Палатаын ыджыт лун

Мийö палатаас вöлiмö витöн: пöрись вöралiсь Ермолай, Свердловскись студент Алик, леспромхозiсь тракторист Митя, нёльöт классын велöтчись Коля да ме — и пöрисьöсь, и шöрöт годдэзсяöсь, и челядёк, Но олiмö бура — дзик öтiк семья: отсасим öтамöднымлö, чöскытжыксö старайтчим мыччыны Аликлö да Колялö и некинöс эг дойдлö лек кылöн.

Медпöрисьыс миян коласын вöлi Ермолай. Сылö неважын вöлi тырöма семьдесят восемь, но мортыт бура кылö и адззö, оз дышöтчы баитны, радейтö кывзыны радио да кокнитика гуддисьыштны политикаын. Эз вöв сылöн, кыдз баитсьö, не чин не грамота, но вöлi бытшöм садя юр, вöлi отирöс радейтiсь сьöлöм и кузь годдэзöн öксьöм опыт. Тöдчис, что татöн сылö гажтöм и недолыт; сылö эз гленитчö дзескыта сувтöтöм койкаэс, умöлика белитöм потолокыс, сылöн незьдöм пельöсыс, дзуртан джоджыс. Но ошкис нiйö отирсö, кин миянöс дозирайтiс, ошкис сёянсö, паськöмсö, небыт да шоныт ольпасьсö.

То ли гажтöмыс кузя, то ли весь олöмыс кузя старик сё касьтылiс гортсö, а медöддьöн — старухасö да кык правнучаткаöс, кöдна понда кутчöма вöлi тшупны виль баня. Öнi чидiс сiя, что вот тулысыс быркнитас-лэбзяс, кыдз чож кай, и тшупсянсö ковсяс кольны ар кежö и что гожумнас керыс косьмас и тшупны сiйö лоас сьöкыт. Эшö тöждiс черикыйöм понда: вот-вот оссяс Иньва, а сiя, пöрись няридз, кутiс да водiс больницаö. Эд вöлi тожно öтiк приступ, а умöльыс пö лоö вöлись куимöтыс бöрсянь, дак колiс я тэрмасьны?

Операция бöрсяняс Ермолай асьсö пондiс лöньсьöтны: ась ни пö эта тулысыс öшас, зато пö мöдiккес сылöн лоасö — эд «синтöм» кишкасö, орсялöмсö, чапкисö, а ранаыс бурдö бытшöма. Öнi, пожалуй, позяс и внучекыскöт согласитчыны — велöтчыны ветлыны мотоциклöн. А мый, разь оз велав?

Студент Алик, кöда куйлö ордчöн Ермолайкöт, локтöма Свердловсксис сойыс свадьба кежö, но эшö свадьба панытас сюрöма хирургическöй палатаö. Сылöн вöлi сьöкыт операция: «слепöй» кишкаыс потöма Менделеевасянь локтiкö, и орыс паськалöма кынöм пытшкас.

Ме бокын, öшынланяс, куйлiс Тонкоев Митя. Сылöн вöлi гöрдкодь ыджыт тош, но тоштöм Ермолай сьöртi сiя унаöн томжык. Митя, кыдз ме вежöртi сы басниэзiсь, леспромхозам лыддиссьö бур трактористöн: удж понда сылö сетöмась орден, ыстылöмась ударниккез слёт вылö. Мöйму мужикыт тёщаыслö кералöм керку вöр да надсадитчöма сiдз, что петöма пахас кила, вот Митя и сюрис хирургическöй палатаö.

Öддьöн интереснöй мортöн вöлi менам мöд соседö — Колька Мукедов. Швавья юра, гöгрöса сина и цыган кодь сьöд вира, сiя вöлi кыквывса феномен: öткö, майсянь ноябрьöдз купайтчö юын, и тöвбыт — мороз не мороз — косви зыртчö лымöн; мöдкö, сылöн вывтi ыджыт память — юрас видзö быдöс, мый кöркö адззылiсö синнэс. Этö ме казялi сы сьöртi, кыдз сiя куим лун бöртi тэчис шахматтэз, кöднö мийö пöрöтлiмö орсан шöрас, и мöдпöв мыччалiс партия, кöдаын вермис менö.

Вот ныкöт и ме куйлi да кыдз кужи джендöтi тулысся кузь луннэсö. И конечно, кыдз и нiя, старайтчи лоны бур ёртöн: дозирайтi нiйö, кин эз вермы чеччыны, гортiсь тшöктывлi вайны интереснöй книгаэз, висьтасьлi ылiсь Приморье да кöдзыт Ямал йылiсь, кöдна местаэзын вöвлывлi том годдэзö. И ежели кинлöкö и вöлi шог, дак этшöм оланас шогыс тöдчис етшажык, кадыс кывтiс чожжыка, ранаэзным веськалiсö кокнитжыка.

И эта луныс — нёльöтыс — миян палатаын пондöтчис öддьöн бытшöма. Шондi петандор кыш-паш пырис дежурнöй сестра, öзтiс палатаас би да быдöннымлö тэчис градусниккез. Чуть сёрöнжык миянöс миссьöтiс старушка Михеевна, зелёнöйкодь сьöд рожабана санитарка, и бöра висьтасис, кыдз сiйö кöдковну панталöма пон и кыдз старушкаыс понсö, медбы эз пур, вердöма яёвöй пирöггезöн, а город дынас вöлись казялöма, что сiя поныс вöлöма вöр пон — рукйöсь гöна кöин. Ермолай стыдитiс Михеевнасö сы понда, мыля сiя, пöрись морт, эз вермы казявны, кинöс вердö, и мыля эз висьтав кöиныс йылiсь вöралiссезлö.

Сэсся миянöс вердiсö казённöй сёянöн, а сыбöрын мийö чöсмасим гортся стряпняöн да юим сахара туримоль ва, кöдасянь, кыдз шуö Михеевна, усьö жар и озжык косьмы горш. А операция бöрсянь прокод овлö ыджытжык температура да пактö öмын. Туримольсö Ермолай вайöма сьöрас сымда, что тырмис бы миянлö куим неделя кежö, и Михеевна, кöр керас сиропсö, сiйöн юктавлiс и мöд палатасис отирсö.

Эз чöсмась миянкöт Алик — садьтöг узис. Сiя ойбыт ойзiс да ружтiс и сё корис юны, а юны сылö нач эз туй, и Михеевна только мавтлiс сылiсь руш ваöн тырппесö.

Сёйöм бöрас кывзыштiмö радио, а сэсся Коля бöра вайис шахматтэз и мийö сыкöт орсiмö часся дыржык. Эна луннэзö ме висьтавлi зонкаытлö быдкодь приёммез, и сiя менö вайöтiс матöдз, а куимöт партиясö ме досповна эг ни орс, сiдз кыдз сiя колис менö ферзятöг. Ме вöлi рад, что дженыт кадö эшö öтiк мортлö отсалi керны бур оськöв одзлань, и небурика, мед эз понды вышитчыны, ошки Колясö. Эта понда, натьтö, и сюйыштiс сiя менам киö джын апельсин — шогалiссес коласын мед ни дона тор. Ме пондылi апельсинсö сетны сылö бöр, но Коля некыдз эз босьт, и меным ковсис торйöтны сiйö вит торйö да сетавны быдöнныслö. Этöн кольччис довольнöй Коля, вöлi довольнöй и ме: бöра аркмис бытшöм дело.

Обход костас миян палатаись гажыс пышшис. Öткö, сестра видiс Митькаöс, мыля сы тумбочкаын, кыдз умöлик кухняын, дуксялöма кытшöмкö стряпня, а мöдкö, сестрасö видiс врачыс, мыля Алик тумбочка вылын сулалiс глюкоза сора ва, кöдö лöсьöтчисö кисьтны капельницаö: юас эд пö шогалiсьыс, а мый сэки лоас? Куимöткö, бура дöнзис и студентыслö, кöда пондiс орöтны-корны юны.

— Тэ мый кагаас пöртчан?! — горöн баитiс лöгсяняс гöрдöтöм чужöма врачыс. — Висьталiсö, оз туй — и быдöс! Ашын инженерöн лоан, а некытшöм воля абу! Вон дзор старик — и шы оз сет; вон Коля — челядёк — и то кывзö менö. Видзсьы, терпит — и чожажык веськалан...

Валерий Михайловичöс ме тöдi мöдкодьöн — рам мортöн, спокойнöйöн, а талун вдруг чирзöмöдз лоис. Да кин вылын ыждалiс — шогалiсь морт вылын, аслас пациент вылын, кöдалö удерлун куим час сьöрна керис сьöкыт операция!

Но эта бöрсянь чожа мыйись локтiс Михеевна и висьталiс:

— Ойсö öтiк воть абу узьöма докторыс, турьявтöн ветлöтö тай... А студентыслö мöдiкö пö колö керны...

Дак вон мыля сiя талун желлясьö, дзик лёкöтчись ань!

Алик койка дынö чукöртчисö нёль хирург да вель дыр кывзiсö да пешлiсö студентсö, а минута бöртi локтiсö сестра да санитаркаэз и тележка вылын тарöвтiсö Аликсö операционнöй жырö.

Ермолай, кöр петкöтiсö зонкасö, жалейтöмöн горöтчис:

— Этатшöм мука том мортлö дöнзьöма! Ась ен оз шу...

— Быд мортлöн аслас туй, и некин сiйö оз орддьы, — шуис Михеевна, кöда кöркö ештöма ни пырны миян дынö кöртовöй дозокöн киас. — Ме тай жöник сайö некöр эг мöд петны, а куимись петалi...

— Дак сiйö война вöлi, — шыасис Митя.

— Кыкö войнаыс вирдiс: Öндрийкосö Хасан дынын, а Пилясö — Берлинас ни... Быд мортлöн, мый тэ он шу, аслас туй,— кöртовöй дозоксö осьтiкö баитiс старуха.— Ноко, кагаэз, отсыштö меным, тампоннэз тшöктiсö керны.

Мийö керим ватнöй дзулёккез и кывзiм Михеевналiсь «лекция» сы йылiсь, кыдз колö берегитчыны операция бöрсянь, да мый сёйны, медбы перытжыка бурдiс вундалöм местаыс.

— Медпервöй лекарство тiянлö — уль кольть... Да эшö ма ёна отсалö. А ва эд юö — сiя умöль. Ваыс — мельницаэз кырöтö. А кöдзыт васö эд и нюкайтö. Тiйö тöдат, мыля Аликсö бöр сэтчин кыскисö? А ва юис — сэсся нем! Тiйö видзöтö менам: кыдз вайöтасö сiйö, метöг вотёк эд мыччö. Колька, кылiн?

— А ме эг сетлы.

— Сетлiн я эн я, ме ог юав. А сэсся — ша! Кылiн, мыся?

— Кылi ни, кылi, — öбидитчöмöн туткыштiс Коля.— Не учöтик, поди.

— Вот и бур, кылiн дак.

Михеевналö семьдесят саяс ни, сiя кöсыник, дзик косьмöм нянь шöрöм, а чорыт характера морт. Ме этö казялi эшö сэк, кöр сiя менö вашöтiс «не олан» койка вылiсь. Сiя койкаыс сулалö öшын дорас, югыт местаын, и, кыдз ме локтi, водi сэтчö юасьтöг. Водi да сразу книга бердö кутчи. Кыш-паш, дзик гусь кань, сибöтчыштiс ме дын лöзкодь халата старушка и пель одзам шушукнитiс: «Давай-ко, кага, мöдiк койка вылö водам». Ме шуа: меным эстöн бур, мыся. «А меным, кага, умöль. Эта койкаыс не тэ понда. Тэныт овны да овны эшö... Вежöртiн?» Михеевна шур-шар öктыштiс хламоккезöс и тэчис мöдiк тумбочка вылö. Меным кольччис öтiк: мунны сы сьöрö. Только ме эг лöсьöтчы сувтны сы дор и мöдi рез-паз жугдыны сылiсь теориясö, вашöтны сы юрись одзза векся приметаэсö, но только ештi осьтны öмöс, а сiя сэк жö и öмлöсалiс менö:

— Тöда, мый шуан, но — ша! Вежöртiн? — и малыштiс, кыдз кагалiсь, кушмыны ни пондöм юрвоманöс. — Мöдпырся, кага, баитам, а öнi — ша! — и уйыштiс-петiс палатасис. А ме думанам шуи сiйö пöрись тупкаöн, кöдалö вашöтлыны бы шыррезöс, а не больницаын уджавны, но сыбöрын жалейтi жö: пöрись дак пöрись и эм. Да и, веськыта кö шуны — мый сэтöн умöльыс? Эд сiя отирыслö жö бурсö керö бы — сюйö миян кодьыслö юрас веськалöмö веритöм: вот кыдзи водан пö эта койка вылö, дак чожажык веськалан. И волятöм морттэслö эта, ме думайта, бура отсалö.

Мийö быдöнным, Коляся, тöдiм, мый сiя лоö öтiк неделя вылын керны мортыслö кык операция, но чöлiм. Каттим чуньпоннэзöн ватаись коколёккез, чапкалiм нiйö тазокö и чöлiм. Только Ермолай нет-нет да и кашельтыштас кокнитика — лöсьöтас сибдöм голоссö да минутаджын кежö лöньсьыштасö, бытьтö падмасö, Михеевналöн чорзьöм да вежöтöм, бырöм гыжа чуннес и кылас пыдынжыка ловзисьöм.

— Но, мый нö, Ермолайко, голостö лöсьöтлан, лöсьöтлан, а сказкасö он пондöт? — вдруг юалiс Михеевна.

— Ог тöд ме сказкаэсö, — шуö старикыт.

— Сэк шульышт мыйкö — серöмтöт энö угланнэсö, — Михеевна юрнас мыччалö миян ладорö.

— Ме эд и бöбöтчынытö ог ни лысьт, — откажитчö Ермолай. ― Бöбöтчöмыс эд мукöдпырсяс бедаöдз вайöтö. Тiян сэтшöмыс эз на вовлы? А ме сы кузя öтпырись сэтшöм страсть адззылi — век ог вунöтчы... Гожумнас — эта вöлi сорок четвёртöй годö — меным ковсис Свердловскö мунны, зонöс охота лоис адззывны. Локтi сэк госпитальсянь, а сiйö босьтöмась. И коккезö оз новйöтö, бедь бердын только видзся, а сьöлöм потö...

Вит год, лыддьы, эг адззисьлö. Но, тэчи öтi-мöдi мешöчокö да и мунi. Локтi Менделееваöдз, вокзалас татшкиси, а сэтöн отирыс — чунь он мöрт. Сулалöны. чöлöны, дзик вартлöмöсь: садьтöмöсь, онзыля синаöсь, лöзöтöмöсь. И каждöйыс билет бы босьтö, каждöйыс мунö бы. Но, думайта, неделясö эстöн сё ни пукалан... А вöлi менам ёрт кудымкарскöй, ранитöм жö. Сiя и шуö: «Дак кыдз инö, Ермолай, билетсö судзöтам?» Дак, мыся, чöвпанок ме сета нето маок, а тэ пырав кассирыс ордö. А сiя: «Мийö няньсö да масö и асьным кужам сёйны, а кассирыслiсь билетсö весь босьтам... Вешьян гасникыт эм эд?» А былись, вешьянö, срам, косам личытöв вöлi, дак ме сiйö воньöн кöрталi. «Вай-ко гасничоктö, фокус мыччала», — висьталiс сiя и сувтöтiс ассис корзинасö мешöккез вылö, кöдна дорын старуха сулалiс. «Эн уськöт жö, бабыс, — закажитö сылö, — а то беда лоас!» Мездöтi вонёкöс, сетi. Петалiс сiя öтöрас, а кöр бöр локтiс, сразу корзина дынас кыссис и шуö: «Бабыс, а мыля нö корзинасö пöрöтлiн?» — «Мый тэ, мый тэ, батюшко, — эг!» — «А мыля нö петöмась?» «Киннэз петöмась?» — «Змеяэз». — «Эн баит, кöдö оз ков!» — «Быль шуа». — «Кыныма вöлiсö?» — «Сизима». Кыласö баснисö мöдiккез, жöв керсясö, чöлöны, а синнэзныс зыргöны корзина ладорас. И вдруг öтiк инька кыдз чирöстас да чирöстас: «Змея!.. Змея!» — и чуньнас мешöк вылö мыччалö, а ачыс вöрзьöтчыны оз вермы. Ме дзар кери — сьöд змея каттисьöмöн куйлö: юроксö вывлань лэбтöм, öмсö, дзик вижлок, лештыртöм. Дзик чарöтiс отирсö горöтöмыс — шы оз кыв. А ёртö нарошно: «Граждана, сизим змея кöрзинаись петiсö, тiйö жагвыв...» Кытшöм ни сэтöн жагвыв! Тойласьны лэбтiсисö, зык, гам... Кин лабичас кайис, кин ыбöсас уськöтчис, кин öшынас, — адззылiт бы, мый сэтöн öзйис! Старухасö, дзик чагокöс, öтöрас кыскисö, а мешöккесö кöс талисö. Ме кыдзкö пельöсокö инми да кутчиси цепь бердö, кöдöн ва юан кружка, дзик понöс, стена бердас кöрталöмась вöлi, и кольччи.

Кассиршаыс юрсö öшынокас сюйыштöма да чирзö: «Мый лоис, сотчам я мый я?!» Змея, мыся, то, змея — и воньöс ассим чужйыштi да киам босьтi. Кассиршаыс сэтöн давай серавны, давай ваксьыны! Кöдна эз ештö петны, сувтiсö, дзарьясьны пондiсö. А ёртö горöтлö: «Ермолай, билеттэсö неб, билеттэсö!» Уськöтчи ме касса дынас и чожа босьтi. А старухаыс, кыдз бöбöтчöмыс разьсяс, милиционер дынö мунас да норасяс ёртö вылö... Сто руб вештiс, артист, бöбöтчöмыс понда. А колiс бы пельдыннэсö лёшавны нето боккесö кöвдавны. Разь колö сэтшöм шумсö öзтыны — ровно немецыт бомба чапкис!.. Дак вот, Михеевна, сэксянь ме ачым ог пöрьясь-бöбöтчы и мöдiккеслö пыр тотя: эд бöбöтчö, эд бöбöтчö!

Колька, пахсö видзöмöн, кромликтiс-локтiс менам койка дынöдз, кытöн пукалiс Михеевна, кикнитiс-серöмтчис.да висьталiс:

— Миян Петрунькалiсь пельбоккесö тожö волькöтiсö...

— Кин нö? — юалiс Михеевна, и Коля серöм пыр вежöртöтiс миянöс:

— А Наталёк-чивылёкыс, сылöн невеста-без-местаыс! Бöбöтöма сiйö: билет пö босьта кино видзöтны,

ачыс Олюокöс велосипедöн Кудымкарö кыскöма.

— Сiдз Петруньытлö и колö — эн бöбöтчы! — висьталiс Михеевна. — А тэ, кага, мортсö некöр эн бöбöт, вежöра ло, честнöй, кыдз учитель. И мöдiк челядьлö сiдз висьтав.

Этшöмсö Колька, тыдалö, эз видзчись и дыркодь чöлiс да вöлись серьёзнöя висьталiс:

— Но.

И мунiс аслас койка дынö да бöра пондiс керны ватнöй гöгляноккесö.

— И миян öтпыр бöбöтчöмыс кузя тöдат мый петiс? — пондöтчис висьтасьны Митя. — Лапша петiс... Ме сэк танктöг ни вöлi, пехотнöй ротаö сюрöтчи. Да и не рота, а юр да бöж кольччис и то кытшö сюрис. Кыдз

петны кытшсис? Отир етша, патроннэз етша, не нянь не табак абу. А кыдзи нянь да куритан абу — кытшöм сiя олан?? Командир шуö: «Кин энö местаэсö тöдö — ме дын!» Петiс сы одзö тоша мужик. Командир юалiс, кысь позяс адззыны нянь да табак. А матын деревня пö эм, сэтчинiсь пö и адззам... Луннас и мунiм ми — дас гöгöр морт. Расоккез, ыбоккез чулалiм, пода карта кытшöвтiм и видззез вылö петiм. Видзöтам: одзаным деревняок мыччисис — километрся невна унажык сы дынöдз. Сержантыс и шуö: «Киселёв да Власкин, тi пырат деревняас, а ми гуна дорас пондам видзчисьны». Корсис вöлi тоша мужикыт, дак эз лэдз сiйö сержантыс — не солдат эд сiя, кин, поди, и эм да. Ми лöсьöтiм винтовкаэз, гранатаэз; дегтярёвскöй пулемёт сьöраным сетiсö, — и сiйö кырасокö сувтöтiмö... Минута-мöд чулалiс — бертiсö разведчиккес: деревняас немецыс пö абу. Но, ми сэтчин, раз некин абу. Повтöг осьтiм ворота, деревня улицаас пырим. А сэтöн — дыды-ды-ды! — автоматтэз! Ми сöтiм бöр — кок увтiсь бус кайö! Нiя — миян сьöрö. Сержантыс горöтö: «Пулемётчик, сувтöт немецсö!» А пулемётчикыс мыйкö кольччис бöранымжык, но оз лый. И тöдат, мыля? Шентöма пулемётсö! Шентöма да миян сьöрö куртö — и бöрас оз видзöт... Тоша мужикыт казялас этшöм делосö, бертас пулемётыс дынö, кватитас сiйö и давай готтьыны немецтö! Только сёрöнöв эта аркмис: нiя одзжык миянöс шырзисö, и вöрас ми бертiм куимöн — сержантыс, разведчикыс да ме... А тöдат, мый керöмась? Деревняас абу и пыралöмась. Видзöтöмась ворота дорсяняс — абу некин!... Сизим юр нем понда öштiм. Адззан, мый петö?

— Öтiклаын сизим, мöдiклаын сизим — и сiдз мильённэз öшисö, — гусьöник, бытьтö ас пондасис, шуис Ермолай.

— Талун тырмас, — шуис Михеевна да нöбöтiс кольччöм ватасö и керöм дзулёккесö. Минута бöртi сiя локтiс вились да юöртiс:

— Студентсö часöт вайöтам, быдöс бура лöсялöм, — и кыскис халат кармансис вит кольть. — Талун ыджыт лун, а ме кольттесö мичöтны эг ешты и кöть уллезнас верда. Сёйö, дитяэз, рананыт чожжыка вурсяс. И ша!

— Меным кольтьыт оз и ков, — горöтчис Ермолай. Кöбы пöжалöм картов вайин, дак öддьöн и бур бы вöлi.

— Кыным ни лун куйлан? — сибöтчис сы дынö Михеевна да пондiс лöсьöтны бокö вешшöм матрацсö. — Одзöв сiйö сёйны.

— Неделя сибöтö...

Михеевна лöсьöтiс койкасö, зэлöтыштiс юр вывсис розовöй чышьян, больничнöй салфетка, тэчис киэсö боккезас, шуис:

— Кытöн нö неделяыт, а? Кватьöт лун талун. А шуин: ог лысьт бöбöтчыныт!..

— Ачымöс позьö...

— Но, ладно, керам. Только — ша! — и бöра суседко моз гусьöн, кыдз велалöм ветлöтны сорок год сьöрна эстöн уджалiкö, ыскöвтiс-петiс коридорö.

Мийö сэтöн жö, дзик катшаэз, писькöтiм да юим кольттесö. И эг на ештö малыштны зэркыт кынöммезнымöс, кыдз локтiс инькаэс палатаись чотiсь старушка — Ермолайлöн тöдса. Сiя баитöв-керис пöрись вöралiськöт и быдöннымлö сеталiс шоколаднöй конфетаэз — талун пö эд ыджыт лун — быдöс му вывся праздник — и колö сетавны отирыслö гöснеччез.

— Мый, ми нищöйез я мый я? — öбидитчис Митя, кöр петiс миян дынiсь старухаыс.

— Сёйö, сёйö, сэтiсь нем абу, — велöтiс Ермолай.— Но тöдö: часöт эта бур сьöлöма инькаыт унажыксö не тiян йылiсь думайтö, а ас йывсис — медбы еныс сiйö чожжыка веськöтiс...

Сэсся вайöтiсö Аликöс, водтöтiсö сiя жö койка вылö, но ольсасисö мöднёж. Эстöн сiя саймис, пондiс видзöтчыны öтiк часö вöйöм да пемдöм синнэзнас, бытьтö первуись адззö этö лöнь палатасö, миянöс. Сестра сэтöн жö лöсьöтiс сылö капельница да кышалiс киэсö одзжык лöсьöтöм петляэзö, а коккесö кокнитика кöрталiс койка бердас марляись керöм кöртöтöн. И нырас и öмас тшуписö: юны оз туй, сёйны оз туй, бергавны оз туй.

Алик кывзiс, ньылалiс дульсö и шы эз сет. Да и кылiс я сiя, вежöртiс я, мый сысянь корöны?

Михеевна зэлытжыка керис петляэсö, бура шебралiс да шуис:

— Этадз, кага, и тэныт, и меным буржык лоас. Узь. Кöр кольччимö öтнаным, Колька бöра локтiс ме дын шахматтэзöн, и мийö орсiм обедöдз. Сёйöм бöрас узьыштiм, а сэсся пондiм видзчисьны полдник. Коля бöра вöзйисис орсны, но ме сiйö иньдöтi видзöтны телепередача. Вот сэк и пырис миян палатаö кватьöт морт, кöдö Михеевна сёрöнжык нимкодялiс мöдöра кучикöн.

Сiя вöлi топытик, небытик, рамыник да гöгрöса, топ дженытик быгрöтчан. Тошсялöм чужöмыс дзирдалiс ыджыт öдöн, дзик том невесталöн, кöдö только корасисö жöник сайö. Сылöн куньсьыштöм, лапöтасьöм синоккес вöлiсö дзик чужöйöсь и некыдз эз йитсьö сы жаг кикоккöт — дзöрисö-ветлiсö, кыдз ворлöн.

Мужик паськыта осьтiс дзуртан ыбöссö и повтöг вожмöвтiс ыбöс увтсö, кытöн колö лоны пороглö, дзарйöвтiс дзуз синоккезнас палатасö, негора голосöн горöтчис:

— Радио абу, патреттэз абу, еннэз абу — вот кытöн килаа мортыслöн оланыс! — и содтiс: — Здорово, челядь!

— Локтан здоров, Питю пиян! — шыасис сылö Ермолай.

— Локта-ту здоров, а кытшöмöн бöр иньдасö — ог на тöд, — кокнита нöбöтiс баснисö мужик. Голосокыс сылöн вöлi небытик, лайкыт. Как раз кага онмöсьтан песняэз сьывны. — Поди, коккезнам одзлань петкöтасö да? Эстöн эд пурттэзныс коса кодьöсь, а киэзныс оз дрöжитö: поткöтöны кир-вар, вурöны тяп-ляп, кыскöны тур-тар.

— Эн карзы, Питю пиян! — сувтöтiс сiйö Ермолай.

— Тэ разь быль менö тöдан? — шагньöвтiс Ермолай ладорö мужикыс.

— Балаыт сьöртi тöдi — васно айыт. Тэ эд Туртыгись?

— Сэтчинiсь. Питю Пашаöн менö шуöны. Шарк пырис Михеевна, дзугис нылiсь баснисö:

— Тэ, Туртыгин, уна эн кой. Вот тэныт чышкöт да кружка, вот койка — вод да узь. Адззан, студентыс öдва ружтö, а тэ сюзь моз уксан сэтöн.

— Вежöртi, малинтусь, ёна вежöртi, — висьталiс Питю Паш и сразу лöньсис, нельки кок чунь йылас сибöтчис койка дынас, гусьöник осьтiс тумбочка ыбöс да пондiс ректыны корзинкаок: кыскис лиловöйöн мичöтöм кольттез, кренделлез, стаканöн ма, рисьтупöссез да эшö öтi-мöдi, кöда вöлi каттьöма чышьяноккезö. Аслас синнэс сё лыйлiсö öтмöдöрö — тöдмалiсö палатасö да сэтiсь олiссесö. И ме думайтi, что сылöн дзирыт синоккес шуч адззöны мортсö, сидзöны сы юрö, и небытик старик пондö быдöс тöдны мортыс йылiсь. Меным лоис не ас сьöртi, кöр сiя кынымкö секунда видзöтiс чужöмам, кöть и немымда ог верит йöз думаэз тöдöмлö.

Вöрзьöтчис Алик, бöра пондiс баитны аслыс. Питю Паш дзар керис сы вылö, шушкыштiс:

— Сылас лымыскöт эта лампасиыс.

— Эн карзы, мыся, — бöра горöтчис Ермолай.— Перво тэныт колö сывны, а не сылö. Зонкаыс таво институтiсь вöлись петас, эз на ов.

— Карзы эн карзы, а ловья вирыс сылöн абу ни. Шыасис и Митя:

— Мортыслiсь джын кынöмсö чапкисö, дак кысь жö сiя сразу лöсьытыс лоас? Лун-мöд бöртi вежсяс, бöра югмасö рожабаннэс.

— Видзöтам вот, видзöтам, — нёштöм шынньöв сорöн горöтчис Питю Паш да пондiс кыскавны корзинасис бутылкаэз.

— А сэтöн нем и видзöтны, — споритö Митя. — Ме ачым тöн сы кодь вöлi, а талун юрöс лэбтi ни. Томыслö дыр я кок вылас сувтны? Фронт вылын вон ки али кок орöтасö томыслiсь, а керасö укол-мöд, каттясö ранасö — и ловзьö. Ачыт, натьтö, адззывлiн. Кокыт, тыдалö, ранитöм жö. Кытöн пуляыс окыштiс?

Питю Паш шытöг ректыштiс корзинасö и простöйсö петкöтiс öтöрö — иньдöтны гортас. Митя висьталiс:

— Öт пельнас, тыдалö, мужикыт оз кыв. Сiя учöтсянь сэтшöм, Ермолай, али сёрöнжык вукойсялiс?

— Ме эд, Митрей, ог тöд сiйö. Айсö тöдлi: Туртыгын мельникöн олiс. Ох и вöрлешак вöвлi! Локтан изны — неделя видзас, кöть и изаныс абу: то турун сылö петкöт, то пес вай, то тёщасö городö кыскыв, а городöдззас пятьдесят верста... И бытшöм пороз вöлi, некытшöм инькаöс бокö эз лэдзлы. Сы кузя и юрсö öштiс.

Ермолай эшö мыйкö мöдiс висьтавны, но пырис Питю Паш, и старикыс öвсис. А Паш дзар-бар кытшöвтiс крысалöн кодь синоккезнас палатасö да кыскис тумбочкасис бутылка.

— То сiя — оланыслöн правдаыс, — лэбтiс юр вевдöрас да треситiс посуданас. — То сiя!.. Подругаö вайис, — ошшасьыштiс да дзебис бутылкасö тумбочка пыдöсас, ыбöсок одзас сувтöтiс стул, пуксис сы вылö.

— Бытшöм тэ порозок, коли подругаэт юкталöны и вердöны, — сьöвталiс Пашсö Митя. — Только ог вежöрт ме: тэ веськöтчыны али вина юны татчö локтiн?

Да, Питю Паш треситчис öнi коньякöн, а одзжык тумбочкаас тыр тапкис-сюйис сур бутылкаэз. Мый бы эта лоö? Морт лöсьöтчö операция кежö и вдруг — сур да вина. Ума али бöбсора эта мужикыт?

Мийö видзчисим, мый висьталас Питю Паш. А сiя кыскис кармансис чöрс йыв кодь ёсь да пондiс гуддьыны пельсö. Чувйис пельсö и чикыра синнэзöн зырйис-нёджжалiс миянöс да чöскыта, чуть тöдчöмöн шыннялiс öм дорокнас.

Питю Пашлö вöлi долыт, вöлi öддьöн бур. И эз вöв охота кывзыны курыт кыввесö. Но Митя эз сет сылö зника:

— Весамисö пеллет? Дак висьтав нö, кытшöм шогöт коньяккесö радейтö?

— А-а, тэ бы тожö жорскан коньяксö? Ась нö тэныт ен сетас ме кодь шогöтсö! — ёрдчис Питю Паш да жагвыв пуктiс ыджыт пернапас.

— Тырмöны аслам, Питю Паш, вевсьöн олöны ни,— кокнита дöвгис Митя, — и некытшöм коньяк меным оз ков.

Сiдз и эз висьтав лöг мужикыт, кыт сылöн висьö, а стул бердас гырснитiс посудаöн — шедтiс пробка — да голюк понсис пондiс гулькйыны-юны быгья сур. Сёрöнжык, конечно, мийö тöдiмö Питю Пашлiсь висянсö — почкаас галька, — кöдö, кыдз висьталöмась враччес, мукöдпырсяс вермö пазöтны базарскöй сур, чочком вина, коньяк, ром. Питю Паш надейтчö, что сылöн галькаыс петас юаннас и почкасö сылiсь вундавны оз пондö.

Саймис Алик, вöрöтыштiс кöс тырппезнас, кеймисис:

— Юкталö менö... пожалуйста...

Ласкова и гажöн, бытьтö дона мортлö, Питю Паш горöтчис:

— Мый, анжинер, пактö горшыт? А ежели сурок? Лöсялас? — и босьтiс Аликлiсь кружкасö. — Сiя бытшöма ыркöтö.

Чуть я не тшöтш горöтчисö Ермолай да Митя:

— Эн ышты, Питю пиян!

— Сылö и васö оз туй юны!

Сё сэтшöм жö рамыник и небытик голоса Питю Паш шынньöв сорöн шуис нылö паныт:

— Стрась тiйö умнöйöсь и быдöс тöдат, кыдз икотаэз, а что сурыс бур лекарство,— сiйö одö тöдö. Меным докторыс ачыс висьталiс: кöть ведра понiсь, шуö, ю, только кынöм вылат эн ветлöт, — и сюйыштiс Аликыс тырппезö кружкасö.

— Сестра! Сестра!— чирöстiмö мийö Митякöт, кöр казялiмö злодейлiсь лёк уджсö.

— Алик, эн ю! — корис Ермолай.— Сiя вияс тэнö! Но студентыс лэбтыштiс вынтöм юрсö и тэрмасьöмöн, горшöн жамйис кöс тырппезнас кружка дорсö. Ермолай перыта бергöтчис бок вылас, нюжöтчис Аликыс койкалань да пиньöвтiс Питю Паш киись кружкасö. Секунда кежö сiя жмитыштiс кисö морос бердас, сэсся мый вын шупкис кружкасö Питю Пашлö гöрд рожаас, но выныс эз ни тырмы: киыс лёп мунiс, ровно орисö жилаэс, и кружкаыс только небурика павкис злодейыс кынöмö да кыминьтчис Аликыс морос вылö, гывьялiс сурнас сылiсь чужöмсö, кöтöтiс тырппесö, кöднö студент тэрмасьöмöн пондiс нювны паськыт кывнас. А Питю Паш, пöльтчöм и свиттялан чужöма, ки бöрнас пыркöтiс пижамасö да видiс Ермолайсö:

— Вот пон, вот чуча! Кватитiс эд, видно, кöспельыс...

А Ермолай садьтöг усис гатш, кутчисис киэзнас морос бердас и сэк жö лöньсис.

— Сестра!

— Михеевна!

Миян öшынö öтöрсяняс вартiс вына тöвчик, осьтiс форточкасö, а сэсся и ыбöссö. Тумбочкаэз вылiсь лэбзисö газетаэз, салфеткаэз. Уль лымоккез лякасисö миян чужöммезö.

Питю Паш вевттьыштiс куш голясö пижама воротникнас, небытика горöтчис:

— А старикыт, рать, колдун вöлöма! Кöр колдуныслöн лолыс петö, дак погода лэбö. — Питю Паш жагвыв пернапасасис да коккезнас шаркöтöмöн петiс коридорас, кытöн эз вöв тöлыс.

— Сестра! Сестра!

Шув-пав пырис сестра, уськöтчис Алик дынö.

— Ермолайыслö умöль, — висьталiс Митя. — Кыдзкö отсалö...

Сестраыс котрасис аслас жырö, вайис шприц и керис уколлэз, а Михеевна Ермолайыс нырöм вылö кышалiс кислороднöй маска. Но старикыс чöлiс, эз вöрзьöт и синлысöн. Сiя, лöзöтöм чужöма да куньöм синнэза, куйлiс гатш и эз ни вачкись ловья мортыс вылö. Нельки паськыт киэс вöлi тэчöмöсь, кыдз кулöмлöн, только веськытыс пидзыртöма кулакö.

Локтiс Валерий Михайлович, пöдналiс форточкасö и дыркодь вöдитчис Ермолайкöт, а вöлись висьталiс сестралö:

— Водтöтö ординаторскöйö...

Некин. шы эз сет, только сьöкыта ловзисис Михеевна и мунiс лöсьöтны Ермолай понда виль ольпась...

Кöр нöбöтiсö миян палатаись Ермолайсö, менчим сьöлöмöс сывьялiс гажтöм и кутiс недолыт. Да и Митялö эз вöв гажа, сiдз кыдз сiя сё ыш лолалiс и чöлiс. И меным охота вöлi öнi меднёштöм кыввезöн, медзубыт видчанöн дойдны Питю Пашлiсь чорзьöм сьöлöмсö, но сiя эз вöв палатаас, а, кыдз висьталiс Михеевна, рама да лöня пукалö телевизор одзын, пукалö да шыннялö небытик тырп дороккезнас;

Эх, олан, олан! Тэ мыля сэтшöм зэлыта, дзик миськасян бон, пидзыртiн мывкыда старикыслiсь сьöлöмсö?

Мыля, олан, тэ мукöдпырсяс орлалан нiйö вужжесö, кöдна вермисö бы сетны бытшöм петассэз, мыйсянь бы кöть невночка бурсялыштiс отирлöн ойлуныс, а тэнат югмыштiс бы эшö öтiк торок? Али сэтшöммес — бур отирыс — вывтi уна тэнат, и нiя нач ни пыркöтiсö да чышкисö му вывсис берся лёксö?

Ме вежöрта тэнö, олан: эта мирын бурыс и умöльыс — быдöс тэнат и быдöс тэ понда дона, кыдз бытшöм мамлö аслас челядьыс. Но эд справедливостьыс — тожö тэнат улок, тэнат торок, дак мыля нö тэ сiйö мукöдпырсяс видзан кыдз не ассит пиянöс?

Рытывбыт менö öдолейтiсö быдкодь думаэз, а сьöлöмö торьясис кык торйö: öткö, жаль, öддьöн жаль вöлi Ермолайöс, а мöдкö, меын павьялiс кытшöмкö гаж: вот мортыс, поди, и оз ло, а нимыс сылöн, сы добрöй делоэзлöн говкыс пондас овны миян оланын, и эта оланыс öтiк вотёкöн, öтiк чирöн лоас югытжык, сöстöмжык, мичажык.

Алик бöра корис ватор, и сестра, кöр видзöтiс сылiсь температурасö да пульссö, воть-мöд кисьтыштiс сы öмö туримоль ва, гажöн шуис:

— Но, зонка, öнi позяс и свадьба йылiсь думайтны...

Дата добавления: 2015-11-16