|
Читайте также: |
Да-а, бур отир понда сiя тожö бур.
Кывзö-ко, мый меным Чукарись öтiк мужик висьтасис. А сэтчин эд лешак увтырыс табунöн ветлö — гöгöр дикöй урман.
Олас кöркö батрак Рокоп. Не кань, не пон — нем сылöн абу. Известно, батрак. Да вöрдас* керкуок керны, шоныт пельöсок аслыс лöсьöтны. А унажыксö урöн-туанöн да чериöн нiя одзжык овлöмась. Вот и мöдас чериыс кузя деньгаок наживитны Рокопыт.
Мунас кыдзкö батракыс Кама дорö. Лунсö öштас, а чери-мöд токо кыяс. И сёйны нем, а вузалöм йылiсь и басни абу. Сэтчö ойыс вöтас. Мый керны? Узьны енöвтчас. Кыскыштас пыжоксö берегас, каяс пугыр* вылас, бипур лöсьöтчö керны. Ачыс и видö асьсö: кыскис пö то вöрисьыс татчö, а кляп петiс.
Только видчас сiдз, а Кама сайсяняс зык:
— Öкö-öй! Видзчись менö!
Сiдз ыкöстас — йöйкыс*, натьтö, Усоллёöдз катöвтчас. Видзöтö Рокоп: юсö мужик пыжöн вуджö. Вуджас, пелыссö гурк чапкас пыжас и пугыр вылас каяс.
— Чериалан? — юасьö. — Уна я кыйин?
— Нем эз шед, — шуö Рокоп. — Черива немись пуны.
— Кайöт менчим, — шуö мужикыс, — да и пу.
Рокоп босьтас пöртсö, или котёлок, кыдз мийö шуам, мунас сы пыж дынö, адззö: пыжас тыр и тыр чери да чисто гырись киння гырись! Но, босьтас черисö, весöтас да пуас.
Сёйöны, баитöны öтi-мöдi.
— Дак оз шед, шуан? — бöра юалö мужик.
— Оз и думайт, — отвечайтö Рокоп. — А мöдi вузавны эшö.
— Мыля вузалан бы?
— Йöзын ола ме, да керкуок бы аслым сувтöта. Нем сэсся оз баит мужикыс, а только висьталас:
— Давай узьны. Водасö узьны.
Саймас Рокоп ойнас, адззö: мужикыт кер кузя нюжöтчöма! А пишкö нырнас, дак би гöгöрас тöвчик орсö.
Казялас Рокоп эттшöм делосö и сэсся оз ни онмöссьыв.
Югдандорас вöрзьöтчас гöсьыс и джендамас — бöра морт кодьöм лоас. Вöлись чеччас да и тшöктö: — Ноко, бур морт, кайöт ва вон сiя öшмöсiсь да юктав менö, — мыччалас чуньнас, кытiсь васö босьтны. А чунь гыжыс кузь да сьöд, дзик ракалöн.
Шы оз сет Рокоп. Босьтас пöртсö, гумыштас сэтчö ва да бертас би дынас. А гöсьыслöн и дукыс абу.
Оз ков Рокопыслö ваыс, но и кисьтны пондас, да не ва вöлöма пöртас — золото. Зарни öшмöс — золотöй колодец миян моз — вöрисьыс мыччалöма.
Батракыс эта золотоöн и строитчас сэтчö, медодзза керку мыс вылас сувтöтас.
Сiя местаын öнi быдса деревня — Петигорт сулалö.
Дата добавления: 2015-11-16; просмотров: 48 | Нарушение авторских прав
| <== предыдущая страница | | | следующая страница ==> |
| Жысь Егорлöн мöдiк висьт | | | Кöч пöртчöма ручö. Мöссэзлöн бунт. Кузьбöж туйö панталi бöжтöмöс |