Кыдз лöг инька раммис

Сiя странаын, кöда, может, некытöн и абу, олiс-вöлiс лöг инька. Некинкöт сiя эз лöсяв, некинöс эз любит. Дзарнитан-керан — топ и топ баба-яга. Натьтö, лöгыссянь и нёштöмсялiс, нельки полöм петiс видзöтны: шадра чужöма, вöснитик кузь голяа да эшö пиньöла öма.

Вöлi эта инькалöн кот Мур Мурыч. Бытшöм вöлi котыс, мывкыда. Луннас гор вылын узьö, ассис песняэз мурзьö, а ойнас шыррезöс куталö. Хозяйкаыс некöр сылö нянь корка оз чапкы, пань йöв оз кисьт, а Мур Мурыч лоток кодь ён да госа. Эта и вежöртана: кин уджалö, дак пыр лоас пöт.

Но вот пöрисьмис Мур Мурыч, — синнэс ныжмисö, пеллес тупкасьны пондiсö, — шыррезöс кутавны оз ни вермы. «Мый öнi керны? — думайтö сiя. — Хозяйкасянь бурсö нем видзчисьны, сiя менö оз понды вердны, а ачым шыравны ог вермы. Тшыгйöн я мый я кувны?»

Думайтiс Мур Мурыч лун, думайтiс ойбыт, сэсся бöра лун да ой думайтiс. Но бурыс нем эз сод. Кынöмыс шутнялö-сималö, синнэз одзын лöз круггез бергалöны, вот-вот садь бырас.

Видзöтö гор вывсянь Мур Мурыч, а хозяйкаыс гырниччезö йöв кисьтö да шöммöтны залавка вылö сувтöтлö.

— Мур-р, мур-р! — шыасис кот. — Кöть паньджын меным сет...

— Ме тэныт сета, дышкучик! — чирöстiс хозяйкаыс. — Вот босьта бедь да пöвсала боккетö, — сразу пöт лоан!

Чирзiс, чирзiс лöг инька да петiс öтöрö мöссö ыбö вашöтны. Мур Мурыч эта коста — прыг залавка вылö, сибöтчис öтiк гырнич дынö да и лакис йöвсö, кытчöдз эз польды.Тшыг кынöмыт, батя, тшыг и эм — быд торсö керны велöтас.

Кайис Мур Мурыч бöра гор вылö, кунис синнэсö и бытьтö не сылöн дело — узьны лöсьöтчис. И, поди онмöссис бы, да пырис керкуас хозяйкаыс. Казялiс сiя, что горшалöма каньыс. Сразу казялiс! И сэтшöм лöг лоис, — öмыс эшö öддьöнжык пиньöвтчис, синнэс бичиррез койöны! Локтiс Мур Мурыч дынö да кыдз кутас бöжöттяс, да кыдз швангас джодж бердас! Кань синнэзiсь биэз чеччöвтiсö, коскаэс мурк-мурк керисö. А хозяйкаыс осьтiс ыбöс да чужйис каньсö öтöрö!

— Мун, — шуö, — вакрамешö. Медбы син одзын эн вöв! Мун!

Мый сэтöн керан? Ковсис мунны.

Петiс Мур Мурыч карта сайö, посок кузя вуджис ю, вöрö пырис. Ачыс сыркьялö-горзö, курыт синваэз кисьтö. «Вот, — шуö, — кытчöдз локтi: гортiсь лöг инька вашöтiс. Кыдз öнi овны?»

А паныт сылö руч. Локтö-котöртыштö, öтмöдöрö дзар керö-видзöтыштö, бöжнас му чышкö. Казялiс каньсö да тран сувтiс.

— Кытчö, Мур Мурыч, лöсьöтчин? Мыля горзан?

— Да кыдз меным, ручиньöй, не горзыны, кыдз синваэз не кисьтны? Вартлiс хозяйкаö кулавтöдз да эшö гортiсь вашöтiс.

— Беда тай! — шуис руч да бöрись лапаэс вылö пуксис. — Совсем вашöтiс?

— Совсем.

— Но, ладно. Вашöтiс дак вашöтiс. Эн горзы, мый-нибудь керамö.

Пырисö нiя вöрас, кусттэз увтö водiсö. Кань дойдöм боккесö нюлö, а руч думайтö, кыдз бы Мур Мурычлö отсавны, да и аслыс кынöмпöт адззыны. Думайтiс, думайтiс, сэсся юалö каньыслiсь:

— Тэнат хозяйкалöн поныс абу?

— Абу, — шыасис паныт кань.

— Öддьöн бур. А мöс видзö сiя?

— Видзö. Серанькаöн шуöны.

— Но, ладно, эн горзы!..

Лöньсис Мур Мурыч, чышкис синнэсö. Руч öвтiс бöжнас, шыннялiс хитрöя. Мыйкö чужис, тыдалö, юрас. А öтöрас локтiс ни рыт, шондi медбöрья югöррез койис. Руч, конечно, не кань, но и сылöн кынöмыс не пыр овлö пöтöн. Талун дак асывсянь öмас крöшки эз вöв. Тэрмасьны колiс.

— Хозяйкаытлöн мöсыс мый медöддьöнсö радейтö? — юасьö бöра ручыс. — Мыйöн сылiсь öмсö хозяйкаыт чöскöтлö?

Каньыс и шуö:

— Нянь любитö. Кыдз локтö гортö, дак сылö хозяйкаö нянь шöрöм сетö. Казялас Серанька няньсö и котöртö, нельки бöжсö лэбтас.

— Но бур. Верма ме отсавны тэныт. Только гусяв хозяйкаытлiсь нянь чöвпан. Керам сiдз, что йöв тэ пондан юны пöттöдз, а хозяйкаыт тэнö окавны пондас.

И висьталiс каньыслö, мый колö керны, медбы тшыгйöн не кувны и медбы хозяйкаыс некöр эз вартлы. Сэсся и шуö:

— Мунам чожжык!

Руч серöтö-котöртö одзас, Мур Мурыч бöрсяняс вугыртö-чеччалö. Прыг, прыг, прыг! Вот и лöг инькалöн керкуыс. Пуксисö руч да кань карта пельöс сайö, смекайтчöны гусьöник. Шы не тöв. Хозяйкаыс, тыдалö, ыб вылын эшö. И мöсыс абу на.

— Но, Мур Мурыч, петкöт хозяйкаытлiсь нянь. Тэ тöдан, натьтö, кытöн сiя чöвпаннэсö видзö, — шуö руч.

Кань, конечно, тöдiс. Эшö сэк, кöр вермис шырресö кутавны, сiя адззывлiс: нянь чöвпаннэс джоджулын джадж вылын куйлывлiсö.

Пырис Мур Мурыч кань öшынöт джоджулö, джадж вылiсь ыджыт чöвпан быгыльтiс. Руч кватитiс няньсö да чожжык карта пельöс сайö и давай сёйны, йирис, йирис, джын чöвпансö курччалiс, кынöмыс син одзын ыждiс.

— Но, вот ме и пöт, — шуö каньыслö. — Спасибо тэныт, Мур Мурыч, бура отсалiн меным. Öнi ме тэныт отсала, чожа пöт лоан!

Эз ешты ручыс висьтавны досповна, кыдз: Му-у-у! Мöс гортö локтö. Руч сылö паныт только скок да скок, скок да скок!

— Мöсiньöй, сера кымöсiньöй, — баитö руч, — хозяйкаыт тшöктiс паныт петны, тэныт нянь сетны.

Чегис ручыс чöвпансис учöтик торок, мöсыслö сетiс. Ам! Чöскыт няньыс вöлöма. Мöс öм дорсö нюлö, бöжнас öвтö. А руч бöра баитö:

— Мöсiньöй, сера кымöсiньöй! Хозяйкаыт тшöктiс тэныт миянкöт мунны да небыт турун сёйны. Мунам вöрас!

— Му-у-у! А он бöбöт?

— Ог, ог! Вот и Мур Мурыч сiдз шуас. И сiйö хозяйкаыт вöрö иньдiс.

— Быль, — шуö каньыс. — Вöрö тшöктiс мунны, ась пö йöвсö унажык öктö.

Руч бöра мöсыслö нянь торок сетiс, бöра сьöрас корö. Веритiс эд мöсыс, согласитчис мунны. Мунiсö нiя куимöн, мунiсö, тшöк чашьяö пырисö. Сэтöн нiйö и ой вöтiс. Руч да кань йöртiсö мöссö остожьяö, высьтiсö сiйö, пöттöдз йöв сёйисö.

Локтiс лöг инька гортас, видзöтö, а мöсыс абу. Котöртас öтöрö — абу, котöртас мöдöрö — абу. Беда! Пыралiс инька керкуö, нянь торок курччöвтiс, мöдiк нянь тор вылö сов пуктiс да бöр посöдзö петiс. Абу мöсыс!

— Серанька, Серанька! — чирзö инькаыс. Шы не тöв.

Öдззис инька керкуыс дынöт котрасьны, öтмöдöрö нёджжасьны, нёштöм голосöн мöссö кытсавны. Берег дорöт мунiс — горöтлiс, вöрö пыралiс — горöтлiс, мöдiс пыдöжык чашьяас пыравны, да повзис, медбы ош эз гыжьяв. Сiдз и эз адззы мöссö. Ойбыт бок вылiсь бок вылö бергалiс, ойбыт синваэз кисьтiс. «Ош, — шуö, — натьтö, мöсöс сёйис».

Вот и асыв локтiс, шондi петiс. Лöг инька бöра чепöссис öтöрö, бöра пондiс мöссö кытсавны:

— Серанька, Серанька!

Мöслöн и дукыс некытöн абу. Хозяйка лунтыр уннялiс-горзiс, нельки синнэс кымöс вылас мыльк петiсö.

Сэк и локтiс кысянькö Мур Мурыч, хозяйкаыс коккез бердö зыртчö, этадз кеймисьöмöн баитö:

— Эн вартлы менö, ежели не сiдз мый горöтча, эн кут бöжöттям. Кыла ме йöв дук и думайта, — ловья Серанькаыс.

Раммис хозяйка:

— Тэ йöв дук кылан? Ах тэ, менам дона, ах небыт гöна! Кытiсь тэ йöв дуксö кылан?

— Нырам тöв вайöтö. Кысянь тöлыс пöльтö, сэтчин и мöсыс ветлöтö...

— Дак мунам чожжык, — шуö хозяйка. — Кошшам сiйö!

— А йöвнас вердан менö? Вартлыны он понды?

— Да мый тэ, мый тэ! — горöтчис хозяйка. — И чуньöн некöр ог вöрзьöт!

Петiсö кань да лöг инька, мунöны. Каньыс одзас котöртö, инька бöрсяняс люштö-падьялö, öдва вермö вöтчыны. Кань сувтлас бöрись лапаэз вылö, нырсö тöв паныт лöсьöтас, русö виш-виш керас — и бöра одзлань. И локтiсö нiя чашьяö, остожья дынö. Каньыс вайöтiс. Мывкыда Мур Мурычöс ручыс этадз керны велöтiс.

Казялiс хозяйка мöссö и радувьяс чуть кок йывсис эз усь. Чепöссис мöсыс дынö, сюррезöт кутiс, ва тырппесö окалö. Сэсся босьтiс киас каньсö, волькöтiс сылiсь гöнсö, тожö окалiс, ласковöя Мур Мурычöн шуис. Руч кусттэз сайсянь видзöтiс этö картинасö да шыннялiс лукавöя...

Локтiсö гортö куимöн, радöсь быдöнныс. И эта кадсянь каньыс пыр шоныт гор вылын узьлö, пöттöдз йöв сёйö. Хозяйкаыс сiйö чуньöн некöр оз вöрöт, а пыр только окалö да небыт гöнсö малалö. Не олан, а малина каньыслö!

И кыдз только дугдiс лöгавны инькаыс, дугдiс чижьявны-видчыны, öмыс сразу веськыт лоис. Од веритö? Быль!

ТУМАНА ОЙÖ

Эшö сэк, кöр Толя Туркин котрасис детсадö, вöлi ни сылöн öддьöн басöк самокат. А кин сiйö керис?

Дедыс!

Тöвнас Толик часто ысласьлiс керöс вывсянь кокнитик дадёкöн. Кин сiйö керис, сэтшöм кокнитсö да чожсö?

Дедыс!

Мöйму и таво Толик кыйис Шорваись мордаэзöн чери. И неетша кыйис. А юалö, кин сылö мордаэсö керис? Кин велöтiс нiйöн черисö кыйны?

Конечно, дедыс!

Öддьöн бытшöм, öддьöн ласковöй да рамыник пöрись Пахом. Ёна сiя радейтö внучексö и готов быд торсö сылö артавны. А Толик? Толик тожö ёна радейтö дедсö и прокод старайтчö, медбы гленитчыны сылö. Пыр эд сiдз овлö: кинöс радейтан, сылö и гленитчыны охота. А мыйöн гленитчан, кöр нем эшö керны он прокмы? Вот бы сэтшöмö бурö мыйкö керны, медбы дедыт малыштiс юртö и шуис радуйтчöмöн:

— Кытшöм тэ молодец вöлöмыт, а ме эг и тöд!

Сэк бы и радуйтчыны позис. Но кытшöм сэтшöм подвиг керан? Нем и думайтны, оз ло подвигыс.

Таво гожумнас Толик часто ветлывлiс дедыскöт Шорва дорö вуграсьны. Пуксяс сэтчин, видзöтö поплавоккес вылö и мечтайтö подвиг йылiсь. А сiя, подвигыс, сё абу и абу. И, медбы кывны дедыслiсь ошкöмсö, мукöдпырся ошшасьлiс:

— Менам табелям почти быдöс отличноэз!

— Эта бур, — шуас дедыс. — Только тэ эд висьтасин ни ны йылiсь?..

Быль. Висьтасьлiс. А мый нö вильсö висьталан, кöр нем сэсся абу? Вот и талун сiдз. Лэдзчö бöра Шорва дорö и баитö тэрмасьöмöн:

— Ме, деда, медчожа котрася школаас, соревнованнё коста некин оз вöт. И турник вылын бергавны лысьта. Он верит? Быль баита...

— Тырмас, Толик, — öмалiс дедыс. — Куимöт класс ни кончитiн, а сё учöтик кага кодь...

Толик лöсьöтчö вöлi эшö мыйкö шуны, но как раз эта коста öмас дзингöмöн пырис ном, и зонка öдззис сьöласьны.

Ю дорö туйыс мунiс перво расокöт, сэсся кежис кöзъяинö. Эстöн сулалiсö сэтшöм ыджыт пуэз, что сайöвтiсö рытся шондiсö. Кöззэзлöн тоша уввез, кöдна öшöтчöмась му бердöдз, мыйкö шушкисö гажтöма. Лыссэс, коласын сьылiсö каёккез. Нiя чивзiсö норöнмоз да небытика, и Толиклö кажитчис, бытьтö не сьылiсö, а тюкйисö ныррезнаныс вöснитик-вöснитик балалаечнöй струна кузя.

Пахом оськалiс перыта, тэрмасис ю дорас. Сылö охота вöлi вуграсьыштны шондiыс лэдзчикö, кöр бура кокалö ёкыш да кельчи. Толик öдва вöтчис сы сьöрö. Но вот старик локтiс чуть тöдчана туйвежöдз, сувтчис и малыштiс ньылöма кымöссö.

— Ылын эшö Шорваыс дынöдз, а шондiыс лажмыт ни, — шуис сiя. — Не мунны я миянлö веськыта, вот эта визир кузя?

— Мунам, деда, веськыта, — согласитчис Толик.

Нiя кежисö веськытлань. Вöр эстöн вöлi эшö тшöкжык. Векнитик туёк часто öшлiс патшыра понуллез коласö, пыравлiс кöз лыссэз да бытшкасяна кусттэз увтö и сэк нюдз шатёккез зубыта сырйисö чужöмö.

— Вот дак тайга, деда! — шыасис Толик.

— Эта разь тайга? Эта понуляин, — горöтчис Пахом. — Вот Шорваыс сайын — тайга! Сэтчин вöрыс дзик стена сулалö. Быдман, дак вöравны сэтчин пондан. Тэ эд некинiсь он пов?

— А кинiсь повнытö? Ме...

Медбы не кывны бöра Толиклiсь ошшасьöмсö, Пахом дугдiс юасьны.

— Э-э, видзöт, кытчö инмим! Кырас... — юöртiс сiя.

Одзаныс былись вöлi кырас, векнитик, но öддьöн пыдын. Тулысся шоррез кырöтöмась мусö, аркмöтöмась мыйкö щель кодьö, да сэтшöм пыдынö, что вуджны сiйö оз вермы не только морт, но и зверь.

— Весь татчö, зонка, кежимö, — горöтчис Пахом. — Не вуджны лоас. Адззан, колодаыс сiсьмöма. Тьфу! Эшö мöйму нач вöлi ён, а таво...

Толик и ачыс казялiс, что пуыс, кöда кузя отир вуджавлöмась сай ладорас, вöлi сiсь. Сылöн шöрыс вöйöма кырасас, а увья конеццес лэбтiсьöмась чуть я не веськыта неболань. Дед кинитчис öтланьö, мöдланьö — быдлаын вöлi сё сiя жö, дзик конечтöм да пыдöстöм кырасыс.

— Беда, — гажтöма шыасис бöра Пахом. — Бöр бертны туйвежöдз — вель ылын. А шондiыс саясьö ни. Мый нö керам?

Старик дыркодь сулалiс чöлöмöн, нёджжасис öтмöдöрö. Толик вирскис нырнас и öвтчис киэзöн — вашöтлiс дынсис номмезöс.

Пондiс пемдыны. Лог пыдöссянь пöльтiс сьöкыт ульсöт. Жагвыв лэдзчисис туман. Сiя вöлi эшö кизерик, кокнитик. Но эд быд минутаö вермас сукмыны, и сэк вöрсис некытшöм туёк он казяв. Колiс тэрмасьны. Колiс мыйкö керны. И старик решительнöя локтiс ыджыт кöз дынö, кöда öткöн сулалiс кырас дорас.

— Пöрöтам пусö, — шуис дед. — Вöлись и вуджам сы вылöт. Видзöтан — спасибо миянлö висьталасö подöн ветлöтiссез.

Сiя сьöвзис кыкнан киас и лэчыт черöн кынымиськö тиньгыштiс вöснитика — чегöтiс кöс уввез. Сэсся öдззис клёнöтны частöя и горöн, небыта пельдöтлiс уль чаггез. Быд сöтöм бöрын вöрас шыасьлiс говк — чавк, чавк! Толик кывзiс этö чавкöтöмсö, и сылö кажитчис, бытьтö кинкö кешитчöмöн нерö дедсö.

Чожа пуыс ризьнитiс и дзик шатöвтчис. Но сiя эз пöр. Пахом эшö размöд тякнитiс чернас, кöз ризьнитiс горöнжык, бöра шатöвтчис. И эта кадö Толик казялiс, кыдз дедыс чапкис черсö да кыкнан кинас перыта пыкöталiс пусö, быд вын тойыштiс сiйö кыраслань. Кöз дрöгнитiс, мутш-мутш керис, но бöра эз пöр, а сё сулалiс и ризьöтiс гусьöник.

— Мун ылöжык! Дойдны вермас! — горöтiс Пахом.

Толик чеччöвтiс бокö. Сiя вежöртiс, что шогмö мыйкö неладно. А дедыс сё пыкис и пыкис пусö, сьöкыта лолалiс и бобгис ныр увтас. Пуыс вöлöма невна чукыля и некыдз эз мöд водны сэтчö, кытчö колiс. Пахом мырсис öддьöн дыр, тойыштiс мымда прок. Но вот чавкнитiс говк, бытьтö кинкö лыйис пишались, и кöз перво жагöник, а сэсся, сё чожжыка и чожжыка пöрис кырасыслань. Ып-п — усис пуыс, и Толик кылiс, кыдз ризьнитiсö уввес. Пахом чепöссис бокö, шуис довольнöя:

— Вермим!

Сiя адззис чапкöм черсö, сюйыштiс коскас, сэсся мышкырасьöмöн пондiс кошшыны вугыршаттез да котёлок. И вдруг ойнитiс нёштöма, öдззис ружтыны и, коссö киэзнас видзикö, жагöник пöрис нитш вылö. Толик шай-пай лоис.

— Деда-а! — сы дынö локтiкö, горöтiс зоночка. Но старик паныт шы эз сет.

Мый лоис дедыскöт — Толя эз тöд, но вежöртiс: аркмис мыйкö öддьöн умöль. Не весь, тыдалö, баитöны: «Вöрын быд торыс вермас шогмыны». Кывлiс Толик и сэтшöм басни: «Мунан вöрö — пов сiсьмöм пуись: усьö сiя казявтöг, жамйыштö мортöс... А эшö ёнжыка пов умöлик ёртiсь, кöдакöт кокнит шедны бедаö, но сьöкыт петны...»

Öнi, дедыс дынын пукалiкö, Толиклö усисö тöдвылас эна кыввес и ёна дойдiсö сьöлöмсö. Оз сiя вермы отсавны дедыслö, нем оз прокмы керны.

Зоночка зэгйис дедсö, старайтчис сувтöтны кок йылö, сыркьялöмöн горзiкö, баитiс ласковöй кыввез — быдöс весь. Старик куйлiс кöрчитчöмöн и эз вермы не только чеччыны, но и шыасьны.

А пуэс вöрас сьöдöтiсö и дзик нюжалiсö. Туман жагöник сукмис и сукмис, лоис руд, кыдз миськавтöм вата. Сiя кöвьясис пуэс коласын, и зоночкалö мылякö кажитчис, что сэтчин ветлöтö кинкö ловья.

— Деду-у! — кынымöтчид ни синваэз сорöн горöтiс сiя.

— У-у, — шыасяс говк и бöра шы не тöв.

Толя эз тöд, мый бердö кутчисьны. Вöлi бы югыт, дак котöртiс деревняö, юöртiс айыслö да мамыслö, что дедыс шогавны пондiс. Но вöрын дзирс пемыт, оз тöдчы векнитик визирыс. И дедсö жаль кольны öтнасö. Мунан сы дынiсь, а сэтöн и шогмас мый-нибудь. Эх, вöлi бы ыджыт да вына — босьтiс бы дедсö пельпон вылö, нöбöтiс гортöдз. А öнi? Öнi вöрöт мунны оз туй.

Öнi пемыт ой, и кин тöдö, мый вермас шогмыны. Вермас...

Толик сьöвзис горöн, ыш ловзисис. Öнi вöлись казялiс, что полö. И мыйкö лэчыт, дзик пурт йыв, бытшкис сьöлöмсö: «Ме — полiсь морт!» Сьöкыт вöлi шуны этö, но ковсис. Да, да, сiя, Толик, полiсь морт! Пыр ошшасьлiс дедыслö, видзчисис ошкöм, а мый понда? Мый сiя бурсö керис? Может, сiйö, что лысьтö бергавны турник вылын и медчожа котрасьö соревнованнёэз коста?

Кытшöмкö лöг бичирок сотыштiс мороссö, сидзис юр вемö. Толик сувтiс кок йылö. Колö мунны! Мый бы эз вöв, а мунны деревняö, юöртны отирлö.

Дедыс сё сiдз жö куйлiс кöрчитчöмöн и, натьтö, зубытсянь гирчыкалiс пиннезöн. Зоночка дыр видзöтiс сылö чужöмас, малыштiс киокнас кымöссö.

— Деда-а! Мый тэкöт? Деда-а... Ме отсала. Эн пов...

— М-м-ым, — ружтыштiс дедыс, мöдiс лэбтiсьны, но ойнитiс и лэдзис юрсö.

Гажтöм и пемыт овлö лысъя вöрын луннас. Пемыт нельки сэк, кöр югьялö шондi. А тумана ойö — и баитны нем. Нюжöтан киэтö — и чуннет оз тыдалö. А мунны öнi ковсис как раз нюжöтöм киэзöн. Этö сiйöн, медбы не татшкисьны кöс уввеза пу вылö. Вермасö бытшкыны нiя, эна уввес, чужöм. Вермасö инмыны синö. Вот и мун да малась, кыдз маласьö аслас кузь уссэзöн слепöй таракан.

Дедыс дынсянь вöрзьöм бöрын Толик сразу жö öштiс визирсö и öнi, туйтöг мунiкö, коккес дугдывтöг падмалiсö, кышасьлiсö мыррез да колодаэз бердö. Мукöдпырся чужöм кузя зубыта сöтлiс лысваа ув, и Толик дыр кежö куньлiс синнэсö, зыртлiс кинас дойдöм местасö.

Лысвасянь руыс ульсалiс сiдз, бытьтö неважын зэрис. Пуэз вывсянь тёпöтiсö воттез. Нiя вöлiсö кöдзытöсь и, кöр инмывлiсö сикöдж коласöт йöрнöс увтö, сотлiсö кучик. Но Толик умöля кылiс быдöс этö. Юрын кокасис öтiк дума: «Чожжык гортö... Чожжык...»

Невежöртана дело: кыным унажык Толик думайтö дедыс йылiсь, сыным етшажык полö пемытсис и вöрсис. Но только вунöтас дедсö кöть джын минута кежö, сэк жö юрö берсяыс пырö. Сiдз и кажитчö, бытьтö одзланьынжык видзчисьö сiйö кинкö страшнöй, видзчисьö, медбы сöтны лапанас юр кузяс и вöлись сёйны... Вон руд туманас тöдчö кытшöмкö öддьöнöв ни сьöд пятна, и не только тöдчö, а вöрö. И мыйкö кышöтö и кышöтö, бытьтö сiя, эта сьöдыс, кыскалö нитшыс кузя коккесö... Не ош ли?

Сьöлöм токöтö горöн. Вывтыр кузя ветлö мыйкö кöдзыт и противнöй, нёштöм. Медбы не адззыны сьöд пятнасö, зоночка кежö невна бокö, старайтчö видзöтны мöдiк ладорö. Но сэтчин, мöд ладорас, бöра сьöд пятна, и бöра сiя вöрö и дзик ружтö сьöкыта... «Только бы петны туй вылас... Отсавны дедöлö...» — думыш керис Толик и, медбы вашöтны дынсис полöмсö, пондiс гусьöник шутнявны. «Эта разь вöр? Эта понуляин!» — усисö тöдвылас дедыслöн кыввес. А если понуляин, то ошшез эстöн абу. Сiдзкö и повны немись.

И только мелькнитiс эта думаыс, только ештiс зоночка горöнжык шутньöвтны, кыдз сы коккез увтын мыйкö кыш-кыш керис, сэсся шовкнитiс-косьöвтiс русö: — гу-у-р-р! Чужöмас бытьтö кырымтыр ва койыштiсö, и зоночка пöрис гатш.

— А-а! — чирöстiс сiя.

Мый лоис?

Натьтö, минутася унажык ковсис сы понда, медбы вежöртны, что сiя повзьöтiс кытшöмкö кайöс. Да, да, кайöс. Неважын Толик ветлiс тшакьявны и шогмис этадз жö. Инмис сiя тар поз вылö, и тарыс сэтшöм горöн шовкнитiс борддэзнас, сiдз гурнитiс — Толиклöн чуть сьöлöмыс эз пот...

Зоночка шупыта чеччöвтiс кок йылö, пыркöтiс курткасö и, кайсö видiкö, иньдöтчис одзлань.

Сё частожык и частожык пантасьлiсö пöрöм пуэз. Нiйö вуджтöн ковсис öштыны уна кад. Косьмöм уввез летiсö паськöм, вирöдз гыжьялiсö куш местаэз. Öтiк сэтшöм пу дынын Толик зубыта дойдiс пидзöссö: падмис и усис кытшöмкö лэчыт дора мыр вылö. Толик перво зыртiс дойдöм местасö, сэсся öвтыштiс киöн — ладно, веськалас. Главнöйыс — колö мунны...

И Толик мунiс. Сiя дугдiс дзарьявны сьöд пятнаэс вылö, дугдiс повны ныись. Вежöртiс: пятнаэс — просто выскыррез. Веськыта кö шуны, Толик лоис смелöйжык. Зоночка казялiс, что ойся вöрын, кыдз и луннас, мунö олан. Шумитöны пу йыввез, дугдывтöг мыйкö кышöтö, кытöнкö нёштöмасьöны лягушаэз. Вот, борддэзöн негорöн шовкöтiкö, сьöкыта лэбзис кытшöмкö ойся кай да укöстiс: ук-ук-ук! Вот тöлок увтын дзуркнитiс косьмöм пу, дзик вöрбаран шыасис: ге-р-р. Эна вöлiсö тöдса шыэз. И нельки сэк, кöр зоночка юр весьтын кинкö уфнитiс горöн и öдззис лёкгоршöн ваксьыны, Толик кваркыш эз кер. Сiя тöдiс, что эта тожö кай. И шуöны сiйö сюзьöн. Да, повны вöлi немись.

И сёжö невежöртана беспокойство пырис моросö. Кыным ылöжык мунiс Толик, сыным сьöкытжык лоис эта чувствоыс, зубытжыка чуткасис и пессис сьöлöмыс. Мыля öнöдз эз пантась туйыс? Эд сiя, Толикыс, натьтö, джын часся дыржык ни оськалö сылань? Неужели... Нет, оз вермы лоны! Толик мунö веськыта.

И только сэтöн казялiс, что кок увтас важын ни абу небытик нитшыс, кöда вöлi одзжык, а кышöтiс кузь турун: то ли осока, то ли ошсьöктан быдмöма моросви, вамöма лысваыссянь. Эта турунöт мунтöн, кышöтiсö вешьян коккез, курткаыс — нiя люзь вамисö и лоисö дзик бановöйöсь. И туман! Эстöн вöлi сэтшöм сук туман, что кажитчис, бытьтö быдлаö — кок увтö, пуэс коласö, быдсöн воздухас — кисьтöмась йöв, чапкалöмась кудель да вата. Сэтчö жö Толик неöтпырись ни инмывлiс гöппезö, кöднаын дорресви сулалiс ва.

Нюр! Кысянь сiя? Эд деревнясянь ю дорö лэдзчикö эз пантасьлы некытшöм нюр? Толик унаись ветлiс вуграсьны, неöтпырись тшакьялiс эта вöрын и некöр некытшöм нюр эз адззыв. А туманыс? Мый йылiсь сiя баитö? О, Толик бура тöдiс, мый йылiсь баитö эта туманыс! Не весь жö таво вуджис нёльöт классö. И не весь сылö учитель öтпыр пуктiс отлично. Да, да, отлично. Учитель юалiс сэк, мыйсянь лоö туман и кытöн сiя овлö сукжык? И Толик висьталiс. Правильнöя висьталiс. Туман — эта öддьöнöв вазьöм воздух, и сукжык сiя овлö нюррезын, ю дорын, мöднёж шуны, лажмытiннэзын. И эстöн тожö лажмытiн. А деревня, кöда дынö сiдз старайтчис локны Толик, сулалiс керöс покат вылын и сы дын почти некöр эз вöвлы туман...

Сiдзкö, Толик мунiс не сэтчö, кытчö колiс. Сiя павьялiс кытöнкö матын ю дорын...

Дрöжитiсö коккез, киэз. Не то повзьöмсянь, не то кынмöмсянь кальскöтiсö пиннез, и быдöс вывтырсö сывьялiс мороз. Охота вöлi пуксьыны му вылö, шоччисьыштны. Охота вöлi горзыны, корны отсöт. Но Толя видзсис. «Трус! — видiс асьсö. — Умöлик морток! А эшö ошкöм дедытсянь видзчисьлiн».

Сёжö мый керны? Мый керны?

Аслас деревняын овтöн Толик унаись кывлiс, что не только учöттэз, но и нельки опытнöй вöралiссез öшöны вöрö и мукöдпырся ветлöтöны сэтчöдз, кытчöдз оз усьö кок йылiсь, кытчöдз оз кулö. Мый лоас сэк, если и сiя, Толик, усяс кок йылiсь?..

Но этö думасö сiя сэк жö вашöтiс дынсис. Зонка крута бергöтчис бöр, шупыта иньдöтчис нюрыс ладорсянь. Колö мунны вывлань, кытöн кизержык туманыс, кытöн ятнöйжыка тöдчöны выскыррес. Сэтчин ыббез, сэтчин расок. Толя решитiс не кежлыны сэсся бокö, не ордйыны колодаэз, а мунны и мунны прокод только веськыта.

Булькöтiс кок увтын ва, негорöн ризьöтiсö тöрмöм уввез да сiсь беддез. Зоночка косви пыралiс гöпö, петiс чибу-чаньöн, мымдакö кыссис кынöм вылас. Сiя вирöдз гыжьялiс киэсö, чужöмсö. Бырис садь, и Толик чувствуйтiс, что вот-вот брякнитчас кыминь и сэк... Но кытшöмкö вын сё тойлалiс и тойлалiс одзлань.

И сэтöн, öтiк ыджыт колода дынын мырсикö, Толик вдруг ятнöя кылiс öддьöн тöдса, öддьöн мирнöй шы: ку-ку-рек-ку-у! Эта шысянь пот мунiс сьöлöмыс, тырис радöн. Петух! Матын деревня! Зоночка кывзiсис, старайтчис вежöртны, кöда ладорын кылiс китсасьöмыс. А сьöлöмыс токöтiс горöн-горöн, и Толик повзис, что эта токöтöмыс вермас пöдтыны петуххезлiсь сьылöмсö. Но весь полiс. Минута бöртi сразу кынымкö петух öтдруг, дзик команда сьöртi, китöстiсö веськытланьын, юöртiсö ойшöр кад. Зоночка чуть ли не котöрöн чепöссис сэтчин, кысянь кылiс дружнöй песняыс.

Ласковöй июльскöй шондi быдса кольтаэзöн кисьтö öшыннэз пыр лэчыт югöррез. Керкуын сэтшöм югыт — синнэзлö зубыт.

Толик кровать весьтын тикöтö часы, лыддьö минутаэз. Öтöрын, кылö, готсьöны курöггез. Локтöма виль гажа лун. А кроватьын куйлыны сэтшöм бур, сэтшöм долыт! Только вот садейтöны киэз, висьö кок, и кытшöмкö вез каттьö чужöм. Этö — дойдöм местаэз.

Керкуын баитöм оз кыв, но Толик чувствуйтö, что кинкö пукалö кровать дынас, орöттöг видзöтö сы чужöмö.

— Баба, тэ?

— Ме, кагу, ме. Тэ узь да веськав, — баитö бабыс. Голос сылöн нежнöй, ласковöй.

А эшö мöдiк сэтшöм жö ласковöй — сойыслöн — шуö:

— Шоччись, Толик. Тэ öддьöн мыдзöмыт. Озъягöд сёян?

Толиклöн сималö кынöмыс, и сiя, конечно, сёйис бы не только озъягöд. Но перво колö тöдны, мый лоис дедыскöт, кытöн сiя.

— Больницаö кыскисö, кагу, — висьталiс бабыс. — Коссö вöрзьöтöма. Лыйöм сылö косас да сыбурна, что кывсö öштöма. Кöбы не тэ, дак чорзис бы. Ми эд думайтiм: тi вуграсят. Эг и ылöстö бы кошшыны... Öнi эн пов, нем оз ло. Больницаын сувтöтасö банкаэз, керасö укол, и старик веськалас.

Бабыс висьталiс этö и петiс мыйлöкö öтöрö. Сы юöрсянь сьöлöмö чепöссис вир, тыртiс сiйö гордостьöн. Охота вöлi шуны: сiя, Толик, не сiсь пу, сiя отсалiс дедыслö! И мыйкö ыджыт да важнöй пырис юр вемö. Толик чувствуйтiс, что эта ойö сiя тöдчöмöн быдмис, лоис вынажык. Öнi сiя тöдö, что морт, кöда асьсö жалейттöг пессьö сы понда, медбы тыртны сувтöтöм задача, сёровно вермас тыртны сiйö, этö задачасö.

И эшö чувствуйтiс Толик, что сiя кинöскö вермис, победитiс. А кинöс — этö сiя оз тöд. Может, асьсö?

— Толик, кытшöм тэ смелöй вöлöмат! — дивуйтчö соёкыс. — Ойнас веськыта вöрöт локтöмат... Тэ... Тэ — герой!

— Вот и не, — гусьöнмоз шыасис Толик. — Ме абу герой. Тöдан мый? Ме эд вöрас öддьöн полi. Быль... Только тэ эн висьтась некинлö. Ладно? И дедöлö эн висьтав. Стыд петö...

Дата добавления: 2015-11-16