ЗОНДАМОНÆН

Рæстдзинад у Хъæбатыры æгъдау, —

Дæлдон кæнай, уа ауындзæн дæ хъуырыл, —

Уæддæр дæ раст, уæд-иу у раст æмгуырæй

Æмæ-иу би дæ иунæг михыл кау.

Козбау та ног дæ удмæ фау куы хæсса

Йæ сау цæсгомыл армистæй, уæддæр

Дæ сау хъама цыргъыссад уæд, цæттæ

Æмæ йыл хæц — йæ кæрддзæмы йæ ма ссон!

Зæххыл цы не ’рцыд, ахæм хъуыддаг нæй,

Кæд дзы нæ уыд хæрз æдылы дæр паддзах,

Фæлæ-иу хыл æнæхъуыддагæй ма къах,

Дæ маст-иу ма ис хи удæй, сæнæй.

Фæндонхорз у фæндиæгты æрмадз...

Æвзæрæн маргæй йе’мыдзаг йæ цайдан.

Рæсугъд цæрын кæй нæ фæнды, уый уадз,

Йæ мæлæтæй ыссардзæни йæ пайда!..

НЫСТУАН МÆЛÆТМÆ

Зарæг

Арвыл сусæны стъалы æрбатæхы.

У мæ къæсы та хъоло сæудзыд.

О, мæлæт! Цæй, дæ хорзæхæй,

Ма тагъд кæн, —

Æз нæма фæдæн дзырд...

Дуне — сусæг, сывæллоны авдæнау,

Карчы цъиутау, йæ хæрзтæ — æвзæрст,

Мæн йæ хинты фæдисмæ нæ равдæлы,

Уый нæ уарзы мæ цæст.

О, фæлæ, мады риутау, кæй бауарзтон,

Уыцы арвы цъæх ма байс мæнæй!..

Уды рухсдæр фæндиæгтæ — ауæзтау,

Ской сын нæй æмæ нæй...

Ехх, хъысмæт та цы удыл нæ рахæты,

Фæлæ уый нæу мæ хъæстаг, мæ зын:

Мæн фæндыди, мæ сонтæй кæй бафхæрдтон,

Уымæн хатыр зæгъын.

Донласт фесты мæ уарзæтты цæссыгæй

Ме знæт фæндæгтæ. Цард та фæуы.

Рох фыдæлты уæлмæрдыл къæмдзæстыгæй

Æз сæргуыбыр лæууын.

Иунæг иу хорз ма у мæ удæнцой:

Мæн ирон мырты фæрцы фæнды,

Дуджы сагъæстæн басгуыхон хурбæлццон,

Уарзтæн — ифтыгъд фæндыр.

Амонд нал и фæндиæггы разагъды,

Ме сконд мæсыг бындзарæй кæлы?

О, мæлæт! Цæй, дæ хорзæхæй,

Ма тагъд кæн,

Æз дæ кадæн мæлын!..

Дата добавления: 2015-09-05