ЦÆЛЫ ФЫНГЫЛ

Цæлхъзард, быцæу... Нæй сидтытæн æмбал,

Хæрзæввахс чидæр ассадта йæ кæрдтæ,

Сæ азарæй ныууынæргъыдта гал,

Мæ фарсмæ бадæг акалдта йæ хъал:

Цæл кæнынæн æй галы богъ хъыг дардта.

II. Цæсты фæзилæнтæ

АИВАД

Хуыцауæн нæ! Дæуæн кæнын æз табу...

Мæлæтау — карз, æрвæрдынау — рæсугъд,

Мæ сираг бæх кæны, æлгъыстау, фаддзу, —

Дæ галуаны раз басыди мæ уд.

Цы сагдæртæ нæ хъавыдысты уымæ

Фыдæй-фыртмæ, фæлæ сыл уад кæуы.

Йæ цъуппыл та, — æнæрвæссон, ызгъуыммæ,

Бæстырæсугъд сæрбæрзондæй лæууы.

Мæ ныфс, тæргай сывæллонау, фæлидзы,

Нынкъуысы тары дурвæдджимæ хох,

Æмæ та йын йæ фалгæрæттæ уидзын,

Æмæ та ног æрдынæлвæстæй — тох.

Уæдæ, кæд у уæларвбæстæ æнæдон,

Нæ дзы æрзайы удыхосæн сæнк.

О, аивад! Дзæнæт мын у дæ зындон,

Ды, кæнæ æз! — Уый у мæ уды фæтк.

Дата добавления: 2015-09-05