Неöткодь йöз олö ошпозъяинын

Неделяся дыржык ме олi Ошпозъяинын. Быдса луннэзöн ветлöтiм Васькакöт вöррезöт, любуйтчим чудеснöй природаöн, кошшим тшак, сёйим ягöд, а рыттэзöн пукавлiм Вильва дорын и кыйимö чери. Мукöдпырся сьöраным босьтлiмö арифметика сьöртi учебник, пуксьывлiм кытчö-либо куст увтö и решайтiмö задачаэз. Ме неетша дивуйтчи, кöр казялi, что Васька почти быдöс правилоэсö тöдö чуть ли не наизусть, а медсьöкыт задачаэз решайтiс совсем кокнита. — Этö мый понда жö учительницаыс умöль отметкасö тэныт пуктiс? — неöтпыр ни юаси ме. — Да тэ жö месся буржыка решайтан!

Васька быдпырся только пишкис нырнас, старайтчис видзöтны кытчöкö бокö, хитрöя мигайтiс шульга синнас и чöлiс, кыдз мыр. Мый понда сылö пуктiсö умöль отметка и мыля колисö ар кежö, — ме понда сiдз и кольччис загадкаöн. Но вежöртi, что эстöн мыйкö эм. Не нарочно жö пуктiсö двойка, кöр Васька быдöс задачаэсö решайтiс...

Кытöн-нибудь ыджыт городын олiкö морт бытшöмика оз и тöд нельки ассис соседдэсö, а татöн, деревняын, эна луннэзö ме ештi тöдсасьны почти быдöнкöт. Уна отирöс тöдi и ним, и айним сьöртi, тöдi уналiсь привычкаэз, характеррез, думаэз. Вот кузнец Софрон, например, морт öддьöн решительнöй и лöгувья аслас молотöн вермас поткöтны не öтiк наковальня; механик Данько, Ананикалöн зоныс, только сы йылiсь и думайтiс, кыдз бы чожжык строитны ремонтнöй мастерскöй и вочны машинаэсö не посадын, кытöн «РТС готов куим кучик кульны öтiк гайка понда, кöть лöсьöтö машинаэсö умöля»; председатель Илья Сергеевич эта неделяö куимись ветлiс посадö и корис банкись одзöсöн деньга, кöда колiс виль строительство вылö; Анна Даниловна узьö и вöтын адззö только порссезöс, сiдз кыдз босьтiс обязательство быдтыны таво тысяча порсьöс; Макась Домна öтпыр вовлiс Марфа Демидовна дынö и горзiс курыт синваэзöн: «Совсем бöбсялiс Надькаö, совсем воля босьтiс, некыдз соглассё оз сет пыртны миронсö и эшö мунны гортiсь мöдö, Ананика пö, бытьтö, овны корö...»

— А тэ, Домнушка, ветлы жö Ананикаыс дынö да стыдитышт сiйö невна, ась юрсö оз сюй, кытчö оз ков, — советуйтiс сэк Марфа Демидовна. — Тожö адззисьöм велöтiсь, пöрись коромысла. Ачыс пыр грешитiс томнас, а öнi миянлiсь ныввезнымöс сэтчö жö велöтö. Кувны сiя оз вермы, кык век олö. Мöд светас сюраэс важын ни, натьтö, биöн кошшöны, а сiя татöн том отирöс сомушшайтö...

Эз пукав гортын и Настя. Ме думайтi, что велöтчöм бöрын сiя пондас гожумбыт шоччисьны, лыддьöтны любитöм йылiсь книгаэз, пантасьлыны аслас Гришакöт да мый да. Но Настя каждöй лун босьтлiс киö окучник и ветлiс Пугинö кукурузнöй ыб вылö. Нывка сетiс чорыт кыв: мый бы эз ло, а веськöтны кузь верзеньлiсь ошибкасö, керны сiдз, медбы тшыкöтöм участок вылын кукурузаыс быдмис бур, кыдз и мöдiк участоккез вылын. Эта понда сiя быд за дынiсь небзьöтiс мусö, медбы вужжез дынöдз пырис воздух, киськалiс ваöн.

— Поди, ваыс и гывьялас закисьсö, — баитiс сiя.

Кöкан Трöпим бура лöсьöтчис праздник кежö: кыйис быдса кöньöс чери, тшöктiс иньыслö сувтöтны сур, а öтпыр ойнас пуктiс телегаö мешöк квасно, джын мешöк чуж, быдса пестер чери и ветлiс посадö. Асывнас локтiс радся-рад и юöртiс, что быдöс товарсö вузалiс öтiк тöдсалö. Вузасис Трöпим, конечно, тожö праздникыс могись: колiс деньгаок небны винатор да иньыслö виль сарафан. Илья Сергеевич корлiс сiйö эта асылö правленнёö и штрафуйтiс вит рубöн, мыля вöвсö доддялöма юасьтöг. Марфа Демидовна кортöг ветлiс правленнёас и, кöр локтiс бöр, висьталiс меным:

— Петшöралi невна Ильясö, ась тöдö, кыдз безответнöйес вылын тешитчыны...

Эта минутаö аслас комнатаись петiс Настя. Сiя только неважын миссьöма и öнi кыйис чикиссез. Öмас шпилькаэз видзикö, сiя юалiс:

— Мама, неужели тэ видчин председательыскöт? Мама, да мыйлö тэ этö керин?

— Мед эз тешитчы!

— Да кытшöм жö тешитчöм, кöр председательыс Устав сьöртi айöс штрафуйтiс? Вежöрт, мама...

— Дугды, зырымöсь бедь! Тэ эшö кинöс велöтны кутчин? Мамтö? Ах тэ, стыдтöм, стыдтöм! — эна кыввез бöрын Марфа Демидовна бергöтчис ме ладорö:

— Вот кытчöдз, Миколай Иванович, городас велöтчöмыс вайöтö. Роднöй мамöс дугдiс кывзыны. О господи, господи! — Марфа Демидовна уськöтiс кынымкö синва воть и сiдз чужöмыс кельдöтiс, — сiйö и видзöт, кыдз бы эз чапкы бöра кудобаö. Настя шы ни эз сет.

Öтiк кылöн висьтавны, ме уна ни адззылi татöн олiкö, уна кылi быд торсö, неумöля шоччиси. И думайтлi ни мунны бöр городö, но Васька кеймисис быдпырся, корис менö кольччыны узьны кöть эшö öтiк ой.

— Чожа Петька дружокö локтас и ми тэныт, дядя, комедия мыччалам, — кöсйисис сiя.

— Кытшöм эшö комедия?

— А вот адззылан, кольччан дак...

— Да тэ висьтав, мый загадкаэзöн баитан? — тшöктi ме.

И Васька висьталiс:

— Пыжйын ысласьны пондамö. Доддялам пыжас поннэзöс, асьным пуксям и лэдзам поннэсö...

— Ах тэ, понкулись Васька! Да тэ, поди, ысласин ни?

— Ысласим, дядя, öтпыр... Ох, мый только вöлi! Таво тулыснас, кöр меным пуктiсö умöль отметкасö да висьталiсö, что ар кежö кольччи, ме сiдз радми, сiдз радми, что охота лоис юр вылын ветлöтны. Локтi Петька дружокö дынö и шуа: мунам, мыся, поннэзöн ысласьны... Петькаыс шуö: «Телегаö я мый я доддялам нiйö?». «Не-е, — пыжйö доддялам...» И вот кутiм перво миянлiсь Бускосö, домалiм гезокöн пыж бердö. Да эшö Петькаыслiсь Тузиксö кутiм да домалiмö. Кöр казялiм, что вынныс учöтöв нылöн, кутiм и торта пельлiсь Лапкосö. Поннэз дзарьялöны полöмöн, лявгöны, а ми кыским пыжсö ваö да пуксим сэтчö. Поннэс перво уйисö бура, сэсся мыдзисö и но жö пурсьыны, уннявны, чепöссисö кöда кытчö, только ва резсьö!

— Но и мый?

— Да пöрöтiсö пыжнымöс, самöй ю шöрас и колисö миянöс...

Васька эшö мöдiс невна баитыштны, но ме öмалi сiйö лöгöнмоз:

— Лыдди ме тэнö умнöй детинаöн, а тэ бöб тай вöлöмат. Тэныт двенадцатöй год ни и колö жö вежöртны, что пороз вылын гöняйтöмыс да поннэзöн ысласьöмыс — öддьöн умöль дело. Мыля умöль? А сiйöн, мыля некытшöм польза этасянь абу. И керан тэ этö только сiйöн, что он тöд, кытчö вынтö ассит воштыны. Тэ шуан — гажтöм. А мыля сэк гожумбыт весь котрасян? Кылi ме: тiян школаын велöтчиссез кроликкез быдтöны, медбы отсавны колхозлö тыртны яй вузалöм сьöртi годовöй план. Вот бы и тэ быдтiн нiйö. Гажажык бы вöлi.

Васька курччöвтiс кывсö. Сiя перыта дзебис синнэсö, но ме ештi казявны, кыдз чужöмыс вевттисис кытшöмкö гажтöм везöн, а синнэзас мелькнитiсö то ли тревога, то ли стыд. Юасьтöг позис вежöртны, что зоночкаöс мыйкö маитö. И медбы тöдны, мый сiя видзö сьöлöмас, ме кольччывлi деревняö эшö лун-мöд кежö. Ветлывлiм вуграсьны, рыттэзнас пукавлiм костёр дынын, пувлiм шерба.

Öтпыр сёрöн ни, кöр небоын öзйисö звездаэз, а турун вылö усис лысва, миян костёр дынö шытöг локтiс Мутэй Егор. Мыччисис сiя совсем видзчисьтöг, гусьöник, дзик не локтiс, а кыськö чужис му пытшкись. Ме нельки дрöгнитi, кöр кылi сылiсь кыз голоссö:

— Мир тiянлö, добрöй морттэз!

— Лок пуксьы, гöсь лоан, — шуи ме сылö паныт.

— Казялi биокнытö да кежи трубка öзтыны. Спичкаэз, шульга кок бы нiйö несйис, гладь бырсьöмась, — баитiс Егор.

Сiя пуксис биыс дынö, писис кыскис трубка да кисет, не тэрмасьöмöн лöсьöтiс куритны, головнясянь öзтiс табаксö.

— Поди, тожö чериок кыян? — юалi ме.

— Да чапки тай вон вугыр-мöд, ог тöд — шедас я. Чериокыс öддьöн бы колiс петыр луныс кежö. Сэтчö жö зон менам кöсйисьö гортö. Уджалiс городын год мымда, пожалуй, а öнi гортланьö лöсьöтчö. Умöля пö сэтчин олö, грамотаыс учöт да... Ме тай кырлалi гижöт, лок, мыся, гортö. Овны татöн туйö ни: нянь сетöны, яй асланым, карчок эм...

Баитiм öтi-мöдi йылiсь. Егорлöн куритчис трубкаыс, а мунны сё эз тэрмась. Ме вежöртi, что мужик локтiс татчö не трубка öзтыны, а кытшöмкö мöдiк могöн. Пондiс бы Егор пукавны костёр бокын, кöр петыр лун кежö чери колö кыйны!

— Тэ пö, некö, городын уджалан? — юалiс Егорыс.

— Городын.

— Сiдз. Грамотнöй мортыслö бур жö, батя, городас.

— Да эд тэ ачыт шуин, что и колхозын неумöля öнi овсьö?

Егор дыр эз шыась, мыйкö думайтiс. Трубкасö пыркöтiс пестер кодь нинкöм ныр бердас, тэчис сэтчö виль табак, вöлись горöтчис:

— Да мый, овнытö позис бы, ежели, шуам, председатель бур. А миян зэлытöв Илья Сергеевичным, оз сет отирыслö овны. Вот пондывлi куканёк быдтыны, мыся, яй лоас, вузала сiйö, дак силой тшöктiс фермаö вашöтны. Сэтчö жö огородеч кори мöдiкö, бöра эз сет: тырмас пö öтiкыс... Вот, кыдз тэ шуан, ежели зонö локтас гортö, позяс сэк миянлö эшö öтiк огородеч босьтны? Эм öтiк пустöй, ордчöн миян усадьбакöт: йöрсö разь и öтлаав кыкнансö...

Егор видзöтiс веськыта чужöмам, видзчисис ответ, а ме старайтчи дзебны синнэзöс и дыр пукалi чöлöмöн. Ме öнi только вежöртi, мыйлö локтiс татчö Егорыс: ог ли ме, грамотнöй морт, отсав сылö кыдз-нибудь босьтны унажык колхознöй му, кытöн позис бы паськöтны ассис хозяйство.

― Ог эд тöд, — шыаси сылö. — Колхозас некöр эг уджавлы, сэтшöм вопроссэсö эг пантавлы. Ветлы эшö председательыс дынö, юась сылiсь.

— Да мый! Миян председателькöт унасö он соровт. Сылöн öтiк басниыс: локтас зоныт, дак ог и примит, шуö, колхозас. Ась, шуа, кузь руббесö кошшö, может, адззас... Только, ме думайта, абу сэтшöм правоыс. Раз локтö морт колхозö, то мед локтö. Колö сылö огородеч, то сет... Тожö вежöртам асьным, не шульга кокöн несъям.

Кöр ме висьталi, что немöн ог вермы отсавны, Егор перыта чеччис и казявтöг öшис пемытiнас, дзик пырис му пытшкö.

Эз ешты сайкавны сылöн местаыс, кыдз миян костёр дынö локтiс виль гöсь — Анань Данько. Локтiс сiя, пыжын сулалöмöн, кузь голенищеа резиновöй сапоггеза, брезентовöй курткаа. Пыжыс пыдöсын вартчисö неыджыт чериэз — Данько кыйöма нiйö вугырöн.

— Здорово тiянлö, — гажöна горöтчис сiя и пуксис би дынö.

— Шоччись да висьтась, мый тiян вильыс эм, — тшöктi ме.

Ме казялi, что детина сьöлöмын поздiсьö кытшöмкö ыджыт радость: сiя паськыта шыннялiс, синнэс югьялiсö, öт кисö часто вайöтлiс тшöка дынö, пешлiс сiйö, дзик мöдiс волькöтыштны тошок, но быдпырся чожа лэдзлiс бöр — волькöтны вöлi нем.

— Пантасьлiс ю дорас öтiк морт, баитыштiм невна, — юöртiс сiя.

— Не Егор ли?

— Не. Эг и думайтлы одзжык, что нывкаэз чери кыйöны, татöн абу сэтшöм модаыс. А талун уя и адзза: пукалö берег дорас вугыршатьöн женскöй. Дзарнитi буржыка — Надя. Диво менö кутiс. Локтi дынас. «Вуграсян?» — «Вуграся»... Сэтöн и казялi ме, что вугыршатьыс киас — менам. Эшö удерлун кватитчи, что öшис öтiк вугыршать. Кытчö, мыся, лоис? Кошши, кошши, эг вермы адззыны, а сiя вон кинлö шедöма.

— И мый жö? — юалi ме.

— А нем. Пукалыштi невна, баитыштi да и мунi. Вежöртi — мамöлöн делоыс. Сiя велöтöма нывкасö вуграсьны, сiя и вугыршатьсö сетöма менчим. Но и морт мамö, а? Эд ми, томмес, эг и думайтö эта нывка судьба йылiсь, сё некöр вöлi, а сэсся öвтыштiм киöн: йöз коласын мыйыс оз овлы... А мамö кутчисьöм сы бердö. Кывсьö, бытьтö и Петькаыс пö вуграсьны лэдзчывлö рыттэзнас, лун-мöд ни оз орс гармоннянас.

— Может, öтлаасясö?

— Кин тöдö. Думайта, кутчисис кö мамö, дак петас мыйкö.

Недыр мыйись Данько висьталiс эшö öтiк виль тор:

— Получитiмö эд станоксö! Вайим талун гортö. Думайтiм, бöбöтасö шеффес, а эз эд бöбöтö. А тöдан мый станокыс миян понда? Эта жö сразу кык кöч! Он вежöрт? А вот: асьным пондам деталлез керны — öтiк кöчок, а мöдыс — колхозаным механизатор содас, станочник лоас. А станочник — эта виль морт, культурнöй, грамотнöй. Нет, мый бы эн шу, а культура деревняö локтö только öтлаын машинаэзкöт.

Данько пукалыштiс эшö невна, куритiс папироса и перыта уйис гортас. А ме думайтi думаэз. Неöткодь йöз олö деревняын: öтiк быдöс вынсö жалейттöг пуктö экономика зорöтöмö, лун и ой думайтö, кыдз бы унажык бур торсö керны аслас колхоз понда, а мöдiк — кучикись петö да личнöй хозяйство бы крепитö. Кöр сэтшöммес орасö?

Рыт вöлi öддьöн мича и шоныт. Кокнитик тöлок вайöтiс кыськö ма кöра турун дук, вöрöтiс бадь листтэз. Небоын сяр видзисö звездаэз, кусттэз сайын шыасьлiсö герсканнэз да эшö кытшöмкö ойся кайез. Сiсьмöм мыррез сотчисö костёрын чалöтöмöн, лэдзисö сир дука курыт тшын, вашöтiсö номмезöс. Кад вöлi сёр ни, и ми, решитiмö узьны талун костёрыс бокын, медбы ашын югдандорын эшö невна вуграсьыштны.

Ашынас ме сайми одз. Костёр важын ни кусöма, вöлi кöдзыт. Му весьтын лажмыта öшалiс кудель кодь сук туман — нюжöтан ки и чуннез оз тыдалö. Юыс дзик пизьны пондöма: сы весьтын кайис чочком пар. Туман пыр, кыдз саöсь стекло пыр, тöдчис шондiлöн веж рöма паськыт круг.

Вöлi сизим час мымда, но видз вылын кылiс ни гора тачкöтöм: кинкö нюжöтiс бабка вылын литовка дор. Деревняын баксiсö мöссэз, öтамöдкöт вермасьöмöн базанитiсö петуххез, готсисö курöггез. Колхознöй ферма дынын öдззис трангыны «барабан» — этö Кöкан Трöпим вашöтiс мöссэсö поскотина вылö.

Ме öзтi би и öшöтi сы весьтö ваöн котёлок: городскöй привычка — быд асылö юны дзирыт чай — казьмöтiс ас йывсис и татöн. Би дынын шонтiсикö охота лоис куритны. Ме кошши папиросаэз, пыравлi быд карманокö, раз-мöд дзарнитi рюкзакам, но некытöн эз вöв и öтiк табакчир. Мый керны? Ветлыны деревняö? Ылын, да и кин тöдö, осьта ли лавкаыс. Иньдывны Васясö айыс дынö — мед вайис махорка? Оз лöсяв: Кöкан Трöпим и сiдз ни табаксö сайлалöмöн видзö — бöбавлö пö зоныс гусьöн. А куритны, кыдз нарочно, лоис эшö öддьöнжык охота — кöть вод да кув. Ме саймöтi приятельöс, тэрмасьöмöн юим сыкöт сэтöр корись заваритöм чай да лöсьöтчи мунны ытшкисиссез дынö.

— Чапкы биас кöсжык мыррез да пу черива. Ме чожа локта. Кора кинлiсь-нибудь джын кырым табак, — висьталi Васяыслö и иньдöтчи тачкöтöм шыыс вылö. Лысваа сук турунöт мунтöн косви люзь вами, но чожа петi веськыта Мутэй Егор дынö. Сiя пукалiс кытшöмкö кокора вылын, одзас пуктöма чуркаö дорöм бабка и неыджыт молотокöн нюжöтiс литовка дор. Быд сöтöм бöрын Егорлöн ыджыт юрыс гогынясис, пельпоннэс вöрисö. Уджалiкас сiя эз и казяв, кыдз ме петi тумансис.

— Бур асыв, Егор! Егор дугдiс кальскöтны.

— А шульга кок бы тэнö несйис! Кыдз повзьöтiн, покась, — горöтчис сiя.

Ме висьталi, мыйлö локтi.

— Вот беда, — паськöтiс киэсö Егор. — Махоркаыс менам öтiк чир абу. Табакыс вылö эд деньга колö, а кысь сiйö колхозниклö... Хе-хе-хе... То тай самосад велалi куритны да гырисьöла, покась, сiйö масьтiссьöма: дзик пожумовöй пессэз трубкаам тэльöны.

Егор кыскис писис кисет, дыр гуддисис сэтöн и сетiс меным кынымкö чепöль гырись самосад. Ме лöсьöтi куритны и пукси ордчöн сыкöт. Егор вились öдззис кальскöтны, часто пешлiс литовка дорсö пев гыжнас, видзöтлiс, ровнöя ли вачкалö. Туман жагöник кизермис. Шондi югöррез сидзисö ни му бердöдз. Свиттялiс лысва. Чожа ме казялi, что Егор татöн не öтнас: ыджыт турунъюр вылын куйлiсö, а может, и узисö кык инька. Бадь ув вылын öшалiсö нылöн пешоркаэз. Недыр мыйись локтiс групповод Парась. Сы бöрын локтiсö эшö кык инька да неыджыт мыгöра винерик зонка. Кошенина вылын кылiсö тожö голоссэз — сэтчин öксисö куртiссез.

— Тэ разь öтнат талун, Егор? Кытчö иньтö воштiн? — юалiс Парась.

— Шогавны бöра кагаокыс пондöма, шульга кок бы несйис. Ойбыт ачыс эз узь, да и меным, вижлок, эз сет синнэз куньны, — висьталiс паныт Егорыс.

— Кага шогалö? Тöн рытнас адззылi — здоров вöлi, талун шогалö? — эз верит групповодкаыс. — Вермис бы и мамыт пукалыштны сыкöт.

Егор шы эз сет.

Локтiсö эшö кынымкö инька. Быдöнныс нiя öшлiсö бадь вылö пешоркаэз, тэчисö куст увтö ырöшöн лагуннэз, сэсся не тэрмасьöмöн, дзик полiсö öштыны выннысö, лопатитiсö литовкаэз. Неылын ме дынсянь, куст сайын, кылiс баитöм:

— Не проверяйтны ли локтiс?

— Кытшöм проверяйтны! Шатласьö татöн кык неделя ни, кыйö чери да тшаккез кошшö. Челядёклiсь уджсö керö.

— Ох-хо, бур жö городскöйыслö овны. Босьтас отпуск и — ветлöтö, кыт колö. Кöр миян сiдз лоас?

— Сетны бы киас литовка...

Этö баитiсö ме йылiсь. Баитiсö нарочно горöн, медбы кылi. Ны баитöмсянь мылякö тшыкис настроеннё и тöдчöмöн шоналiсö пель йыввез. Вöлi дума, öнi жö мунны син одзись, не мыччасьны сэсся.

Кыськö кусттэз сайсянь, тумансис, петiс ыджыт мыгöра да шадраа чужöма инька, здоровайтчис и юалiс:

— Онтонöс эд жö адззылö, не татöн ли сiя, лысöй кöин?

— Вон кусттэс увтö дзебимö, — шутитiс Мутэй Егор.

— Не тэкöт баитöны, кырныш, — лöгасис инькаыс. — Колö зород пондöтны, а сiя, абыз, öтiк стожар абу мöртöма. Од ли тöдö, мыля эз лок?

— Кила, натьтö, бöра петiс, — горöтчис кинкö инькаэс коласiсь. — Петыр луныс панытö сылöн пыр кила петавлö.

— Ужо, мыччала ме сылö киласö, — грöзитчис шадраа чужöмаыс. — Оз кö вай справка, дыв вашöта группасим.

Ытшкисиссез босьтiсö литовкаэз, öксисö кругö, баитiсö. Парась дзарнитiс видзыс вылö и юöртiс:

— Талун досповна ытшкыштны колö. Председательыс не ашын, дак мöдлун миянöс мöдö иньдыны Туланöскöйö: оз пö ештö сэтчин куртны.

— Видно, бура машинаэс таво мунöны, — горöтчис гöрд чышьяна и кузь сарафана инька.

— Анань Данько эд лöсьöтiс, — содтiс мöдiк инька, литовкасö пешлiкö.

— Вот бы миянлö кöть öтiк машина.

Ыджыт бадь ув вылын кольччисö кык свободнöй литовка. Парась казялiс нiйö.

— Этö кин жö эшö эз лок? Кинлöн литовкаыс?

— Петришна Öгрöпенлöн тай...

— Бöра сёрмис? Вот жö морт... Ме отирсö готов пуись керны да ытшкисьны сувтöтны, а сiя луншöрöдз узьö. — Парась баитö горöн и, тыдалö, öддьöн лöгыс петiс.

Эта минутаö менам чужис дума — мыччавны лэчыт кыла инькаэзлö, что кужа не только шатласьны, что городас ми тожö весь ог пукалö. Ме решительнöя босьтi ув вылiсь литовка и сувтi постатьö ордчöн Егоркöт. «Кöть аслам векын некöр эг ытшкисьлы, — думайтi ме, — но не еннэз кашниккесö керöны».

Менам литовка — сiя сюрöма Егорыс иньлöн — кокнита чывкнитiс турунö, металл вöснитика тринь керис заэз бердö. Вундыштöм турун, дзик шырöм юрси, кышöтöмöн водiс, и литовка ороплöн дыныс вештiс сiйö лёдзö. Вжи... вжи... вжи... вжи — кылiс быдлаын. Турун вöлi кузь и лысвасянь небыт, ытшкиссис кокнита. Ме тыр моросöн лолалi асывся воздухсö, öвтi литовканам, старайтчи босьтны паськытжыка, медбы не позоритчыны. Одзам, кынымкö шаг ылынаын, мунiс Егор. Сылöн öтмöдöрö ветлiсö паськыт спинасис чуть петöм лопаткаэз, юрыс гогинясис, кыдз вöвлöн, а мороссис петiсö чорыт шыэз: «кхы, кхы». Кынымкö шаг бöртi дзарнитi мышкам и радöн казялi, что водöма менам покосö сiдз жö, кыдз и Егорлöн — веськыта и ровнöя, только разь ытшкöмподыс вöлi сылöн невна лажмытжык.

Джын сотня шаг бöртi Егор сувтiс, сапырнитас литовка оропсö муö и кутчисис лопатитчыны. — Тринь-бринь, тринь-бринь — ветлiс öтмöдöр бокö лопаткаыс, нюлiс литовка дорсö. Кеслiсьöм бöрын сiя сюйыштiс зудсö натодиль керöм пуртöсö, кöда öшалiс коскас сыромятнöй ремень бердын. Лопатитчисö и мöдiк ытшкисиссез. Только ме сулалi весь: эз вöв лопаткаö. Егор казялiс этö, мыччалiс кинас кольöм бадьыслань:

— Босьт бабкаыс дынiсь инькаöлiсь лопаткасö. Сьöкыт эд сiдз-ту.

Ме благодарностьöн нёджжöвтi Егор вылö, думайтi, что добрöй сьöлöма эта мужикыс и, пожалуй, весь сiйö оз радейтö. Ветлi бадь дынö и вайи лопатка. Менö вöтiс öтiк инька, кокнита ордйис и, паськыта литовканас öвтiкö, шысеттöг чепöссис одзлань. Недыр мыйись вöтiс Парась, дзарнитiс мелань.

— Сразу тöдчö, некöр абу ытшкисьлöмат. Вай жö мыччала, кыдз лопатитчöны.

Тринь-бринь, тринь-бринь. Инька уджалiс кокнита, кыдзкö гажöн, дзик не кеслiсис, а пукалiс пызан сайын и гижис любимöй мортлö дзирыт письмо. Ме старайтчи видзöтны буржыка, кыдз сiя видзö лопаткасö.

— Городас кинöн уджалан?

— Инженер ме. Проектировщик.

Парась дивуйтчöмöн нёджжöвтiс синнэзам, дзик первуись адззылiс быльнöй инженерöс, и шуис то ли жалейтöмöн, то ли кешитчöмöн:

— Мунiн бы, шоччисьыштiн вöрас. Ытшкисьöмыс — öддьöн сьöкыт удж, кужны колö...

— Ытшкисьышта невна. Сiдз, бöбалöм могись.

Вöтiс менö и кокнита одзалiс эшö öтiк инька. Ме ештi только казявны, кыдз вöрисö сылöн крут пельпоннэс, кыдз öвтчис öтмöдöрö кокнитик сарафан подулыс да кыдзкö нёштöма пöлiнясис каджыс. Ме сетi аслым кыв — не кольччыны эта инька сьöрись, быд вынiсь öвтi литовкаöн, часто нырнас кошши, кыдз баитöны, ма поззэз. И кöр казялi, что не только ог кольччы, а, мöднёж, тöдчöмöн вöта инькасö, — сьöлöмсянь радуйтчи, кыдз кага, кöдалö сетiсö кытшöмкö чöскыт тор. «Бу-ур, бу-ур, бу-ур!» шувлiс литовкаö, дзик бодритiс менö. Но киэз пондiсö орны, мыйкö сöталiс косö. Косьмис горш. А инька сё мунiс и мунiс, ритмичнöя — раз! раз! — öвтiс литовкаöн. Ме öдва ни лолалi, синнэзö вевттисисö гöрд сора веж круггезöн, йöрнöсö вамис и лякасис спина бердам, конувтсим и кымöс вывсим визывтiс сола ньылöм. Только бы не кольччыны, только бы не кольччыны, не мунны татiсь позорöн — кокасис дума. Юыс ладорсянь кылiс зоночкалöн горöтлöм. Этö, натьтö, Васька пуис ни черивасö и корис менö обедайтны. Но ме умöля кылi сiйö. Пеллезын трингис кытшöмкö вöснитик шы, дзик пырöмась сэтчö балямошшез, вартчисö борддэзöн, кошшисö осьта петны бöр и эз адззö сiйö. Литовка лопатиттöн вöтiс менö неыджыт мыгöра зоночкаыс, дзарнитiс синнэзам чочкомоккезöн, нёштöма пильскнитiс. Инька, кöда сьöрын вöтчи, керис ни мöдiк круг.

И сiдз, куим круг, öддьöн сьöкыт куим круг, кери ме шоччисьтöг, пуксьывлытöг. И думайтi ни чапкыны вакрамешö литовкасö, мунны позорöн татiсь, лишь бы не мырсьыны, но Мутэй Егор — сiя кыкись одзавлiс менö и керис вит круг — мöртiс литовка оропсö муö, чышкис кымöс вывсис запон поланас ньылöмсö и шуис:

— Атшалi, шульга кок бы несйис...

Эта арттöм поговоркасянь важын ни дурмисö пеллез, дзугыльтчис сьöлöм, но воштiсьны вöлi некытчö, и ме сьöкыта лэдзчиси, не лэдзчиси, а шлёпкиси ордчöн Егорыскöт. Охота вöлi куритны, юны кöдзыт ва, но эг вермы вöрöтчыны и öвтыштi быдöс вылö киöн: ло мый лоас... Пельпоннэз и киэз дрöжитiсö, сьöлöм токöтiс сьöкыта-сьöкыта, пессис, кыдз кай, готов вöлi петны моросiсь. Синнэз одзын сё эшö кывтiсö быд рöма круггез, и ме умöля адззи чужöммезнысö инькаэслiсь, кöдна сьöкыта пишкöмöн локтiсö миян дынö и сiдз жö сьöкыта шляпкисисö шоччисьны.

— Вот жö, покась, уна эшö ытшкынытö, ашын кежö кольччас, натьтö, — гажтöма баитiс Мутэй.

— Этö тiян коддес кузя эд, — шыасис Парась. — Иньыт эта неделяö мöдöдз прогул ни керö. Сэтчö жö вон Öгрöпен эз лок. Интересно, мый сыкöт лоис?

Егор мышкыртiс юрсö, пишкис горöн, некö, мöдiс онмöссьыны. Инькаэз невна чöлiсö, юисö ырöш, гöститöтiсö менö, асьныс мыйлöкö нямлялiсö öманыс курыт турун заэз. Öтiк инька осудитöмöн дзарнитiс мелань и шуис:

— А гордöй тэ. Ми шутитыштiмö сiдз, а тэ сразу литовка бердö. Городас, шуöны, инженерöн уджалан? Грамотнöй, сiдзкö...

— Инженеррес öнi уна, машинаэз керöны уна, — горöтчис мöдiк. — А ытшкисямö сё вот литовкаэзöн. Неужто оз позь керны сэтшöм ытшкисян машина, кöда мунiс бы и логын, и кöчкаэза видз вылын?

— Мыйлö машинасö керны? — шыаси ме. — Не буржык ли весöтны видззесö, кöчкаэсö ровняйтны бульдозерöн, кöдзны сэтчö культурнöй быдмассэз и ытшкыны вöлись простöй косилкаöн?

— Важын ни сiдз керамö бы, да вынным оз тырмы. Войнаыс бöрын этö видзсö эг на и весöтлö эшö, пöдтö ни вöрыс сiйö, — горöтчис Парась. — Вот весöтны бы арнас таво...

— Арнас позис бы, — саймис Егор да лэбтiс юрсö. — Комбайннэз пондасö кö мунны, дак одз вундiссяс таво.

Вопрос — пондасö ли мунны комбайннэз — волнуйтiс быдöнöс. И эшö бы! Он ешты кончитны сенокос, кыдз колö пондöтчыны вундыны. Ошпозъяинскöй инькаэз эз на вунöтö, кыдз быдöс ыббесö вундывлiсö чарлаэзöн.

— Ёрдöм эта уджыс, пым синваэзöн киськалöм, — баитiсö нiя. — Öнi дзик адiсь мезмимö, кöр комбайннэс и миян вöр шöрын мыччисисö. Мöйму чарласö, пожалуй, и киö ни эг босьтлö.

— Эта сiдз, — баитiсö мöдiккез. — А вот ытшкисям сё косаэзöн. Кöть бы петыр лунсö сетiсö празднуйтны, шоччисьыштiм бы кöть, песлалiмö бы вывт вежöттэз.

Егор саймис начöдз:

— Видзчись, сетасö. Председательным миян — не понлö не каньлö. Кывсьö, бöра пö быдöс деньгасö порсь картаэз вылö видзö, а народыслö праздник кежö — шиш.

— Да мыйлö жö петыр лунсö празднуйтны? — юалi ме. — Тöдат эд асьныт, религиознöй сiя праздникыс. Неужели тi святöйезлö веритат?

— Кытшöм веритöм. Век бы эг празднуйтö этö лунсö, да шоччисьыштны колö. Адззан, кытшöм сьöкыта уджалам. Эх, кöбы машинаöн быдöс керны — сьöлöм бы радъялiс. А председательсö тэ, Егорушко, эн вöрöт. Асланым сiя мортыс, не одззаэс кодь.

Медбöрья кыввесö Егор эз ни кыв — сiя бöра сунасис. Инькаэз шоччисисö дас минута дырна, баитiсö öтi-мöдi йылiсь и бöра кутчисисö литовкаэз бердö. Ны басниись ме вежöртi уна: колöны деревняö машинаэз, медбы не керны ни сьöкыт уджжесö киöн. Киöн уджалöмыс нырыштö мортсö, пöдтö сылiсь медбур чувствоэз, гажтöмсьöтö, оз сет отирлö культурнöя шоччисьны. Сьöкыт удж бöрын морт оз ни думайт босьтны киас книга, мунны клубö да кывзыны лекция нето видзöтны кино, сiя рад месталö. И дасiсь прав вöлi Данько, кöр баитiс: «Культура деревняö локтö только öтлаын машинаэзкöт». Быдöс аслам сьöлöмöн, каждöй вир вотьöн, каждöй мыдзöм мускулöн вежöртi ме, что деревня öнöдз кольччö городсянь только сiйöн, мыля татöн эшö уна сьöкыт уджжез керсьöны киöн.

Ме саймöтi Егорöс и вились кутчиси литовка бердö. Шоччисьöм бöрын ытшкисьны лоис эшö сьöкытжык. Киэз менам тувдiсö совсем, лоисö сьöкытöсь, дзик чуннезам кисьтiсö свинец. Туман совсем рознитчис, и шондi öнi сотiс жалейттöг. Ньылöмсянь йöрнöсö чорзис, вевттисис совчиррезöн и лоис, кыдз брезентовöй, — вот-вот потласяс. Ме часто юи кинлöнкö лагунiсь ырöш, мыйсянь пымалi эшö öддьöнжык. «Вжи, вжи, вжи» — шувлiс литовка, а юрын токöтiс дума: колöны машинаэз... колöны машинаэз... Да, колöны машинаэз. Сьöкыт ытшкисьны киöн. Мыля жö колхоз öнöдз эз весöт видззесö, мый думайтö председатель?

Сiдз, натьтö, ме и чапки бы литовкаöс, мунi бы татiсь позорöн, сералöв бы, натьтö, керисö ме вылын инькаэс, но мездiс том приятельö. Васька абу вермöм видзчисьны менö и павжун одзын локтiс дынам.

— Горöтлi ме, дядя, горöтлi — садь бырис, — юöртiс сiя. — А тэ паныт шы он сет. Тэ жö, дядя, кулан тшыгйöн, эн на сёй талун.

Сёйны, конечно, колiс, и ме öшöтi литовкасö бадь вылö. Берег дорö мунны миянлö колiс куртiссез дынöт, и ме адззылi, кыдз öтiк инька сьöкыта лэбтавлiс, а сыбöрын сiдз жö сьöкыта лэдзлiс муö стожар. Лысöй Онтон сiдз и абу локтöм уджавны, сылiсь уджсö керис мöдiк...

Эг на ештö сибавны берег дорöдз, кыдз пантасимö конюх Демидкöт. Старик локтiс кысянькö Чöвпан ладорсянь, шынньöвтiс меным кыдз добрöй тöдсалö и öвтiс киöн: сулалышт пö. Сылöн пыдына вöйöм синнэзын орсiсö кульпияноккез, тошокыс треситчис и быдöс аслас видöн старик баитiс, что сылö сьöкыт видзсьыны ыджыт смехсянь. Демид кутiс внучексö кипöлöт и висьталiс строгöя:

— Шагом марш гортö! Котöрт, кинлö ме баита? Но!

Васька дивуйтчöмöн дзарнитiс дедыс вылö, а сыбöрын ме вылö, дзик юасис, мыйлö сылö котöртны гортас. Ме вежöртi, что стариклöн эм кытшöмкö юöр, кöдö оз туй баитны Васька дырни.

Ме висьталi Васькалö:

— Мун гортат да дозирайт лосьпияноксö. Тэ жö сы дынын неделя ни эн вöв.

Зонка дыша иньдöтчис деревнялань. И сразу, кыдз сылöн саясис спинаыс кусттэз сайö, Демид öдззис нюжласьöмöн серавны.

— Ох! Миколай Иванович, Миколай Иванович! Мый ме талун адззылi! Настоящöй комедь. Ох-хо-хо!

— Мый, деда, сэтшöмсö адззылiн?

— Ох, эн ни юась... Öнöдз кынöмö висьö, сыбурна сералi. Эд колö жö, а? Но, проклённöй табун, кытчöдз вермасö лэдзчисьны, а? Мунi талун Чöвпан дынö межаоккез гогнавны, турунок, мыся, заптышта невна. Но бур. Локтi и уджала жагöник. Вдруг кыла: баитöны кытöнкö. Дзарнитi Ананикаыс керку месталань, а сэтöн настоящöй картина: старухаэз юрбитöны...

— Но-о-о?

— Истиннöй христос мекöт! Кытшöм толк бöбöтчыны? Быль баита. Локтi ме матöжык гуыс дынö пожумоккез коласöт, саяси кöз увтö и пондi видзöтны. Ох, мый только эз керсьы сэтöн! Кикимораыс, проклённöй, сувтöм гуыс одзö кытшöмкö ыджыт галя вылö, кок увтас ведра ва сувтöтöма, киас крест босьтöм, сэтшöм рожа, проклённöй, лöсьöтöм, истово поп сулалö! А сы одзын пидзöссэз вылö сувтöмась Макась Домна, Пугинiсь лысöй старичок Онтон, Мутэй Егорлöн иньыс да эшö Петришна Öгрöпен.

― Сулав, сулав, деда, — öмалi ме Демидсö. — Неважын только вон видз вылас Мутэй Егорыс баитiс, бытьтö иньыс шогалiсь кагаöн гортас кольччöма...

— Мутэй Егор висьталас, верит только. Да сылöн, проклённöйлöн, кагаэс ошпияннэзся здоровжыкöсь. Некöр оз шогалö. Но вот, сувтöмась быдöнныс кикимораыс одзö и öвтöны киэзöн, пернапасасьöны, значит. А ылöстöм кымöссэзнаныс только бут да бут мусö кокалöны! Джын час мымда юрбитiсö, а ме сё кöз увтас пукалi, охота вöлi тöдны, мый одзлань лоас. А одзлань лоис настоящöй комедь. Кикимораыс размöд öвтыштiс крестнас, сэсся сюйыштiс сiйö ваö, босьтiс киас кöш да кыдз öдззас васö гуыс вылö коявны, только бус лэбö...

— Этö мыйлö жö коялiс?

— А лешак тöдö. Видно, сiйöн, медбы нечистöй дук эз аркмы... Но вот, коялiс, коялiс, сэсся бöра гусис тыр ведра петкöтiс и давай жö ванас рожасö миссьöтны! А юрбитiссес, но дзик челядёккез, горöтлöны öтiк öмись: «Ась каньлöн синыс висьö, а не тэнат, матушка! Ась каньлöн синыс висьö, а не тэнат, матушка...» Ме кывзi, кывзi, да сiдз и мöдi ни серöмтчыны, но видзси сёжö и медбы не пондыны ваксьыны, сюйыштi тош конечöс öмам...

Кикимораыс зыртiс, зыртiс «сэтöр синсö» ванас, лыддьöтiс молитва да и шуö сэсся: «Дзик буржыка адззыны пондi». Пукалыштiс сiя невна галя вылас, шоччисьыштiс, значит, и пондiс юрбитiссесö «веськöтны». Перво локтiс Домнаыс дынö и юалiс вöснитик голосокöн: «Кыт тэнат, грешнöй, висьö?». Юалiс сiдз, бытьтö, проклённöй, первуись Домнасö панталiс, бытьтö эз и кывлы сы шог йылiсь. А Домнаыс и шуö: «Кокö, матушка, висьö. Мунi кöркö вöрö, а ме вылö и пöрис сiсь пожум, только вотш кокö чегис». Кикимораыс лыддьöтiс молитва, тшöктiс Домналö окавны крест, сэсся шуис бöра вöснитик голосокöн: «Ась кöинлöн кокыс висьö, а не тэнат, Домнушка». И брызнитiс чегöм кокыс вылö быдса кöш ва. И сiдз быдöннысö веськöтiс. Мутэй Егорлöн иньыс висьталiс, бытьтö гыркыс висьö, Петришна Öгрöпен кага еныслiсь корис. Ола, шуö, мужиккöт, а кага оз шогмы. Кикимора висьталiс: «Ась чавканлöн пияноккес оз шогмö, а тэнат, Öгрöпенушка, мед шогмöны», — и брызнитiс ваöн.

И вот лысöй Онтонлöн очередь локтiс. Старик сувтiс пидзöссэз вылö, окалiс кикиморалiсь кисö и шуö: «Ослобонит, матушка, ыджыт шог терпита». — «Кыт тэнат висьö, грешник?» — «Кила менам, матушка... пакам... петны пö мöдö... брызнит святöй ваокнас...», — и веритан ли, проклённöй, лэдзис эд вешьянсö! Кикимора кыдз чирöстас: «А-а-ах, луннас... шондiыс дырни... Ох, согрешеннё!». Но ме сэтöн эг ни вермы видзсьыны, сьöвзи öмсим тошöс да и серöмтчи лёкгоршöн, чуть гöгö эз пет! Ох-хо-хо-хо-хо! Веритан, кикимора черк-барк только кок вывсис усис, крестыс мезмис кисис да кыдз öбыртас Онтоныс лысина кузя, старикыт сунньöн-панньöн пондывлiс вöлi котöртны, но вешьяныс лэдзчисис и Онтон нюжалiс ордчöн кикимораыскöт! Макась Домна кватитiс бедьсö и только крöмлик-крöмлик котöртiс гуыс сайö. Инькаэз лэбтiсö матушканысö, мöдiсö кыскыны тожö гуыс сайö, но сiя мезмис и веськыта ыбыс кузя, кыдз бордтöм рака, лэбзис деревнялань. Адззылiн бы тэ, кыдз котöртiс. Дасiсь чожжыка, нежели сэк, вöрас... Да...

— Мыйкö умöля верита ме, деда. Кин жö, поди, юрбитны пондас керöс дынас?

— Истиннöй христос мекöт! Вот, если он верит... Эна кыввез бöрын старик чöвтiс пельпоннэз сайись пестерсö да кыскис сэтiсь неыджыт пуовöй крест.

— Колисö гуыс дынö, сыбурна повзисö. Председательлö мöда мыччавны, ась невна сералыштö. Кыдз тэ думайтан, эм кикимораыслöн мыйкö юрас?

— А кыдз тэ ачыт думайтан?

Старик шы эз сет, только öвтыштiс кинас и мунiс кытчöкö Пугин ладорö, а ме жагвыв оськалi деревняö и думайтi: «Не быдöс висьталiс старик! Сайлалö нывсö. Сiдз и шу, Марфа Демидовна тожö Чöвпан дынас вöлi».

Эта думаöн ме и пыри оградаö, кытöн оча ныр пантасимö Марфа Демидовнакöт. Инька, кыдз öшöм, ветлöтiс оградаöт и вöлi не кулöм не ловья. Рожабаннэс бöра шойöтöмась, тырппес лöзöтöмась, синнэс вöйöмась эшö пыдынжыка, а киэс дугдывтöг дрöжитiсö. Сiя, тыдалö, неважын только локтöм гортö и абу эшö ештöма садясьны. Гажтöм синнэзöн Марфа Демидовна дзарнитiс ме вылö и юöртiс ойзöмöн:

— Ох, беда, Миколай Иванович, конеч менам локтö...

— Мый сэтшöмыс, Марфа Демидовна?

— Вöр дядь повзьöтiс... Мыйнö, мыйнö... Только сибалiм Чöвпаныс дынö да пондiм ягöдоксö öктыны, сэтöн вöрас, кыдз ризнитас-чегас мыйкö, и давай жö кинкö ваксьыны-серавны нёштöм голосöн... Ми не кулöмöсь не ловьяöсь лоим, старайтчам молитва лыддьöтны, а кыввезным кынмисö, нем и горöтчыны ог вермö. А вöрас бöра: «Ох-хо-хо!» — да сiдз куимись. Вöлись и вежöртiм: вöр дядь тешитчö миян вылын. Ой, беда! Не бур одзын сiя шыасьлiс миянлö.

Ме öддьöн полi сыись, медбы Марфа Демидовнаöс вились эз чапкы кудоба, и кыдз кужи, сiдз и пондi бурöтны сiйö. Эта коста ковсис невна бöбöтчыштны, сочиняйтны быдкодь гажа историяэз, кöднö, кыдз ме тöдi ни, Марфа Демидовна кывзывлiс ыджыт охотаöн.

— Кытшöм жö, поди, вöр дядь, Марфа Демидовна, — пондöтi ме. — Поди, сiдз кажитчис тiянлö? Вöрас мукöдпырся мыйсö он кыв. Ме вот тожö öтпыр муна вöлi неыджыт расокöт. Но ладно, муна и муна. И тожö вдруг кыдз öдззас кинкö ваксьыны-серавны, кыдз öдззас! Ме чуть перво кок йылiсь эг пöр. Мый, думайта, сэтшöмыс?

Дзарнитi, а сэтöн мыр вылын инька да мужик пукалöны. Мужикыс и висьтасьö мыйкö, а инькаыс ваксьö лешак моз...

— Мыйлö нiя сэтчö локтöмась? — öзйис Марфа Демидовналöн вöвлытöм любопытство.

— А порсь тöдö, — гажöн отвечайтi ме. — Может, любовнöй делоöн мыйкö.

— Тьфу! — сьöвзис Марфа Демидовна да гажöнжыка ни шынньöвтiс. — Висьталан тэ.

Кынымкö сэтшöм история кывзöм бöрын Марфа Демидовналöн дугдiсö дрöжитны киэс и чожа юöртiс, что лунся заботаэз бöрын öнi, пожалуй, водас шоччисьыштны. А ме мунi правленнёö. Менам чужис чорыт решеннё: лэбтыны тревога, корны, медбы председатель проверитiс быдöс и примитiс кикиморакöт строгöй мераэз. «Кыдз жö сiдз, — думайтi ме, — öтiккез песöны выннысö, унажык бы заптöны турун, а мöдiккез эта коста, здоровöсь и вынаöсь, керöны челядьлiсь удж, кывзöны Кривöй Матренöс, кöда, тыдалö, ылöстöмсялöма ни начöдз?». Но правленнёын пукалiс только бухгалтер и, кыдз пыр, шваткöтiс счётыэзöн. Öмас трубка видзикö, сiя только и висьталiс, что председатель, Анна Даниловна да Анань Данько асывнас мунöмась посадö и кöр локтасö бöр, сiя, конечно, оз тöд.

Ме решитi мунны видз вылö и юöртны юрбитöмыс йылiсь инькаэзлö. Но сы коста, кöр вовлi гортö, видз вылын шогмöмась неучöт событиеэз. Ме казялi, кыдз ытшкöм видзыс дорöт, самöй ю пöлöн, жолькöтöмöн и дзуртöмöн шупыта мунiс косилка. Гнедöй гöна пара вöв орсiсö пеллезöн, öвтiсö юррезнаныс и кыскисö косилкасö нем туйö. Косилка вылын лихöя пукалiс клетчатöй йöрнöса да кузь юрсиа детина и веськöтлiс вöввезнас. Эта вöлi Гриша. Косилка пурт увтсянь орöттöг петiс ытшкöм турун, водiс ровнöй лёдзö, а радмöм инькаэз, кöдна эз и казялö менчим локтöмöс, котрасисö машинаыс сьöрын, дзик первуись адззылiсö сiйö, и быднёж ошкисö Гришасö.

— Дона кай тэ миян, кыдзкö отсалiн!

— Гришунька, ягöдтусиньöй, буржыка видзöт, эн жугды машинатö.

— Пыравлы петыр луннас: сурок вийöтi!

Ме думайтi-кери да, медбы не дзугны инька пöлöсыслiсь бур настроеннёнысö, оськалi бöр гортö. «Локтас председатель, баитышта сыкöт, да и метöг, может, быдöс лöсялас», — думайтi мунтöнним.

А событиеэс развивайтчисö öддьöн перыта, и гажтöм конец нылöн вöлöма совсем ни матын. Но висьталам быдöс сьöрсьöн-бöрсьöн...

Дата добавления: 2015-11-16