Мамыс асывнас Васюткалö висьталiс:
— Тэ, кага, школа бöрсянят ме дынö кежав, ме тэкöт гöснеч гортö иньда... Адззан менö?
— Адзза.
Васютка мамыслöн бур отсасись, сiя пыр керö сiдз, кыдз мамыс тшöктас. А эстöн эшö гöснеч кöсйöны, дак кöр он кежав?
Сылöн мамыс маляр, виль керку дын белитчö да краситчö. А посёлокын лэбö только öтiк керку. И сiйö кöть кин тöдö. А кöть и он тöд, дак видзöт, кытöн ыджыт кран сулалö, сэтчин и эм виль керкуыс.
Кранысся ыджытжыкыс посёлокас абу нем, и сылöн голяыс да нырыс быдласянь тыдалöны.
Мöйму арнас, кöр ветлiсö туримольла, Васютка адззылiс туриöс. Сiя сулалiс зöр коласын, и тыдалiс только юрыс.
Дак вот, кöр видзöтан ылiсянь, кран вачкисьö чатыра юра тури вылö.
Кöр Васютка локтiс керку дынö, мамыс да инька сьöд ваöн мавтiсö керку стенасö. Кыкнанныс руд комбинезонаöсь, öтыждаöсь, но зоночка мамсö тöдiс ылiсянь.
— Бур лун! — горöтыштiс Васютка. — А керкуныт нёштöм лоö, топ сьöд доска.
— Бур лун, Васенёк! — шыасис инькаыс. — Дак, шуан, нёштöм? А тiянöс мыйлö инö — серöтат эд! И басöк лоас. Карманат кыным мелок?
— Мелсö ме сумкаам новйöта.
— Кöть кытöн, а новйöтан эд! Мамыс сэтчö горöтчис:
— Миян сьöдыс только улiсянь лоас, мед етшажык нятьыс сы бердö кутчисис. Вывтi чочком лоас.
— Сэк бур. Вай инö гöснечтö.
— Ö-ö, дак тэ гöснечла? — гажтöма шуис инькаыс. — А ме думайтi — уджавны... Мöдi белитчан кисть сетны, то заптi ни.
— Эн на сет, — шуис мамыс. — Мöдпырся уджöтам. Талун зонкаыт нимлуна. — И пырис будкаö.
— Ö-ö, дак вон мый! Сэк пеллезöттяс нюжöтам, ась чожажыка быдмас! Инькаыс лэдзчис лажмытик лисничок вылiсь, чышкис киэсö трепичö. Васютка сы дынiсь бöрлань вешшö.
— Оз ков нюжöтны! Менам пельö сiдз ни зубыт, тöн мячöн инмисö.
— Сiя пельöт нюжöтам, кöда абу зубыт... Васютка — мамыс дынö.
«И нюжöтас, мый сылiсь босьтан?..» А мамыс петö ни, киас видзö коробка.
— Эстöн, Васютка, торт... Нимлун кежат. — Осьтiс коробкасö, мыччалiс зоныслö да бöр пöдналiс и сетiс. — Эн уськöт, эн нöит. И метöг эн джынняв.
Тортыс Васюткалö бура гленитчис: шöрас розовöйöн гижöма 10. Этö сыным год Васюткалö. Доррезöттяс лöз цветоккез, зелёнöй листтэз, гöрд туссез. И, конечно, чöскыт сiя: сiдз и курччöвтны охота.
— Ö-ö, а менам талун и конфетка абу, — норасьö инькаыс. — Мыйöн инö потшшуйта тэнö, нимлуна зон?.. А вай ме тэныт мыйкö козьнала. — И комбинезон кармансис кыскис складенёк. — На-ко. Сiя виль эшö, тöн вöлись бсьтi. Васютка пуктiс коробкасö му вылас и повтöг (мамыс ордчöн!) оськöвтiс инькаыс дынö да босьтiс складенёксö. Видзöтiс: кык пурта. Осьтлiс öтсö и мöдсö.
— Бур складенёкыс. Спасибо.
— Нем понда, Васенёк... Чожажыка быдмы да миян дынö уджавны лок!
— Ог. Ме футболистöн лоа... Адззисьлытöдз!
Васютка дзебис пуртоксö карманас, босьтiс коробкасö да иньдöтчис гортас. И чожа локтiс бы, да площадь вылöт мунiкö пантасис школаись ёрттэскöт.
— Лок футболöн орсны, Васютка! — корöны сiйö.
— Ог. Менам этö колö гортö нуны, — Васютка мыччалö коробкасö.
— Сыбöрын нуан. Пукты кыдз увтас, некин сiйö тэнчит оз сёй... Недырик орсам...
— Но, недыриксö позяс. И Васютка мунiс орсны.
Пуктiс коробкасö пу увтö, чöвтiс сиви вывсис сумка, а юр вывсис — кепка, пуктiс öтлаö. Пуртоксö колис жö — сумкаас сюйыштiс. Ылöжык пуктан, матiсьжык босьтан. Бöрйисö капитаннэзöс. Капитаннэс аслыныс босьтiсö вратаррезöс.
— Судьяöн лоас Васютка.
— Оз ков сiйö! Колö Вадимöс!
— Кудымовöс пуктам!
— Оз ков!
— Колö!
Споритiсö-керисö да пондiсö лыддисьны:
Мунi ме öтöрö:
Мунi ме мöдöрö,
Адззи да босьтi
Лягуша йöрнöс.
Гортö кайöтi,
Тувйö öшöтi,
Косьтi да масьтi ―
Вот и быдöс!
Васюткалö инмис лоны судьяöн. Сэк ковсяс котрасьны сэтчöдз, кытчöдз кыссяс орсöмыс. Но мый керан? Кыдз лöсялiс!
Орсiсö пымавтöдз. Споритiсö пöттöдз. Мыдзисö усявтöдз. Öт капитаныс висьталiс:
— Тырмас орсны. Мöдыс висьталiс:
— Талун гортö мунам.
Небурика споритöмöн лöсьöтчисö горттэзö.
Пу увтас, Васютка сумка дынын, гыжьясис ыджыт пон. Пукалö, бöрись кокнас вартö пель увтсö да шыннялö — чочком пиннесö мыччалö. Васютка серöмтчис сылö паныт, но сэк жö öмыс нюмыртчис: коробкаыс осьта, тортыс абу!
— Сёйöма!
— Кин?
— Мый?
— Тортöс сёйöма-а-а! — бöрдчис Васютка да кватитiс кирпич торок, но поныслö вачкыны эз лысьт: пурны вермас.
Кин эз ешты мунны, чукöртчисö Васютка дынö.
— Кинлöн поныс?
— Вадимлöн! Вадим оз суськись:
— Менам. Но и мый?
— Вешты тортыс понда Васюткалö.
— Эшö мый висьталат?.. Эз ков чапкасьны тортнас! Колiс гортат нöбöтны.
— Дак ме эд мöдi-и, — пильскö-горзö Васютка. — А тiйö орсны корит... Кудымов бурöтчыны пондiс:
— Эн горзы, Васютка. Вот тэныт руб, виль торт небан. Кинкö шуис:
— Рубыс етша. Кин содтас?
Öдззисö кошшисьны карманнэзын да сумкаэзын и Васюткалiсь кырымсö тыртiсö веж да чочком деньгаэзöн.
— Мун босьтась öнi!..
А вит минута бöртi Васютка бöра вöлi площадь вылын. Локтiс виль тортöн. Сiйö видзöтiсö быдöнныс, кин сеталiс пятаккесö да десяриккез.
— Босьтiн?
— То тай, — шыннялö Васютка. — На видзышт, Кудымов. — Сетiс коробкасö сылö, кин медуна пуктiс деньгасö. Ачыс чöвтiс спина сайсис сумкасö, кыскис сэтiсь козьналöм пуртоксö, пуктiс бок вылас сумкасö: — Сувтöт этчö, Кудымов.
И вот осьтöм коробкаись мыччисис торт. Сы вылын эз вöв розовöй 10, эз вöлö гöрд тусёккес. Доррезöттяс нюжалiс чукыля-викыля зелёнöй визь да шöрас куйлiс лöз василёк кодь цветок.
— Этö видзöтны али сёйны? Васютка мöртiс пуртоксö торт шöрас...
— Сёйны. Менам талун нимлун.
ЧИКАЛЯКА
или Канин Шуралöн, кузь мыгöра дасгодся зоночкалöн висьт сы йылiсь,
Дата добавления: 2015-11-16; просмотров: 55 | Нарушение авторских прав
| <== предыдущая страница | | | следующая страница ==> |
| СЕВАЛÖН ВÖТ | | | Мый вермö аркмыны, кöр мортлöн öшас он |