Сэдьхэл баянтай Семён Цыдыпович

гэжэ бүхы Хэжэнгээрхидэй хэлэхэ байhандань гайханагүйб. Юуб гэхэдэ, «биб» гэжэ бэеэ hайрхадаггүй, урма зоригтой, урагшаа hанаатай Семен Цыдыпович Цыреторов «Буян хэшэг» гэhэн номинацяар урдань бэшэhэн статьягайм түлөө шүүхэл ёhоороо шүүгээ. Юундэб гэхэдэ, дэлхэйн эгээл hайн, сэн-тэй мэргэжэл – врач болохоо шиидэhэн, олон шэнэ докторнуу-дай, тэрэ тоодо, республикын габьяата врач, минии аха – Валерий Гончикович Дымбрыловэй Шэтын мединститут дүүргээд ерэхэдэ ехэ дэмжэhэн, үргэhэн С.Ц.Цыреторов Хэжэнгын аймагай ахамад врачаар амжалтатай ажаллаа. Электромонтёр байhан Цыретор Цыдыпович эсэгынгээ, шарайд угтай Ешима Очировна эхынгээ нэрэ нэрлүүлээ, Ким, Самбу дүүнэрээ дэмжэжэ, үргэн харгыда гаргаа.

1959 ондо Эрхүүгэй мединститут hурахаа ороhон, Ленинэй орденто Жана багшын hурагша байhан Семён хүбүүн суг hураhан суута поэт Бато Базароной басаган, географиин бэрхэ багша Антонина Батоевнатай халуун дуранай охин дундаа ниилэжэ, айл бyлэ болоhон. 1965 ондо Шэтын багшанарай институт дүүргэhэн Антонина Батоевна бидэндэ географи заа-жа, дэлхэйн hайхан оронуудтай танилсуулhан юм. Географида дуратай бидэ хоёрто – Бэлигтэ эхирни, би гээд дэлхэйн олон гүрэнүүдые хараха зол тудалдаа: Германи, Чехословаки, Монгол, Америкэ, Турци, Итали, бусад республикануудаар ябааб, Антонина Батоевнагайнгаа хөөрөө ажабайдалдаа хаража сэгнээб, баясааб.

1965 ондо Эрхүүгэй институт дүүргэhэн Семен Цыдыпович хүнгэн бэшэ хирургын ажал шэлэжэ, түрүүн Хоридо, удаань түрэл Хэжэнгэдээ бэрхээр ажаллажа, ахамад врач болоо. Г.И. Турнирай нэрэмжэтэ Ленинградай НИИ-дэ ординатурада hуража, травматологиин болон ортопедиин Киевэй НИИ-дэ кандидатска диссертацияа хамгаалба, тиин Хэжэнгэдээ анха түрүүшын медицинын кандидат болоhон алдартай Семён Цыдыпович тоонто нютагаа үргэбэ, 10 жэлдэ больницынгаа ажал эдэбхижүүлбэ:шэнэ поликлиникэ, хүүгэдэй терапевтическэ таhаг, эхэнэрнүүдэй консультаци, шyдэ эмнэлгын поликлиникэ нээгээ, хүдөөгэй нютагуудай фельд-шерско-акушерскэ пунктнуудта ехэ туhа хүргэбэ. Харин 1977 ондо Буряад Республикын габьяата врач болоhон С.Ц. Цыреторов Д. Банзаровай нэрэмжэтэ БГПИ-дэ медицинын факультет толгойлжо, бэрхэ мэргэжэлтэдые hурган гаргаа, сагаалганаа, хэлэ, бэшэгээ, соёлоо үргэхэ тухай олон hонин статьянуудые «Yнэндэмнай» хэблээ.

Ажалдаа харюусалгатайгаар хандадаг Семён Цыдыпович түрүүшын зарлалай Арадай Хуралай депутадаар, hүүлдэнь Хэжэнгын аймагай гулваагаар hунгагдажа, түрэл нютагаа үргөө, нютагаархидтаа туhалаа.

2006 ондо «Буряадай түрүү хүнүүд» гэhэн конкурсдомнай илаhан Семён Цыдыпович манай гэр бүлэнүүдэй баяр нааданда, түрэ хуримуудта, хадаг табилгада ходол худын түрүү болодог hэн. Эдэбхи үүсхэл ехэтэй С.Ц. Цыреторов олон жэлдэ Улаан-Yдэдэ ажаhуудаг нюта-гаархидаймнай нэгэдэл бэрхээр ударидаа, ехэ hонин уулзалга, үдэшэнүүдые үнгэргэhэн габьяатай. Семен Цыдыпович ехэ баян сэдьхэлтэй, «биб» гэжэ ехэрхэдэггүй, дорюун, хүхюун зантай, ходол дүүрэн эдеэ хоолтой, гэр бүлэтэй. Марина, Дарима басагадынь, табан зээнэрынь эхэ, эсэгэеэ ходол баясуулдаг, урмашуулдаг байна.

Республикымнай хүгжэлтэдэ нилээхэн хубитаяа оруулhан ахатамнай – Л.В. Потапов президентын түhалагша ябаа, хүндэ хүшэр сагта нютагаа дэмжээ, салингүй сагта ветерануудта, пенсионернүүдтэ, хүүгэдтэ, эхэ зондо мүнгэ танга олгуулаа. Хүн зондо налгай, hайн сэдьхэлтэй, hайхан hанаа бодолтой Семён Цыдыпович минии больницада (Сотниково) байхадамни, машинаараа ерэжэ, обоо хүбөө фрукт, овощ асаржа баясуулаа. «Анхандаа бүри заахан ябахадаа, hургуулида hурахадаа, Самбу бидэ хоёр танай нагаса эжы-дэтнай байгаад hурадаг hэмди. Тэрэ сагаа мартадаггүйб» гэжэ хөөрэhэн Семён Цыдыпович hаяар 70 наhанайнгаа ойн баяр тэмдэглэхээ байна. Сэдьхэл баянтай Семён Цыдыповичээ хани халуунаар амаршалан, гурбан зөөлэниие наhан соогоо үзэжэ байхыень хүсэн: үгын зөөлэниие, эдеэнэй зөөлэниие, унтариин зөөлэниие. Yдэр бүри жаргалай hайханиие үзэжэ, үглөө бүхэндэ наранай hайханиие хаража, үеынгөө наhанай нүхэртэй, үри хүүгэдээрээ, зээнэрээрээ үлзы хэшэгтэй, буянтай, бурхантай ябахатнай болтогой гэжэ үреэнэбди, hайн hайханиие хүсэнэбди.

Дата добавления: 2015-11-30