Пятницаö Андрей Никитичлöн лекцияэс етша, сiя гортас локтiс одз и пыртöнняс жö и босьтiс почта. Письмоэз сылö вовлöны шоча, и эта дынö мортыт велалiс ни да оз и видзчись. И вдруг сразу куим письмо.
«Кинсянь ноко и кытшöм юöр вайöны?» — пырикас думайтiс сiя да порогувтас и пондiс видзöтны. Первöйыс, печатнöй букваэза адреснас, — солдатскöй. Дрöгнитiс сьöлöмыс, жарöн палитiс юрсö и вывтырсö. «Не сiя ли лоис, мый йылiсь гижлiс?» Осьтiс конвертсö, лякасис синнэзнас басöк строчкаэз бердö, кöдна вöлiсö улын: «Спасибо Вам, дорогой Андрей Никитич, за отличное воспитание сына...»
«Бур... Быдöс бур, — кокнитжыка ни ловзисис. — Ошкöны Яшка понда: бытшöм морт, повтöм воин».
Мöдыс — техникумись, кытöн велöтчö Ромка, учöтжык зоныс. Дженытик письмо, кытшöмöсь гижлö и ачыс Верепов: лоас собраннё, корам вовлыны... Сьöлöмнас кылiс: эстöн тожö быдöс ладно, позяс и не мунны, а только гижны завучлö письмо. Думайтыштiс небурика: «Таво, может, гожум кежас гортö корны, не лэдзны стройотрядас?.. А мыля бы не лэдзны? Ась, пожалуй, ветлö. Сё жö гортся унажык адззылас и деньгаок шедтас».
Куимöтсö, Яшкасянь, лыддьöтiс пуксöн ни, не тэрмасьöмöн. Мукöд кыв вылас сувтчылiс, дырöнкодь думайтiс, ыш лолалiс, но сёравно зоныс надз гижöмись етша вежöртiс. Арсяняс öтпыр гижлiс, что гортiсь ыстöны «мöдлапöлö», и сэк айыс бура тöждiсис да жалейтiс зонкасö сэтчöдз, кытчöдз эз лок мöдiк письмо: ола пö виль местаын, ола бура, гажöна и сiдз одзлань, А вот öнi, шуö, оланыс мыччалiс даки ассис гыжжесö да ковпиннесö, и кытчöдз пö ветлöтны оз тшöктö — веськöтöны коксö, но повны немись: Нина тёткаыслöн гублянскöй петухыс кокыштö зубытжыка, пыдынжыка.
«Сiдзкö, сё жö вöлi сэтчин, кысянь не пыр бертлöны, и, тыдалö, ранитöм...» Но бöра загадка: адресыс сiя жö, важыс, а эд госпиталь ны дынын абу, ежели частьныс сулалö учöтик станцияын. Али былись только кокыс небурика доймö — бытшкис али вундыштiс кытчöкö?
Видзöтiс командирскöй письмосö — сэтчинсянь жö локтöма, но гижöма кык неделяöн одзжык, кöр Яшкаыс, натьтö, вöлi эшö мöдлапöлас и панталiс нiйö бандаэсö, кöднö Америка отсöтöн, кыдз висьталöны газетаэз, ысталö Пакистан.
Арнас, кöр Андрей Никитич лыддьöтiс зоныссянь медодзза «умнöй» письмосö, завидуйтiс зонкаыс судьбалö: олö сьöкыт, ыджыт оланöн, олö Родина интерессэзöн, тыртö мортлiсь-гражданинлiсь долг. И часöт ымйöвтiс сыын айлöн гордость, кöда веськöтö кöстiсьöм кос, томтö да буртö мортсö, содтö сылö вын, паськöтö дон.
Чеччис креслоись, ванйöв паськöтiс öшынсö. Керкуас чепöссис льöмпу цветлöн дук, бытьтö öтöрсяняс чапкисö жырас льöмпулiсь дзоридза ув. Улица сайись кварталлэзын, кытöн сулалiсö пуовöй керкуэз, тыдалiсö чочкоммöм льöмпуэз.
Керку гöгöрас уялöны вожа бöжа чикиссез — нiя помечöн керöны аслыныс поззэз. А тёсовöй склад пельöсын, столб йылын, кытöн слега бокас шогмöма куим чунь пасьта куш места, лажмытик дора позокын — нельки бöжыс вевдöрын — пукалö гуткыйись, рудыник да гусьыник, воробейся учöтжык, но ыджыт сина каёк. Крыша вылын ошшасьö гöрд сапожоккезнас да сизьньöвтан паськöмнас вургись дудi. И чикись, и гуткыйись, и дудi — быдöнныс думайтöны öнi поз йылiсь, семья йылiсь.
«Колö звонитны Олялö, висьтавны, кытшöм сылöн йöз зоныс...»
Городыскöт Гублян йитöм автоматöн и оз ков öштыны уна кад да мыла, медбы звонитны сельпоö: раз-раз чуньнат — и баит, кытчöдз кылыт оз мыдз.
Андрей Никитич öктiс Гублянлiсь номерсö, ласков кыввез лöсьöтчис козьнавны, а сiйö одзалiсö этöн делонас:
— Здравствуй, Андрюша!
Казялiс жö, что ровно бы не Олявка здоровайтчö, но эз ни вермы вежны лöсьöтöм зарядсö и лыйис, мый эм.
— Олюша, шондi менам!..
— Эта мöдiк шондi — Ника. Тэ кылан, Андрюша?
— Кысянь тэ?
— Перемсянь. Куим лун татöн лоа... Андрюша, тэ меным öддьöн-öддьöн колан. Сiдз колан — оз позь висьтавны некытшöм кылöн. Кеймися: вовлы, пожалуйста. Талун жö лок. Кылан?
— Мый лоис?
— Локтан, быдöс висьтала.
— Ашын уджавны меным.
— Корсьы. Ме тай вовлывлi тэ дынö. Ой не ой, мороз не мороз, а коран — юрöс пиньöвта, да локта... Видзчися, Андрюша! Тэсянь... эта локтöмсянь мортлöн олан зависитö. Мортлöн олан!.. Мийö гуманнöй отир и давай сэтшöмöн и кольччамö...
И бытьтö не Андрей Никитичыс думайтiс, а кинкö мöдiк сы пытшкын пукалiс и шушкис ответ: «Да, да, сэтшöмöн, пыр кеж сэтшöмöн кольччам, пыр кеж!» И быдöс, мый часöт вöлi одзас, сайöвтiс аслас гордöй мичöн Вероника да шоныта-шоныта чушыктiс Верепов пель одзын — вот-вот шушукнитас гажа кыв, и небыт, музыкальнöй чуннес павкöтчасö сы чужöм бердö, и сiя павкöтчöмыс кодззöтас пессян ловсö.
— Кылан, Андрюша: видзчися!
— Кытöн олан?
— Важ квартираам.
Перемö мунны могыс вöлi. И тöдiс, что завуч керас сiдз, кыдз тшöктас Андрей Никитич, и кöсйисис. А раз кöсйисис, сэсся сiйö некин оз сувтöт и нем оз вермы видзны. Эта — сылöн закон, а закон сыын пукалö крепытжыка, нежели муын мыр.
Юöртiс Олявкалö, что мунö командировкаö. Сэсся звонитiс завучлö, и завуч вежис сылiсь уроккесö. А сыбöрын сюйыштiс портфельö лимонад — луныс жар, пондас юöтны — и вот сiя, вольнöй кай, пукалö перемскöй автобусын да кывзö анекдоттэз.
Пöриськодь ни, дзормöм уса, но эшö волькыт чужöмбана интеллигентнöй мужик висьтасьö:
— Лэбзьö кытшöмкö ыджыт кай — шевк да шевк, шевк да шевк, — мужик мыччалö киэзнас, кыдз кайыс борддэзнас павйöтö. — Жагöник лэбзьö-бергалö, сё вылöжык и вылöжык кайö. Пантасьö воробей: «Лэбзян, дядя?» — чивзö. «Лэбзя, кыдз адззан», — шуö ыджытыс. «Ме тэкöт жö», — шуö воробей. «Пожалста, небоыс паськыт». Ыджытыс круг да круг, сё вылöжык да вылöжык. Учöтыс — сы бöрсянь... Час лэбзьöны, кыкö, куимö — не шöр, не дор! «Тэ кытчö лэбзян?» — юалö воробей. Ыджытыс шуö: «А сэтчин, кытчö борддэзö нуöтöны!..»
Мöдiк, натьтö, строителлез коласiсь, висьтасьö склеротиккез йылiсь, кöдна туалетö ветлiкö вунöтöны кушöтны, кыт колö, нето кузь командировка бöрсянь Настасья нима иньнысö шувлöны Ленушаöн.
Бедя старик вильöтiс протезнöй пиннесö да потласьöм лöз тырппесö, чöвтiс фуражка, юалiс:
— Меным позяс я?.. Учöликö то видза тöдвылам, дженыликö.
— Чаль кузяö?
— Серöв ыждочкиö.
— Резьöт, только эн быздöт!
— Менö клерозыт ышшö шöшнадцатöй годö чепöльтiс, кöть петнадцеть тожно тырис и вешшанö эз на вöв... Надумав, челядь, инькаасьны. Но, вадно... Тятькоö вешшан вурöтiс. Ме сiйö меряйтi,сикöджас гасник сюйыштi да градкаввö öшöтi. Но, вадно... Ашынас чеччи, отопкиэз чальподöн кöмави, кузь шабур кышыштi — и айда-пошов вöр сайö корасьны. Пошов öтнам — свакасö немöн медавны... А сiя кульпиыт, кöдö корася бы, не воньтöм нинкöма вöвöм. Мыйöн сiйö босьтан, мыйöн бöбöтан ас саят? Но, вадно, мыйкö керам, мыся... Пыри керкуö, гырка джек джодж шöрас, матича увтас, сувтöтi, пукси. Сiя — паныт, веськыт вабичас. Но, вадно... Воктi, мыся, чебер, коравны тэнö. А мыля нö пö подöн? Вöвтöмыс сайö пö ог мун!.. Мыся, няньным таво уна, вартöны, дак кыкнансö доддявисö. А мыля пö отопкиа? Мыся, ме стрась уджависёвöй, кöзяйствоö паськыт, тэрмася быдваö да некöр нямöтасьны-вонясьны... Но, вадно... Ышшö пö мыйöн ошшасян?.. А то этöн мыся, — шарк паськöтi шабур поваэзöс да виль вешшанöс мöдi мыччавны, — и кынми местаам: вешшанöс эд эг кöмав! Рожа кулись тэ, мыся, рожа кулись! И ыбöсö! А сiя шуö: «Эн пышшы, зонка! Адзза: кöзяйствоыт добрöй, пета тэ сайö!» — и сетö знамьё...* Адззан, мый паршивöй клерозыт панiс, чомору!..
— Но и шульыштiн, — ошкис стариксö строитель.
— Ог шулясь, быльвö баита. Öн кö верит, дак ассис чеберысвись юав: то сiя, кульпи, одзам пукавö... Сторублёвöй шаляыс...
Былись, одзас пукалiс пуховöй шаля старуха: öшыннэс осьтаöсь, автобусас ыркйö тöв, и сылö, пöрисьыслö, кöдзыт.
— А вот мекöт солдат служитiс, — öдззöтчис эшö öтiк мужик да пондiс висьтасьны неинтереснöй история...
Джын туйсö мунiсö и некин öмсö эз осьтлы, а кыдз пондöтiс öтiк — не сувтöтны сэсся, быдöнныслö мыйкö охота висьтавны.
А Вереповлöн юрсис эз пет одзза анекдотыс: «Тэ кытчö лэбзян?» «А сэтчин, кытчö борддэзö нуöтöны!» А сiя, Вереповыс, кытчö лэбзьö? Сэтчин я борддэс нöбöтöны, кытчö колiс бы? Эз я нiя сорасьö, эз я öштö туйсö? Да и позьö я борддэс вылö надейтчыны? Кылö сiя, что сылöн борддэс унажыксö тöв ньылат нöбöтöны, а этiя — умöль: вермасö люкöтны да сiдз, что юрвемыт зэгнитчас нето сюрги коскаыт тресь потас.
Дак сэтчинiсь я сiя чöскыт олансö кошшö? Может, как раз сы дынсянь лэбзьö? Овлö тай сiдз: горш мöс пелитчö чужöй йöрö, думайтö, что сэтчин литурун да сизьюр быдмö, а босьтас öмас — вöвкудзтурун...
Этшöм думаэс Андрей Никитичöс эз на öдöлейтлö. Эз думайтлы, мый вермас лоны, ежели сетны волясö вожжиэзтöм борддэзлö. Одзжык, томувьяс, кажитчис, что мортыс должен овны балямош правило сьöртi: босьт нектарсö быдлаись, кытöн эм, кытöн кокнитжыка шедö, кытiсь верман судзöтны. И быд цветок дынö, кöда усьлiс син вылас, старайтчывлiс сибöтчыны матöжык... Басöкжыккес сылöн вöлiсö куим цветок: Вероника — тулысся дзоридзок, Оля — гожся, и Женя — арьявся, кöдакöт олiс уна год, кöда козьналiс сылö кык зонöс.
Что нiя басöк цветоккез, Верепов ныын абу сорасьöма. Что нiя мöдiккезся мыйöнкö буржыкöсь, умнöйжыкöсь, сöстöмжыкöсь, честнöйжыкöсь, сэк этö эз вермы висьтавны, сiдз кыдз öтсö, и мöдсö, и куимöтсö радейтiс, кыдз лыддис сэк, дзирыта, а дзирыт радейтöм — этö би: сылöн не син, не мывкыд абу.
Андрей Никитичлöн öнi и синнэс оссьöны, и мывкыдыс содö, и юрыс мöднёж вежöртö. Сiя нельки кыкнаннысö öтдруг адззö. Вот нiя ордчöн сулалöны — Ника да Оля. Öтыс ыджытжык, вöснитжык, моднöйжык; мöдыс гöгрöсажык, тöвзьöм чужöма, простöйжык. Шаньга да тупöсь. Öтыс виажык да рöмажык, мöдыс постнöйжык да бледжык, но кыкнанныс чöскытöсь, дзирытöсь, сiдз и тшöктöны: курччöвт, курччöвт менö! И кыкнанныс ассяма юраöсь, ассяма мичаöсь, ассяма синтуяöсь...
«Гусьöн, бöбöтчöмöн муна гортсим, — стыдкодь лоис Андрей Никитичлö. — А мыйöн Никаыс буржык, мыйöн донажык? Поди, сiйöн, что грамотнöйжык? Что тожö велöтiсь, кыдз и ме? Может, сiйöн донажык, что киэс небытжыкöсь, ласковöйжыкöсь? Али сiйöн, что öддьöн волькыта кужö висьтасьны аслас любитöм йылiсь и письмоэзын, и баитiкö?»
Тырис эна думаэзöн юр вевдöрöдззас, бытьтö и не сы юрын нiя шуксьöны, а сы гöгöр, и мортыт вöйис ны пытшкö и, кажитчö, некöр ни оз вермы петны, мездöтчыны ны изын увтiсь нельки йöз отсöтöн.
Карагайын автобус сувтчис, пассажиррес рознитчисö öтмöдöрö. Андрей Никитич петiс жö, но некытчö эз мун, а пондiс гöгравны автобуссö. Быдöс джын чассö, мый дырна сёйисö да шоччисисö отирыс, шляндiс зэрöн гывйыштöм песока мусö. И кöр станциясянь локтiс да недырик кежö сувтчыштiс кудымкарскöй автобус, Андрей Никитич босьтiс портфельсö, висьталiс стариклö, медбы сiйö эз кошшö, и пырис кудымкарскöяс. Но сэтчö казьмöтчис сылöн законыс, кöдö эшö некöр, мымда тöдö, эз дзуглы. «Кыдз нö ме сiдз?.. Эд кыв сетi: локта!»
И чеччис, медбы бöр пуксьыны мöдас, а сiя только бöрнас зэгнитiс да мигнитiс, бытьтö серöмтчис, гöрд биоккезöн. «Ковсяс öнi станцияöдз, а сыбöрын — поездöн...»
Видзчисис мыла быртöдз, но автобус эз лок, а грузовöйес эз босьтö.
Карагай вылö рытыс вожасис-пуксис кöдзыт руöн да лöзöтöм кымöрöн и казявтöг вашöтiс, бытьтö ньылыштiс, льöмпу цветлiсь дуксö, кöр öтлаын ой тöвкöт посад вылö койыштiс поснитик зэрлöн бусок. Ковсис кыскыны портфелись плащ да дзебсисьны крыша увтö. Но тöвсяняс да зэрсяняс и сэтöн эз вöв йöрыс, и мужиктö бöра пондiс чувйыны кудымкарскöй бесыс (не сiя, кöда велöтö бöбöтчыны, а кöда тшöктö вежöртчыны): «Берт, аридлöн пöттöм сьöлöм, эн йöкты эстöн! Тэ не студент, а велöтiсь, солдатскöй ай...» Мöдiк бес зiлис: «Тэ — мужик, тэ не рукледь, и эн дзуг законтö — мун Перемö, и лоас тэныт сы понда награда: дыр кежö бурмöтан сьöлöмтö!»
Быдöс машинаэс мунiсö мöдöрö, не сы туй ньылат, дзугисö сылiсь законсö, и Андрей Никитич думанас бöра пондiс пöлiньтчыны горт ладорас, кöдöрын не етшажык шонытыс да долытыс. «Видзчися эшö вит минута и, кыдз оз ло машинаыс, ыскöвта Кудымкарö». Но сэтчö и локтiс «КамАЗ», сувтчис, и Верепов мунiс станцияö. Мунiкас пыр думайтiс, кыдз шедны Перемö, ежели сёрмас электричка вылö. Оз кö пуксьöт скорöй, ковсяс сунасьны сэтчин асъяойöдз да туктыны кузь думаэзсянь.
Но вот и станция. Вокзал пытшкын — пустöй чорыт лабиччез. Дук, пемыт, биыс потолок бердас. Этатшöмас — не сулавны, не пукавны. А öтöрас — тöв да зэр. Электричка мунöма ни, а скорöй лоас нёль час бöртi.
Гажа рыток — нем он шу!
Пустöй жыр, пустöй ой, пустöй думаэз...
Пустöйöсь я?
«Мый жö сiя мекöт керö? — думайтö Андрей Никитич Вероника йылiсь. — А висьтав, пожалуйста, мыля — сiя керö, ежели эстöн ойсö пыка ме? Ассим, ассим колö юавны: мый тэ керан, Верепов? Юавны: мый тэ сыись адззин сэтшöмсö, медбы чапкыны горттö, уджтö и коза баранок моз, юртö чатыртöмöн, гöнитны тартарарыö? Кин сiя, мый сiя? Инька кыдз инька. Котöрок шуанöн — шöмашыдыс быдлаын öткодь, буди кинлöнкö шöмажык да солажык, а кинлöнкö шöмтöмжык да дубжык...»
А поездыс сё абу. И дума — оз орлы: каттисьö ас гöгöрас, Вероника гöгöр, Олявка гöгöр. Каттисьö час, кык час, куим час. Пукалас, пукалас, сыбöрын чеччас да кресталöв-керас залсö, сэсся ыбöс саяс петалас, пырас да бöр пуксяс, медбы вились нырыштны отир паськöмöн волькöтöм лабичсö.
Сiдз и пыд ойыс вöтiс.
Голлисö-мунiсö поезддэз. Мукöдыс горöн, баксöмöн моз, шыасьлiсö, бытьтö здоровайтчисö шоччисян эшелоннэскöт и содтылiсö ассиныс чожнысö. Мукöдыс сувтчывлiсö, лöньсьывлiсö, и станция мыйкö дырна чöлiс, онмöссьывлiс некыз онöн, и сэк кылiс, кыдз асфальтнöй перронсö миссьöтö зэр-ичмонь и кыдз рельссэс кузя пöв кок вылас чеччалö зэрок-челядёк.
Грыма-грума нетшкöвтчас-вöрзьöтчас поезд, саймöтас станциясö, ойсö, матiсь расоккесö да ыббесö, и чуть тöдчöмöн, ружтöмöн да повзьöтчöмöн, сьöкыта иньдöтчö мыччалöм-оссьöм туй кузя.
«Инька кыдз инька, — береститiс думанас одзза баснисö. — А ме кин? Кин ме? Ме — мужик. Мужик кыдз мужик. И менам эм инь. И мöдiккезся не умöльжык. Дак мый нö эшö колö?»
И эта минутаö сьöлöмöдззас сидзисö Дорохинлöн кыввес: «Тшыкöтiсö миянöс этöн материальнöй заинтересованностьнас. Вужжезöдз тшыкöтiсö. Быль ме шуа. Некытшöм стыд эз ло, некытшöм честь ог тöдö. Кöда и горшви быдöсöн пöт, а сё — вай, вай, вай! Не сысянь я и юöм-гуляйтöмыс ыждö?»
Асъяв ладорас пондiс чукöртчыны отир. Локтiсö öтiкöн-кыкöн, вамöмöсь, онзыляöсь да лöгöсь. Зонтиктöммес чöвтлiсö плащщез, чышьяннэз, фуражкаэз, треситiсö ны вылiсь зэр васö и пуксьывлiсö торйöн, ылöжык öтамöд дынсянь: öтiккезлö охота сунасьны, мöдiккезлö — анализируйтны кольöм чассэсö, куимöттэзлö — видзöтны ашыння лунсö, лöсьöтчыны сы кежö.
Тöння буса лунсянь да узьтöм ойсянь Андрей Никитичлiсь пондiс бытшкыны синнэсö. Колiс бы ветлыны бачок дынöдз и гывйыштны синнэсö, но дыш петiс лэбтiсьны. «Чышка чышьянокöн и чулалас». Но дыш вöлi и чуньнас вöрзьöтны, нетолишто лэбтыны ки да сюйыштны сiйö карманö, и Андрей Никитич кунис синнэсö.
Чожа мыйись оссис касса, отирыс небисö билеттэз, томжыккес пондiсö лöсьöтчыны чукöроккезö, тöдсасисö, юасисö-висьтасисö, сералiсö. Торья баитöмыс, шушкöмыс, сералöмыс пöртчис öтласа неятнöй шумокö.
Сыбöрын радио висьталiс, что локтö электричка, и отирыс чукöртчис öтöрись ыбöс дынö, медбы эшö минута ли, кыкö ли сулыштны крыша увтын, етшажык вадiсьны.
Кылiс этö и Андрей Никитич, недыр кежö осьтлiс синнэсö, лэбтылiс юрсö, дзимлялiс кымöс вылас лэдзчисьöм юрсисö.
Сы дынö кежалiс старушка, тэрмöтiс:
— Вöрöтчы, том морт, часöт локтас, а тэ билеттö эн на неб.
— Эг на, эг на...
Стрась неохота вöлi, но чеччис, вöрöтыштiс тувдöм пельпоннэзнас, сайкалöм коккезнас, волькöтiс нöитчöм плащсö да пуксис важ местаас, нюжöтiс коккесö, жöв керсис.
Негорöн, эшö ылын станция саяс, дженытика тутöстiс электровоз, и пассажиррезлöн чукöр, дзик зэрны пондöтчикö вотьва, вотьыштiс-уськöтчис перрон вылö.
Верепов бöра кольччис öтнас. Дзир öтнас эта пустöй залын, и сылö лоис гажтöм, кутiс полöм, бытьтö кольччис олантöм пустыняын.
Дата добавления: 2015-11-16; просмотров: 58 | Нарушение авторских прав
| <== предыдущая страница | | | следующая страница ==> |
| ТАЛУН, АШЫН И ПЫР | | | ВИДЗÖТ, КЫТI МУННЫ |