МÖДНЁЖ ЭЗ ВЕРМЫ ЛОНЫ

Не сiя лунö, кöр видзчисис Олявка, не ашынас ылiсь гöсьыс эз лок, а вайисö сысянь письмо, кытöн вöлi гижöма, что стариксö туй вылас пондöма висьöтны, и сiя неделясö-кыксö мöдö овны Перемын, зятьыс ордын, а сэсся сёравно вовлас Кудымкарö, сiдзкö, Андрей ась оз тöжды и оз вид пöрись мортсö. Сымда и висьталöм — не гижны, не звонитны оз позь.

А Верепов тöждiс: и чеччис, и водiс гöсьыс нимöн и Олявкалö покойсö эз сет, сё тшöктiс то миськасьны, то песласьны, то кошшыны бытшöмжык вина да сёян, то фронтовöй песняэзöн пластинкаэз адззыны — любо лоас пöрись солдатлö кывзыны, а может, и сьылыштны тшöтш.

Медбы буржыка тöдны, мый сэтшöм танк и кытшöмöсь нiя вöвлiсö война костас, Андрей Никитич öтпырись рытывбыт пукалiс библиотекаын, лыддьöтiс книгаэз да журналлэз, лыддьöтiс, кыдз сыбöрын шуис, юрыс пыктытöдз, но нач шардöтiс сiйö то эта: войнася нёль годö миян странаын вöлi керöма сто два тысяча самоходка да танк.

Кык неделя, кыдз только мезмас лекцияэзiсь, звонитлiс соседкаыслö — эз я лок? — да тэрмасьлiс гортас я рыт-рыт лыддьöтлiс полководеццезлiсь да солдаттэзлiсь гижöмсö, медбы унажык тöдны война йылiсь правдасö. Не сiйö правдасö, кöда йылiсь похоронка висьталiс: «Пал смертью храбрых...», и не сiйö, мый уна год бöртi юöртiс мöдiк документ: «В списках убитых и раненых не значится», а ловья правда — солдатскöйö, фронтовöйö.

А гöсьыс локтiс как раз недосуг коста: кольччис кынымкö лун Победалöн годовщинаöдз, и техникум корис гöститны фронтовиккезöс. Андрей Никитичöс тшöктiсö лöсьöтны магнитофон, медбы рытнас гижны баитiссесö.

Гуддисьö Андрей Никитич, кошшö неладносö, а минутаэс чылöны-мунöны, некытчö оз кышасьö, оз падмö. Дзар керис часы вылö — рыт сибалö, а сiя сёйтöм. Вот сэтчö и звонитiс соседкаыс: локтiс пö, видзчисьö. Уськöтчис директор дынö — абу, котöртiс завуч кабинетö — пöдана. Кинöс кольны ас туяс, кинöс корны? Звонитiс Олявкалö, тэрмöтiс сiйö лэдзчыны городö, ачыс котöртiс гортас: кыдзкö пö сёравно керся, бур отирыс эз бырсьö.

Нiя пантасисö öтöрас. Гöсьыс тöдсасис кöин ыжда поннэзкöт, кöднö видзисö эта керкуись челядь. Пасьтасьöма сiя öння мода сьöртi: каракуль воротника пальто, кроликовöй шапка, не öддьöн паськыт вешьян, ботинкиэз — быдсöн сьöд, только голясö сайöвтö гöрд кашне. Чужöмыс паськыт, тоштöм, блед.

— Здравствуйте, Прохор Давлетович! — ылiсянь шыасис Верепов и нюжöтöм киöн сибöтчис не сэтшöм ыджыт мыгöра морт дынö.

— Андрей Никитич? — гöсьыс зэлыта кутiс сылiсь кисö и дыркодь сiдз видзис да нёджжалiс ятнöй, лэчыт синнэзнас Вереповсö. — Ну, здравствуй! — шуис сiя негора голосöн. — Бур лун, Никита пиян! Ме Дорохин.

Вот диво: москвич, а тöдö коми кыв! Андрей Никитич лöсьöтчис ни юавны, абу я сiя лингвист, оз я тöд финно-угорскöй кыввез, но Прохор Давлетович висьталiс:

— Ме татöн быдми, детдомын... А ола вон кытöн!

— Адззылi, кытöн. Быдöс видзöтi.

— Вöвлiн Рузаас?

— Нарошно мунi, кöр письмоныт локтiс, а тiйö Перемö...

— Вот дак изюм, — серöмтчис Дорохин.— А ме ог и думайт сымдасö. Но ась, эн жалейт кадсö эта понда. Сiя святöй дело — солдатöс касьтывны.

Сiдз баитöмöн пырисö квартираö, чöвтчисö. Андрей Никитич лэдзис орсны магнитофон да пондiс ваявны пызан вылö сёян — капустаок, сола гос, öшын вылын быдтöм лук чепляннэз.

Кöр Дорохин пырис пемыткодь прихожöйись шöрись жырас да пондiс вевттьыны кизерик юрсинас кушмöм вомансö, Вереповлöн синнэс ордчисö: старикытлöн быдöс моросыс тырöм орденöн да медальöн. «Öтiк, кык, куим, нёль, — пондiс лыддьыны сiя, — сизим, кыкьямыс, öкмыс... И куим «Слава»!»

— Колiс бы семьятö видзчисьны да вöлись... Али тэрмасян кытчöкö?

Ковсис висьтавны, кытшöм сылöн семьяыс и кытшöм талун рыт техникумын.

— Босьт-ко и менö сьöрат, — вöзйисис Дорохин. — Любита собраннёэсö кывзыны, велассьöма учöтсянь.

— Мыдзатö эд.

— Медбöрья годдэсö ме совхозын рабочкомöн командуйтi, дак кужа пукавнытö, седунö пöртчи... А перво вот мый: мыччав-ко карточкаэз. Важжесö,

— Айöлiсь? Абу эд. Кытчö и лоисö, некин оз тöд.

— Может, эз и вöлö. Сэк некöр вöвлi снимайтчыны. И некытöн. — Дорохин кыскис сумкасис книга, пуктiс пызан вылас, паськöтiс. — Этö öнi быд студентлöн аппарат, а сэк?.. Вайи ме кык фото. То эстöн — танкисттэзö велöтчис. Отличниккез.

Вежöтöм фотография вылын не öддьöн ятнöя тöдчисö двадцать гöгöр солдат, эшö погонтöмöсь. Андрей Никитич öтпыр да и мöдпыр сувтöтлiс синнэсö каждöй чужöм вылö, а сiйö, кинöс кошшис — роднöй айсö, эз адззы.

— Эм я эстöн?

— То кöда, ордчöн мекöт, — тюкнитiс чуньнас Дорохин. — Видзöт бытшöмик — тöдан.

Дыр видзис киас фотографиясö, ылiсянь и матiсянь нёджжалiс, сё мöдiс адззыны айыс чужöмись мыйкö донаö, роднöйö, кöдасянь сьöлöм вылын лоö долыт да шоныт, и эз адззы. А кытöнкö юрас али сьöлöмас, может, жилаэзас, олiс-лолалiс шы не шы, кыв не кыв, а мыйкö сэтшöм-сэтшöм ласковöй, нежнöй — «Андрюшка...» Может, сiя шуöмыс-кылыс, дзик медважнöй кадр, кольччис медбöрья басниись, прощайтчикö?

Бергöтiс карточкасö, шöрись строкасис адззис фамиллё: Верепов. Медулын тэрмасян киöн гижöма: «Курсы механиков-водителей, 1941».

— А эта — фронтовöй, — Дорохин сетiс мöдiкö. — Сэк меддона солдатскöй награда миянлö сетiсö — «За отвагу» медаль... Руза город сайын.

Снимок вылас шапкатöм нёль танкист, сералöны гажöн, радöсь.

Эстiсь адззис сорасьтöг: и синнэс, и шынньöлыс — топ Нина сойыслöн. А пеллес — дзик сылöн, Андрей Никитичлöн, — дженытöсь, но паськытöсь — чур видзöны бокö.

— Менам нiя уна, — шуис старик. — Фотографияын мöдпöв снимайтiсö. Сета тiянлö. И асланыт лоасö, и музейö нöбöтат, и школаö — небось, тожö корöны. Татiсь газетаö öтiкö сетам... Статья айыт йылiсь гижи. Только военкоматö эшö ветла да колхозö, а то ог тöд, кыдз уджавлiс. Утлянно-то ог тöд, но тöда öтiкö: Никита эз вермы шаляй-валяй уджавны. Кытшöм солдат вöлi, сэтшöм и тракторист должен вöвны... Но ладно, сы йылiсь эшö баитамö, а часöт, Андрей, давай техникумыт йылiсь думайт...

Локтiс Олявка. Сiя кокнитик, шырöм овчинаись вурöм пасёка, гöрд шапочкаа, кытшöмöсь öнi гöрдззöны французскöй мохерись, капроновöй чулкиа, но эшö шоныт сапоггеза. Апрельскöй шондiыс ештöма ни пуктыны сы чужöмö ассис рöмсö, керöма сiйö эшö басöкжыкö, ровно волькöтöма да дзебöма чукыроккесö, и пиннес свиттялöны чочкомжыка, дзик нiя керöмась жемчугись.

Верепов тöдсöтiс нiйö и жалуйтчис гöсьыслö:

— Некыдз бы оз лок овны городö...

— Умöля, тыдалö, коран, — шыасис Дорохин. — Не сiдз я, хозяйка?

— Может, невночка и сiдз, а может, и мöднёж, — думайтöмöн отвечайтiс Олявка. — Не сiдз-то просто быдöс эта. — Сiя дзар керис пызан ладорö, видiс моз Андрей Никитичöс: — Сёяннэсö вайöмыт, а мыйöн нö панясьны-судзласьнытö, стряпка?

— Озö колö, — висьталiс Дорохин, — Сёйны пондам сыбöрын. Мунам, Оля, öтлаын, концерт пö лоас. Поди, и коми песняэз сьыласö, интересно эта.

— Мунам, пасьтасьö тiйö, а ме пызан вывсис дзимляла...

...Залыс вöлi ыджыт, и сэтöн — тыр народ. Неетша сулалiсö стенаэс пöлöн. Андрей Никитич котрасис кабинетас и вайис Олявка понда стул. А Дорохинöс эшö одзжык, кöр тöдiсö, кин сiя, корисö президиумö. Рытыс пондöтчис öддьöн торжественнöя. Оссис занавес, и отирыс син одзын, сцена пыдöсас, уна рöма брильянттэзöн югйöвтiс Победа орден. А сы дын, öтмöдöр боксянь, автоматтэзöн сулалöны солдатскöй паськöма зонка да нывка.

Петiсö сцена вылö да пуксисö кузь пызан сайö гöссез, и сэк жö шыасис сьöлöм вöрзьöтан музыка да пондöтчис быдöс мирлö тöдса сьыланкыв: «Вставай, страна огромная, вставай на смертный бой...»

Эта песня дырни гöссес сувтiсö. Нiя эз вермö пукавны да спокойнöя кывзыны этö вир пизьöтан песнясö. Лэбтiсис кок йылö и быдсöн залыс.

Кöр песня сьывсис, директор висьталiс, кин нылöн гöссес, и сетiс кыв пöрись инькалö, фронтовöй медсестралö, кöдö война туйыс нуöтöма Волга дорсянь Берлин шöрöдз.

— Ме и счастливöй и несчастнöй морт, — горöтчис сiя да ыш ловзисис. — Счастливöй сiйöн, что мунi ва пыр, и би пыр, панталi ыджыт лун, вöвлытöм Победа лун, и öнöдз ола эта гажа оланын... Ме счастьетöм морт — менам однополчана, менам ёрттэзö, эз локтö сiя ыджыт лунöдз, и ме пöрисьми семьятöг... Вот мый сэтшöм война вöлi ме понда и ме кодь жö тысячаэз понда. Нiя немымда эз жалейтö асьнысö, эз кеймö не пулялö, не снарядлö, кöр Родина тшöктiс дорйыны ассиным мусö, дорйыны маммезöс да айезöс, дорйыны поснит челядьöс — одзланься олансö...

Залын абу шытор, бытьтö кывзiссес ланьтiсö. Андрей Никитичлö тöдвылас усис неважся басни, кöр сiя локтiс Москвасянь. Тридцать гöгöр годся мужик, снабженец, кöда неумöля тöдö Ницшелiсь философскöй визьсö да лыддьö войнасö общество понда колан факторöн, шуис: «Часöт каждöй полководец, каждöй фронтовик-офицеришко — писателлес йылiсь ог ни баит — гижö книгаэз. И печатайтöны, и вузалöны, и библиотекаэзö чукöрöн иньдöтöны, да некин нiйö оз лыддьöт. Некин! Не сiя öння лыддьöтiсьыслö колö, не сiя!..»

Пондылiсö сыкöт споритны, но сiя вермис öмнас быдсöн купесö.

И часöт, инькасö кывзiкö, Андрей Никитич радуйтчис том отирыс понда, радуйтчис этöн рытнас, и эта шытöм залöн кыдз бы тупкис волькыта баитiсь снабженецлiсь öмсö: сiя, мый правдивöя гижöма, мый честнöя керöма-висьталöма Великöй Отечественнöй война йылiсь, — кутчö морт сьöлöм бердö, олö миянкöт да отсалö зорöтны олан.

Инькаыс бöрсянь баитiс пöрись солдат, кöда пондöтчöм пессьыны фашисттэскöт эшö Испанияын, а гортö бертöма Югославиясянь. Куимöт выступайтiсьыс, морскöй десантник, воюйтöма Норвегияын, нёльöтыс вöтлöма Квантунскöй армияись самурайезöс...

Россия, Россия! Кытöн только эз вöлö тэнат зоннэт да ныввет нiя сьöкыт годдэзö, мыйсö эз адззылö!

И мымда жö, Россия, вöлöма тэын добротаыс, ежели сiя тырмöма сетны и рытвыв странаэзiсь, и ойвыв муэзiсь и асыввыв океан дорись йöзлö! Россия, Россия!..

Кынымись ни вежсис сцена вылiсь караул, а гöссес сё висьтасисö и висьтасисö, и залыс кывзiс. Вот и Дорохин петiс трибуна дынö.

— Ме сувтча öтiк подвиг вылын, кöдö керис советскöй отир Сталинград дорйикö, и эта подвигись босьта учöтик, но типичнöй торок танкисттэз оланiсь. Сэтшöм торок, кöдö, кажитчö, морттэс некöр эз вермö керны. Но нiя керисö... Эта экипажын вöлi механик-водительöн Никита Верепов — сылöн зоныс велöтö эта техникумын... Дак вот, тöвся рытö öзйис ыджыт бой, мийö вешшим бöрлань, öштiм не öтiк танк. Эз берт танкыс и Вереповлöн... Ашынас, югдандор, миян вылö вились уськöтчисö немецкöй танккез, да не сiдз, кыдз мийö видзчисим: перво чепöссис öтiк и öддьöн перыта локтiс веськыта миян вылö. Сы бöрсянь — мöдiк, куимöт, только ылын одзисьыс дынсянь. А сы кузя миян пушкаэс лыйöны и бöрись танккес тожö. Вурисö, вурисö — жугдiсö сётаки... Экипажыс петiс танксис, дзебсисис логö... Этö Верепов да сылöн ёрттэс пышшöтöмась немецкöй танк. Врагыс ныр увтiсь... А асьныс — ранитöмöсь, öдва вöрöтчöны...

Каждöйыс баитiс торья бой йылiсь, неыджыт подразделеннё йылiсь, кöднакöт сёйис-юис öтiк дозiсь, куритiс öтiк кисетiсь и тöдiс нiйö, кыдз сойöс-вонöс — мыччалiс ассис войнасö, но эта ассяыс — кöс правда, эта ассяыс — ыджыт войналöн торок. Эта вöлi сэтшöм рыт, кöда Андрей Никитичлö сороковöй годдэзся героическöй оланiсь осьтiс эшö öтiк тöдтöм страница.

Гортаныс нiя бертiсö сёрöн ни и пыд ойöдз пукалiсö пызан сайын, не тэрмасьöмöн бöрйисö виль кадсö, касьтылiсö кöркöсясö, чулалöмсö, и Дорохин сё бергалiс война гöгöр, ветлöтiс сы туйез кузя, ветлöтiс, кытi мунiсö сылöн танккес, сылöн ёрттэс, кöда кузя мунтöн öтiккез öштiсö юр, мöдiккез кольччисö китöг, коктöг, синтöг, куимöттэз судзöтiсö воюйтан опыт, бур слава.

— Тэ, Андрей Никитич, мöдiн тöдны, кыдз воюйтiс айыт, — пондöтiс Дорохин сiйö баснисö, кöда понда и локтiс пыд Урал пытшкö поздiсьöм городокö. — Дак эшö öтпыр шуа: сiя воюйтiс геройскöя и кулiс кыдз герой. Но кулiс, висьтала, нем понда... Да, нем понда... И не только сiя, а уна отир.

— Кыдз этö — кулiс геройöн и — нем понда? — обидитчис Андрей Никитич. — Сiдз разь вермас лоны?

— А вот сiдз, дона ёрт... Война вылас быдöс овлö... Перво кывзы-ко, а вöлись... вöлись и юасьны дугдан... Февраль сорок четвёртöй годö мийö сулалiм Украинаын. Миянöс, танкисттэсö, сетiсö полклö, кöдаын отирыс вöлiсö стрась етша. Полк одзын сулалiс задача: босьтны важ крепость. А тöдан, мый сэтшöмыс крепостьыс? Дак вот кывзы и вежöрт... Ю дорись керöс вылын — вал, а вал пытшкас — доттэз да дъзоттэз. Валыс паськыт — двадцать метрся не векнитжык. И керöсыс, и валыс — миян ладорсянь ваöн киськалöмöсь — волькыт йы, катушка. Кузянас — джын километр. И быдöс йыа. Вал саяс — кирпичнöй стена, а сы сайын — вичку, казармаэз, складдэз, мастерскöй да эшö öтi-мöдi.

Одз асывнас миян дынö локтiс комбат, сетiс приказ: «Кватьöт да öкмысöт мунасö крепость пытшкö. Пушкаррез «осьтасö» ворота, а танккез вешталасö сы сайись баррикада и жугдасö складдэз, казарма, огневöй точкаэз, вöлись пырас пехота». Кватьöтсö нуöтiс Никита, а мöдсö ме... Но, вежим траккез, асбестöн тупкалiм быд осьтасö. И люккесö. Немецытлöн тожö вöлi биа смесь, и сiйöн сотлiсö миянлiсь танккесö. Да, война вылас и кöртыс сотчö, дзик сартас... Керим, мый колiс, пырим шоччисьны керкуокö... Приказ видзчисям. Видзöта: Никита гижö письмо. Эг понды сылö мешайтны, мунi анекдоттэз кывзыны. Кывзан, он кывзы, а öтлаын пукалан... Дыр я мöд жырас олi, ог тöд, а петi — сiя сё гижö. «Не роман я, Никита, гижан?» — серала ме. Не, шуö, не роман, а зонöлö памятка. Кузьö и кузьö гижис, тыдалö.

— Медбöрьяыс, кöда меным, дженытик, — висьталiс Андрей Никитич. — Ме сiйö бура тöда. Февраль вылас и вöлi гижöма.

— Сiдзкö, дыр думайтiс, уна мöдiс висьтавны... И вот команда... Котöртiм, заводитiм. А пушкаррет масьтöны воротасö, доттэз кузя бузйöны. Сэсся химиккес сэтшöм тшын лэдзисö — дзик ой лоис, туйыс умöля тыдалö... Нетшкöвтчи ме первöй, кыдз тшöктiсö, чулалi валсö — немымда эг буксуйт: пушкаррес «лöсьöтöмась» туйсö. Ыждöтi воротаас осьта, баррикадаэсö вешталi öтмöдöрö — пехоталö туйсö осьтi... Ме бöрын и Никита локтiс. Жогьям пушкаись, а кытчö — нем оз тыдав. И миянöс, кыла, кысянькö вурöны, да сiдз вурöны — броня торрес юр вылö киссьöны... Мöд баррикада вылас кайтöн менам машинаö кушöтiс кынöмсö, сэтчö и сöтiсö — гусеница орис. Танкö бергöтчис моз, ыскöвтiс бöрлань... А пушканым сё кожгö, оз чöв... Сэтöн сiя и одзалiс менö да öдззис соровтны пытшкас. Вöлi паздöма капониррез, землянкаэз ляпкöтöм, пушкаэз. Мийö сы коста лöсьöтiм трак, вежим чегöмсö. А пехота эз лок. И миянлö приказ: петны бöр. Кöд коста мийö пырам танкас да лöсьöтчам, Никита петiс ворота сайö. И вдруг — сьöрсьöн-бöрсьöн куим взрыв! Бергöтi машинаöс, адзза: кватьöтыс сотчö, и некин танксис оз пет... Ештöма фашистыт минируйтны туйсö — ворота одзас тарöвтöмась фугаскаэз.... Падми сэтчö: кыт петны? Командир матькö, мунны тшöктö. Вашöтi — мый лоас, сiя и ло! И верми эд петнытö!.. А Никита кольччис сэтчин... Нёль морт.

Дорохин кисьтiс кружкаö лимонад, горша юис да эшö содтiс:

— Пехотасö мийö видзчисям, а сiя важын ни мунöма крепость саяс. Орддьöма сiйö, а мийö, бöбöввез, немецытлö юрнымöс: на, фриц, керав!.. Но война — война и эм.

Дата добавления: 2015-11-16