(Триоди, на 8 )глас 4, подобен «Дал еси Знамение»:

Господи, воззвах, глас 4

(Триоди, на 8 )глас 4, подобен «Дал еси Знамение»:

Пострадал еси яко человек, / безстрастный Божеством/, и воскресл еси Тридневен, / пленивый смерть, и совоскресив вся истлевшия: / и вознеслся еси, Христе, ко Отцу, / обещав послати Утешителя Священным Апостолом Твоим,// Иисусе Всесильне, Спасе душ наших.

(Минеи,на 5) глас 1, подобен «Небесных чинов»

Воспоим, людие,/ честное житие Отца нашего Макария, / града Овруча святое прозябение,/ благочестия рачителя, нечестия же обуздателя,/ и тому ныне помолимся, преподобномучениче,/ даровати Церкви единомыслие,// мир и велию милость.

(Минеи, на 1) Глас 2, подобен «Егда от древа»

Егда узрел еси, отче Макарие, / в земли твоей от униатов /повреждаему святую веру православную, / противостал еси им /и опло́т православия явился еси. / Сего ради изгнания многа от униатов претерпел еси. // Темже тя почитаем и ублажаем.

Слава, глас и подобен тойже.

Постом и послушанием,/ слезами и молитвою/ похоть плоти, похоть очес и гордость житейскую,/ отче Макарие, из корене посекавый, / кончиною мученическою за Христа / подвиги твоя запечатлел еси. // Темже и память твою любовию почитаем.

И ныне, глас 4

Егда пришел еси на гору Христе Елеонскую, / Отчее совершити благоволение, / ужасошася небеснии ангели, /и устрашишася преисподнии. / Предсташа же ученицы с радостию трепетни, / яко глаголал еси им, / яко престол же готовляшеся против облак ждущий: / врата же небо отверзшее доброту являше, / и земля сокровища открывает, / Адамову схождению яко познатися, и паки восхождению. / Но стопы убо возвышахуся, якоже руце, / уста же вельми благословляху, якоже слышашеся, / облак подъемляше, и небо внутрь Тебе прият. / Дело сие Господи соделал еси великое и преславное, // во спасение душ наших.

Стихиры на стиховне.

Минеи, глас 5, подобен «Радуйся»

Радуйся, угодниче Христов Макарие, / ум владыку на страсти пагубныя поставивый, / во еже плоть неудобопокоривую духу поработити. / тем и мы сердцем смиренным, / к тебе припадающее, просим / ко одолеванию страстей твоея помощи //и в скорбех благодушия.

Слава Минеи, глас 7:

Христа вселив в душу твою, Отче Макарие, / Источника жизни, / нравы благими процвел еси. / Тем моли Его благостыню / ниспослати нам помощь / во еже страсти многия, от юности нас борющия, одолети// и Господеви работати

И ныне, Триоди, глас 4:

Низшедшее естество Адамово, / в дольнейшия страны земли, Боже / новосотворивый Собою превыше всякаго начала и власти,/ возвел еси днесь: / яко бо возлюбив спосадил еси, / якоже помиловав соединил еси Себе, / яко соединивый спострадал еси, / яко безстрастен пострадав, и спрославил еси. / Но безплотнии, кто есть Сей, глаголаху красный Муж? / Но не человек точию, Бог же и Человек, / совокупленно и являемо. / Темже удивлени ангели, во одеждах летающе окрест учеников, / друзии же стояще вопияху: / мужие галилейстии, Иже от вас отыде, / Сей есть Иисус Человек Бог. / Бог Человек паки приидет, Судия живых и мертвых, // верным же даруяй грехов прощение и велию милость.

Тропарь, глас 4:

Христу, нас ради с Небес сошедшему,/ последовал еси в подвизех твоих,/Макарие, отче наш./Егоже моли о нас, ублажающих тя,/ прощение прегрешений даровати нам, /любовию же и смирением сердца наша озарити// и спасти души наша.

Слава, и ныне, глас тойже:

Вознеслся еси во славе, Христе Боже наш, / радость сотворивый учеником / обетованием Святаго Духа, / извещенным им бывшим благословением, // яко Ты еси Сын Божий, Избавитель мира.

Дата добавления: 2015-08-27