Турун керан кад чулалiс, и Андрей Никитич колис Виль Гублянсö, мунiс городö — аслас гортö, кытöн сiйö некин и нем бурыс, пожалуй, эз видзчись, ежели не лыддьыны соседдэсö да почта.
Квартираыс панталiс гажтöма: быдлаын бус, ёг, коргаг бабыв, пеславтöм паськöмлöн дук, розьнитöм газетаэз да журналлэз, разьöм приёмник. Но меднёштöмыс вöлi узьлан жырын: пемыт, дзескыт, полöтан лöнь, кöда пытшкö вöйöмась нятьöсьмöм öшын, везъясьöм стенаэз, самöм потолок, оссьöм ыбöсока гардероб, сувтöм часы, стул вылын сьöд чышкöт, топ горшковик, джоджö уськöтöм книга. Эта ладтöм картинаыс бöра казьмöтiс тулысся трагедия йылiсь, кöр эз ло сыкöт иньыс, и бöра сылöн öшöтчисö борддэс, и сiя пуксис шебрастöм койка дорö да пукалiс сэтчöдз, кытчöдз эз шыась ыбöсiсь звонок. Точнöйжыка шуны, дак звонокыс не просто шыасис, а герйöвтiс, мыйсянь Верепов дрöгнитiс и жаралiс и эз вермы сразу лэбтiсьны местасис. А кöр петiс ыджыт жырас, сылö паныт сувтiс соседкаыс — вайöма Андрей Никитичлiсь почта.
— Мыйкö дырöв эн мыччась, зону, ладно я тэкöт? Видзöт, мымда öксис — быдса ноша, — старуха пуктiс морос одзас сывьялöм чукöрсö пызан вылö.
— Туруналi, пес кери... Деревняас тырмö уджыс.
— Уджыс быдлаын адззисьö... Кöдалö колö сiя... Вот мый, мед не вунöтны: тэнö инька кошшис. Юалi: кысь, мыся, тэ? Висьталiс: «Ылiсь, мöдiк городiсь».
— И быдöс?
— Не быдöс: висьталi, кытчö мунiн, но эг висьтав, кöр бертан.
— А сiя мый?
— Бергöтчис да шуис: «Адззисьлытöдз!»
— Натьтö, иньöлöн сойыс...
— Может, и сiя. — Старуха нёджжöвтiс кухняö, мöдiк жырö, бöр локтiс Андрей Никитич дынö. — Öнi некытчö ни он мун?
— Ог, öнi гортын лоа.
— Шонты ва, миськасьны пондам...
Рытнас, кöр квартираыс лоис гажа, гора да сöстöм, Андрей Никитич лэдзис телевизор, пуксис ыджыт креслоö, медбы лыддьöтны письмоэз. Нiя невна: кыка зоннэзсянь, öтiк — гороносянь. Осьтiс медбöрьясö, дзарнитiс строчкаэс вылö: «Вы направляетесь на курсы усовершенствования...»
«Эта бур штука — олыштны Перемын, — думайтiс сiя, — только вот одзöв невна». Сылö жаль лоис бур кадсö, кöдö ковсяс чулöтны дука классэзын, кöр позис лолавны сöстöм деревенскöй руöн, лоны öтлаын Олякöт.
Лыддьöтiс и мöддэсö. Зоннэс юöртöны, что овсьö бура: солдат служитö, велöтчись уджалö стройотрядын. Но кыкнанныс öтмоз жалейтöны öтка айнысö: «Вынсьöтчы, старик! Видзчись миянöс, мийö бертам гортö, тэ дынö, и быдöс лоас бур!..» «Ашын гижа нылö, а Яшалö перво колас телеграмма ыстыны — сэсьмöдлун сылöн чужан лун»,— усис тöдвылас.
Журналлэз, кöднö одзжык лыддьöтлiс быдсöн, талун тожö эз пырö киö. «Босьта Перемö, сэтчин видзöта», — и нöбöтiс аслас жырö да чапкис шахматнöй пызанок вылö.
Телевизор мыччалiс Шекспир йылiсь фильм, но орсiссес сылö эз гленитчö медодзза жö кадррезсянь, и сiя дугдiс видзöтны, петiс öтöрö, медбы баитыштны тöдса мужиккезкöт, но ны коласiсь керку дынас эз тыдав некин, и сiя ыбöс дынас и сувтчис.
Челядь площадка вылын, садокын, орсiсö нылочкаэз да зоночкаэз, мырддясисö мяччезöн да тележкаэзöн, öвтчисö чеччалан гезоккезöн, туплясисö и ветлiсö, кыдз баитсьö, юррез выланыс.
Лöз лабичоккез вылын пукалiсö баббез да деддэз, кулитiсö моннезнысö да зяттезнысö, но ошкисö ассиныс «золоткоэзнысö», кöдна и Чуковскийлiсь «Телефон» тöдöны, и басöка рисуйтчöны, и йöктöны-сьылöны, дзик артисттэз. Кага дозирайтiссез шочыника дзарьясьлöны орсiсь челядь ладорö, мукöдпырсяс чеччылöны, медбы «золотколiсь» чышкыны ляксьöм ныр, лэдзлыны вешьянок нето шлёпкыны каканокö.
Ыджытжыккес шуксисö ылынжык, кытöн пондöтчисö керны виль керку, но тэчисö только джоджувт стенаэсö да вевттисö джоджувтсö. Нiя чеччалiсö-лэбтасисö пöв вылын, кирпичись строитiсö крепосттез, лыйсисö да ураöн мунлiсö атакаö.
Торйынмоз пöрись отир дынсянь сулалiсö да вöрöтыштлiсö коляскаэзнысö томыник инькаэз, кöдналöн кагаэзныс везгисö-нималiсö посудка бердö кышалöм няняэз.
«Быдöнлöн, нельки нимасись кагаэзлöн, эм удж. А мыля нö менам абу? — гажтöма думайтiс Верепов. — Мыля менö оз кыскы не книга, не чер, не струж? Умöль эта, öддьöн умöль...» И бöра сылiсь сьöлöмсö мидзöвтiс-жмитiс кытшöмкö лёк вын, дзик кырымö зэлöтiс, и Андрей Никитич сэсся эз ни вермы асьсö бöбöтны: эта лёк выныс — Оля.
Видзöтiс, кыным час, уськöтiс тöдвылас, кöр мунö Гублянö автобус.
«Быдöс бур, ешта...» Пыралiс гортас плащла да кепкала, казьмöтчис соседкаыслö и мунiс автовокзалö, сразу уськöтчис касса дынö.
— Гублянöдз öтiкö...
— Жугалiс автобусыс, оз мун сэсся.
— Оз я позь мöдiкöн?
— Сёрöнöв локтiт, быдöс ни иньдiм... «Сёрöнöв... Может, и быдöс сёрöнöв ни? Может, кыдзкö мездöтчыны эта сьöлöмшогись, чапкисьны котрасьöмсис? — вокзалiсь петiкö маитчис думанас Андрей Никитич. — Эд витöт десяток, чожа дед лоа, а сё зонка моз чепсася. Да и овнытö деревняас лоö некытöн, Нинкалöн челядьыс гортаныс чукöртчисö, дзескыт...»
Сувтiс площадь шöрас, сулалö, дзик памятник, öтнас, оз и вöрзьöтчы, сё думайтö, мый керны.
— Андрей Никитич, мый сэтшöм дузгыля, мый сюртö муас мöртiн?
Лэбтiс юрсö, адззö: сы дынö солдатскöй оськöлöн локтö кöркöся ёрт, öнi районоись заведующöй. Негорöн шыасис сылö паныт:
— Лöсьöтчи тарöвтчыны, да эз оссьы туйö.
— Сё шоччисян?
— Лун-мöд эшö эмöсь. А сэсся велöтчыны.
— Бур олан! А менö некытчö оз лэдзö, некытчö оз велöтö.
— Мый нö сiдзи?
— Кадррез кошша. Лок ме дынö, школаö директорöн сувтöта, бур оклад сета, готовöй квартира. Верман аслыт керку сувтöтны — отсала быд материалнас. Кипод увтат — трактор, машина, вöв.. А опыт тэнат тырмас. — Сiя кутiс Вереповöс киöттяс, пондiс нуöтны кафе ладорö. — Давай пукыштам, баитам, ежли туйыт эз аркмы. И иньытлö уджсö адззам. Сiя эд медик тэнат?
— Ме инькатöм... Кулiс сiя менам.
— Важын ни?
— Тöвнас эшö.
— И сё эн гöтрась? Но и молодчина. Миян невестаэс — бур киння бур. Охота — англичанкаöс босьт, абу охота сiйö — биологöс. Колö кö — зонöн адззам али нылокöн... Дак локтан?
— Норовита. Эстöн эшö эг на поздiсь. Шуасö быркьялiсь ракаöн. А ракаыслiсь — кылiн, небось? — öнi веськыт бордсö орöтöны да охотинспекцияö нöбöтöны: вреднöй кай.
— Но, сэки ло здоров! Ковся кö, дак звонит али вовлы...
Андрей Никитич кольччис местаас. Сiя сулалiс, видзöтiс кок увтсис виль асфальтсö да чöлiс. И нем эз думайт, дзик сунасис, но юрас сорласисö-кöвьясисö неважын и кöркöся кылöм кыввез да басниись торрез, сьылöм и сералöм, жольöтöм да йöктöм — мыйкö сэтшöм жö, кöр ылiсянь-ылiсянь кылан праздничнöй пызан сайись да сы гöгöрись шум. И вдруг сэтшöм ятнöя представитiс ассис свадьбасö, мыдзкодь, но гаж чужöма иньсö, старухаэзлiсь чирзöм: «Йикиа! Ырöшыс йикиа!.. Сурыс тагьяöв, курыт! Курыт, курыт!»
Эта дзуг шумись жагвыв торьясис чуть тöдчан голосок, нельки не голосок, а мыйкö учöтик, небытик, гöгрöса и голубöй торок, и, бытьтö звезда-пульсар, пондiс койны-ыставны импульссэз, кöдна вашöтiсö Верепов юрись хаоссö, и сы вемын, сы жилаэзын кывсис корöм: лок, лок, лок!
Сэк сiя видзöтiс шондi вылö — вылын я? — и петiс Юголь туйвежö, кытi кöркö öтiк луннас котрасьлiс городсянь гортас и вовлiс бöр.
Свадьба машинаэзлöн лёдз, кöда одзын, дзик вöввезлöн дружнöй тройка, ровнöя видзсисö куим мотоцикл, гора зыкöн одзалiс сiйö да кежис ыджыт керкуэс коласö. Ёна ни кöстiсьöм старуха — ыджыт шаль сiйö шебралöм юрсянь пидзöсöдз — дыр видзöтiс эта гаж вылö, тюкнитiс-чувйыштiс каттьöм зонтикöн свадьбовшанаыс ладорö, шавгыштiс:
— От оланыш локтiш! — и качайтöв-керис öшöтчöм юрнас.
Кысянькö вылiсянь — то ли вöск öшынсянь, то ли шиферöн сайöвтöм балкон вывсянь, — отирыс юр вылö ёркйыштiс-усис, дзик гымыштöм, öння музыка. Сiя вöлi сэтшöм гора, что вевттис шумсö и бульдозерлiсь, кöда волькöтiс ныроксялöм туйсö, и кык комбайнлiсь, кöдна, тыдалö, ремонт бöрсянь тэрмасьöны горт колхозö.
Зык, жар, бус...
Медодзза километрсö сiя эз и казяв, кыдз мунiс. Юрас олiс песня. И эта песня увтö сылö оськавсис öддьöн кокнита. Сэсся сiйö вöтiс да пуксьöтiс телегаö мужик, и нiя бура-бытшöма гöнитiсö куим километр, и рас дорын Андрей Никитич бöра сувтiс ас кок йылö.
Мунiс и прокод видзöтлiс бöрас, кöр мыччисяс машина, кöда вылö надейтчис эшö городiсь петтöн, а сiя эз вöв.
Туйыс ровно бы сiя жö, кытшöм вöлi кöркö, сы велöтчикö, и не сiя. То пантасяс сэтшöм тöдса, сэтшöм гажа да сьöлöмлö дона расок, что быдöс вывтыр — юрси тылöпсянь кок гыжöдз — радуйтчö, то вдруг логок дорын, кытöн часто öктывлiсö шыранькытш, тшöтшкöр, гонюш, а кöр и озъягöд, син вылö усясö банка-склянкаа кучаэз, киссьöм бочкаэз да солидола ящиккез, пазалöм кирпич.
«Да, быдöс вежсьö, быдöс мöдкодьсялö, — согласитчис философкöт Андрей Никитич, кöр матiсянь и не тэрмасьöмöн, не автобус öшынсянь, видзöтiс талуння туй гöгöрсö. — Только жаль, что не быдöс мöдкодьсялö буржык ладорö...»
Шондi бура ни лажмалiс, кöр сiя локтiс Югольö, и югöррес öнi ласкайтiсö телевышкалiсь вевдöрсö, кытöн свиттялiсö прожекторрезлöн стеклоэз, да вичкулöн зелёнöй купол вылiсь золотитöм крестсö. Колiс бы жарыслö чинны ни, но сiя пöжис одззамоз, а может, и öддьöнжык, пöжис сiдз, что и туруныс, и пуэс сулалiсö люммöмöсь, нельки лёк петшöр öшöтöма чорыт листтэсö, лоöма онзыля, нач вынтöмсялöма, и порськоклöн яя корыс лёшмöма.
Небурика косьмис горшыс, но терпитны позис эшö, и юны некытчö эз пырав. Колiс тэрмасьны: Гублян ладорын пыть-пыть лэбтiс кымöссö зэран кымöр. Ежели сiя локтö паныт, а не бокö уйö, то, Верепов лыддьöм сьöртi, нiя пантасясö посад дорас, сiдзкö, нятьсö уна оз паняв. А кöть и вамыштас, дак абу сахар, оз незьды.
Сойыскöт янсöтчикö Андрей Никитич шуис, что öнi дыр пукалас городас, а, видзöт, мый керö: эз на бöжыс саясь, а нырыс бöр ни мыччисьö. Мый Нина шуас? Да сiя, пожалуй, нем оз шу, а вот жöникыс вермас висьтавны: миськасян бон, а не мужик. Былись, мый сiя керö? Неужто оз позь видзсьыны, оз позь терпитны? Этö Онегин эз вермы овны Татьянаыстöг, сiдз кыдз инькаэс сьöрын вöтлiсьöмыс сылöн вöлi быдлунся удж, а сiя абу жö Онегин.
«Абу Онегин, мöдкодь — двадцатöй векись мужик, — но кыдз и сiя, радейта балет, стиххез, инькаэзöс,— рассуждайтiс Верепов. — Не пыр жö физика йылiсь тотьны да пыктыны сысянь али пес-турунын путрайтчыны. А кыдз инö? Сiя интеллигентнöй мужикыс, кöдалö оз ков не стих, не инька — джын мужик...»
Нина кольлавтöнняс горöтчис: «Вонушко, ме тэнö ог осудит не ог панлав, да öтiкись пола: но кö жöникыс локтас — мый сэки?» А сiя вот, топ невежöртiсь али асныра челядь, аслыс кöтö: кыным унажык сiйö öлöны, оз тшöктö ыжмавны, сыным öддьöнжык öдззöтчö, пыдöжык пырö, кыдз шуöны, ньывйö биöн кайö. Но мый керан, кöр мöднёж он ни вермы? Может, мыйкö и не сiдз петас — эта делоыс не öтнаслöн, сiя оз вермы мöдiк понда висьтавны, — но сiя некöр оз понды каитчыны и оз понды ыстiсьны мöдiк вылö, что сiйö дзугисö.
А кымöрыс пантасис одзжык, но эз вачкись зэраныс вылö: не тöв, не вирдалöм, а только кытöнкö уль вöррес сайын öтпырись торкнитiс-гымыштiс и просто рытыс пемытжык лоис да руыс мымдакö ыркалiс, сiдзкö, и тэрмасьны, весь вын песны — немлö. Но вдруг шытöг, гусьöник-жагöник пондiс бызитны зэрок-бусок. Вадны öддьöнсö сiя эз вад, но и дугдыны эз лöсьöтчы, ковсис пасьтавны плащ да вöрöтчыны перытжыка.
Кöд коста зэрокыс öктiс вынсö, Андрей Никитич ештiс мунны эшö километр мымда, и вöлись сэк волькалöм, дзик клеёнка, туйыс вамис да нильзис, бытьтö миськасян матег. И мый мед ни умöльыс, дак этö дзуг тöв, кöда лэбис казявтöг да пондiс гардны зэрсö и коясьны ванас и чужöмö, и мышкö да вашöтiс мортсö томыник расокö, кытöн сулалiс ордчöн кыдззескöт не öддьöн лапыт кöзок. И сайласис эстöн сэтчöдз, кытчöдз видзисö васö лыссэс.
Люзь ва, нятьöсь кока да кынмöм, Верепов ойшöрнас, кöр недыр кежö дугдыштiс зэрны и нельки некыз кымöррез коласöт мыччасис тöлiсь, ёркöтчис заветнöй öшынö, и минута бöртi, бытьтö только сылiсь локтöмсö и видзчисисö, сiя колис посöдзас плащсö да туфлиэсö и кокнита вожмöвтiс паськыт порогсö.
— Ме вами, Оля...
Олявка шытöг жмитчис чужöмнас сы бердö и öдззис горзыны — гусьöн, небурика сыркьялöмöн.
— Оля, ме локтi... — Андрей Никитич не öддьöн дзирыта сывьялiс сылiсь ляпкалöм пельпоннэсö, нырйыштiс ваöсь чужöмнас небытик, цветитан клевер дука юрсисö. — Ме эг вермы не локны. И, он кö вашöт...
— Ох, Андрюша! — горзан голосöн шыасис Олявка и калькöтчис Верепов бердiсь. — Да тэ вылiсь тай шоррез котöртöны! Ыш-ыш-ыш! — Сiя уськöтчис мöд жырас, öзтiс би, комодiсь кыскис кöс паськöм. — Пасьтав этö, а ме чай лöсьöта, тэныт колö пымö юыштны.
Кухняын сiя жольöтiс чайникöн, пань-бекöрöн, чывкйис-котрасис жырись-жырö и, кöр ойся гöсь пырис неыджыт кухняö, корис сiйö пызан сайö:
— Пуксьы, Андрюша, ме татчö лöсьöтi. Ог любит сэтчин, улица öшын дорас, пукавны, а эстöн — ограда.
— Сiдз, сiдз, Оля, татöн буржык, — шыасьыштiс Верепов и дзар керис пызан вылö, кытöн югьялiсö серебро да хрусталь. — А гажа тэнат пызаныт!
Посудаыс моз жö югьялiсö и хозяйкаыслöн синнэс: тöдчис, что сылöн талун ыджытся-ыджыт праздник, кöдö Вереповлö колö эшö буржыка ыждöтны да керны гажажыкöн.
— То этчö пуксьы, — лöсьöтiс стулсö Олявка. — Но кыдз, лöсялiс паськöмыт? — юалiс сiя да кисьтiс рюмкаэзö вина. — Абу зэлыт?
— Лöсялiс тай...
— Ю, вашöт кынмалöмтö... Ло здоров! — висьталiс хозяйка да кокнита павкöтчис аслас рюмкаöн гöсьыс рюмка бердö и, кыдз баитсьö, мыччалiс пример — пöрöтыштiс öмас джын рюмкасö, вöлись пондiс нимавны апельсин чальпа.
Нималiс-керис, сёйис сiйö, а сэсся вдруг пондiс стиххез лыддьöтны:
Тэ эн вид сiдз менö, мама,
Мыччы нылытлö бур кыв.
Доймö мусö, дзики рана,
Доймö сьöлöм, дзик нарыв.
Пемыт ойнас онö пышшö,
Мича лунöн öшö садь,
Бытьтö виззьö менö свищень,
Бытьтö лöсйö пöжöм шать.
Тэ эн видчы, мам, эн летсьы,
Он ни вермы керны нем —
Сёравно ме муна сэтчин,
Кытчö кыскö том сьöлöм...
Шынньöвтiс Андрей Никитич, юалiс: — Тэ кытiсь нiйö босьтiн?
— Юрсим... Нет, не юрсим, а сьöлöмсим, — шуис Олявка. — Сэксянь, перемскöй рытсяняс, и олöны сё.
— Öнi менам... доймö сьöлöм, дзик нарыв.
А сыбöрын нiя битöг югытöдз пукалiсö диван вылын, сё касьтывлiсö важсö, мечтайтiсö виль олан йылiсь.
— Ме мылякö веритi, Андрюша, что тэ локтан. Сьöлöмö тöдiс: сiдз лоас... Этö лунсö ме пыр видзчиси, уна-уна год видзчиси... Нельки сэк, кöр мöдiккöт олi.
— Не видзчисин, а может, только касьтывлiн кöркöсясö, кыдз мыйкö донаö, чöскытö...
— Быль, Андрюша: видзчиси! Колö жö, а? Жöникö бокам — и видзчися... Сётаки, кыдз шуö Дзолинь бабö; эта делоын миян порядокыс öнi абу.
— Кинлöн — миян?
— Ну, татöн, Россияас.
— Россияас вексö сiдз вöвлöм: Васька любитö Петрикаöс, Петрика Егорöс, а Егорика Васькаöс. Этö сысянь, что нывкаэс жöниккезнысö не асьныс бöрйылiсö.
— Сiйö ме ог тöд и абу охота тöдны. Сiя — мужиккезлöн сказка — что вексö инькаэзныс бöбöтлöны нiйö. Ме тöда мöдiкö — лоа медсчастливöй морт, ежели гöтрасям да лоасö челядь. Семья. Менам, аслам семья!
— Гижсям, кыдз велöтчансяняс локта, — висьталiс Андрей Никитич. — И лоас миян семья... Быдöс лоас.
— И ме лоа счастливöй морт, — бöра висьталiс Олявка. — Мужика инь.
— Счастьеыс, конечно, не только сыын — семьяын да öтамöдöс радейтöмын. Ме шуа ачымöс счастливöйöн, кöр быд лунсö, быд чассö чулöта пользаöн... ыджыт пользаöн. И эта пользасянь бурыс-бытшöмыс не меным öтнамлö, а и мöдiккезлö — сойöлö, соседдэзлö, быдöс городыслö, Вежöртан, Оля?.. Колö овны ыджыт олöмöн, кöда дорресви тыртöма уджöн, творчествоöн, радейтöмöн, пессьöмöн, мыйсянь чужö героизм, сьылö сьöлöм, шогмöны стиххез да музыка.
— Сiдзкö, кинлöн оз чужö героизм да оз шогмö песняэз, сiя — счастьетöм? Сiдзкö, сельпоись техничка — шудтöм кöк? А мылякö сiя ачыс мöднёж лыддьö...
— Да не песняэзын делоыс! Гажыс, олангаж ась олö тэын... ась öгралö тэнат сьöлöмын! Сылöн биыс, жарыс!.. Олö дугдывтöг... Ась тэ и не лирик, а физик...
— Ме, Андрюша, товаровед, — небыта, серöмсорöн шуис Олявка, медбы дугдöтны сылö неколан баснисö.— Товаровед, а öнi, тöнсянь вöлись — сельпоись председатель. И некытшöм стих ог гиж, некытшöм формула ог петкöт, а старайтча честнöя овны да уджавны и этö жö кора мöдiккезсянь. И эта тожö — счастьелöн торок.
— Да, тэ он гиж, но сiдз уджалан, сiдз олан, что охота сьывны, охота стиххез гижны — кылан, что нiя олöны тэын, öдззöтöны тэнö, шонтöны, сöстöмтöны сьöлöмгажтö. Вот мый йылiсь ме баита.
— Меным, Андрюша, оз ков сэтшöм формулаэтö. Меным колан тэ. Тэ — ме понда и музыка, и песня, и олан. Менам счастьеö — тэ.
— Не, не сiдз, — небурика, небыт кыввезöн панöвтiс Андрей Никитич. — Ме тэнат счастьеись только учöтик строчкаок, öтiк желёк, öтiк тусёк.
— Строчкаок, кöдатöг стихыт — абу стих... Тэ... тэ менам счастьеö... И сэсся эн баит...
Одз асывнас, мед эз паськав лишньöй басни, Андрей Никитич мöдiс мунны, но Олявка эз лэдз: — Мый меным йöз басниыс, кöр мекöт вöлiн тэ.
— Сё жö незаконнöйöсь кытчöдз.
— Кольччы. Ме уджавны муна, а тэ узьышт. Этшöм нятяс кытчö тэ? Да и паськöмыт эз на косьмы... Öтöрись вороткасö замокала, а огородечас осьта лоас. Кыдз косьтас, локта...
Луннас колхозниккеслö сеталiсö зарплата, и рытъявнас быд магазинын гудыртiс йöз. Но медуна босьтасисö продмагын: сэтчö петкöтiсö свежöй помидоррез да не öтiк сорт кын и сола чери.
Вузасисö куимöн, и очередь вешшис чожа, кöть мужиккес нет-нет да и юасисö: «А может, сетан öтiкö?.. Оз я позь «чудпиян»?.. Чапкышт жö училикö, сьöлöм мыйкö пессьö...» Продавец юавлiс нылiсь: «Талун кытшöм луныс?» — и мыччавлiс чуньнас джаджжез вевдöрö, кытöн гижöма: «В понедельник, среду и пятницу вином и водкой не торгуем». И содтывлiс: «Асьныт сiдз керит, не мийö».
Мукöдыс корлiсö сералöмöн, мукöдыс кытсавлiсö вузасисьсö бокö да шушкывлiсö пеляс, а кöда и мöдiс босьтны винасö повзьöтöмöн. Öтi-мöдi пыравлiсö складö и контораö да тожö быднёж кеймисисö-корисö, но и сэтчин нем эз пет: сельпоись вузасиссес эз видзöтö некытшöм кеймисьöм вылö, эз бöбасьö, эз повзьö.
Эта радöн и мунiс Олявка гортас. И вдруг Гублянка ю дорись казялiс код артелёк: сiя гомозитiс и готсис, кыдз одзжык.
«Неужто продавеццес сетiсö? Али Ыштайöдз гöняйтiсö?» — думайтiс Олявка.
Мунiс ны дынö и чуть гатш эз пöр: сэтöн вöлiсö и Чикиськин, и Африкан. Сiя Африканыс, кöда конференция коста сiдз видiс винаюиссесö!
Чикиськин кыш-паш чеччис лудовка вылiсь, чань моз гöрöвтыштiс:
— И-и-и, ачыс Гавриловна локтiс! Дозок, зонкаэз, дозок сылö!
— Эх, Кирилл Потапович, Кирилл Потапович!
— А ме мый? Уджалi, мымда колö, öнi культурнöя шоччися.
— Кинлiсь винасö бöбöтiн? Басниас пырис Африкан:
— Тэнат гижöток сьöртi Шура сетöма. А раз тэ гижин, то, мыся, и юыштны позьö.
— Но, шедат тiйö меным!
Эз и дышöтчы, кайис складö, уськöтчис Шурончик вылö, кöда лыддисис пызан сайын:
— Ме тэныт кин — пешка али бöбöв? Складiсь вина не сетны — вöлi висьталöм?
— Вöлi висьталöм, дак сiдз и кер! — кутчис эргыны Шурончик. — Сой ли, вон ли — абу и баста! А тэ мый керан? — Шурончик лэбтыштiс пызан вылiсь счёты и голльыштiс-вештiс мöдiлаö. — Ме тожö не гыр, тожö нерваэз эмöсь.
— Ме сiдз и кера. Шура, кыдз висьталi.
— Сiдз? — Шурончик летöвтöмöн осьтiс пызан ящиксö, кыскис сэтчинiсь гижöток и чапкис Олявка одзö. — Эта öнджа ли мый ли? — И кузя нюжöтiс чуксö, дзик öбидитчöм кага.
Олявка босьтiс гижöтоксö, лыддьöтiс: «Шура, сет эта мортлö 10 б. Савыркина», — и пондiс бериняйтны юрнас. — Эта не менам гижöмыс.
— Здрасте! — Шурончик нёштöма нюмыртiс öмсö.— Ме тэнчит китö сто год ни тöда!
— Чикиськин петкöтiс?
— Кинлö гижин, сiя и босьтiс, — сё букыша синöн видзöтiс Шурончик. — Инька тай — не фуфыра и не миян кодь... лябишна.
— Ас вылат эн курт, Шура. Тэнö некин сiдз эз шу... Усис тöдвылам: кöдковну тшöктi сетны öтiк банка компот.
— Öтiк десяток шу.
— Öтiк банка, — чорыта и ятнöя висьталiс Олявка. — А öтiкыс дынö талун нулёк содтöмась.
— Но дзöдзыв син! — пыкнитiс Шурончик. — Дас бутылка, шуö... Ме сылö эд и сливасö сетi. Новоселлё, шуö, миян; керкутыр ылiсь народ... Ножö скöтина!
— Дугды, Шура, öнi он ни бергöт.
Дата добавления: 2015-11-16; просмотров: 62 | Нарушение авторских прав
| <== предыдущая страница | | | следующая страница ==> |
| Кудым-Ош да Юкся | | | ВИЛЬ ДЕНЬГАЛÖН ВАЖ ЛЫД |