Ташқи кўриниш: ҳусн

Ҳусн – комплексларга сабаб бўлувчи яна бир белги. Одам ўз ҳуснидан кўнгли тўлмаслиги жуда кўп учрайдиган ҳолат. Бундай ҳолатда ҳусн нуқсони комплекси ҳосил бўлади.

Бу ерда одамнинг бошқаларга ёқиш илинжи ва бошқалардан кам бўлмаслик истаги катта рол ўйнайди. Бу икки интилиш ҳам муҳимликдан келиб чиқади.

Мен сизга бир нарса айтсам – ҳайрон қоласиз: дунёда хунук ва чиройли одамлар бўлмайди – ўзини хунук ва чиройли деб ўйлайдиганлар бор, холос.

Сиз ўзингизни қандай ҳуснга эга деб ўйласангиз, атрофдагилар ҳам сизни шундай кўрадилар. Ишонмайсизми? Мана сизга исбот. Физиогномика деган фан бор – у одамнинг юз тузилиши ва феъл-атвори ўртасидаги боғлиқликни ўрганади. Шу соҳада олиб борилган изланишлар шуни тасдиқладики, ўз ҳуснидан норози бўлган шахслар одамлар билан мулоқот пайтида юзларига шундай ифодаси беришар эканки, улар ростдан ҳам хунук кўринишар экан. Олимлар ўз ҳуснидан кўнгли тўлмаган одамларни ёлғиз ўзлари қолганларида яширинча суратга олишган ва бу суратларни улар одамлар даврасида эканида олинган суратларга солиштиришган. Биринчи суратларда тажриба иштирокчилари очиқ юзли ва истарали бўлиб чиққанлар.

Ана шунақа. Табиат сизга бетакрор ҳусн берган бўлиши мумкин, аммо уни сиз ўз комплексингиз билан булғаб, одамларга жуда ёқимсиз қилиб кўрсатишингиз мумкин. Ундан кейин, ҳуснга қараб биринчи таассурот олинади – аммо одам билан яқиндан мулоқот унинг чиндан қандай одам эканини очиб беради.

Жуда кўп ҳолатда мулойим юзли одамни кўриб ҳавасингиз келади – бироқ у билан икки оғиз гаплашгандан сўнг унинг жуда қўрс ёки калтабин экани маълум бўлади. Феъл-атвори хунук бўлган одамнинг эса, ташқи чиройига ҳеч ким эътибор бермайди. Машҳур рус ёзувчиси Фёдор Достоевский “Гўзаллик ортида шайтон яширин” деб бекорга ёзмаган.

Психологлар жуда қизиқ тажриба ўтказишган. Улар бир гуруҳ эркакларга иккита аёл суратини кўрсатишган – бири жуда гўзал, бошқаси унчалик ўзига тортадиган эмас. Сўнг уларга шу икки аёл билан телефон орқали мулоқотда бўлиш таклиф этилган. Телефонда аёллардан бири жуда мулойим, сўзларни танлаб гапирган ва суҳбатда эркак фикрларини тасдиқлаб турган. Бу кўримсизроқ аёл бўлган. Иккинчи аёл, аксинча, жуда совуқ оҳангда гаплашган ва мудом эркак билан баҳслашган. Буниси гўзал ҳусн эгаси бўлган.

Тажрибада иштирок этган ҳар бир эркакдан суҳбатдош аёл суратини кўрсатишни илтимос қилишганда, у мулойим аёл деб гўзал суратни танлаган ва кўримсизроқ аёлни дағал суҳбатдоши деб билган. Аммо уларни суҳбатдошлари билан юзлаштиришганда, улар танловда адашганликларидан ҳайрон бўлишган. Энг қизиғи шундаки, эркаклар улар билан мулойим гаплашган кўримсиз аёл ҳаётда суратдагига нисбатан анча чиройлироқ эканини, совуқ гапирган аёлнинг асл гўзаллиги эса суратдагидан анча камроқ эканлигини таъкидлашган.

Шундай экан, ташқи гўзалликка алданмаслик керак. Тўғри – ҳам ташқи, ҳам ички гўзаллик эгаси бўлган одамлар ҳам бор. Бундайлар кам учрайди. Биласизми бу қандай одамлар? Бу – ўз ҳуснидан нолимайдиган, ўз чиройини бошқалар билар қиёсламайдиган ва ҳаммада ўзига хос гўзалликни кўра биладиган одамлар.

Сиз ўз ҳуснингиз ўзига хос кўркка эга эканини тан олинг ва бундан кўнглингиз тўлсин. Ҳусн комплексига одамлар билан мулоқот қилишингизга ҳалал беришига имкон берманг. Сиз – ҳеч кимга ўхшамас қилиб яратилгансиз. Шундай экан, бошқа “гўзаллар”га ўхшамаганингиздан хафа бўлиб эмас, хурсанд бўлиб яшанг. Ҳаммага ўхшагандан кўра, ўзига хос бўлган яхши эмасми?

Дата добавления: 2015-12-01