Милёв да Ярашко

Рассказ

Овлö сэтшöм кад, кöр тэ ачыт аслыт он ков, кöр тэ ёрдан и мусö, и шондiсö, кленитан и айтö, и мамтö, готов петляö юртö сюйыштны, но ыджыт досадасянь он думайт джагöтчöмыс йылiсь.

Ерофей Кустинович, а соседдэс моз ― Ярашко, талун и енлiсь не öтпыр ни корис смертьсö, но еныс и чутыр эз кер.

Кусiс луныс, и Ярашколöн мымдакö ямис курыт шогыс, но эз чулав. Ва фуфайкаа, нятьöсь вешьяна да сапога, мисьтöм да сынасьтöм, мужик шы не тöв куйлö сайкыт керкуокын, лажмыт полатьын. Юрас абу некытшöм дума ― нач пустöй, дзик стын вылын косьман туис. Да и кикоксö оз кыв, бытьтö нiя пельдöмась бердсис, только кылö негора тёпöтöм ― то сьöлöмыслiсь, то ва воттезлiсь, кöдна шогмöны бус кодь зэрокись да усялöны крыша дорсяняс улö.

Сiдз Ярашко куйлiс сёр рытöдз, и эз вöв сылö не зубыт, не долыт, не кöдзыт, не шоныт, не югыт, не пемыт ― бытьтö нем эз вöв: не керкуокыс, не туруновöй ольпасьыс, не Вурлам юокыс, кöда больгис керкуок бокас, не руыс, кöдöн лолалiс.

Кöр му вылас лэдзчисис арся сук пемыт, дзур-вир оссис сьöкыт ыбöс. Ярашко эз и вöрзьöтчы, синнэсö эз осьт. Сiя тöдiс, кин локтö ― Милёв. Сiя видзчисис Милёвсö, этö ладтöм лызлосö, но некыдз эз лöсьöтчы пантавны: мый лоас, сiя и ло, только сы одзын пöрись морт оз понды коссö чегны.

Фонариклöн кöчок перво шныритiс керкуок пытшксö, сэсся кылiсö шаркöтан кокшыэз ― пырис сапога морт, пырис повтöг, кыдз пырö гортас хозяин.

Старик сiйö эз адззы, но сылöн син одзас вöлi Милёвыс ― кузь чужöма, ыджыт ныра и тупка сина том морт.

Биасьтöг, пемытiнас, чöвтiс болоневöй куртка, чапкис Ярашко коккез дынö, пуксис джек вылö, горöн ловзисис:

― Ыххы... Ярашко шы эз сет.

― Сё, бат, кöздан, масык? ― юалiс сiя лöга. И Ярашко сразу вежöртiс: раз масыкöн шуис, то бурсö сысянь эн видзчись.

― Нёра сё, ― няр голосöн шыасис Ярашко, бытьтö нöитiс сiйö ыджыт шог. ― Лёкшöрта вот, дзик кочегöсь баля. Кöть бы бисö керны, кынтö менö, и öсöтö. Лёк тресся кутчисьö.

― Черпезьдан, бат, чожа, ― висьталiс Милёв. ― Значит, немлö куйлыны. Чеччы да кер бисö, а то ме сiдз веськöта ― чорзян.

― О-ог вермы-ы, ― нюжвыла, кеймисян голосöн висьталiс старик. ― Кöть юрöс орöт, ог вермы.

― Эн на, бат, чапкась юррезнат, пригодитчасö эшö... Но ежели таой он адззы чачасö ― коккетö шедтала.

― Шедтав, шедтав, ― висьталiс Ярашко. ― Тэ менчим, а нiя ― тэнчит.

Киннэз «нiя» ― этö бура тöдiс Милёв: милиция. Но сiя нылiсь татöн эз пов, сiдз кыдз этчö, лешакыс урманö, милиция оз лок, а ачыс сiя ны дынöт матi оз ветлöт. Сiйöн и висьталiс:

― Кöр нiя тöдасö, что Ярашколiсь коккесö летiсö, ме мöдiк конецын ни лоа. Вежöртiн?

― Нiя, поди, тöдöны ни а...

― Вузалiн, бат? ― лöгöн юалiс Милёв да иньдöтiс фонариклiсь югöрсö старикыс синнэзö. Ярашко сё куйлiс гатш, куньöм синнэзöн, эз и вöрзьöтчы лöг горöтчöмсяняс, но смевжыка ни висьталiс:

― Эн лет адтö. Лешаксö я мый я кытсалан?

― Вузалiн, падла? Мымда мынтiсö?

― Сякöй шовды-бовдынас ог торгуйт. Но тэ сiйö тöд: кырнышыс падинасö дукыс сьöртi адззö... И тэнö адззасö. Менам юрö дона.

― Повзьöтны мöдан? ― Милёв бöра öзтыштiс фонарик и кватитiс стариксö тошокöттяс, пуксьöтiс полать вылас. ― Тэнат калганыт джын грош оз сулав. Кöть и бужда ме ― нем оз сетö. Вежöртiн? ― юалiс пиннес пыр и лэдзис тошсö.

― Бур срок, мыся, ме кузя шедтан, ― сералöмöн ни горöтчис Ярашко. ― Ме öнi абу ни преступник.

― Чукоткася, бат, ылöжык оз мöдöтö. А ме сэтчин вöвлi ни öтчид... Но, кер бисö! Кылiн? ― Милёв бöра öзтыштiс фонариксö и воротöттяс лэдзис стариксö полатёк вывсис, тойыштiс джодж шöрас. ― Кер, масык, бисö и жоргыны лöсьöт. Да чожажык тöдвылат уськöт, кытчö торкин чачатö. Вежöртiн? ― не аслас голосöн горöтiс Милёв и кайис да нюжöтчис полатёк вылас.

Старик эшö луннас тэчис пессö горас, и öнi колiс только би сюйыштны. Дыр я сiйö? Чиркнитiс спичка, югйöвтiс биок, чижа-важа öзйис бантор. Ярашко пуктiс банторсö горас, и биыс сэк жö кутчисис кöс песыс бердö. Керкуокöт паськалiс сотчöм симöт дук.

Горыс тэчöма иззэзiсь и вачкисьö паськыт песласян öр вылö. Да сiйö, пожалуй, и горнас оз туй шуны: джодж шöрас, дзик грядок вылын, иззэзiсь керыштöмась клетка, а клеткаас сотчö пес. Биыс и шонтö, и югдöтö. Конечно, керкуокас тшын. Правда, улын ежели пукалан, синнэз оз курöт.

Кöр горыс жаралiс, Ярашко сы весьтö öшöтiс ведра ― пизьöтны чай. Паськытжык из вылö пуктiс консерва банка и пуксис гор бокас чапкалöм пессэз вылö. Лунтыр куйлiс ― некытшöм дума эз вöв, а часöт кутiс сiйö гажтöм. Мымда ни каитчис, мымда ёрдiс сiйö лунсö, кöда вились öтлаöтiс Милёвкöт, эта сьöлöмтöм морткöт! Колiс сьöвзьыны да мунны сы дынiсь ― сымда бы и вöлi. Да кытчö мунан? Öтiк ньöрöн нiйö ньöралöмась, кыдз йöрись майöггез, и сулавны нылö öтлаын, ордчöн. Öтлаын? Не, не öтлаын. А разь не, то сетны сылö, Милёвлö, только невночка, только сiйö, кöдö эта неделяöн öктiс. Да, только сiйö, а одзза заптöмсö суськыны. Ась ачыс гуддисьö, Ярашко не строшнöй сылö. Ежели тшöктас отсавны ― отсалас, стариклö некытчö тэрмасьны. Сiдз и висьтавны сылö, Милёвлö: вот пö быдöс эстöн, мый шедiс гожумнас, ― и точка.

И колö жö вот этадз петны ― öшис золотöй сöныс. Кöбы эз öш, дак куим луннас нiя Милёвкöт мымда гудралiсö бы! Сэк и, может, эз понды бы ыждавны, рад бы вöлi сылö, мый адззисис.

Но öнi мый ни керан?.. Не, не морт сылöн ёртыс. Ежели и морт, дак сотанасора. Куим лун ни то вöрас олö и уджавны оз уджав, и бöр оз мун, а тшöктö важ заптöмсö сетны. И тöдö эд, гнус, бытьтö адззылiс, что запасыс эм.

Ох, вунöтны бы одззасясö, быдöс зыртыштны сьöлöм вылiсь да юрись, чапкыны сiйö нужникö. Да разь вунöтан важсö, кöр сiя тымусат лёкьяйöн быдмöм? Вундыштан сiйö, орöтан бердсит ― ассит олантö орöтан. Не весь тай шуöны: кытшöм чунь эн курччöвт, а сё зубыт.

Вунöтны бы... Да верман разь ассит олантö вунöтны, ассит туйтö?...

Вöлi сэк няньтöм год ― тшыгсяняс отирыс кулiс, пипу качсянь и туруннэзсянь дундiс да пыктiс. А Ярашко эз тöд тшыгыслiсь кöрсö, сiя няньсянь пыктiс ― госсялiс. А мыля бы не госсявны? Сы киын вöлi сю, вöлi нянь. И ежели сэк уджалiс бы осторожнöя, дак öнöдз бы вöлi бур морт, öнöдз бы важмоз величайтiсö ― Ерофей Кустинович. И некöр бы эз ыргö-горöтö сы вылö Милёв кодьöммес, эз летö аднысö. Ох, сюрис бы сы дынö сэтшöмыс одзжык, дак Ярашко мыччалiс бы сылö масыксö! Кыдзкö кутлiс сiйö горшöттяс öтiк урка ― этö Сибиряс, пукалiкас вöлi, ― дак Ярашко сiдз сюйыштiс сылö сöп увтас, что детинаыт уннялöмöн водiс...

Не весь, конечно, пуксьöтлiсö сэк, не весь. Уна я, етша я, а тонна мымдасö Ярашко вузалiс. Ох и гажöтчис вöлись: юис ― мымда тöрис, сьылiс ― голос быртöдз, неделяöн гортас эз узьлы. А модззес ― быд кресення вильöсь, да сё культурнöйöсь, ласковöйöсь, роч дукаöсь. Да, да, Ярашко эз тöдчы сэк торковöй мыгаэскöт, нинкöм новйиссескöт ― мед ныкöт чуддэс любитчöны! А кыдз пасьтасьлiс, кыдз кöмасьлiс! Дона парочка новйис, чочком шляпа, гöрд йöрнöс да сапоггез дзурки-вирки ― вятскöй хромись вурöмöсь.

А мöдпырсяс нем понда сюрис ― сёйтöм коза юр понда. Пöжис бы юркок, керис бы коза юрсис студень да сёйис сiйö ― и быдöс бы бур вöлi. А сiя орöтiс козаыслiсь юрсö да ваö чапкис. А юржугыс кут да и соседыслö сакö шед. Соседыссянь кылас мортыс, кöдалöн скöтинкаыс öшис. А сэсся...

Пукалö Ярашко джодж шöрас и касьтылö важсö, мунö думанас сiя туй кузя, кöда гортсянь мунны ― öддьöн паськыт, а бöр локны ― стрась векнит да и кузь... И сэтшöм досада кутiс стариктö, что пиннезнас бы гирчыктiс, но оз туй: пиннес одзас только кольччöмась, да и нiя ылынöсь öтамöд дынсянь, дзик стожаррез видз вылын.

Да, вöлi сiдз ― коза понда Сибирьö шедiс. Сэтчин и тöдсасис эта сотана пиянкöт ― Милёвкöт. Öнöдз тöдвылас, кыдз эта аркмис.

Оссис виль прииск. Шедтiсö золотосö неетшаöн ни, а туйес сё эшö эз вöлö ― куш мыр да вужья, няридзöн только ветлöны. Вот öтпыр строй одзын висьталiсö:

― Пондам писькöтны виль туй. Эта ― срочнöй удж. Кин желайтö мунны сэтчин, петö одзлань.

Отирыс сулалiсö стройын и видзöтлiсö виль забор вевдöрö, кытöн вына тöвкöт орсiс колючка. Нiя видзöтiсö бырöм-орласьöм ботинки ныррез вылö, видзöтiсö гажтöм руд кымöрö, но эз видзöтö начальник чужöмö. Сулалiсö, чöлiсö ― не эз несйö, не эз вирскö нырöн, не эз кызыктö кöс кашельöн. Сулалiсö ― эз и вöрзьöтчö, кöть арся свищень пичкис синва.

― Туй керисьлö содтам нянь. Кин бура уджалас ― одзжык гортö петас...

Шутнялö забор вевдöрись проволока, дзуртö сторожевöй вышка. А отирыс чöлö, дзик виньдöм.

Но вот медбöрья рядiсь ёрттэс коласöт кыссис-петiс морт, сувтiс строй одзö. Сы бöрсянь петiсö эшö дас гöгöр морт. Первöйыс вöлi ― Ярашко. Мый петкöтiс сiйö ― нянь содтöм, срок чинтöм али ыджыт желаннё керны пыд вöрö виль туйсö? Натьтö, öтыс и мöдыс, но не куимöтыс, кöть и начальник шуис Ярашкосö сознательнöй мортöн и сэтöн жö пуктiс бригадирö. И виль бригадир бöрйис аслыс туй кериссезöс. Сiя надейтчис, что öнi тюрьмасис петас одзжык и адззылас эшö олансö ― и гуляйтас пöттöдз, и юас зырым петтöдз ― эд сылö вöлись пятьдесят.

Кöдна петiсö стройсис сы бöрсянь, Ярашко аслас бригадаö босьтiс быдöннысö, только öтiкö колис ― винерикö, долонь пасьта чужöмаö, но ыджыт ныраö. Кытшöм ни эттшöм бачелягаыс, чöрс кыза киа-кокаыс, уджалiсь! Кольттез, буди, öктыны нето пистикавны. А сiя, вынтöмыс, кеймисьны пондiс: босьт пö, бригадир, и менö.

Эз бы видзöт виль бригадир няргöмыс вылö, да Микеш, Ярашлöн кудымкарскöй ёрт, корны пондiс:

― Босьт дынат, кöть уввесö чукöртас.

― Увсö чукöртны ― не пу пöрöтны, и асьным вермам, ― пыкис вöлi Ярашко, но Микеш лöгöнмоз висьталiс:

― Эн вий мортсö, бöбöв. Кöдна эз петö, сёясö сiйö. Ярашко полiс кодь Микешыслiсь и кывзiс сiйö. Винерик мортыс дзар керис гаж синнэзöн Микеш вылö, горöтчис:

― Тi, бат, абу рочöсь? Ме эд коми жö. Кöдлаись тi? Микеш öмалiс сiйö:

― Эн боньгы унасö, сыбöрын тöдан, кытiсь...

Сiдз Ярашко тöдсасис Милёвкöт, Коса ю дорись том морткöт. И сэк эз жалейт, что босьтiс дынас: зонкаыт, кöть и вынтöм, да уджалiсь вöлöма. Тöдчис, что гортас весь абу видзöмась.

Ярашко перво видзöтлiс сы вылö кöдзыта, а сыбöрын, кöр казялiс, что зонкалöн кикокыс абу тувдöм, пондiс шонытжыка баитны, а кытöн позяс, мыччывлiс ыджытжык нянь шöрöм. Милёв ― сiдз сiя и тшöктiс асьсö шуны, кöть и вöлi мöдiк фамиллёа, ― некöр спасибо эз висьтав эта понда. И Ярашколö мукöдпырся юрас пыравлiс недобрöй дума: «Абу, натьтö, тэ морт, раз лешаччöй нимöн тэнö шуöны...»

Не весь старайтчис Ярашко, не весь кывлiс öбиднöй кыввез нысянь, кинöс тэрмöтлiс уджын ― сы срокись чинтiсö год да джын. Одзжык лэдзисö и мöдiккесö, кöдна керисö туйсö, но не быдöннысö. Колисö и Милёвöс, кöть и Яршко висьталiс сы понда начальниклö бур кыв. Мый сэтöн керан? Ыджытжык начальник дын мунан? Мун, мун! Ылöжык мунан ― унажык адззан! Сымда адззан ― не öтiк год кежö тырмас.

Петiс Ярашко тюрьмасис, локтiс Кудымкарö, Микеш ордö лун-мöд кежö сувтчис. Микеш шоныта примитiс: бура вердiс, брагаöн пöттöдз юкталiс, размöд гöрд вина босьтлiс, а сыбöрын висьталiс:

― Эм тэнат, Ерофей, инь. Мун-ко сы дынö ― рад лоас. Деревняын тэ кодь киэс ой кыдз колöны... Нимнат да айнимнат пондасö величайтны, только уджав, кыдз ме жö.

Иньнас, может, и эз туй шуны сiйö, кöдакöт тюрьмаöдззас олiс Ярашко, но примитны ― примитас. «И быль колас мунны, ― думайтiс Ярашко. ― Дунька проститас, не лёк сьöлöма сiя. Будичи, мöдiк сайö петiс ни? Но петiс, дак петiс. Вильö адззам. Война бöрсяняс дöваэс кольччисö ― дзик шоныт тулысö пистик: кöда любо, сiйö и босьт».

Мöдiс мунны деревняö, но эз ешты: локтiс Микешлöн свестя и корис отсавны сылö ― лöсьöтны посöдз. Ярашко лöсьöтiс. Сэсся корисö мöдiлаö, куимöтлаö ― эз откажит. Ежели бы мужик корис, а то сё дöваэз, дöваэз ― кыдз откажитан? А сэсся богатöй тöдсаöс, мужикöс, адззис. Деньга сылöн ― кыдз чаг: вердö, юкталö, пасьтöтö ― мыйöн не олан? И ендiс Ярашко этчö дыр кежö, ендiс сэтчöдз, кытчöдз деньгаыс эз видзсьы. А кöр нем лоис сёйны (юöм йылiсь эзö ни думайтö), иньдöтчисö кошшыны чача ― сiдз нiя шуöны золото. Вот сэк и керисö керкуоксö Вурлам ю дорö и гожумбыт миськалiсö чачаа песоксö. Кöть и не öддьöн кыза сюрис, а сёжö павкалiс, и нiя вель тума öктiсö. Арьявнас ёртыс мунiс золотонас Перемö да эз берт. Ярашко видзчисис неделя-мöд (эта коста инмылiс золотöй сöн вылö), и тожö мавтiс кок пыдöссэсö ― ыскöвтiс Сибирьö.

Мымда ни сэксянь чулалiс? Уна ни, квать год ни... И вот бöр локтiс, бöра чача миссьöтiс, бöра вöрас дзебис мымдакö, а невна Перемö нуöтлiс. И сэтчин, Перемас, Милёвöс панталiс. А Ярашко, гöнтöм кепись, кут да и ляпкы сылö: «Чача эм!» Бур кöть сiя, что сразу эг нуöт да дзебöмсö эз кыскы. Адззан, кытшöм лоöма öнi ― жандарм! Ёнмöм сэтчöдз ― синнэс оз тыдалö. Только нырыс сё сы ыжда жö ― рожабаннэс коласö оз тöр. И сё сэтшöм жö сапья ныра ― бат-бат баитö. А мывкыднас чёртлö оз сетчы. И басниыс ворьёлöн. Адззöма тай кыв ― масык. Тюрьмаас сiдз только пöвсина жулик, кöдалiсь быдöнныс повлiсö, баитлiс... Масык пö...

Но и олан!

Ылалiс Ярашко думанас, ывтi кытшöвтiс ассис важ олансö, а мый часöт керны Милёвкöт ― эз вермы решитны. Пышшыны, поди? А мый ― петны часöт жö и мунны эстiсь. А кытчö? Пышшан эта керкуокись, а пармасис он пышшы. Ась сiя и паськыт, но пышшыны некытчö. Может, сетны, ась тупкалö адсö! Дак эд оз пöт сiйöн, оз ― мöдпырся локтас, и куимöтпырся... А кыдз эшö мöдыс бертас? Сiя сразу джагöтас, он сет дак: дзебöмас и сылöн пайыс эм. Ох, урсалiс юрсö пöрись кöин! Мунiс бы сэк Дунькаыс дынö, дак эз бы тöд некытшöм полöм. О-ох!

Биыс горас ыждiс, и пессэс пондiсö лонтiсьны чалöтöмöн. Öнi бисяняс тыдалiс и полатёкыс, кытöн куйлiс Милёв. Узис я сiя, старик эз тöд, но Милёв куйлiс лöня, ровно эз и чушыкты.

Шовкнитiс шоналöм банка, и Милёв повзьöм кань моз чеччöвтiс полатёксис.

― Кин этö? ― гусьöн юалiс сiя.

― Консерваыс, ― сiдз жö гусьöн шуис Ярашко. ― Слабöй жö сьöлöмокыт, видзöта да. Видно, кылö мыйкö... Понлöн кодь эта оланыс: кöть и вольнöй тэ, но голяат ошейник эм.

Милёв сьöвзис пиннес пырйöт, судзöтiс джаджокись кружка, гумыштiс джоджись ведрасис ва да гулькйис-юис ловзисьтöг и водiс бöр.

Старик решитiс сибöтчыны Милёв дынö эшö мöдöрсянь и пондöтiс этö баснисö:

― Кывзы, зонка, мый ме тэныт висьтала. И думайт, ёна думайт менам кыввез вылын... Чапкы, зонка, эттшöм олантö, чапкы: сiя тэнö вöтяс. А тэ эд том эшö ― овны да овны! Мунам деревняö, ме тэныт сэтшöм нывкаöс корася, сэтшöм нывкаöс... И керку керам, вильö, басöкö...

― Виньды, масык, ― сувтöтiс Ярашкосö Милёв, ― а то ме тупкала нянь сёянтö.

И Ярашко дугдiс, казялiс, что быдöс этö весь: Милёвлöн думайтöм мöдiк дело, кöдö öнi сiя некöр оз чапкы, кытчöдз оз понды сiйö керны. Кöть мый ло, а кутчылас сы бердö.

Старик вöрзьöтiс горсис пессэсö, корис Милёвлiсь нянь, и мöдыс сетiс сылö волькыта да топыта кыйöм зобня, пуксис чурка вылö, матöжык би дынас. Сэтöн Милёв кыскис сапогсис пурт, чожа осьтiс консерва банкасö да пондiс кыскавны пуртнас небзьöм чериоккез. Ярашко шöри чегöтiс няньтор, джынсö нюжöтiс ёртыслö. Сэсся сiя чапкис гор вылiсь ведраас кöс туруннэз, и керкуокын паськалiс пöжсьöм турун дук. Сэк жö старик чеччис и ачыс судзöтiс кружкасö, кöдöн неважын юис Милёв, и гумыштiс дзирыт ва, медбы кылöтны сы сорöн чорзьöм няньсö.

Кыдз чöлöмöн ужнайтiсö, сiдз и чöлöмöн кыкнанныс чöвталiсö сапоггез да кайисö полатёкö ― öтыс öт дорас, мöдыс ― мöдöрас. Кöс пессянь керкуокыс чожа шоналiс, и вылын сулалiс кöс жар, сорлассьöм заваритöм турун дукöн.

Ярашко бура мыдзис лунся котрасьöмсянь да кузь думасянь и думайтiс сразу жö онмöссьыны да кöть пыд ой кежас вунöтлыны вачега öма ёртыс йылiсь. Но кыдз бы паокжыка эз лöсьöтчы водны, мымда бы эз бергав, а ланьтны эз вермы. Мыйкö сё не сiдз вöлi турун ольпасьыс: водас гатш ― полать пöввес каджас мöртчöны, дойдöны лопаткаэсö; лöсьöтчас бок вылас узьны ― пельпоныс позялö, юрыс мыдзö лажмыт юрöдзсянь; кыминь, кынöм вылас, сiя некöр эз узьлы ― сiдз сiйö учöтсянь велöтiсö: тшыг ли, пöт ли, а кынöм оз туй нöитны.

Кöть эз узь Ярашко, а син одзас ойбыт вöлi золото: то свиттьöвтас сiя кулак ыжда изöн, то öр пасьтас, кöдаын миськавлiс песоксö, ольсыштсяс кыз шлихöн, кытшöмö некöр сiя эз адззывлы нельки сэтчинiсь, кытöн кöркö шедтывлiс золотосö государство понда.

Югдандорас ни керкуокыс сайкалiс, и старик чеччис да кöмасис и лöсьöтчис пыртны пес, но ылалiс, песысла эз пет. Бöра öдöлейтiс сылiсь дзор юрсö дума: сетны али не сетны? Кыдз сетас ― аслыс нем оз кольччы. А нем оз кольччы ― не лэбтiсьны сэсся öння нятьсис, не лоны мортöн, не сувтöтны аслыс керкусö, кöда йылiсь öнi часто думайтлiс. Сылöн важын ни решитöм: бертны, дак бертны деньгаöн, пырны Дунька керкуокö созлöй хозяинöн да камгыны-керны вит стенаа терем. Только сэтшöммесö радейтöны инькаэс, уважайтöны соседдэс и казялöны начальниккез. А локтан бырöм нинкöма да тойöсь вешьяна ― пондасö видзöтны тэ вылö кыдз умöлик пон вылö. И тэ пондан викыльтны бöжнат кытшöм-нибудь грамотнöй стиляга одзын, пондан уськöтчыны чапкöм кöс коска вылö, жоритны багсялöм кусöккез да шöммöм баланда.

А ежели не сетны? Не сетны кö, то Милёвсянь бурсö нем видзчисьны. Да ― нем. Кöр Милёв лöгасяс, сылö морт юр мургыльтны ― дзик чирöй чепöльтны.

Дак мый жö керны? Сетны?

Кыным год сiя видзчисис бур лунсö, кыным месяц öктiс веж песоксö ― тусёк дын тусёк ― и сетны? Сетны сiйö тусёксö, кöдö адззöм понда бергöтiс тонна мымда песока му и даспöв миськалiс-гывьялiс кöдзыт вурламскöй ваын? Сетны сiйö тусёксö, кöда кузя старик шедтiс быдкодь висянсö, кöда увья адззылiс быдкодь полöмсö?

Оз, батя, некыдз оз туй сетны сэтшöм тусёксö! Некыдз! Оз вермы сiя, Кустин пиян Ярашко, сетны сiйö. Нiя тусёккес, кыдз вир воттез, олöны сы жилаэзын, йитсьöмась сы сьöлöмкöт, и ежели нiйö калькöтны сы сьöлöм бердiсь ― орас сьöлöм етшыс, орас оланыс.

А ежели ковсяс зорöн юр кузя ― сэк оз ор оланыт? Поди, сетны да, и ась мунö вакрамешö. Сёравно дырсö оз жыкруйт, этöн жö и шедас. А кыдз шедас да и сылiсь юрсö сёяс ― сэк мый? Сэк разь лоас бур оланыс? Тожö оз. Беда, беда! Сiдз, тыдалö, и не адззывны пöт да шоныт ойлунсö... Туйыс счастьеыс дынö кузь! А оланыс ― дженыт. Сэтшöм дженыт, что не пыр мортыс ештö локны счастьеыс дынöдз. Ештас я сiя?

Эшö гажтöмжык лоис Ярашколö. И первуись аслас оланын сiя бура, шоныта казьтiс милицияöс и нельки жалейтыштiс, что абу сiя матын. А бура бы лöсялiс, кöр нiя локтiсö этчö, Вурлам дорас. Да кысь сiйö! Медматiсь деревняок дынсянь татчöдз, лыддьы, сто верста! Узьö часöт милицияыс да оз и вöтась, натьтö, что пыд вöрын шогмö умöль дело ― преступленнё.

Парма-мамöй! Уна я тэ пытшкö пыр кежö кольччис отирыс, кыным морт эз бертö горттэзаныс? Дак етша разь эшö сiя тэныт? Лэбтiсь, Парма, рез-чапкав этö керкужугсö öтмöдöрö, а сыкöт öтлаын ― и энö морттэсö, эн лэдз аркмыны лёк вийсяныслö!

Чöлö арся вöрыс, чуш оз кер, только кылö, кыдз тёпöтö-виялö öтöрас вотьва да кинкö кышöтчö полать увтас ― шыр нето лягуша.

Старик адззис гормöччан, соровтыштiс сiйöн шоммесö, и горас югйöвтiс биок. Сэкжö Ярашко чапкис шоммес вылö тöнсянь шулялöм сартас, ушкыштiс небурика ― и сартасыс öзйис. Адззисисö песторрез, и нiйö тожö тэчис горас. Чожа мыйись горыс вадзалiс, потолокас пондiсö орсны би югöроккез. Кöс тшынок лэбтiсис юр вевдöрас, и быдöс керкуокыс тырис палитчöм кыдз дукöн.

Шытöг чеччис Милёв, кöмасис шытöг, öзтiс папироса.

― Но кыдз, масык?

― А сё сiдз жö, ― жагвыв висьталiс Ярашко. ― Невнасö, шуа тай, верми бы öктыны ― пань мымда. Видзчись неделя-мöдсö... Мый шедас ― быдöс тэныт.

― Эн пöрьясь, масык, ― жагвыв, пинь пырйöттяс шуис Милёв. Старик чеччис местасис, уськöтчис пидзöс вылас, пондiс кеймисьны.

― Видзчись, мыся, невнасö... Ачым вая, только висьтав, кытöн олан али кинлö сетны. Вились миськала и вая... А öнi ― мый эм...

― Меным час колö, ылöстöм! ― дрöжитан голосöн висьталiс Милёв. ― Кылан: час колö!

― Но кысь, кысь? ― горöтiс Ярашко. ― Адззö еныс ― абу!

― А ме адзза ― эм! ― чирöстiс Милёв. ― Эм! Эм! Милёв эз и вöрзьöтчы местасис, только пöрччалiс фуфайка киззесö, ― тыдалö, жаралiс горöтöмсяняс. А старик ёрзайтiс пидзöссэз вылас, видзчисис, кöр овсяс ёртыс.

― Чöв жö, зонка, ― ласкова шыасис Ярашко, ― кывзы менö... Вот гарйися и сета быдöс, воть ог коль аслым...

― Тэ пеля али пельтöм, масык? ― юалiс Милёв. ― Час, мыся, колö, час! ― горöтiс не аслас голосöн и мый вын пондiс чужьявны Ярашлö кытчö шедас. Старик уськöтчис кыминь, кутiс юрсö киэзнас и öтпыр эз ойнит, öтпыр эз вöрзьöтчы, нельки мымдакö эз и лолав.

Недыр чужьялiс Милёв, но жалейттöг, зубыта, бытьтö сы одзын вöлi не ловья морт, а резиновöй манекен. А кöр дугдiс, сразу висьталiс пиннес пыр кыдз позьö ятнöйжыка:

― Юала бöрьяись: сетан, он?

Ярашко лэбтыштiс юрсö, нёджжöвтiс морт чужöма зверь вылö, сулис нырсö. Сiя перво эз и вежöрт, мый сэтшöмсö видзö киас беспияныс ― то ли чаг, то ли бедьтор, ― а кöр бöра сувтiс пидзöссэз вылас, и бедьторыс лоис сы синнэз одзын, сразу тöдiс: Милёв кыскöма «перо» ― ыджыт финскöй пурт. Сайкалiс гыркыс, öм пытшкыс косьмис.

Сюрлiс Ярашко зэлыт местаэзас не öтпыр: и юрсö поткöтлiсö, и ордлыэсö чегöтлiсö, но лэчыт пурт увтас эз вöвлы. Бергöтчис сьöлöмыс, мороспань увтас пондiс мыйкö дзескöтны, а кöсичаэс да кымöсыс вамисö дзулля ньылöмöн, дзик сьöкыт груз бöрын. «Вундалас, культун, нем он босьт сылiсь, и турйöн-тарйöн кыскас эстiсь да Вурламас лэдзас», ― думыш керис Ярашко.

― Видзчися минута, масык, ― спокойнöя висьталiс Милёв, ― öтiк минута. Он сет чачасö ― ловтö босьта.

Быдöс вежöртiс Ярашко: не овны сылö, ежели оз сет. И эшö вежöртiс: эта вöрдядьпияныс лöсьöтчö пышшыны граница сайö ― не весь тöн казьмöтлiс эта йылiсь! Тöдчö, что сылö сетiсö кык-куим лун, вот сiя и тэрмасьö адззыны чожажык деньга. А кöр адззас деньгасö ― сыкöт, Милёвкöт, может, этадз жö керасö, кыдз мöдö сiя...

Вежöртiс этö Ярашко, и син одзас пемдiс. Не зубытсянь, не тшыг олöмсянь, не шогсянь, а сысянь, что сiя нем эз вермы керны, медбы дорйыны асьсö. И ачыс эз казяв, кыдз висьталiс:

― Сета, быдöс сета... Ноко, отсав чеччыны, ог вермы... Ордлыэзö, видно, чегисö.

― Уна я? ― сё сiдз жö лöгöн юалiс Милёв. ― Уна я сетан?

― Тырмас тэныт, тырмас, ― гусьöник, бытьтö кинлöкö пель одзас, шуис старик. ― Тэ отсав... садьö воть абу...

― Кытöн сiя? ― рамжыка ни юалiс Милёв.

― Ылын тасянь, ылын... Öтнат он адззы.

Милёв öзтiс фонарик, дыркодь югдöтiс стариксö, видно, мöдiс тöдны, быль я баитö Ярашко али бöбöтчö. А старик мороссö видзöмöн сулалiс пидзöс вылас и баралöм синнэзöн да осьта öмöн видзöтiс вывланьö, кытöн колö лоны Милёв синнэзлö. Сiя эз кунь синнэсö нельки сэк, кöр югытыс усис веськыта сы чужöмö.

Казялiс Милёв: конечно жö, повзьöма Ярашко, нельки тошокыс треситчö. А может, и быль шогалö, садьыс бырис. И ордлыэс вермисö чегны: сапогыс Милёвлöн чорыт и выныс эм.

Кусiс фонарикыс, и старик кылiс, кыдз Милёв сюйыштiс сiйö карманас. Недыр мыйись, кöр синнэс велалiсö ни пемытыс дынö, казялiс и ассис лёк врагсö ― сiйö небурика югдöтiс кусны ни пондöтчöм горби: сiя сё видзис киас финкасö.

― Мыччав, кытöн...

― О-ох, бöра мöдö лихорадкаыс нöитны, ― ружтыштiс Ярашко. ― Мунам нö, а то кöзда этчö, ― горзан голосöн содтiс сiя и вынсьöтчис чеччыны.

Милёв шагньöвтiс сы дынö, шульга кинас кутiс стариксö конувтöттяс, пондiс лэбтыны. Ярашко мый вын клёнгис Милёвлö юр кузяс кирпич ыжда изöн. Милёв веськöтчис, керсис бöр-бöр. Эта коста старик сувтiс дрöжитан коккес вылö и эшö öтпырись жогйыштiс изнас. Милёвлöн чегисö коклидзиммес, и сiя сувтiс перво пидзöс вылас, а сыбöрын тур-бар усис кыминь...

ТÖВЧИК

Сiя гожумö мийö, городiсь уджалiссез, часто ветлывлiм колхозö. Уджавлiм весь, не деньга понда, кыдз керсьö öнi, и дышöтчытöг. Отсавлiм и матiсь и ылiсь деревняэзлö, пантасьлiм быдкодь йöзкöт, кывлiм да адззывлiм берсясö, кöдö öнöдз сайöвтiсö ни уна годдэз. Но öтiкö ны коласiсь, öддьöн нёштöмö, эз вермы и некöр оз вермы пыркöтны менам юрись некытшöм кад.

Паськыт мыс дорын мийö лёдзалiм эшö улькодь турун. Вылынжык керисö турунъюррез, мужик мöртiс сырсаэз. Вöлi жар, кöда мыдзтöтiс кикок и юрвем, но шоччисьны эг пуксьылö, тэрмасим: рытвыв горизонт сайсянь, дзик пашкыртчöм гöна юссез, мыччисисö кокнит кымöроккез. Быдыс тöдiс, что талун радио кöсйöма зэр, сiдзкö, косьмöм турунсö колö чукöртны зородö.

Уджалiм шытöг, только и кылiс кураннэзлöн шаркöтöм да турунлöн кышöтöм, но сэтчö мотоциклöн локтiс бригадир, вайис флягаöн ырöш, и отирыс вöрзьöтчис юан дорö. Ны бöрсянь мунi и ме, и бригадир тöждiсьöмöн шуис меным:

— Куртöмыс уна ни, тэчны бы колö, да некинлö. Поди, отсалан? — И сэк жö, эз и понды видзчисьны, мый шуа ме паныт, висьталiс: — Виласö ме зород дынас коли, зонкаоккес сетасö.

Тэчны, дак тэчны. Ме сiйö уджсö буржыка радейта, нежели куртöмсö.

Босьтi павжунокöс да паськöмок и мунi зород дорö, кытöн мужикыс мöртiс сырсаэз. Сэтöн жö вöлiсö и менам кöдковнуся тöдсаэз — кузькодь вывтыра том мужик Трошкич и том инечка Мая. Нiя мöддэс сьöртi интеллигентнöйжыкöсь да мывкыдажыкöсь, нельки пасьтасьöмась не соседдэс моз — сöстöма, лöсьыта: Трошкичлöн юр вылас идзасовöй шляпа, Маялöн — вежкодь чышьян; кыкнанныс лöз вешьянаöсь, рудкодь йöрнöса-кофтааöсь, кокнитик туфлиаöсь.

Ме думайтi, что нiя соя-вона нето гозъя, но меным шуисö: не пö, нельки абу соседдэз — не öтiк деревняын олöны, а уджалöны öтлаын только гожумнас, сiдз кыдз Мая — бухгалтер.

Быдöс этö ме тöдi пöриськодь инькасянь, кöдö мылякö шуöны то Чирейика, то Кисойика и некöр оз казьтö сылiсь ним. Сiя бура кужис тальны зороддэз, и талун керис сiйö жö уджсö, а Трошкич да Мая пондiсö сюртнявны турунъюррез. Ме видзöтi ны удж вылö и ошки нiйö: — Видзöт, кытшöм молодчинаэз!

— Мый нö не да — молодчинаэз! — серöм пыр шуис Кисойика. — А медбурыс — Маяыс. Мöйму сiйö Анвар донтiс, а таво Трошкич пиас новйöтö. Öнi Анвар бöра Маяыс дынö кыссьö...

Туруныс вöлi кöс, кокнит, а тэчиссес томöсь, и куим часöн мийö лэбтiм бытшöм зород — квать кос. Лэбтiм, сыналiм боккесö, юр вылас öшлiм шаттез, медбы эз вöрöт вевдöрсö тöв, и пондiм шоччисьны. Челядь котöртiсö вадöрö, а мийö, ыджыттэс, пуксим расок бердö, вуджöрö. Миян дынö локтiсö и сюртнясиссес да морт-мöд куртiссес коласiсь.

Эг на ештö буржыка лöсьöтчыны, эз на пондöтчы басни, кыдз мыс дорись лёдзалöм турун вылö уськöтчис лёк тöв да пондiс гардны сiйö, резны öтмöдöрö, павйöтны му вевдöрöт.

— Но, мый эта сэтшöмыс лоö? — повзьыштiс Кисойика и бöр пуктiс юр вылас чöвтöм ни вöлi чышьянсö, зэвжыка домалiс сiйö, кизялiс кофта киззесö. — Инмас кö миян вылö, бура эд куштас!

Эта жö кадö расок дорас вöрзис мöдiк лёк тöв, вачкис ёгöн да бусöн миян синнэзö. Сiя вöлi мöдыс кодь жö вына, но эз чепöссьы бокö, а кыдзкö гардчöмöн нетшкöвтчис кымöрлань, дзик мöдiс лэбтыны, миянöс, да выныс эз тырмы и мунiс öтнас, только тыртiс буснас синнэз.

Кöр ме осьтi синнэзöс, медодз казялi Маяöс, кöда зэв жмитчöмöн сулалiс Трошкич бердын, а сiя бергöтлiс юрсö, дзарьясис, дзик мыйкö кошшис. Ме мöдi ни юавны, мый сiя öштiс, но одзалiс шыасьны Кисойика:

— Улiсь эн кошшы, кымöрас нёджжöвт... Воно уйöны.

Ме лэбтi синнэзöс, адзза: ю весьтас неперыта бергалöны-кайöны вывланьö веж чышьянок да чочком шляпа — бытьтö парочка туман коста гуляйтö, и только юррезныс тыдалöны.

Трошкич чатыртiс юрсö, казялiс шляпасö да чышьянсö, и чужöмыс тувдiс осьта öмöн да баралöм синнэзöн. А нiя, юр вевтöссэз, сё сiдз жö не тэрмасьöмöн кайисö вывлань да небурика дюттясисö руас, дзик видз вылын горадзуль да катшасин, кöднакöт орсöтчö тöлок.

Джын минута дырна мийö видзöтiмö шытöг, сэсся пондiсö баитны мужиккез:

— Космонавттэс сьöрö, видзöт жö, мунöны.

— Не бордаöсь, а лэбалöны.

— Эта мый! Кöр ме целина вылын вöлi, миянлiсь палатка степас нöбöтiс — эг и адззö.

— Афганистанын вöлi баляэзöс керöс вылö чапкöма...

Эна басниэз бöрсянь Мая калькöтчис Трошкич бердiсь, ниртыштiс киэзнас бледöтöм рожабаннэсö, негорöн юалiс:

— Кытöн?

— Ю весьтас, — шуис Трошкич.

Мая дзар керис юр вевдöрö и, кыдз меным кажитчис, гажöн шуис:

— Ой, мый вылына!

Недыр мыйись кинкö горöтчис:

— Мыля нö нылiсь, а не мöдiккезлiсь? Эз я грешитö ойнас, хе-хе!

— Нiя и луннас оз полö, — öдззöтiс баснисö Кисойика. — Анварыс умöль — ме бы сы местын Майкисö ог тöд мый кери... Косялi бы, шöри поткöтi.

— Тэ тупкы öмтö, каргуння, — видiс сiйö мужик. — Асьтö тöд, а мöдiккесö эн адззы! Маяыс кин Анварыслö? Некин!

— Некин, некин! А тэ мый тöдан?.. Но ась, — шуис Кисойика и сьöкыта чеччис. — Уджавны пондам.

Эшö час гöгöр уджалiм да пуксим павжнайтны, сёйыштiм и юим чöскыт ырöш. Челядьыс да томжыккес котöртiсö ю дорö, пöрисьжыккес нюжöтчисö куйлыштны.

Локтiс сьöд, дзик цыган, морт, смекайтчис-керис и юалiс:

— Кытöн Маяыс?

Кузь кыла Кисойика висьталiс:

— Баддяинас тай лэдзчисö, шляпаэзнысö кошшöны.

— Кытшöм шляпаэз?

— Эн разь адззыв, кыдз кымöрас кайисö? Суськисисö эд сё, нем пö абу миян коласын, да грехныс кымöр пасьтас быдöнныслö мыччасис.

— Тупкы öмтö, каргуння! — бöра шуис мужикыс. — Тэнö тожö вöтасö, этадз пондан керны дак.

― Ме некинöс эг бöбöтлы да... Ме правдасö только висьтала. Не сiдз я?.. Скöтинка скöтинка и эм!

Меным эз вöв охота кывзыны эттшöм баснисö и ме чеччи да мунi челядьыс сьöрö. Сэтчин миссьöтi пымалöм коккезöс да пыри баддяинас — кöть сэтöр, мыся, сёйышта. Пыри да инми морт басни вылö. Тöда, кывзiсьны — умöль дело, но мывкыдöс вермис кытшöмкö нёштöм куль, и ме минута етш сулалi сэтöн.

— Мунам татiсь. Этадз ме сэсся ог вермы, — корис инька голос. — Талун жö мунам. Тэ эд кыв сетiн.

— Сетi и ме сiйö видза, но кыдз этö — талун жö мунны? Видзöт, мымда эшö уджным, а ме звеньевöй. Подрядö колхозыскöт пырим — ачыт тöдан. Давай мöд неделя вылас... Весь полан, нем оз ло.

— Сэк ме öтнам... Сойö ордö муна. Тэ тöдан, кытöн сiя олö, адззан менö.

— Сiдз дак сiдз. Рытнас лэдзчöта посадöдз, пуксьöта автобус вылö.

— Часöт жö муна, кытчöдз Кисойикаыс юрсö эз верд. А тэ сыбöрын мамöлiсь коран паськöмсö. Чемоданö тэчöм... Деньга эм сьöрат? Сет руб-мöд.

— Пиджакам кольччис. Часöт вая, видзчись. Этö вöлiсö Трошкич да Мая.

Ме пыри пыдöжык, инми сэтöр вылö и мыйкö дырна чöсмаси сэтöн. Кайтöнням меным пантасис Трошкич: ветлöма ни павжнайтан местаас.

— Ягöдалiн али ваас тульöтчин? — юалiс сiя.

— Мисси да мый да.

— Ваыс шоныт?

— Купайтчыны, дак кöдзытöв жö миян кодьöмыслö.

Сiя мунiс кусттэзас, а ме кайи зород дынö да тупыльтчи турун вылö. Сэтöн куйлiсö ни мужиккес, а Кисойика пукалiс, дзик бабука, пондöтöм зород вылын да ситурунiсь кыйис куим прятя плеть.

Мыдзöмувьям ме, тыдалö, чожа ланьтi и сайми Кисойика чирзöмсянь.

— Ой, ой! Эта нö мый лоö?! — горöтлiс сiя. — Кералас эд, сёравно кералас!.. Кылат, мужиккез? Литовкаöн вöтчö!

Медодз кок йылас лэбтiсис сiя мужикыс, кöда видiс Кисойикасö каргуннянас, дзир-бар керис öтмöдöрö, кватитiс зорпон, бöр чапкис сiйö да босьтiс менчим турун тэчан вилаöс и котöртiс паныт Маялö, кöда сьöрын вöтчис цыган кодь мужикыс. Сiя, кажитчис, эз и тэрмась сiдз, кыдз инькаыс, но ны шöрись коласыс чинiс быд оськöлöн, и литовка вот-вот сапкисяс-мöртчас мортыс сивиö.

— Анвар! Анвар! — горöтiс мужикыс. — Тэ кылан? Эн бöбав, öвсьы! Кылiс я, эз я Анвар этö горöтлöмсö, но сувтчыны эз и думайт, и мужикыс, кöр сы бокöт чывкнитiс Мая, лöсьöтiс вила вожжесö Анварлö паныт. Анвар сувтчис, чöвтiс юр вывсис фуражкасö, пондiс чышкисьны сiйöн, а Мая локтiс миян дынö.

Мийö кокнита ловзисим, лöньсим моз, но сё сулалам да видзöтам Анвар ладорö. А сiя видзчисьтöг вештiс одзсис вила вожжесö, оськöвтiс одзлань и шабаркнитiс литовканас мужикыслiсь голясö.

— Кералiс эд, мужиккез, кералiс! — бöб сорöн ыкöстiс Кисойика да гуж ыскöвтiс зород вывсис, дöвкис Маялö, кöда стожар бердö кутчисьöмöн чушыктiс, дзик пöдöм баля;

— Тэнчит эд, швалина, колiс орöтны юртö, а не сылiсь!.. Ой, ой! Мый öнi лоас, мый лоас?!

Анвар, кöр казялiс, что кералiс морт юр, шентiс литовкасö да уськöтчис ю ладорö, но казялiс Трошкичöс и чепöссис миянлань. Эстöн чижьялiс Кисойика, вöлi отир, и мортвийись, тыдалö, повзис, öшис, эз тöд кытчö воштiсьны да пондiс дзарьясьны, дзик кытшö сюрöм пон.

— Но мый тэ керин, кульпель, мый керин? — герьясис Кисойика, керöс увтö оськалiкö. — Сылiсь юрсö босьтiн да и ассит эд тожö, а швалинаыт дзонь кольччис! Ой, ой, ой!

Эна кыввес, может, сидзисö Анвар юрö, и сiя кыскис писис четушка, осьтiс пробкасö и пондiс юны голюк понсис.

— Вот гадина — сё абу пöтöма, сё тыткö! — кинкö видчис мекöт ордчöн мунiкö

Ректiс четушкасö, турьялöмöн керис кык-куим шаг и бряк пöрис, бытьтö крюкалiсö коккесö. Сы дынö котöртiс Кисойика, пондылiс пуксьöтны сiйö, но эз вермы и пондiс горöтлыны:

— Отсалö жö, мужиккез, отсалö!

Отирыс вöлi мöдлаас, некин сiйö эз кывзы, и Кисойика босьтiс пустöй четушкасö да мунiс йöзыс дынö.

— Мужиккез, эз я отравитчы? — посудасö нюкайтiкö баитiс Кисойика. — Мыйкö дуст дукаö юöма. Эта мыйкö лоö, а? Кытöн бригадирыс, мыйкö эд колö керны!...

Сiйö некин эз кывзы, быдöнныс старайтчисö отсавны кералöм мужикыслö, и Кисойика иньдöтчис отирыслань. Мунiкас казялiс чапкöм литовка, босьтiс сiйö да эшö öддьöнжык пондiс герьявны:

— Ой, ой! Ой ни да ой тай! Сiя эд менчим косаöс вирöсьтöма! Да мыля нö менчим босьтам?

Öтiк мужик мырддис сылiсь литовкасö, зыкнитiс:

— Эн бöрд, косаыт понда, кöр ордчöн покойник куйлö!

Вит-квать минутаöн видз вылас чукöртчис джын бригадаыс. Локтiс и медик, но отсавны эз ни позь некöдалö.

Ойзöм, горзöм да видчöм сорлассис тракторнöй шумкöт.

Кöин моз унньöвтiс пöрись пон, но сылiсь горзöмсö орöтiс вына гымыштöм, и чожа мыйись усисö медодзза зэр воттез. Ме дзарнитi вывланьö и казялi: видз весьтас öшалiс сьöд кымöр.

Мöдöдз гымыштöм бöрын отирыс чукöрöн-чукöрöн иньдöтчис деревнялань, кöдöрö тэрмасис трактор. Сы телегаын куйлiсö кык кулöм морт, а одзись борт бердын — то ли кöрталöм, то ли оропнас сюйыштöм джоджын аркмöм осьтаö — сулалiс кузь оропа вирöсьмöм литовка...

Костi чапкöм зород бокын сулалiсö Мая да Трошкич. Сулалiсö öтамöд бердö жмитчöмöн и, кыдз кажитчис меным, нем эз адззö ас гöгöрсиныс ― не отирсö, не сьöд турунъюра кымöрсö, кöдаын гудыртiс лёк вын, ни рытсялан лунсö…

ГАЖА БИБЛИЯ

Дата добавления: 2015-11-16