ЧЕГÖМ ЙЫЛА ТОПОЛЬ 1 страница

Медодзза жö лунö Венька казялiс, что керис öддьöн ыджыт ошибка. И кöр казялiс, пондiс ёна каитчыны. Эз ков ошшасьны аслас вынöн, немлö вöлi вышитчыны аслас дружоккез одзын. «И мыйлö ме корси эта морт дынö? Мыйлö?»

Детина лöгöн сьöласис, видiс асьсö ылöстöм кагаöн, кöдö бöбтiсö комбайнёрлöн ыджыт слава да гора ним. «Степан Сергеевич — одзынмунiсь! Степан Сергеевич — миян герой!» Да век бы эз вöв сэтшöм геройыс. Вöлöма мый вылö видзöтны! Быдсöн колхоз пасьта лэбтiсö, быд собраннё вылын, быд пельöсын сё Степан Сергеевич да Степан Сергеевич, а сiя вон кытшöм!

Венька кымöс вывсянь рудзалiс ньылöм. Сiя визывтiс бусöн вевттьöм чужöм кузя, пырис öмö и, кыдз клей, лякасис тырппез бердö. Йöрнöсыс, кылö, тожö важын ни ва, сiдз и кутчисьö спина кучик бердö. Тожö абу ыджыт удовольствие. А эта разь бур, кöр лэчыт йики тыртö синнэз, пырö öмö и лякасьö чужöм бердö?

И сё жö Венькаöс унажыксö лöгöтiс не эта бусыс да ньылöмыс, не эта йикиыс, а ачыс комбайнерыс. Стальнöй я мый я сiя? Вöрöтчытöг сулалö аслас местаын, чуннесö дзик мöртöма штурвалö — немöн калькöтны оз позь. Кыдз кайис сэтчö асывнас, сiдз эз на и лэдзчывлы, эз и сувтöтлы машинасö. Может, и павжун йылiсь вунöтiс? Да кытшöм сiя асныр, мый понда сiдз пессьö?

Венька жалейттöг гыжьялiс йикиöн бытшкалöм боккесö, мороссö. Кадiсь кадö сё нёджжалiс небоö, шондi вылö: оз я сiйö, шондiсö, сайöвт кымöр? Поди, зэрыштас невна, шоччöтас «небеснöй канцелярияыс» несчастнöй Венькаöс? Но небоын öтiк кымöрок абу, шондi рыгзьö-сералö. И горизонтыс, кöдöрö бы эн видзöт, сöстöм да югыт. Некысянь зэрсö видзчисьны.

А омöн рудзöг окласьö, быд ладорын деревняэз тыдалöны. Вон мыс покат вылын Казырин поздiсьö, ордчöн сыкöт Лобан. А чуть ылынжык, керöсок сайын, и Гаранёва югьялö аслас виль крышаэзöн.

Гажа шондiа лун, паськыт чочком светыс. И только Венькалö дзескыт. Кöрталiс сiйö кинкö эта комбайн бердö — не одзлань, не бöрлань. Тöд öтiк дело: вештав соломокопнительö вилаöн сьöкыт идзас, уджав, кыдз заводнöй. А кин кöрталiс? Ачыс! Ачыс вöзйисис эта знаменитöй Степан Сергеевич дынö. Вот и кисьт öнi ньылöмтö.

Детина ёна ни мыдзис. И нельки лöгасис сiя морт вылö, кöда первöй шуис этö машинасö степнöй корабльöн. Натьтö, бöбöв кинкö вöлi. Натьтö, некöр ачыс эз вунды сiйöн. Тожö адззöм степнöй корабль.

— Дядя Степан! Степан Сергеевич, шоччисьыштны колö, атшалi! — норöн горöтiс Венька.

Комбайнер дыша бергöтчис сылань, бытшкис дзуз видзан синоккезöн:

— Терпит, атаманöн лоан!

Эшö сералö, ош. Сылö мый! Сулалö штурвал сайын, сёравно что шоччисьö. Вот бы киас сетны вила... Мый бы эн шу, а, натьтö, öддьöн жаднöй. Рулитö и, натьтö, гöрд флажок адззö. Сетасö бур удж понда флажок да эшö вит руб деньга, а сiя и рад.

Керисö эшö öтiк круг, гöгöртiсö паськыт ыб. Киэз совсем орисö, синнэз одзын кытшöмкö чераньвез я мый я, кытшöмкö лöз гöглян пежьялö...

— Степан Сергеевич! Дядя Степан! Ог вермы сэсся... Шоччисьыштам! — горöтiс бöра Венька. Комбайнер бöра дыша бергöтчис сылань, шуис недовольнöя:

— Тэ мый, курортö локтiн? А рудзöгсö кин дзимлялас? Адззан воöм, чожа киссьыны пондас.

Венька ньылыштiс сола ньылöмсора дуль, ыш ловзисис. Нет, мый бы эн думайт, а ненормальнöй кытшöмкö комбайнерыс. Этадз уджавны, дак кöть ашын жö гроб закажит. И мыйлö сiя, Венька, корсис эта морт дынö? Эх, бергöтны бы бöр...

* * *

Павжнайтны пуксисö луншöр кадö неыджыт рас дорö. Степан Сергеевич чапкис курткасö и, медбы етшажык пöжис шондiыс, шлёпкисис пашкыра кöз увтö, ыркытiнö. Сiя вöлi мыдз, сьöкыта лолалiс, йöрнöс соснас орöттöг чышкис кымöссö. Венька брякнитчис гатш и кынымкö минута куйлiс вöрзьöтчытöг, кыдз вийöм. Вöлись пуксис, осьтiс пешорка. Пешоркаын йöв, кольттез, нянь. Мамыс пуктiс быдöс этö асывнас, кольлалiс зонсö кыдз юрвердiсьöс öтöрöдз. Усисö тöдвылö сылöн кыввез: «Тэ уджав, эн дышöтчы, а то осудитас Степан Сергеевичыс».

Но и ась, ась осудитö!

Детина дзарнитiс комбайнерыс вылö, кыдз враг вылö — косöя, лöгöн. Степан Сергеевич нетэрмасьöмöн сёйис, öт киас ыджыт нянь шöрöм, мöдас — йöлöн бутылка. Венька вылö сiя эз и видзöт. «Осудитö, натьтö...» Но вот комбайнер сувтöтiс бутылкасö одзас, дугдiс вöрöтны аннэзöн.

— Мыдзин? — юалiс Венькалiсь. — Мый жö, овлö. Ме тожö мыдзи.

Сэсся ловзисьтöг юис быдöс бутылкасис, сувтiс кок йылö.

— Адззан ыб шöрсис топольсö? Вон, кöдалiсь йывсö чарньöв ризьдыштöма?

— Но, адзза...

— Кыдз тэ думайтан, мыйлö сiя сэтöн сулалö? — Сулалö и сулалö. Меным кытшöм дело.

— А вот кытшöм... Эм предложеннё вундыны рудзöгсö эта топольви. Талун, конечно. Мый, повзин? Али кашасö етша сёйин? А мыгöрнат, видзöт, богатырь. Порозöс верман.

— Богатырь ли, не ли... А топольыс сэтöн мыйлö? Висьталiн бы веськыта: давай нирт, геройöн лоан, — бобгыштiс Венька.

Бобгыштiс и повзис. Вот вашöтас эшö позорöн. Характерыс, тыдалö, крутöй. А гортын айыс и мамыс. Кыдз ныкöт пантасян, кöр юрвердiсьöн шуöны? Но Степан Сергеевич эз вашöт. Сiя нельки нем эз горöтчы. Сулалыштiс невна и мунiс аслас машина дынö. Эта эшö ёнжыка лöгöтiс Венькаöс. Чеччöвтiс кöз увтiсь, иньдöтчис тожö комбайнлань. Минута бöртi сiя сулалiс ни бöра аслас ёрдöм местаын.

Степан Сергеевич, кыдз и асывнас, чожа заводитiс мотор, мöртiс чуннесö штурвалö. Сiйö маитiс кытшöмкö досада, вöлi недовольнöй аснас. Не öддьöнöв я круто? Зонка только таво кончитiс öкмысöт класс, вöлi, конечно, не богатырь. Зонка кыдз зонка. А сiя дзик пöрись морткöт баитiс, лöгöтiс сразу. Но вöлi и мöдiк дума. Ласковöйжыка некыдз оз туй. Венька, тыдалö, асныра, сьöкыт характера. Первöй жö лунсянь сыкöт колö серьёзнöя. Ась тöдö, что комбайн вылын уджавны не шутка. Ась сразу вежöртö и правильнöя бöрйö аслыс туйсö. Удж эм удж. Раз кутчисин — уджав.

«А топольыс йылiсь колас висьтавны. Только вежöртас я?»— думайтiс комбайнер.

Машина мунiс пöлiнясьöмöн, то öтiк колесо, то мöдiк часто инмывлiсö бороздаö, и Венькаöс ёна треситiс. Павжун бöрын уджавны лоис эшö сьöкытжык. Первöй жö круг бöрын орисö киэз, бус да йики сёйис синнэз. А рудзöгыс таво вöлi бур, тшöк да кузь тылöпа. Он ешты вештыны идзассö решётка вылiсь копнительö, кыдз вартан машина чапкö сё виль и виль куча. Сiйö и кер — вештав кузь оропа вилаöн, лэдз ыб вылö гырись копнаэз.

А Степан Сергеевич бытьтö оз и адззы, что Венькалö öддьöн сьöкыт. Сiя, мый бы эз вöв, а вундö бы талун вон эта чегöм йыла тополь дынöдз. Ох, морт жö! Сылö бы только унажык керны, унажык куртыштны деньга. Нельки асьсö оз жалейт. И мый понда сiйö уважайтö отирыс, готов киын новйöтны? «Вот локта уджсянь и висьтала правленнёын, кытшöм сiя герой. Сiдз и шуа: жадюга».

Ыб, кытöн нiя уджалiсö, вöлi паськыт. Керан öтiк круг — джын час чулалас. А йывтöм топольыс сё эшö аслас местаын, немымда оз сибав. А киэз сё орöны и орöны. Чужöм вылö шоррезöн визывтö ньылöм. Йики да бус тыртöны синнэз.

Неужели сiдз и мöдiк комбайннэз вылын? Поди, кокнитжык?

* * *

Медбöрья круг керисö, кöр Лобановскöй нюр весьтын, кытчö пуксис шондiыс, небо дзирыта öзйис вöснитик гöрд рöмöн. Ыб вылö усис лысва, лоис ыркыткодь. Степан Сергеевич сувтöтiс комбайнсö чегöм йыла топольыс увтö и шуис дзик ас кежас:

— Шабаш. Мый висьталi — керим, öнi позьö и шоччисьны.

Венька эз тэрмась лэдзчыны му вылö. Сылöн висисö киэс и спинаыс, юрын орöттöг тиньгис кытшöмкö музыкальнöй инструмент: то ли балалайка, то ли гитара. Зонка сулалiс вилаыс вылö нырыштсьöмöн. Неохота вöлi вöрзьыны местаись. И думайтны нем неохота. Юрвем вöлi тожö мыдз.

А Степан Сергеевич солидолöсь трепичöн зыртiс мотор, пешлiс ременнез да цеппез, ачыс чуть да бöра дзарьялiс топольыс вылö. «Висьтавны я? Поди, нем оз вежöрт? Эшö öдззас пильскыны...»

Кöр Венька лэдзчис комбайн вылiсь, Степан Сергеевичлöн вöлi быдöс ни готов. Нiя иньдöтчисö гортö: комбайнер — одзас, а зонка — сы бöрын.

— Тэ тöдан, Веня, — шуис сiя небытик голосöн. — Тэ давай-ко вот кывзы. Менам сэтшöм правило: уджавны, дак уджавны, медбы совесть вöлi сöстöм. А эта ыб вылын уджавны умöля и совсем оз туй. Ме эд, тöдан, быд сезон эта ыбсянь пондöта. И быдпырся медодзза лунас эта топольви вунда. Этö лоö тридцать гектар. Тэ, конечно, эн тöд этö... Вот öтiк случай сэтшöм вöлi... Висьтавны?

Венька öдва вешталiс коккесö, мунiс юрсö öшöтöмöн. Мый баитiс комбайнерыс, сiя кылiс умöля. Да и неохота вöлi кывзыны. «Уджöтiс кулавлытöдз да эшö боньгö, пöттöм чёрт. Кык норма керис — и рад».

— Вот вöлi случай...

Колö бы висьтавны зонкаыслö, кытшöм случай вöлi эта ыбын, ась вежöртö, мыля оз туй уджавны умöля, да некокнит висьтавны. Быдпырся, кöр Степан Сергеевич уджалö татöн, сы син одзö сувтö айыс.

...Сiя годö, первöй колхознöй годö, эта ыб вылын быдмис öддьöн бур рудзöг. Колхознöй председатель Сергей Фокич почти быд лун вовлiс любуйтчыны сiйöн, гордöя баитлiс зоныслö, кöда пыр вöтлiсис сьöрас:

— Вот сiя, сюыс, Стёпа. И не кинлöн-нибудь, а асланым. Тэ том и, конечно, эшö не сэтшöм сю адззылан, а менам и öнi сьöлöмö радъялö. Эх, сю-сюок!

Öтпыр мунiсö ай да зон ыбас сёрöн ни. Небоын югьялiсö звездаэз, и пондiс везъясьны туман. Мунiсö межа вылöт, любуйтчисö рудзöгнас. Эта рытö сiя окласис кыдзкö особеннöя, дзик паськыт ва вылын кокнитик волнаэз ветлiсö, быд шеп нёкралiс кузь тылöпсö, кöсйис богатöй урожай. Кöр кайисö мысок вылö, кытöн öнi сулалö топольыс, сюсис вдруг петiсö пишаля морттэз. Сергей Фокич сёрöнöв казялiс нiйö, только и ештiс тойыштны зонсö рудзöгас да шуны: «Бандиттэз! Котöрт деревняö! Кор отсöт...» Ачыс водiс йöр бокö, карманiсь кыскис наган.

— А-а, вот тэ кытöн пантасин... — небытшöма шуисö кынымкö лöг голос.

Зонка котöртiс веськыта сюöттяс, юрыс сылöн эз и тыдав. Котöрттöн кылiс, кыдз айыс кынымиськö шовкнитiс наганiсь. Но недыр мыйись бузгис пишаль, и наганiсь лыйсьöмыс дугдiс кывны.

Эта арö даснёльгодся Степан аслас дружоккезкöт садитiс ыб шöрас вöснитик стройнöй тополь. Садитiс как раз сiя местаö, кытiсь адззисö вийöм айсö.

«Вежöртас я зонкаыс? Кытшöм сылöн сьöлöмыс? Э-э, да ладно! Ешта эшö висьтавнытö».

Степан Сергеевич эз горöтчы Венькалö öтiк кыв. Венька люшкис сы бöрын, тожö чöлiс, лöга вирскис нырнас. «Ашын жö корся мöдiк удж вылö. Эта морткöт не уджавны меным», — решитас сiя.

А Степан Сергеевич думайтiс Венькалöн счастливöй судьба йылiсь, мирнöй кад йылiсь, кöр позьö спокойнöя уджавны, быдтыны урожай, богатсьöтны роднöй страна. «Интересно, локтас я ашын? Ноко, видзöтам...»

Венькаöс панталiс гортын айыс. Сiя вöлi тожö мыдз. Эд лунтыр уджалiс ыбын, лунтыр, кыдз и зоныс, дзимлялiс урожай.

— Но кыдз? Атшалiн, небось? Степан Сергеевичлö только шед — дёка мужикыс. Висьтасис топольыс йылiсь?

— Мый сiя меным, топольыс!

— Ого, лöг! Сiдзкö, эз висьтась? Вот кывзы жö, зонö. Сэтшöм дело вöлi, значит...

* * *

Венька вöлi öддьöн мыдз, но онмöссьыны ойнас дыр эз вермы. Сiя бергалiс бокись бок вылö и сё думайтiс, думайтiс. А саймис асывнас одз. Шондi только лöсьöтчис мыччисьны, а зонка вöлi ни чегöм йыла топольыс дынын. Сiя гöгöртiс паськыт листтэза пусö, пешлiс кинас качсö, нёджжöвтiс йылас. Чарöтöм топольсö кытшöмкö гожумö, чарньöв поткöтöм шöри, чегöм йывсö. «Косьмас, натьтö, чожа, — думайтiс Венька. — А мый, если таво вильö садитны?»

ОЧА МОРОС

(ордч. одзза вар.: Тулыс горалö)

Лэчыт йыла льöмвинскöй вöррезын кудельöн кöвьясьö туман. Ой и лун сэтчин сылö лым, кышöтöмöн пуксьöны столаэз, öктöны выннысö шоррез. Ой и лун тёпöтö гырись вотьва, пуэз саймöны тöвся онсянь и гусьöн шувгöны лыссэзöн.

Локтö тулыс.

Туман кöвьясьö льöмвинскöй вöррезын. А посёлокас, кöда нюжалöма лажмытик берег пöлöн, воздухыс шучтыдалана, сöдз да гора. Быд пуок вылын сымда кайпöлöсыс чивзö — пельшы оз кыв.

Посёлок сайын, винерик пипуэзöн вевттьöм логгезын, быд асылö баксöны вöрпороззэз, нёштöм голоссэзöн корöны дынаныс подругаэзнысö.

Льöмвинскöй вöррезö тулыс локтö маласьöмöн, дзик полö падмыны мыррез бердö да нюжавны и лязны пиннесö чарöм бердас, локтö жагöника-жагöника. Луннас, видзöтан, «сотчö» лым, крышаэз да пу лыссэз вывсянь виялöны вотьваэз, а ойнас вдруг пöльтыштас кöдзыт тöлок, и вотьваэс пöртчöны чöрс кодь йыжоллезö, лымыс чорзьö сiдз, что чарöмыс и вöлöс терпитны вермас. Быдса месяц мукöд годö вермасьöны öтамöдкöт тулысыс да тöлыс, и только апрель конецын ни лымыс сылö досповна — этö сэк, кöр уль тöлок ой и лун пöльтö шоныт ладорсянь и мукöдпырся зэрö. Не весь эд Льöмваас шутитöны гажтöма: «Тулысыс миянö сувтöм вöлöн локтö».

Но не пыр овлö сiдз. Вот таво, дак эшö март пондöтчикö кутчис сылöтны, а апрель первöй луннэзö посёлоксис столаэс гора шоррезöн быдöс визывтiсö Льöмваö. Ваыс нöбöтiс сьöрас гырись чаггез, тракторнöй башмаккезöн пазöтöм лыссэз да киськалöм турунчиррез. Только öтi-öтiлаын кольччисö йы коркаэз и öнi няжöтöны нiя кок увтын, кыдз вöснитик стекло тороккез. Юыс сьöдöтiс и син одзын пöльтчис. Сiя ружтöмöн нямралö йысö, быд вын старайтчö чапкыны тöвся вевтöссö. Не талун, дак ашын юыс оссяс — тулыс.

Льöмвинскöй лесопункт, кöдöн дас год мымда ни командуйтö Макар Кузьмич Шерстобитов, лöсьöтчö сплав кежö. Берег дорын, плотбищеын, рабочöйез бергöтлöны слегаэз, нюжöтöны ва дорöдз кыз леженнез, куталöны нiйö öтамöд бердö ыджыт скобаэзöн, медбы эз вешшö бокö, кöр ны кузя пондасö тарлавны вöрсö. Кузницаын талун дорисö медбöрья багоррез, йитiсö орласьöм трос. Штабеллез дынын камöтöны черрез, сьöкыта буткöтöны кувалдаэз. Мунö, кыдз пыр, дзирыт удж, нем сэтшöмыс абу, медбы волнуйтчыны...

Нем сэтшöмыс абу, а сёжö...

Макар Кузьмич Шерстобитов, морт эшö не сiдз и пöрись, но лысöй и рушмöм — чувйышт чуньнат и киссяс! — оз любит весь нервничайтны. Сылöн висьö сьöлöмыс и, медбы эз шогмы сэтшöм дело, унажыксö чöлöмöн пукалö аслас кабинетын, жагвыв кышöтö гижöтоккезöн — мукöд лунö и шы оз сет. А талун асывсянь горöтлö лёкгоршöн, рявзö сiдз, что кöть пеллетö тупкав. Ачыс сiя пöльтчöма и гöрдöтöм, голосыс вежсьöма, лоöм кыз да грубöй, ньылöма чужöм вылас кынмöма адззывлытöм тревога.

— Öнi жö дугдö бомбитны юсö! Кылiтö? Öнi жö! — чирзö сiя телефоннöй трубкаö.

— Мыля? — юалöны сылiсь.

— Дугдö, мыся, ыжмавны! Накажита! Вот и баит сыкöт.

Макар Кузьмич лöгöн чапкис трубкасö рычаг вылö, кулакнас гымгис стена кузя:

— Лена!

Кабинетö каёк моз чывкнитiс томыник нывка, тувдiс начальникыс одзö.

— Мунiсö ни эта ёрдöм Пальникö или сё эшö эзö?

— Мунiсö, Макар Кузьмич. Часöт юöртiсö... Начальник жагöника чеччис местасис, синнэсö сувтöтiс нывкаыс вылö. Басöк сiя, томыник. Лена пасьталöма дженытик лöз юбка, чим гöрд кофта. Русöй юрсиыс киссьöма пельпоннэс вылöт, сьöд синкыммес дзик лэбзьыны лöсьöтчöмась. Бытшöм! Öддьöн охота вöлi Макар Кузьмичлö горöтлыштны ловья морт вылö, да мыйкö вöрзис сьöлöмас, эз понды ванзыны нывкаыс одзын, только кваркыш-кваркыш керис гöрдöтöм синнэзнас да юалiс гусьöнмоз:

— Кыдз тэ думайтан — ваясö?

— Ваясö. Зонкаэс надёжнöйöсь.

— «Надёжнöйöсь!» Тöда ме нiйö... Но ладно, мун. Адззылам, мый петас.

Макар Кузьмич чышкис кымöс вывсис ньылöмсö, дзарнитiс öшынö. Тулыс! Кöть и тшöктiс не пизьдыны аммоналöн йысö, Льöмва вот-вот оссяс. Да, оссяс — немöн он сувтöт...

* * *

Льöмвасянь Пальникöдз дас верстася только разь невна унажык. Сюрны сэтчин кöс погоддяö öддьöн кокнит. Вöр туйыс, конечно, не пызандöра кодь, но жар гожся луннэзö, кöр косьмасö быдöс нюррез и муыс чорзяс, кыдз печина, ветлыны сы кузя позьö приключеннёэзтöг. Вит верста мымда гöнитан Льöмва ю пöлöн, вуджан пыдын кырас, сэсся крутöя кежан шульгалань и веськыта ни тшöк кöзъяинöт сырйы да сырйы Вильва ю дынöдз. Сэтчин, ю саяс, и сулалö Пальникыс.

Мöдiк делоыс öнi. Дзарнитан öтмöдöрö — и сьöлöмыт пот мунас. Канаваэзын доррезви сулалö тулысся гудыра ва. Пыдын ныроккезын быльс видзö ырöш гуща кодь кизерик нять. Мукöдлаын, кытчö тöвнас лэбтывлöма морт сувда столаэз, öнi куйлö кыз йы, а лажмыт местаэзын, паськыт логгезын да нюррезын, сё эшö кышöтö шыдöс кодь чорыт лым. Лым увтас больгöны шороккез, и вöввез тальччалöны полöмöн: фырскайтöны, тревожнöя орсöны пеллезöн, берегитчöны, медбы не инмыны пыдын ямаö.

Ва да нять. Нять да гудыра ва.

Телегаэз чеччалöны и ёркйöны. Нёштöма горалöны ны вылын пустöй бочкаэз. А ямщиккесö зэгйö сiдз, бытьтö кытшöмкö нечистöй вын медасьöма лешакыслö пыркöтны нылiсь коскаэзнысö. Пукавны бы эттшöм кадö гортын, висьтасьны шонытiнын öтамöдлö интереснöй случайез, а не петны туяс, кытöн — сiйö и видзöт! — пиньöвтан юртö. Но начальник тшöктiс мунны, и зонкаэз мунöны.

«Надёжнöйöсь», — шуис ны йылiсь Лена. И быль — он кулит. Кыкнанныс статяöсь, крепытöсь. Сергей Комолов, сiя, кöда мунö одзас, паськыт пельпоннэза, ён чужöмыс биöн öзйö. Тöдчö — вына детинаыс, прока. И дивуйтчыны нем: сылö только неважын тырис двадцать год. Сы кодь жö и мöдыс, кöда пукалö бöрись телегаас, — Виктор Гыров. Топытик, паськыт корпöса. Кыдз бы эз ёркйы, а сiя пукалö веськыта, оз копырась. Зонка, тыдалö, любитö форситыштны: юр вылас пуктöма моднöй шапка — малахай, кöда мыйöнкö вачкисьö верблюд горб вылö, голясö кыза каттьöма гöрд шарфöн, а кöмалöма — дивуйтчы только! — басöк хромовöй сапоггез. Этö öнi, тулыснас, кöр нятьыс пидзöсви! И настроеннёыс сылöн, тöдчö, öддьöн бур. Синнэс югьялöны, ачыс лукавöя шыннялö.

— Эй, Сергей, кыдз тэ думайтан: эм мыйкö миян начальниклöн юрас или абу?! — горöтлö сiя мый вын.

Сергей кöдö кылiс, кöдö эз, но быдöс вежöртiс и дивуйтчöмöн дзарнитас Гыров вылö.

— Начальникыс юрын? Да, натьтö, сiя жö, мый и тэнат гырничын. Вермас лоны — öтмымдаöн. А мый?

— Сiдз... Репöтiс эттшöм погоддяö. Кинкö вöйöтöма тракторсö, а миянöс, кык дуракöс, репöтiс. Этö кин жö сiдз керö? Эшö бöбöтас... Сiя эд премия кöсйис...

— Кытшöм заслугаэз понда?

— Ваят, шуö, горючöйсö — премия сета. Делоыс, шуö, государственнöй важностя.

— Но, если сiдз, дак сетас, пожалуй. Мый сылö деньгасö жалейтны, не аслас эд.

— Конечно, не аслас. Ассис эз бы сет. Надз сiя. Сергей сэсся эз шыась: абу охота горшсö весись летны. Да и юрас сылöн аслас думаэз, аслас заботаэз. Сiя ёнжыка жмитчис пустöй бочка бердö, медбы эзжык зэгйы, крепыта видзö вожжисö. Сет вöввезлö волясö, дак пондасö чепсасьны öтмöдöрö, кошшыны кöсжык местаэз. Сiдз и рытöдз Пальникас он лок.

Пукавны сьöкыт, недолыт. Вöв коккез увтсянь песоксора вачиррез лэбзьöны веськыта чужöмö, инмöны öмö, пиннез коласö. Телегаэз пöлiнясьöны. То öтiк колесо, то мöдiк осьви пырö нырокö, чуть да и бöра забгисьö ямаö. Сэтчин, ямаас, нёштöма няжöтö поснитик галька. Мукöдлаын, лажмыт местаэзын, кажöтö йы, жугалö и лэбзьö öтмöдöрö учöтик тороккезöн. Гажтöма, дзик норасьöмöн, дзуртöны телега колесоэз, лэдзöны сэтшöм шыэз — пиннезлö зубыт, ваыс гывьялöма оссез вылiсь мазьсö.

Чукыль сайсянь мыччисис векнитик лог. Сы пыдöсöт шумöн визывтö лымсора ва. Эстöн öмтö эн осьтлы. Вöввез орсöны пеллезöн, сiйö и видзöтöны, кыдз бы чеччöвтны бокö, умöль места дынсянь ылöжык. Плетьтöг нем он кер. Сергей сöтiс коренниксö, трекнитiс вожжи. Вöввез дзебисö пеллез, корснитiсö, дзик шуисö: мый лоас, сiя и ло! — и уськöтчисö ваö. Телега дзуркнитiс эшö нёштöмжыка, кытшöмкö миг кежö дзик öшöтчывлiс воздухас, сэсся мымда вын ёркнитiс кын му кузя — сай ладорас ни. Вуджис и Гыров.

Лог бöрын сразу жö пондöтчис кöзъяин. Эстöн туй вылас куйлiс эшö пыдынкодь лым, только мукöдлаын мыччисьöма муыс. Телега колесоэз нилисö лымсö, вöйлiсö му бердöдз, и ны следдэзö сразу жö йиджис ва. Туй дорас, лапыт кöззэз увтын, сiдзжö сулалiс сöнöг, вöрас кудельöн кöвьясис туман. Мукöдлаын мыччисьöмась ни векнитик кöчкаэз, и ны вылын пежьялiс зэррезöн миссьöтöм пуягöд кор. Веж-бель видзисö первöй лымдорчачаэз.

Гажтöм и таинственнöй вöрыс. Сьöкыт туман шучкöп кöтöтöма лыссö, йиджöма сыö, и пуэс сулалöны вöрöтчытöг, бытьтö лэдзчисьöм борда курöггез — ульсöт нырыштöма нiйö. Пуэз коласын ветлö сьöкыт испарина, а вöр пыдöссянь кышöтöмöн петöны тöдтöм шыэс. Неылын кырас дорын лошнитiс-чегис пу, ризьöтöмöн усис му вылö — тыдалö, кынмалöма сiсь гыркыс и öнi, кöр сылiс, эз ни вермы öшшыны кок йылас. Понуллез сайын кыз голосöн мукнитiс лось, дзик сiмöм трубаö пöльыштiс: м-б-бу-у! Тöвнас вöрпороззэз олöны торйöн, а öнi, тыдалö, öтлаасьны ни мöдöны, кошшöны подругаэзнысö, баксöны вöрас...

Погоддя тшыксис син одзын. Не весь, тыдалö, баитöны: тулысся лунö, кыдз и арнас, сизимись сiя вежсьывлö. Асывнас югьялiс шондi, гажöтiс быдöнöс, а öнi сьöкыт кымöррез öдва кыскöны польдöм кынöммезнысö пу йыввез бердöт, зыртчöны öтамöд бердö, тыртöны и сiдз ни уль воздухсö эшö ыджытжык ульсöтöн. Эта ульсöтыс пырö моросöдз, нырыштö сьöлöм, лякасян везöн каттьö юрвем.

Сергей Комолов, аслас характер сьöртi весёлöй морт, мукöдпырся лунтыр шутитö да згальничайтö, а талун öшöтöма юрсö, кыскöма сiйö пельпоннэзас. Чужöмыс чуть да и бöра нёштöма пиньöвтчас, бытьтö нетшкö сiйö ойтöв, синнэс гажтöмöсь.

Недолыт и сьöкыт. Сьöкыт не только погоддясянь. Волнуйтö туйыс и заданнёыс, кöдö сетiс начальник. Мый нiйö видзчисьö одзланьын? Вермасö я босьтны горючöйсö? Кыдз сiйö босьтны? Йы вылöт вöввезöн öнi не мунны. Сiдзкö, ковсяс быглявны бочкаэсö сай берегсяняс киэзöн. Удайтчас я? «Вот локтам, видзöтам — кыдз и мый», — решитiс Комолов и домыштiс вожжисö радз бердö, чеччöвтiс сöнöгас, нарошно сералöмöн юалiс Гыровлiсь:

— Государственнöй важностя пö заданнёыс?

— Сiдз и шуис, — гогинялыштiс юрнас Гыров и паськыт шынньöв пыр мыччалiс чочком пиннесö. — Шедiс сiя, колö висьтавны, кыдз капканö кöин. Öнi тангасö сивилёнас, иньдöтасö Макарушконымöс дыв, кыдз баитöны роччес, как раз сэтчин, кытöн сылöн тёзкаыс куканнесö эз дозирайтлы...

— Тэ, тыдалö, рад?

— Меным-ту мый, горзыны я мый я? Эд баитiсö сылö, кынымись баитiсö, эх! — Виктор шляпнитiс кывнас и сьöвзис пиннес коласöт. Сэсся казялiс, что пондiс кольччыны, и сöтiс коренниксö плетьöн:

— Но, но! Вöрöт коккетö, дышкуль!

* * *

И быль — неетша баитiсö Макар Кузьмичлö, что умöль дело вермас петны, не иньдыны кö аскадö горючöйла трактор.

— Одз сылöтö, Макар Кузьмич, кыдз бы этö... горючöйтöг не кольччыны, киэзöн вöрсö не тарлавны.

Но Макар Кузьмич быдпырся дзарьялiс неболань и öмалiс советчиккесö:

— Ештам эшö! Талун сылöтö, ашын мороз жвангас. Эшö öшкалöн сюррес усяласö. А тракторыс вöр кыскавны колö. Страна вöр видзчисьö. Вежöртiт?

Дело вöлi, конечно, простöйжык. Льöмвинскöй лесопункт мартын öдва-öдва тыртiс план и сылö эз кöсйö премия. Макар Кузьмич сетiс аслыс чорыт кыв: мый бы эз ло, а получитны солиднöй премия апрельын. Но и эта месяцын вöрсö кыскалiсö не буржыка: туйес разьсисö ни. Вöлi вежöртана: не примитны кö кытшöмкö срочнöй мераэз, премия бöра ывтi орддяс начальниклiсь кармансö. Да эшö выговор сетасö, а то и дыв вашöтасö. Тöвся делянкаэзын вон мымда заптöм вöрыс ендö. Коль сiйö гожум кежö — сiсьмас. Эта перспективасянь начальникöс сывьялiс мороз.

Дата добавления: 2015-11-16