Кытшöм морт, сэтшöм и сер

Керны тротуаррез — уджыс абу сьöкыт. И кöть ачыс оз жö керсьы, а юр жугдыны оз ков: пуктiн куим плаха — и квать метр кузя оськöвтiн, эшö куимö — бöра квать метр кузя оськöв. Куим лун — и посад шöрö водас, дзик кузься-кузь половик, кокнитик говка тротуар.

Гриша да Шурик öнi уджалiсö öтнаныс, Борис Борисович только шочыника казьмöтчывлiс да отсавлiс кывнас — сiя сё олiс пионерскöй лагерьын.

Нiя öтiк лунöн локтiсö важ часовня весьтöдз и сэтöн падмисö: бырсис плаха. Сельсоветын висьталiсö: лоас пö ашын. Ашынас сiдз жö — лоас пö ашын. Но чулалiсö кык ашын, локтiс куимöт, а нiя сё туплясисö часовня дынiсь тополь увтын, сiдз кыдз сельсоветiсь председатель öддьöн ни авторитетнöя кöсйис плахасö.

Эта асылö ны дынö локтiс Борис Борисович, пуксьыштiс боканыс. А деревняын часто сiдз овлö: кытöн куим — сэтчö и нёльöтöс кыскö. Сiдз и эстöн шогмис: казялiс нiйö да кежис сэтчö старик — Иван Якимович, кöркöся велöтiсь. Сiя бура ни мышкыртчöма, но ветлöтö бедьтöг. И сё гажа сина, и сё галстук новйö.

— Бур лун, уджалiсь отир! — здоровайтчис сiя шляпасö босьтлöмöн и недовольнöй шыöн юалiс: — Мыйлö тiйö эта удж бердö кутчисит? Сiя не тiян понда.

Зонкаэс дзар керисö öтамöд вылö: кыдз пö этö вежöртны? Борис Борисович чеччис, здоровайтчис, юалiс дивуйтчöмöн:

— Мыля, Иван Якимович? Удж кыдз удж. Асьныт тöдат, что...

— Не тiян понда, коллега... А позьö и этадз шуны: тiйö не эта удж понда. Да, сiдз лоас точнöйжыка висьталöм. Ме видзöтi зарни карнытö — сьöлöм гажмö. Тiйö — художниккез, а не ув суййиссез. Вежöртана эта, коллега?

Гриша да Шурик сувтiсö пидзöссэз вылö, öмныс реш оссис: то тай кыдз нiйö ошкöны!

А Иван Якимович одзлань баитiс:

— Эм мöдiк удж — тiян ки сьöртi, тiян юр сьöртi.

— Кытшöм жö?

— То этö лöсьöтны, коллега, — Иван Якимович мыччалiс часовня вылö. — Да, да! Сiя тiян ки сьöртi.

Борис Борисович виньдiс сы кыввезöн: пöрись коммунист, кöда, натьтö, отсалiс игнавны часовнясö, öнi мöдö сiйö осьтны бöр?

— Лöсьöтны, да не кыдз-нибудь, а керны сiйö сэтшöмöн, кытшöм вöлi вильувьяс. А сылöн, кыдз и колö быд часовнялö: вöлi колокольняок, башня вылас — луковка, колоннаа посöдз, серреза карниз да öшын.

— И посöдз вевдöрас ен сувтöтны, а «луковка» вылас — крест? — желлясис Борис Борисович.

— Кужат кö — керö, этасянь часовняыслö умöльжык оз ло. Да и йöзыслö сiдзжö, — отсалö Иван Якимович. — Дак вот, вочны часовнясö да осьтны сэтчö сельскöй музей. Мый тiйö шуат?

Мöддэс нем эз шуö, да и эз ештö: Иван Якимович кыскис нiйö часовня пытшкö, кытöн куйлiсö баляэз да козаэз, а ны одзын, дзик сторож, сулалiс кукань-порозок, а кынöм увтсис рудзлiс вöснитик-вöснитик шорок.

— Мийö шуам часовня, а сiя пода карта тай, — горöтчис Борис Борисович. — И сэтiсь шогмас музей?

— Кутчан кö — шогмас. Сiя ачыс ни музейнöй пельöсок, берсясö адззылiс, — ошкис часовнясö Иван Якимович. — Оссис революция годас, тридцать седьмöйö пöднассис — гöрд пельöс да изба-читальня лоис. Война костас олiсö Ленинградiсь локтöм отир, сэсся МТС керис склад, колхоз видзис сю. Кöр сiсьмис крышаыс — некинлö эз понды ковны...

Часовня пытшкыс нёштöм, тшынасьöм да бусöсьмöм. Джоджыс да сы бердiсь керрес мавтчöмась керосинöн, дьöгöдьöн, мазутöн. Öтiклаын, дзик могилка, куйлö изсялöм цемент. Омöн ёг, нять, но быдöс ён, нельки öшын рамаэс дзоньöсь, но зэр васянь вежöтöмась кынымкö потолочина.

Ветлöтöв-керисö и часовня гöгöрöт — петшöрöт да шышыбарöт. Фундамент абу киссьöм, угöввес дзоньöсь.

— Дак мый, коллега?

Борис Борисович старикыс моз жö юалiс зонкаэслiсь:

— Дак мый, Мизёввез?

Шурик трек керис пельпоннэзнас да шы эз сет. Гриша юалiс:

— Позьö анекдот висьтасьны? — и сэк жö пондöтiс: — Öтiк комилiсь юалöны: «Тэ вермин бы министрöн уджавны?» Сiя шуö: «Верми бы, ежели бур заместителлез шедасö»... Ме сiдз жö шуа: кутчи бы, ежели Борис Борисович миянкöт лоас.

— Вежöртана... Быдöс вежöртана, — Борис Борисович ниртö оча ки, бытьтö шонтö нiйö. — Но сёжö öтiк невежöртана: кинлöн сiя?

— Некинлöн, коллега. Не колхозлöн, не сельсоветлöн, не райисполкомлöн. Сы понда ме быдлаöт ни ветлöтi-юаси.

— Сiдзкö, некинлöн. А некинлöныслöн эд нем абу — не вöр, не краска, не деньга. Кысь быдöс этö вайны, Иван Якимович?

— Деньгаыс эм, коллега, — кöсйö Иван Якимович. — А деньга эм — быдöс лоас. Давайте кутчам. Ашын асывнас локтö сельсоветö. Адззисьлытöдз! — Иван Якимович чöвтлiс шляпасö да не тэрмасьöмöн иньдöтчис виль тротуар кузя.

Неделя бöртi, кöр часовнялöн крыша шöрыс вежöтiс виль тёссянь, посадын пондiсö шушкöтчыны: — Часовнясö пö осьтны мöдöны...

— Не весь тротуарсö сэтчöдз нюжöтiсö...

— Поп вовлöма ни, уна деньга сетöма...

Попыс и быль сельсоветö вовлöма, да сыбöрын, кöр Борис Борисовичлöн бригада пондöма весöтны часовня пытшксö. И сiя сiдзжö быль, что вöзйöма деньга, медбы лöсьöтны часовнясö.

И колхознöй бригадир ёнакодь ыждалöм: «Керкуыс миян, колхознöй, асьным лöсьöтам!»

Иван Якимович, кöр сылö сiдз баитöны, лэбтыштас баитiссес одзын шляпасö, вежливöя шуас: «Сёрöнöв, донаэз, саймитö! Сiя öнi миян, сельскöй...» И сылö сiдз шуны позьö: музейыс понда деньгасö сетöма сiя — öтка пöрись мортыт.

Öтiлунö ме ветлi видзöтны плотниккезлiсь уджнысö и бура дивуйтчи: ештöмась ни тшупны квать пельöса башня да сы вылö керöмась луковка кодь юр! Правда, сiя эшö му вылас, но эм ни! Уджалöны гажöн, тэрмасьöны. Гриша радувьяс меным анекдот висьтасис: «Рака пукалö пу вылын, öмас — рисьтор. Руч сылö: «Висьтав жö, кысь адззин?» Рака дзебас рисьторсö борд увтас да шуас: «Öнi не Крылов дырни олам, он бöбöт».

* Кушборд ― лэбалiсь шыр.

Дата добавления: 2015-11-16