КРИВÖЙ МАТРЕН

Туй крутöя кежис веськытлань и пырис ягö. Сразу лоис ыркытжык, воздух сöстöм, кокнитик. Сiя боссьöма быдкодь цветтэз да сир дукöн и вачкисис ароматной крепыт настойка вылö. Эта воздухöн лолалiкö мортлö кажитчö, бытьтö сiя юö кытшöмкö чöскыт сок. Шондi öшалiс кытöнкö веськытланьын и аркмöтiс вуджöррез, кöдна поперегалiсö туйсö. Кажитчис, бытьтö кинкö чапкалöма му вылас кыз сьöд колодаэз. И вöв, кöр сибöтчывлiс сэтшöм вуджöр дынö, вылöжыка лэбталiс коккесö: чайтiс, быльнöй колода вуджö... Ме талун чеччи одз, сто верста мымда мунi грузовöй такси вылын, кöда жалейттöг пыркöтiс и жегйис коскаэз, и öнi вöлi мыдз. То ли мыдзöмыссянь, то ли сира крепыт воздухöн лолалöмсянь висис юр, дзик молотокöн кинкö вачкалiс кöсичаэзö, и ачым эг казяв, кыдз пондi сунасьны. Мымда бы эг старайтчы видзöтны вöрсö, мымда бы эг зэгйы юрöс, — он вермис. Но узи кокнита. Он пыр кылi, кыдз няжöтiс колесоэз увтын галькаыс, кыдз пöлiнясис телега, кöр öтiк ладорнас инмывлiс гöпокö, и кылi нельки сiйö, кыдз ямщик сё эшö мурзис кузь песнясö.

Ылö ли сiдз мунiмö и дыр ли сунассис телегаас — висьтавны ог вермы. Сайми ме спинаö зубыта тойыштöмсянь. Кытшöмкö чорыт предмет, может, котелокö, а может, и фляжкаö, сюрöма плетёнка и лопаткаэз коласö и, кöр Демид мылякö вдруг пондiс тормозитны телегасö, эта предметыс нырыштiс сiдз, что ме ойнитi и осьтi синнэзöс. Онзыльувья казялi, что мыйкö шогмö: ямщик быд вынiсь зэлöтö вожжи и старайтчö сувтöтны вöвсö, но туй лэдзчöтö логö, и телега тарöвтчö ачыс, сидзавлö вöвлö бöрись коккез бердö, мыйсянь сiя чепöссьывлö котöртны шакардаöн. Демид быдöс телонас öшöтчис вожжи вылö и горöтлiс чуть ли не лёкгоршöн:

— Тпру-у! Тпру-у, проклённöй!

Лог пыдöсас ни вöвсö удайтчис сувтöтны, и Демид чапкис вожжисö меным: видзышт пö. Ачыс, кыдз шардöм, чеччöвтiс телега вывсис, сунньöн-панньöн берездасис канава сайö, усис кыминь, но проворнöя чеччис бöр, лэбтiс му вылiсь уськöтöм плетьсö и ньöвьёсьöн иньдöтчис чашьяö.

— Стой! Сулав, мыся, öнджа... Сулав!

Ме кыдз кольччи осьта öмöн, сiдз и пукалi аслам местаын, тули синнэзöс и нем эг вежöрт, мый шогмö. Бöбсялiс ли мый ли ямщик? Кин сьöрö сiдз вöтчö? Может, ош? Некöр эг лыддьы ачымöс полiсь мортöн, но эта думасянь пот мунiс сьöлöмö, а спина вылö дзик койыштiсö ключ ва. Уна ни кывлi, кытшöм смелöйöсь ошшез таладорын. Мый лоас, если кутчисяс сiя вермасьны? А вöрас сё эшö ризьöтiсö кöс уввез, Демид горöтлiс и видiс кинöскö проклённöйöн да сюра сатанаöн: «Стой! Сулав, öнджа! Тэ мый, кин шогья мöдан пышшыны? Сулав!».

Сы сьöртi, кыдз горöтлöмыс кылiс сё ылынжык и ылынжык, позис вежöртны, что старик одзын котöртiс кинкö öддьöн перыта, прока. Вот дугдiс ни кывны кöс уввезлöн ризьöтöмыс, вот умöля ни кылö Демидлöн горöтлöм. Меным лоис не ас сьöртi, эг тöд, мый керны и мый думайтны, вöрзьöтчытöг пукалi плетёнкаас и полöмöн дзарьялi öтмöдöрö.

Стенаöн сулалiс пемыт вöр. Шондi ештöма ни сайöвтчыны, вуджöррез лоöмась эшö ыджытжыкöсь и пемытжыкöсь. Тоша вековöй кöззэз дзардiсö туй дорас, увгисö рамыник рытся тöлок увтын: у-у-у-ш-ш...

Но вот вöлокыс, кöда öнöдз сунасис öшöтöм юрöн, лэбтiс пеллесö и бергöтiс нiйö чашьялань, кытчö саясис хозяиныс. Ме пондi кывны кокшы, кылi, кыдз старик баитiс кинкöткö, сьöлöмсянь видчис и сьöласис. Не ош сьöрö вöтчывлöм, морт кинкö вöлöма...

— А бура тэ котрасян, проклённöй! Люзь пымалi... Кыдз вöр мöс, только прыг да прыг! И кысь тэнат выныт адззисис, быздöм кикиморалöн, неужто святöйес сетiсö? — бобгис ямщик.

Тшöк понуллез сайсянь кыдзкö бокöн-бокöн петыштiс неыджыт мыгöра, кузь дубаса кöсыник старушка. Быгалöм чышьянокыс усьöма пельпоннэз вылас, шочыник юрси лэдзчисьöм кымöс вылö, вевттьöм синнэсö, чужöмсö. Киас старушка видзис кузь увья бедь, а пельпоннэз саяс вöлi неыджыт котомка. Старушкаыс бöрын победнöя, сьöкыта ыш лолалöмöн, оськалiс Демид. Ме барöтi синнэзöс. Неужели эта дзормöм да горба старушка сэтшöм ловкöя котрасис вöрас? Мыля сiя пышшывлiс?

— Грех тэ аслат душа вылö босьтiн, Демидушко, — мыдзöмсянь ышки-пойки баитiс старушкаыс. — Позьö разь пöрись морт сьöрын вöрын вöтлiсьны? Адззылiс бы кин, дак мый думайтiс?

— Грех, шуан? — юалiс, телега дынö локтiкö, Демидыс. — А тэныт не грех туй вылiсь кежны да пышшыны вöрö? Видзöта, морт оськалö. И вдруг, кыдз кöин, — вöрö! Стой, думайта, делоыс не сöстöм, не вор ли кин котöртiс тайгаас? А может, разбойник кытшöм? И вот — на тэныт: Матрен вöлöма!

Старушка лöсьöтiс юр вылас чышъянсö, тшаклялöмöн сюйис сы увтö пашмöм юрсисö. А Демид, кыдз петух, гартчис сы дынын и кешитчöмöн юасис:

— Ноко висьтав, пöрись греховодница, кинiсь повзин? Мыля туй вывсис кежин, миянöс казялiн да? А-а! Шы он сет? Ньылыштiн кывтö? А ме тöда, кин шогья тэ сiдз чывкнитiн! Председатель шогья. Думайтiн, небось, председатель телегаас пукалö, посадiсь гортö локтö. Полан тэ сыись, кыдз биись. А кыдз котрасян! Дзик кöин, одзам котöртiн. Тьфу!

Старушка нырышсис телега бердö и сулалiс öшöтöм юрöн. Меным охота вöлi вежöртны, кин эта мортыс, мыля сiя «кыдз биись полö председательлiсь», но юасьны эз лöсяв. Ме казялi только, что эта кöсыник старушкалöн öт синыс, дзик занавескаöн öшын, вевттьöма бельмоöн, а сьöд голя вылас öшалiс кытшöмкö гöйтан.

— Но ладно инö, — шыасис Демид, — пуксьы козлаыс вылö бокам. Пукалыштам ордчöн, кыдз жöник да ичмонь. И то шуны: кык нинкöм — гоз.

— Вот спасибо. А то коккез нач и нач орисö.

Матрен сюйыштiс коколюкасö кытчöкö плетёнка увтö, личöтiс котомка волыссэсö и ружтöмöн кайис козла вылö. Ямщик трекнитiс вожжи, вöв гогыньыштiс юрнас, и ми вöрзим.

— Но мый инö чöлан, баитышт кöть невночка, — корис Демид. — Адзза, вичкуö ветлöмат?

— Вичкуö, батюшко, юрбитыштi невна...

— Но и мый?

— А дзик кокнитжык лоис, синö бытьтö, беднöйка ёнжыка пондiс адззыны.

— Этö ме казялi ни, — шыасис Демид, — котöртiн вöрас бытшöма, öтiк мыр бердö эн падмы. Баитыштiн жö бöра попыскöт?

— Баитыштi, баитыштi. Веськалас, шуö, синыт, только юрбит унажык да вичкуас частожык вовлы. Быдöс, шуö, бур лоас.

Старик бергöтчис мелань, лукавöя мигнитiс, дзик шуис: лоас смешнöй басни, — сэсся öддьöнöв серьёзнöя горöтчис:

— Ме тай важын тэныт висьталi, мыся, миссьöт жö сэтöр синоктö вичкуас святöй ваöн — отсалас, а тэ эн кывзы. Эх, Матрен, Матрен, сё тэ асныралан... А мый инö эшö батюшкоыс висьталiс? Поди, юалiн, кинсянь Христосыс шогмис?

— Дыр баитiм быд торыс йылiсь, Демидушко, уна баитiм. Вичкуас бу-ур. Пуксим попыскöт вуджöр сайö да час-мöд сёрнитiмö. И Христосыс йылiсь баитiм неетша. Ловзяс пö сiя бöр, локтас отир дынö. И эшö буржыка пö отирсö любитны пондас.

— А шогмöм, шогмöм кинсянь сiя? — сё сiдз жö серьёзнöя юасис Демид. Матрен эз видзчись некытшöм кешитчöм, сюльтыртiс ассис:

— Да кыдз кинсянь? Батюшкоыс тай сiдз и шуис: беспорочнöй дева Мариясянь пö, кыдз и гижöмась евангелиеас. Мыйнö, мыйнö...

Старик, кыдз вöлi, сiдз и кутчисис кынöмыс бердö, ваксис нюжласьöмöн, горöн, сiдз, что вöрын чаналiс говк: хо-хо-хо! Эта коста тошокыс сылöн треситчис, дзик ловья, а коккес чужьялiсö воздухсö. Демид чуть эз усь гатш менам коккез вылö.

— Ой, смертiньöй менам, ой, проклённöй... Сiдз и шуис, беспорочнöй девасянь пö? Ой, кикимора...

Дыр бы, наверно, эшö ваксис и юасис Демид, но подвода вдруг петiс паськыт ыб вылö. Кытöнкö кылiс ни поннэзлöн вувтöм, баксiсö мöссэз. Неылын вöлi деревня. Старик сувтöтiс вöвсö и висьталiс Матреныслö:

— Но, беспорочнöй дева, висьтав спасибо да лэдзчы боксим. Оз лöсяв меным пöрисьувьям томмескöт ордчöн ысласьны. Адззылас председатель, дак вашöтас должностьö вылiсь.

Матрен шы эз сет паныт, ружтöмöн лэдзчис му вылö, пернапасасис, вуджис туй бокас да вöлись лöгöнмоз бобгыштiс:

— Христос тэкöт, Демидушко...

И пондiс шагнявны бедь вылö нырышсьöмöн. Подвода кайис керöс вылö.

— Кин сiя? Мыля пышшывлiс вöрас? — юалi ме.

— Да морт тожö. Только юрас осьтаэс не сизима, кыдз быдöнлöн, а унажык невна. Лишньöй осьтаэзöттяс и петöма умыс. Кривöй Матренöн сiйö шуöны, а унажыксö кикимораöн, мыля некытöн оз уджав, а мукöдся пöтжыка олö. Кужö бöбöтлыны отирсö.

Старик висьталiс этö, нюмыртiс тырппесö, брезгуйтöмöн сьöвзис сьöдöтны ни пондöм пиннез коласöт и лöгöн сöтiс вöвсö плетьöн.

Дата добавления: 2015-11-16