|
Читайте также: |
Чойкарын öзйисö ни биэз, кöр Чикаляка локтiс автобус сувтчанiнö. Сэтöн, бедь вылö нырыштсьöмöн, сулалiс мышкыра инька, а лабичын куйлiс капустаюр.
— Баба, Канин Шура ордö мунны эссянь? — пондiс юасьны борда пассажир. Инька лэбтiс юрсö, видзöтiс ас гöгöрас — некинöс эз адззы. Пуктiс кисö кымöс
вылас да нёджжалiс ывтiжык — некин абу. И бöра нырыштсис бедь вылас.
— Тэ менö, баба, кошшан? — Чикаляка сувтчис мортыс син увтö. — То ме! То ме! — и размöд чеччöвтiс.
— Мы-ы-ый? — веськöтчис инькаыс.
— Туйсö тай юала.
Мышкыра инька кресталiс Чикалякасö:
— Чур, чур, менö! Мун эстiсь, бес!
— Кытшöм бес, баба?
Мышкыра инька дзебис бедьсö конувтас, кватитiс капустаюрсö да öшис пемытiнас. Гажтöм кутiс Чикалякасö. Кинöн сiйö лыддьöны?
Рушки-рашки локтiс кодыш старик. Гимнастёркаа, ременя, чочком вешьяна, тапочкаа. Сiя кинкöткö споритiс и кинас руас чертитiс круггез.
— Дона менам ёрт! Тэ эн вермась мекöт, а кывзы. Кывзы дзир öтнамöс, и ми лоам генераллэз! — Пуксис лабич дорокас, чатыртчис, зэлытжыка кышалiс фуражкасö. — Вежöртiн, дона менам ёрт!
— Тэ кинлö сiдз шуан, дед? — юалiс Чикаляка.
— Тэныт! Только тэныт, дона менам ёрт!
— Ке-ке-ки, — серöмтчыштiс Чикаляка. — Ме лоа ге-не-рал? — А кыдз инö? Ме — генерал, и тэ генерал!.. Бур генералнас овны: лимузин тэныт, телефон, кофеёк... Тринь-тринь телефонöт — и одзат солдат: «Мый прикажитат?» Тэ сылö: «Смирно! Кер этö и этö!» Сiя: «Кывза, генерал ёрт!..»
Гажмис Чикаляка: сiйö тай мортöн жö лыддьöны!
— Дед, а ме мыгöрнам учöтöв да...
— Дона менам ёрт! Кинлö колö öнi мыгöрыт? Вöлi бы юр! Да эшö пельпон!.. Эд тэнат — папаха, золотöй погоннэз! Ух-х! — и пондiс смекайтчыны. — А... кытöн нö тэ? Ноко бокам пуксьы, генерал!
Чикаляка чеччöвтiс лабич вылö:
— Ме бокат ни!
Старик видзöтiс, видзöтiс, видзöтiс, чуньнас лег-лег керис да юалiс бинтуйтöм борд вылас видзöтiкö:
— Тэ ранитöм? Инвалид? И ме инвалид! Дак кинöс нö мöдан бöбöтны? Генералсö? Сiйö он бöбöт! — и юрнас беринь-беринь, кыдз люкасись куканёк. — Тэ — сiя крокодилыс, кöда эта пораö ме дынö куритны вовлö. Только сiя не крокодил, а бес. И тэ — сiя бесыс!
Чикалякалöн лöгыс петö:
— Ме не бес! Ме Чикаляка!
— Дона менам ёрт! Кöть тэ слонö пöртчы, меным сёравно. Кылан: сёравно! Споритны дугдам, а рякöстам сьыланкыв. Генераллэз мозöн. — Старик пуксьöтiс Чикалякасö öлöдзас, зэв жмитiс бердас. — То этадз рякöстам:
Мича шо-о-ондiыс а-а-абу-у-у, Кöть и эм, да-а-а мия-а-анöс оз шонт... Старик чышкис öмсö, кашельтыштiс:
— Ме пондöта, а тэ отсав.
И пондöтiс. И Чикаляка отсалiс.
И сьыланыс нылöн аркмис öддьöн-öддьöн-öддьöн бур! Нельки машина ны весьтö сувтчис: тыдалö, и шофёрыслö любо кывзыны, кыдз генераллэс песняэсö чалöстöны. И локтiс шофёрыс ны дынöдз топ да висьталiс:
— Тырмас тiянлö!.. Баксöны, кыдз мöс да дзелёк!.. Мунам-ко, — и сьылiсьсö конувтöттяс кутiс.
— Кытчö мунам?
— Узьны. Вытрезвительö.
Кылiс этö Чикаляка да мöдiс мездöтчыны старикыс киэзiсь, но эз вермы. А старик ошшасьö:
— Дак ме не öтнам. Мекöт генерал!
— И генералтö сьöрат босьт. А эта коста.
Дата добавления: 2015-11-16; просмотров: 55 | Нарушение авторских прав
| <== предыдущая страница | | | следующая страница ==> |
| Канин Шура да Лег-лег Чойкарын | | | Канин Шура да Лег-лег вирскöны ныррезöн |