ДЕРЕВЕНСКÖЙ РЫТ

Рытнас локтiс Настя. Сiя, кыдз каёк, чывкнитiс керкуас и сразу жö öшöтчис мамыс голя вылö.

— Мамук!

Марфа Демидовна ыжмитiс нывсö аслас ён морос бердö, малалiс сылiсь юрсö и радсянь эз вермы горöтчыны нем. Ог тöд, казялiс ли Настя, а ме син дорнам адззылi, кыдз мамыс размöд дзарнитiс нылыс кынöм вылö и кокнита ловзисис, дзик шуис: слава тэныт, господи, нем абу...

Вöлi Настя совсем эшö подросток, семнадцать год гöгöрся нылочка, неыджыт мыгöра и винерик, мыйсянь кажитчис аслас годдэзся томжыкöн. Сiйö позис бы шуны не öддьöн басöкöн, если бы не синнэс да не тырппес. Природа абу жалейтöма сы синнэз вылö голубöй краскасö, мавтöма кыдз колö и керöм этö öддьöн кужöмöн. Баитны кö тырппез йылiсь, то нiя вöлiсö гöрдöсь, неöддьöн кызöсь и неöддьöн вöснитöсь. Басöксьöтiс Настяöс и платьеыс, кöда вöлi бытшöма вурöма уна рöма цветтэза ситецись.

Марфа Демидовна сывьялiс нывсö, малалiс спинасö, пельпоннэсö, неöтпыр шуис: «Кыдз тэ умöльтчöмат, малинтусь», — а Настя кань моз леститчис мамыс дынö и быд движеннёöн мыччалiс, что ёна гажтöмтчöма сытöг. Картина вöлi трогательнöй и, медбы не мешайтны мама-нылалö, ме лöсьöтi куритны да петi öтöрö.

Вöлi рыт, сiя сельскöй гожся рыт, кöда йылiсь быд поэт гижö стиххез. Гажаöсь нiя деревняын. Öддьöн долыт овлö сьöлöмлö, кöр ытшкöм видззез ладорсянь пöльтыштас уль тöлок и пыртас деревняö косьмыны пондöтчöм турунлiсь да быдкодь цветлiсь лысваын миссьöтöм нежнöй аромат. Шондi койыштö медбöрья югöррез, и вöр ладорсянь гусьöник кыссьöны пемыт вуджöррез. Ачыс вöрыс жагöник öштö строгöй линияэз и пöртчö сук массаö, кытöн оз кыв öтiк шы торок.

Эта кадö удж вывсянь локтöны инькаэз да мужиккез. Нiя оськалöны чöлöмöн, öтi-öтi горöтчас кытшöм-либо кыв, мöдiк гогиньыштас юрнас — и быдöс. Зато нывкаэз да зонкаэз, кöдна удж вылö мунöны пöриссез одзын, а локтöны гортö ны бöрын, кривзöны дугдывтöг, кынöм висянöдз сералöны неыджыт пустяк вылын и орöттöг горöтлöны частушкаэз.

Эта жö кадö джынняннэзöн тронгöмöн локтöны гортö мöссэз. Нiя горöн баксöны, тшöктöны осьтны воротаэз. Воздухын дас минута мымда öшалö парнöй йöв дук.

Мужиккез, тыдалö, ештiсö ни сёйыштны и öнi öксьöны вон кинлöнкö öшын увтö, куритöны и обсуждайтöны лунся делоэз. Йывтöм кедр дынын кылö ни нывкаэзлöн смех, а неылын, ыббез ладорын, кытöн эм деревня Пугин, воздухсö косьöвтiс гармоння. Фермаэз ладорсянь локтiсö нывкаэз. И сразу жö, кыдз шыасис гармонняыс, нiя иньдiсö сылö ответö частушка:

Ой, миянлö честь и слава —

Ми уджалам перыта.

Сымда йöвсö высьтам таво,—

Вöтамö Америка.

Ме дынö локтiс двадцать пять год гöгöрся детина, пуксис лабичок вылö, корис спичаэз öзтыны папироса. Сы вылын солидолöн лякöсьтöм комбинезон, кокас кирзовöй сапоггез. Бензин да солярка дук петiс паськöмсис и юасьтöг позис тöдны, кин пукалö ордчöн, — конечно, механизатор. Тöдсасим. Шуöны сiйö Данькоöн, уджалö механикöн, öнi строитö эшö ремонтнöй мастерскöй, но вот беда: «Оз тырмö строительнöй материаллэз, етша станоккез. Кöсйисö шеффез öтiк токарнöй станок, да вунöтiсö, тыдалö»,

— А тэ не райкомись локтiн? — юалiс сiя.

— Не, ме отпускын.

— М-да. А ме думайтi райкомись. Месяц-мöд ни татчö некин эз вовлы...

— Мыля вунöтiсö?

Данько кусöтiс папиросасö, чапкис сiйö канаваö.

— Кин тöдö. Поди, керны нем. Мукöд колхозын, кытöн делоэс умöля мунöны, райкомись бригадаэз пукалöны, а татчö тай оз кежавлö.

Деревня шöрöт шумöн мунiсö куим зонка. Кыкыс вöлiсö неöддьöн ыджытöсь, а куимöтыс, кöда оськалiс шöрас, быдмöма кузь да вöснитик, кыдз ректан, мунiкö гогинялiс быдöс телонас и кажитчис, бытьтö лёнас сылö кинкö тойлалö кулакöн. Кузь верзень видзис киас гармоння и пöвсалiс походнöйö, зонкаэз сералiсö.

— Гажöтчыны, тыдалö, öксьöны? — юалi Даньколiсь.

— Томмезлöн сымда и удж. Локтасö татчö и Пугинiсь, и Кондовникись да ойшöрöдз узьны оз сетö. Вот адззылан, мый эшö лоас. Нiя председатель öшын увтын быд рыт концерттэз мыччалöны. Смех...

— Мыля сэтöн, а не клубын?

— Вот сiя и эм — мыля? Клубас председательыс типпез йöртны тшöктöма. Вайöтöмась нiйö кык тысяча мымда, а йöртны некытчö. Вот и усьöм председательлö тöдвылас клубыс.

Данько мунiс гортас, а ме эг тэрмась пырны керкуö. Охота вöлi видзöтны концертсö, кöдö мыччаласö председатель öшын увтын. Тожö эд юр сылöн! Деревняын Кривöй Матрен кагаэз пыртö, а клубын типпез видзöны. Кöть бы лекцияэз лыддьöтiс кин-нибудь да кино мыччалiсö йöзыслö...

Гармонист, гармонист,

Кер жö дзар миян вылö,

Тэ мыйлö Надюшсö корлiн

Гöгрöса Чöвпан вылö? —

сьылiсö нывкаэз кедрыс дынын. Сэтчин, тыдалö, йöктiсö ни кадриль: чочком бус кайис неболань, шваткöтiсö каблуккез.

Керкуись петавлiс Марфа Демидовна, силöй сюйыштiс киам пряник — вайöма Настяыс гöстинеч. Кöкан Трöпим пуöма ни шерба, и хозяйка корис сёйны, но ме висьталi, что кывзышта том йöзыслiсь песняэсö.

— Гармонистыс, кузь верзеньыс, и бöбöтöм Надькасö. Тожö ум нывкаыслöн, видзöтöм сэтшöм майöг вылö. Тьфу, прости, господи! — шуис Марфа Демидовна и пырис бöр.

Джын час мымда томмес кульмисö кедр увтын, сэсся кутчисисö оча ки и мунiсö деревня шöрöт. Апчхи! Апчхи! — несйисö быдöнныс — бусыс пырöма ныррезö.

Кузь верзень баитiс öтiк нылочкалö:

— Ох и любита ме тэнö, Галя. Веритан, кыдз онмöсся, сiдз тэ и сувтан синнэз одзö, адзза, дзик ловьяöс, нельки понпутшшеыт свиттялöны.

— Мыйöн и поздравляйта!

— Талун кольлавны тэнö гортöдз?

— Вот эшö! Кольлав жö Надятö....

— Рад бы, да оз петавлы гортсис. Гöтрасьны мöдi ― оз мун: лöгасьöма.

— Не лöгасьны колö, а синнэтö гарйыны!

Кузь верзень эз письты висьтавны нем, только öвтыштiс кинас. Сiя пуксис öтiк керку öшын увтö завалина вылö и нюжöтiс гармоння мехсö. Нывкаэз сьылiсö:

Виль частушкаэз ми вайим

Дона председательлö.

Сыкöт бытшöмö чулöтам

Культмероприятие.

Оссис öшын, и сэтiсь мыччисис кинлöнкö юр.

— Ах, малинтуссез, локтiт жö бöра! — шыасис юрыс. — А ме важын ни думайта, мыся, кытчö нö воштiсисö. Но сьылö инö, сьылö, позьöтö тырппезнытö!

Председатель нырыштсис гырдззаэз вылö, лöсьöтчис кывзыны. Нывкаэз локтiсö матöжык керкуыс дынö, зонкаэз пуксисö ордчöн гармонистыскöт. Кылiс частушка:

Председатель миян боёк,

Ой, видзöтны любо!

Медбы кольть унажык вöлi,

Типпез пöжö клубын.

— Во, правильно! — комментируйтiс частушкасö председатель. — Бура сьылат, и частушкаыс öддьöн содержательнöй. Ноко, сьылö эшö мый-нибудь.

Кинобудка ми лöсьöтiм,

Ой, не весь ми видзим вын:

Мöйму кык кино видзöтiм,

Таво öтiкö да джын!

— И эта частушкаыс туяна, — шыасис председатель. — Интересно, кин сiйö сочинитiс? Натьтö, тэ, Галя? Ах тэ, горадзуль, ах, басöк акань! Сьöлöм вылын долыт лоис, дзик ма сёйи. Ноко эшö...

Сiдз гажöтчам, сiдз гажöтчам,

Что синваэз киссьöны.

Председатель сё сералö

Да малалö лысина!

— Но этö тi весь ни. Кылас вот эшö иньö. Кытöн менам лысинаыс? Сiдз, öтiк пустяк. Да и мый сэтшöм лысина? Эта тожö, позьö шуны, кудриэз, только оз тыдалö, кыдз тiян. Умöль эта частушкаыс, оз лöсяв. И тöдат мый? Ашын одз ме тiянöс саймöта, мунiт бы гортаныт, шоччисьыштiт.

Но нывкаэз эз мунö. Нiя кутчисисö оча ки и öдззисö йöктыны, гармонист мымда вын нюжлалiс мехсö, базанитiс сiдз, что пеллез дурмисö.

— Умöля йöктат, — горöтчис председатель. — Сьöлöм гудрасьö. Дугды, Петрован, пилитны арттöмтö, мун да шоччись. Эй, нывка табун, мунö горттэзö, иньö видчö ни!

— Висьтав, Илья Сергеевич, кöр клубсö осьтан? — юалiс кинкö.

— Чожа ни, чожа, горадзуллез. Талун мунö, шоччисьö. Ме тожö вода ни.

Председатель кыскис юрсö öшынсис, саясис керкуас. Нывкаэз бöра öдззисö чеччавны, кузь верзень базанитiс эшö ёнжыка, нежели одзжык. Но чу! мый лоис? Гармоння вдруг виньдiс, нывкаэз öдззисö кивзыны и чепöссисö быд ладорö, кыдз воробейез, кöдна стаяö чапкисö галя.

— Но, Илья Сергеевич, этадз-ту оз жö лöсяв! Ми гажöтамö тэнö, а тэ ваöн коясян!

Вон мый вöлöма! Председатель пöрöтöм öшынöттяс гажöтчиссез вылö быдса ведра ва. Медöддьöн павкöм гармонистыслö. Вон сулалö сiя, кыдз кöтöтöм курöг, пидзралö курткасö.

М-да-а... Бытшöм деревня Ошпозъяин. Уна татiсь виль торсö позьö адззывны. Но видзöтам, мый лоас одзлань...

Дата добавления: 2015-11-16