

— Локта, Васька, обязательно локта!

Туй вылын поснитик галька нёштöма няжöтiс сьöкыт сапоггез увтын, вöлi бус, и ме вуджи канава сайö, кытöн векнитик туёк чуклясьöмöн кыссис ордчöн ыджыт туйыскöт. Эстöн öтiк кустiсь ме вундыштi льöмпуовöй шать, кери сыись бедь и, жагвыв оськавтöн, вачкалi туй дорись турун заэз кузя. Вöрö пыртöн эшö öтпырись дзарнитi деревнялань. Васька сё эшö сулалiс пос вылын и кöр казялiс, что ме бергöтчи сылань, гажтöма öвтiс кинас. Верми ли ме вöрзьöтны сылiсь сьöлöмсö, осьтi ли синнэсö? Кин тöдö, может, и осьтi.

Вöрын, кыдз пыр овлö гожся жар лунö, вöлi лöнь. Пожуммез и кöззэз сулалiсö дзик тувдöмöсь, пипуэзлöн да кыдззезлöн листтэз öшöтчöмась, кыдз трепиччез, мукöдыс гардсьöмась трубочкаэзö, озö и вöрö. Но вот деревняыс ладорсянь лэбзьыштiс перыт тöвчик, и вöр сразу жö ловзис. Ыджыт пуэз нюжöтiсö уввезнысö, дзик киэзöн кутiсö тöвчиксö. Недыр мыйись быдлаын кылiс гажöна шушкöтчöм: великаннэз юасисö, кытöн сiя, тöвчик, вöлi и мый адззылiс чочком светас...

Дата добавления: 2015-11-16