Летописная повесть о куликовской битве

ЛЕТОПИСНАЯ ПОВЕСТЬ О КУЛИКОВСКОЙ БИТВЕ

Подготовка текста, перевод и комментарии М. А. Салминой

Текст: Вступление Оригинал Параллельно Перевод

О ПОБОИЩИ ИЖЕ НА ДОНУ И О ТОМЬ, ЧТО КНЯЗЬ ВЕЛИКИЙ БИЛСЯ СЪ ОРДОЮ

Прииде ордынский князь Мамай[1] съ единомысленики своими, и съ всѣми прочими князьми ордынскими, и съ всею силою татарскою и половецкою, еще же к тому рати понаимовав бесермены, армени, фрязи, черкасы, и ясы, и буртасы.[2] Такоже с Мамаемь вкупѣ, въ единой мысли и въ единой думѣ, и литовский князь Ягайло Олгердович[3] съ всею силою литовскою, с ляцкою, и с ними же въ единачествѣ Олегъ Иванович, князь рязанский.[4] Съ всѣми сими съвѣтникы поиде на великого князя Дмитриа Ивановича[5] и на брата его князя Володимера Андреевича.[6] Но хотя человеколюбивый Богъ спасти и свободити род христианский молитвами пречистыа его Матере от работы измалтьскиа,[7] от поганаго Мамая, и от сонма нечестиваго Ягайла, и от велерѣчиваго и худаго Олга Рязанскаго, не снабдѣвшему своего христианства. И приидет ему день великий Господень в суд, аду и ехидну!

Окаанный же Мамай разгордѣвся, мнѣвъ себе аки царя, нача злый съвѣтъ творити, темныа своа князи[8] поганыя звати, и рече имъ: «Пойдемь на рускаго князя и на всю землю Рускую, якоже при Батыи[9] было. Христианство потеряем, а церкви Божиа попалимь и кровь христианскую прольемь, а законы их погубимь». И сего ради нечестивый лютѣ гнѣвашеся о своих друзех и любовницѣхь, о князех, избиеных на рѣцѣ на Вожи.[10] И нача сверѣпо и напрасно силы своя сбирати, съ яростию подвижася и силою многою, хотя пленити христианъ. И тогда двигнушася вся колѣна татарскаа.

И нача посылати к Литвѣ, к поганому Ягайлу, и лстивому сътонщику,[11] диаволю съвѣтнику, отлученому Сына Божиа, помраченому тмою грѣховною и не въсхотѣ разумѣти — Олгу Рязанскому, поборнику бесерменскому, лукавому сыну, якоже рече Христос: «От нас изыдоша и на ны быша». И учини собѣ старый злодѣй Мамай съвѣтъ нечестивый с поганою Литвою и съ душегубивымъ Олгомъ: стати имъ у Оки у рѣки на Семень день[12] на благовѣрнаго князя.

Душегубивый же Олегъ начал зло к злу прикладати: посылаше к Мамаю и къ Ягайлу своего боярина единомысленаго, антихристова предтечю, именемь Епифана Корѣева, веля им быти на тотъ же срок, и тъже съвѣтъ свѣща — стати ему у Оки с треглавными звѣрми сыроядци,[13] а кровь прольати. Враже измѣнниче Олже, лихоимъства открываеши образы, а не вѣси, яко меч Божий острится на тя, якоже пророкъ рече: «Оружие извлекоша грѣшници и напрягоша лукъ стрѣляти въ мракъ правыа сердцемь. И оружиа их внидут въ сердца их, и луци их съкрушатся».[14]

И бысть месяца августа, приидоша от Орды таковыа вѣсти къ христолюбивому князю, оже въздвизается на христианы измаилтьский род. Олгу же, уже отпадшему сана своего от Бога, иже злый съвѣтъ створи с погаными, и посла къ князю Дмитрию вѣсть лестную, что: «Мамай идет съ всѣмь своимъ царствомъ в мою землю Рязанскую на мене и на тебе, а и то ти свѣдомо буди — и литовский идет на тебе Ягайло съ всею силою своею».

Князь же Дмитрей се слышав, невеселую ту годину, что идуть на него вся царства, творящеи безаконие, а ркуще «еще наша рука высока есть», иде къ соборной церкви матери Божии Богородици,[15] и пролья слезы, и рече: «Господи, ты всемогий, всесилный и крѣпкий въ бранех, въистину еси царь славы, сътворивый небо и землю, помилуй ны пресвятыа Матере молитвами, не остави нас, егда унываемь! Ты бо еси Богъ нашь и мы — людие твои, посли руку твою свыше и помилуй ны, посрами враги нашя и оружиа их притупи! Силен еси, Господи, и кто противится тебѣ! Помяни, Господи, милость свою, иже от вѣка имаши на родѣ христианскомь! О, многоименитаа Дево, госпоже, царице небесных чинов, госпоже присно всеа вселенныа и всего живота человечьскаго кормителнице! И въздвигни, госпоже, руцѣ свои пречистаа, има же носила еси Бога въплощена! Не презри и христианъ сих, избави нас от сыроядець сих и помилуй мя!»

Вставъ от молитвы, изыде из церкви и посла по брата своего Володимера, и по всѣх князей руских, и по великиа воеводы. И рече к брату своему Володимеру и всѣмь княземь и воеводамъ: «Пойдемь противу сего окааннаго, и безбожнаго, и нечестиваго, и темнаго сыроядца Мамаа за правовѣрную вѣру христианскую, за святыа церкви, и за вся младенца и старца, и за вся христианы, сущая и не сущаа. И възмемъ с собою скипетръ царя небеснаго — непобѣдимую побѣду, и въсприимемь Аврамлю доблесть».[16] И нарек Бога, и рече: «Господи, в помощь мою вънми, Боже, на помощъ мою потщися! И да постыдяться и посрамляются, и познають, яко имя тебѣ — Господь, яко ты еси единъ вышний по всей земли!»[17]

И съвокупився съ всѣми князьми рускими и съ всею силою, и поиде противу их вборзѣ с Москвы, хотя боронити своея отчины. И прииде на Коломну, събра вой своих 100 тысящ и 100, опроче князей и воевод мѣстных. И от начала миру не бывала такова сила рускаа князей руских, якоже при семь князи бѣаше. А всее силы и всех рати числомъ с полтораста тысящ или с двѣстѣ. Еще же к тому приспѣша въ тъй чинъ рагозный издалечя великие князи Олгердовичи поклонитися и послужити: князь Андрей Полоцкий съ пльсковичи, брат его — князь Дмитрий Брянский[18] съ всѣми своими мужи.

В то же время Мамай ста за Доном, възбуявся, и гордяся, и гнѣваася, съ всѣм своимъ царствомъ, и стоя 3 недели. И прииде князю Дмитрию паки другаа вѣсть: повѣдаша ему Мамаа за Дономъ събравшася и в полѣ стоаща, ждуще к собѣ на помощъ Ягайла с литвою, да егда сберутся вкупѣ, и хотят побѣду створити съ одиного. И нача Мамай слати къ князю Дмитрию выхода просити, како было при Чанибѣ-цари,[19] а не по своему докончаниу. Христолюбивый же князь, не хотя кровопролитьа, и хотѣ ему выход дати по христианской силѣ и по своему докончанию, како с ним докончалъ. Он же не въсхотѣ, высокомысляше, ожидаа своего нечьстиваго съвѣта литовскаго.

Олегъ же, отступникь нашь, приединився къ зловѣрному и поганому Мамаю и нечьстивому Ягайлу, нача выход ему давати и силу свою к нему слати на князя Дмитриа. Князь же Дмитрий увѣдавь лесть лукаваго Олга, кровопивца христьянского, новаго Иуду-предателя, на своего владыку бѣсится. И князь же Дмитрий въздохнув из глубины сердца своего и рече: «Господи, съвѣты неправедных разори, а зачинающих рать ты погуби, не азъ почалъ кровъ христианскую проливати, но онъ,[20] Святополъкъ новый![21] Въздай же ему, Господи, седмь седмерицею, яко въ тмѣ ходит и забы благодать твою! Поострю, яко млънию, мечь мой, и приимеет суд рука моа, въздамь месть врагомъ и ненавидящим мя въздамь, и упою стрѣлы моа от крови их, да не ркут невѣрнии “кто есть богъ их?” Отврати, Господи, лице свое от них и покажи им, Господи, вся злаа напослѣдокъ, яко род развращаемь есть, и нѣсть вѣры в них твоеа, Господи! И пролии на них гнѣвъ твой, Господи, на языки, незнающаа тебе, Господи, и имени твоего святаго не призвашя! Кто богъ велей яко Богъ нашь! Ты еси Богъ, творяй чюдеса единъ».[22]

И кончав молитву, иде к Пречистѣй[23] и къ епископу Герасиму[24] и рече ему: «Благослови мя, отче, поити противу окааннаго сего сыроядца Мамаа, и нечьстиваго Ягайла, и отступника нашего Олга, отступившаго от свѣта въ тму». И святитель Герасим благословилъ князя и воя его вся поити противу нечьстивых агарянъ.

И поиде с Коломны с великою силою противу безбожных татаръ месяца августа 20, а уповая на милосердие Божие и на пречистую его матерь Богородицю, на приснодевицю Марию, призываа на помощь честный крестъ. И, прошед свою отчину и великое свое княжение, и ста у Оки на усть Лопастны,[25] переимаа вѣсти от поганыхъ. Ту бо наеха Володимеръ, братъ его, и великий его воевода Тимофей Васильевич, и вси вои останочныи, что были оставлены на Москвѣ. И начашя възитися за Оку за неделю до Семеня дни в день неделный. И, переехавше за рѣку, внидошя в землю Рязаньскую. А самь в понеделник перебреде своимь двором. А на Москве остави воевод своих, у великой княгини Евдокеи[26] и у сынов своих — у Васильа, у Юрья и у Ивана[27] — Федора Андреевича.[28]

И слышав в градѣ на Москвѣ, и в Переаславлѣ, и на Костромѣ, и в Володимерѣ, и въ всѣх градѣх великого князя и всѣх князей руских, что пошол князь великый за Оку, и бысть в градѣ Москвѣ туга велика, и по всѣмь его предѣломъ, и плач горекъ, и глас рыданиа. И слышано бысть, сиирѣчь высокых, Рахиль же есть, рыдание крѣпко, плачющеся чяд своих[29] и с великимь рыданием и въздыханиемь не хотяше ся утѣшити, зане пошли с великымь княземь за всю землю Рускую на остраа копья! Да кто уже не плачется женъ онѣх рыданиа и горкаго их плачя, зряще, убо ихъ каяждо к себѣ глаголаше: «Увы мнѣ! Убогаа нашя чада, уне бы намъ было, аще бы ся есте не родили, да сиа злострастные и горкыа печали[30] вашего убийства не подъяли быхом! Почто быхомъ повинни пагубѣ вашей!»

Князь же великый прииде к рѣцѣ к Дону за два дни до Рожества святыа Богородица.[31] И тогда приспѣ грамота от преподобнаго игумена Сергиа,[32] от святаго старца, благословенаа; в ней же писано благословение его таково, веля ему битися с татары: «Что бы еси, господине, тако и пошолъ, а поможет ти Богъ и святаа Богородица». Князь же рече: «Сии на колесницах, а си на коних. Мы же въ имя Господа Бога нашего призовемъ:[33] “Побѣды дай ми, Господи, на супостаты и пособи ны оружиемь крестнымь, низложи врагы нашя; на тя уповающи, побѣжаемь, молящеся прилѣжно къ пречистой ти Матери”». И сиа изрек, начя полци ставити, и устрояше въ одежу их местную.[34] Яко великии ратници, и воеводы оплъчишя своя полки, и приидошя к Дону, и сташа ту, и много думавше. Овии глаголаше: «Поиди, княже, за Донъ». А друзии рѣша: «Не ходи, понеже зѣло умножишася врази наши, не токмо татарове, но и литва, и рязанци».

Мамай же, слышав приход княж к Дону и сѣченыа своя видѣв, възьярися зракомъ и смутися умомъ, и распалися лютою яростию, и наплънися аки аспида нѣкаа,[35] гнѣвомъ дышуще, и рече: «Двигнетеся, силы моя темныа, и власти, и князи! И пойдемь, станемъ у Дону противу князя Дмитриа, доколѣ прислѣеть к намь съвѣтникь нашь Ягайло съ своею силою».

Князю же, слышавшу хвалу Мамаеву, и рече: «Господи, не повелѣлъ еси в чюжь предѣлъ преступати, аз же, Господи, не преступих. Сий же, Господи, приходяще, аки змий к гнѣзду окаанный Мамай, нечистый сыроядець, на христианство дръзнулъ и кровь мою хотя прольяти, и всю землю осквернити, и святыа церкви Божиа разорити». И рече: «Что есть великое сверѣпство Мамаево? Аки нѣкаа ехидна, прыскающи, пришел от нѣкиа пустыня, пожрети ны хощет! Не предай же мене, Господи, сыроядцу сему Мамаю, покажи ми славу своего божества, Владыко! И где ти аггелстии лици, и где херувимское предстоание, где серафимское шестокрилное служение? Тебе трепещет вся тварь, тебѣ покланяються небесныа силы! Ты солнце и луну створи и землю украси всѣми лѣпотами! Яви, Боже, славу свою и нынѣ, Господи, преложи печаль мою на радость! Помилуй мя, якоже помиловалъ еси слугу своего Моисеа, в горести душя възпивша к тебѣ, и столпу огньну повелѣлъ еси ити пред нимь, и морскыа глубины на сушу преложи, яко владыка сый и Господь, страшное възмущение на тишину преложилъ еси».

И си вся изрекши, брату своему и всѣмъ княземь и воеводамъ великимъ, и рече: «Приспѣ, братие, время брани нашея, и прииде праздникъ царици Марии, матере Божии Богородици, и всѣх небесных чинов, и госпожи всея вселеныа и честнаго еа Рожества. Аще оживемь — Господеви есмы, аще умремь за миръ сей — Господеви есмы!»[36] И повелѣ мосты мостити на Дону и бродов пытати тое нощи, в канон пречистыа Божиа матере.

Заутра же в суботу порану, месяца сентября 8 день, в самый празник Госпожинъ,[37] всходящу солнцу, и бысть тма велика по всей земли, и мгляно было бяше того утра до третиаго часа.[38] И повелѣ Господь тмѣ уступити, а свѣту пришествие дарова. Князь же великый исполчи полки своа велиции, и вся его князи рустии свои полкы устроивше, и великыа его воеводы облачишася въ одежда местныа. И ключя смертные растерзахуся, трусъ же бѣ страшенъ и ужасъ събраннымь чядомъ издалече от встока и до запада. Поидоша за Дон, в далняа чясти земля, и преидоша Донъ вскорѣ люто и сверѣпо и напрасно, яко основанию земному подвизатися от великых силъ. Князю же перешедшу за Донъ в поле чисто, в Мамаеву землю, на усть Непрядвы, Господь Богъ единъ вожаше его, и не бѣ с ним Богъ чюждь. О, крѣпкыа и твердыа дръзости мужъство! О, како не убояся, ни усумнѣся толика множества народа ратных! Се бо всташя на нь три земли, три рати: первое — татарскаа, второе — литовскаа, третие — рязанскаа. Но обаче всѣх сих никакоже убояся, ни устрашися, но еже к Богу вѣрою въоруживься и креста честнаго силою укрѣпився, молитвами святыа Богородица оградився, и Богу помолися, глаголя: «Помози ми, Господи Боже мой, спаси мя ради милости твоеа, вижь — врагы моа яко умножишася на мя. Господи, что ся умножишя стужающеи мнѣ? Мнози въсташя на мя, мнози борющеся со мною, мнози гонящеи мя, стужающеи ми, вси языцы обыдоша мя, именем Господнимь противляхся имъ».[39]

И бысть в шестую годину дни,[40] начашя появливатися погании измаилтяне в полѣ, бѣ бо поле чисто и велико зѣло. И ту исполчишася татарстии полци противу хрестьан, и ту срѣтошася полци. И великыа силы, узрѣвше, поидошя, и земля тутняше, горы и холми трясахуся от множества вой безчисленыхъ. И извлекоша оружия — обоюдуостри в рукахъ их. И орли сбирахуся, якоже есть писано, — «где будет трупие, ту сберутся и орли».[41] Пришедшимъ рокомъ преже бо начашася съеждати сторожевыи плъки рускии с татарскыми. Сам же князь великий наеха наперед в сторожевых полцех на поганаго царя Теляка,[42] нареченаго плотнаго диавола Мамаа. Таче потом недолго попустя отъеха князь в великий полкъ.[43] И се поиде великаа рать Мамаева, вся сила татарская. А отселѣ — князь великий Дмитрий Иванович съ всѣми князьми рускими, изрядивь полкы, поиде противу поганых половець и съ всѣми ратьми своими. И възрѣв на небо умилныма очима и въздохнув из глубины сердца, рече слово псаломское: «Братие, Богъ намъ прибѣжище и сила».[44] И абие сступишася обоя силы велиции вмѣсто на длъгъ час, и покрыша полкы поле яко на десяти верстъ от множества вой. И бысть сеча зла и велика, и брань крѣпка, и трусъ великь зѣло; яко от начала миру сѣча такова не бывала великимь княземь рускимь, якоже сему великому князю всея Руси. Бьющим же ся им от шестаго часа до 9-го,[45] прольяся кровь аки дождева тучя, обоих, рускых сынов и поганых, и множество безчислено падоша трупиа мертвых от обоих. И много руси побиени быша от татаръ, и от руси — татаре. И паде труп на трупѣ, паде тѣло татарское на телеси христианскомъ; индеже видѣти бяше русинъ за татарином ганяшеся, а татаринъ русина стигаше. Смятоша бо ся и размѣсиша, кииждо бо своего супротивника искаше побѣдити. И рече к собѣ Мамай: «Власи наши растръзаются, очи наши не могут огненых слез истачати, языци наши связаются, и гортан ми пресыхает, и сердце раставает, чресла ми протязаются, колѣни изнемогают, а руцѣ ми оципают».

Что намь рещи или глаголати, видящи злострастьную смерть! Инии бо мечемь пресѣкаеми бываху, а инии сулицами прободаеми, инии же на копиа взимаеми! Да тѣм же рыданиа исполънишася москвичи мнози, небывалци. То видѣвше, устрашишася и живота отчаявшеся, и на бѣги обратившеся, и побѣгоша, а не помянушя, яко мученици глаголаху друг къ другу: «Братие, потерпим мало, зима яра, но рай сладокъ; и страстенъ меч, но славно вѣнчание». А инии сыны агаряны на бѣгъ възвратишася от клича велика, зряще злаго убийства.

И по сих же въ 9 час дне[46] призрѣ Господь милостивыма очима на вси князи руские и на крѣпкыа воеводы, и на вся христианы, дръзнувше за христианство и не устрашишася, яко велиции ратници. Видѣшя бо вѣрнии, яко въ 9 час бьющеся аггели помогают христианомъ, и святыхъ мученикъ полкъ, и воина Георгиа, и славнаго Дмитриа,[47] и великых князей тезоименитых Бориса и Глѣба. В них же бѣ воевода съвръшенаго плъка небесных вой — архистратигъ Михаил.[48] Двоя воеводы видѣша погании полци треслънечный плъкъ и пламенныа их стрѣлы, яже идут на них; безбожнии же татарове от страха Божиа и от оружия христианскаго падаху. И възнесе Богъ десницу нашего князя на побѣду иноплеменникь. А Мамай, съ страхомъ въстрепетав и велми въстенавъ, и рече: «Великъ Богъ христианескъ и велика сила его! Братие измайловичи, безаконнии агаряне, побѣжите не гóтовыми[49] дорогами!» И сам вдав плещи свои и побѣже скоро паки къ Ордѣ. И то слышавше темныа его князи и власти, и побѣгоша. И то видѣвше и прочии иноплеменницы, гоними гнѣвомъ Божиимь и страхомь одержими суще от мала до велика, на бѣгъ устремишася. Видѣвше же христиане, яко татарове с Мамаемь побѣгошя, и погнаша за ними послѣ, бьюще и сѣкуще поганых без милости, Богъ бо невидимою силою устраши плъкы татарскые, и побѣжени обратиша плещи своя на язвы. И в погонѣ той овии же татарове от христианъ язвени оружиемь падоша, а друзии в рѣцѣ истопошя. И гониши их до рѣки до Мечи,[50] и тамо бѣжащих бесчисленое множество побишя. Князи же полци гнаша съдомлян,[51] бьюще, до стана их, и полониша богатства много, и вся имѣниа их, и вся стада содомскаа.

Тогда же на томь побоищи убьени быша на сступѣ: князь Феодоръ Романовичь Бѣлоозерский и сынъ его Иван, князь Феодоръ Торуский, братъ его Мстислав, князь Дмитрий Манастырев, Семенъ Михайлович, Микула Васильев, сынъ тысяцкого, Михайла Иванов Акинфович, Иван Александрович, Андрей Серкизов, Тимофей Васильевич Акатьевич, нарицаемый Волуй, Михайло Бренков, Левъ Морозов, Семен Меликов, Дмитрий Мининичь, Александръ Пересвѣтъ, бывый преже болярин брянскый,[52] и инии мнози, их же имена не суть писана в книгах сих. Сии же писаны быша князи токмо и воеводы, и нарочитых и старѣйших бояръ имена, а прочих бояръ и слуг оставих имена и не писах множества ради именъ, яко число превъсходит ми, мнози бо на той брани побиени быша.

Самому же князю великому бяше видѣти всь доспѣх его битъ, язвенъ, но на телеси его не бяше раны никоеа же, а бился с татары в лице, став напреди на первомъ суймѣ. О семь убо мнози князи и воеводы многажды глаголаша ему: «Княже господине, не ставися напреди битися, но назади или на крилѣ, или нѣгде въ опришнемь мѣсте». Он же отвѣщаваше имъ: «Да како азъ възглаголю — братия моа, потягнем вси вкупѣ съ одиного, а самъ лице свое почну крыти и хоронитися назади? Не могу в томъ быти, но хощу якоже словомъ, такоже и дѣлом напереди всѣх и пред всѣми главу свою положити за свою братию и за вся христианы. Да и прочии то видѣвше приимут съ усръдием дръзновение». Да якоже рече, тако и створи, бьяшеся с татары тогда, став напереди всѣх. А елико одесную и ошую его дружину его бишя, самого же вкругъ оступиша около аки вода многа обаполы! И многа ударениа ударишася по главѣ его, и по плещима его, и по утробѣ его, но от всѣх сих Богъ заступилъ его в день брани щитомъ истины и оружиемь благоволениа осѣнил есть над главою его, десницею своею защитилъ его и рукою крѣпкою и мышцею высокою Богъ избавилъ есть, укрѣпивый го. И тако промежи многими ратными цѣлъ схраненъ бысть. «Не на лукъ бо мой уповаю, и оружие мое не спасеть мене»,[53] — якоже рече Давидъ пророкъ. — «Вышняго положилъ еси прибѣжище твое, не приидет к тебѣ зло, и рана не приступит к телеси твоему, яко аггеломь своимъ заповѣсть о тебѣ съхранити тя въ всѣх путех твоих, и не убоишися от стрѣлы, летящаа в день».[54]

Се же бысть грѣх ради наших въоружаются на ны иноплеменници, да быхом ся отступили от своих неправдъ: от братоненавидѣниа, и от сребролюбиа, и в неправды судящих, и от насилья. Но милосердъ бо есть Богъ человеколюбець, не до конца прогнѣвается на ны, ни въ вѣки враждуеть.

А отселѣ, от страны Литовскиа, Ягайло, князь литовский, прииде съ всею силою литовскою Мамаю помагати, и татаромь поганымь на помощъ, а христианом на пакость. Но и от тѣх Богъ избавилъ, не поспѣша бо на срок за малым, за едино днище или менши. Но точию слышав Ягайло Олгердович и вся сила его, яко князю великому с Мамаем бой былъ, и князь великий одолѣ, а Мамай побѣже — и без всякого пожданиа литва съ Ягайлом побѣгошя назад съ многою скоростию, никим же гоними. Не видѣша тогда князя великаго, ни ратии его, ни оружиа его, токмо имени его литва бояхутся и трепетаху; а не яко при нынешних временех литва над нами издеваются и поругаются. Но мы сию бесѣду оставльше и на предлежащее възвратимся.

Князь же Дмитрий з братомь своимъ Володимеромъ, и съ князми рускими, и воеводами, и прочими бояры, и съ всѣми вои оставшимися, став тое нощи на поганых обѣдищех, на костех татарскых,[55] утеръ поту своего, и, отдохнув от труда своего, велико благодарение принесе Богу, таковую побѣду давшему на поганыа, избавляющему раба своего от оружиа люта: «Помянулъ еси, Господи, милость свою, избавил ны еси, Господи, от сыроядець сих, от поганаго Мамая, и от нечьстивых измайлович, и от безаконных агарянъ, подаваа чьсть, яко сынъ, своей матери. Уставилъ еси стремление страстное, якоже еси уставилъ слузѣ своему Моисею и древнему Давиду, и новому Констянтину, и Ярославу, сроднику великих князей[56] на окааннаго и на проклятаго братоубийцю безглавнаго звѣря Святоплъка. И ты, Богородице, помиловала еси милостию своею нас, грѣшных рабъ своих, и всь род христианскый, умолила еси безлѣтнаго Сына своего». И мнози князи рустии и воеводы прехвалными похвалами прославиша пречистую матерь Божию Богородицю. И пакы христолюбивый князь похвали дружину свою, иже крѣпко бишася съ иноплеменники, и твердо забрашася, и мужьскы храбровашя, и дрънуша по Бозѣ за вѣру христианскую.

И възвратися оттуду в богохранимый град Москву, въ свою отчину, с побѣдою великою, одолѣв ратнымъ, побѣдивъ врагы своя. И мнози вои его възрадовашяся, яко обрѣтающе користь многу: пригнашя с собою многа стада кони, и велбуди, и волы, им же нѣсть числа, и доспѣх, и порты, и товаръ.

Повѣдаша князю великому, что князь Олег Рязанский посылалъ Мамаю на помощь свою силу, а самъ на рѣках мосты переметалъ. А кто поехалъ с Доновского побоища всвояси сквозѣ его отчину, Рязанскую землю, бояре или слуги, а тѣх велѣлъ имати, и грабити, и нагых пущати. Князь же Дмитрий про то въсхотѣ на Олга послати рать. И се внезапу приехашя к нему бояре рязанстии и повѣдашя, что князь Олегъ повръгъ свою землю, да самь побѣжалъ, и съ княгинею, и с дѣтми, и з бояры. И молиша его много о семь, дабы на них рати не послалъ, а сами биша ему челом и рядишася у него в ряд. Князь же послуша их и приимъ челобитье их, рати на них не посла, а на Рязанскомь княжении посади своя намѣстники.

Тогда же Мамай не въ мнозѣ убѣжа и прибѣжа въ свою землю в малѣ дружинѣ. Видя себе бита, и бѣжавша, и посрамлена, и поругана, пакы гнѣвашеся и събра остаточную свою силу, хотя ити изгономъ пакы на Русь. Сице же ему умыслившу, и се прииде ему вѣсть, что идет на него нѣкий царь съ встока Тохтамышь из Синие Орды.[57] Мамай же, юже уготовалъ рать на ны, с тою ратию готовою и поиде противу его. И срѣтошася на Калках, и бысть имъ бой. И царь Тахтамышь побѣди Мамая и прогна его. Мамаевы же князи сшедше с конь своих и биша челомь царю Тахтамышу, и даша ему правду по своей вѣре, и яшася за него, а Мамаа оставиша поругана. Мамай же то видѣвь, и скоро побѣжа съ своими единомысленики. Царь же Тахтамыш посла за ними в погону воя своя. Мамай же гоним сыи, и бѣгаа пред Тахтамышевыми гонители, и прибѣжа близ града Кафы. И съслася с кафинци по докончанию и по опасу, дабы его приали на избавление, дондеже избудеть от всѣх гонящих его. И повелѣша ему. И прибѣже Мамай в Кафу[58] съ множествомъ имѣниа, злата и сребра. Кафинци же свѣщавшеся, створиша над нимь облесть, и ту от них убьен бысть. И тако бысть конець Мамаю.

А самъ царь Тахтамышь, шед, взя Орду Мамаеву и царици его, и казны его, и улусъ[59] всь поима, и богатство Мамаево раздѣли дружинѣ своей. И оттуду послы своя отпусти къ князю Дмитрию и къ всѣм княземь рускимъ, повѣдая имъ свой приход, и како въцарися, и како супротивника своего и их врага Мамая побѣди, а самь, шед, сѣде на царствѣ Волжъскомъ. Князи же рустии посла его отпустиша съ честию и с дары, а сами на зиму ту и на ту весну за ними отпустиша в Орду къ царю коиже своих килициев[60] съ многыми дары.

[1]...ордынский князь Мамай... — Темник (военачальник) при хане Золотой Орды Бердибеке Мамай, женатый на дочери хана, был по существу правителем Орды. Β 1379 г. он полностью захватил власть в свои руки. Однако именоваться ханом Мамай не мог, так как не был потомком Чингисхана.

[2]...бесермены... буртасы. — По мнению М. Н. Тихомирова, черкесы и ясы — это черкесы и осетины Северного Кавказа, буртасы — различные племена Среднего Поволжья, фрязи (фряги) — итальянцы, связанные торговыми отношениями с Поволжьем; армены — армяне в войске Мамая, упомянутые потому, что в XIV в. они жили и торговали в волжских городах; бесермены — мусульмане.

[3]...князь Ягайло Олгердович... — Литовский великий князь с 1377 по 1392 г. (с перерывом), с 1386 по 1434 г. король польский; сын великого князя литовского Ольгерда (1345—1377 гг.).

[4]...Олегъ Иванович, князь рязанский. — великий князь рязанский Олег Иванович (1350—1402). Положение Рязанской земли между Московским великим княжеством и Ордой приводило κ тому, что все карательные экспедиции из Орды прежде всего обрушивались на Рязанское княжество. Это определило двойственность политики великого князя Олега Рязанского: он неоднократно вступал в сделки с Ордой, преследуя интересы своей земли. Однако такая политика не спасала Рязанское княжество от разгромов ордынцами. После Куликовской битвы Олег вынужден был бежать из своего княжества и в 1381 г. заключить невыгодный для себя договор с Дмитрием Донским. Β 1386 г. Олег заключил мирный договор с великим князем московским, скрепленный родственными отношениями: сын Олега Рязанского Федор женился на Софье Дмитриевне — дочери Дмитрия Донского. С этого времени летописи ни ο каких конфликтах между Москвой и Рязанью не сообщают.

[5]...на великого князя Дмитриа Ивановича... — (1350—1389) — великий князь владимирский и московский с 1359 г., сын Ивана Ивановича Красного, внук Ивана Даниловича Калиты. Проводил политику укрепления Московского княжества, направленную на подчинение Москве русских княжеств, централизации государственного управления и военного дела. При Дмитрии Ивановиче для укрепления Москвы в 1367 г. предпринимается постройка кремлевских стен из камня, что в те времена имело важное военно-политическое значение. Β 1378 г. на реке Воже под его руководством были разгромлены войска хана Мамая, которые шли на Русь под предводительством воеводы Бегича. (Повесть ο битве на реке Воже и коммент. κ ней см. в наст. т.). После Куликовской битвы в 1380 г. Дмитрий Иванович получил прозвище — Донской.

[6]...князя Володимера Андреевича. — двоюродный брат Дмитрия Донского, князь серпуховской. Впервые участвовал в военном походе с Дмитрием, когда великому князю московскому было двенадцать лет, а ему — девять. Руководил многими военными мероприятиями и походами Дмитрия Донского. Умер в 1410 г.

[7]...от работы измалтьскиа... — Согласно Библии, от наложницы Авраама, рабыни Агари, родился сын Измаил, ставший родоначальником различных арабских племен. Β русских памятниках измаильтянами назывались кочевые, нехристианские народы вообще.

[8]...темныа своа князи... — Темными князьями (темниками) у татар назывались предводители крупных воинских отрядов (тьма — десять тысяч).

[9]...при Батыи... — внук Чингисхана. Возглавлял нашествие монголо-татар на Восточную Европу в конце 30—40-х гг. XIII в. При нем возникла Золотая Орда н началось монголо-татарское владычество над Русью. Умер в 1255 г.

[10]...на Вожи. — река в северо-западной части Рязанского княжества, в сорока-пятидесяти километрах от его границы с Московским княжеством; впадает в реку Оку. Также см. «Повесть ο битве на реке Воже».

[11]...сътонщику... — Это слово, видимо, производное от слова «сатана».

[12]...на Семень день... — 1 сентября, день памяти Симеона Столпника.

[13]...сыроядци... — Здесь видят намек на обычай татар есть сырое (вяленое) мясо.

[14] «Оружие извлекоша грѣшници... и луци их съкрушатся». — Ср. Пс. 36. 14—15.

[15]...къ соборной церкви матери Божии Богородици... — к Успенскому собору в Кремле. Успенский собор, сохранившийся до нашего времени, был построен в 1475—1479 гг. на месте одноименного собора XIV в.

[16] «...Аврамлю доблесть». — Имеется в виду один из наиболее почитаемых библейских праведников патриарх Авраам.

[17] «И да постыдяться и посрамляются... единъ вышний no всей земли!» — Пс. 82, 18—19.

[18]...великие князи Олгердовичи... князь Дмитрий Брянский... — Андрей и Дмитрий — сыновья великого князя литовского Ольгерда. Β 1378 г. князь Андрей Полоцкий бежал в Псков, а затем приехал в Москву κ великому князю Дмитрию Ивановичу. Дмитрий Брянский перешел на службу κ Дмитрию Ивановичу в 1379 г. и княжил в Переславле-Залесском. Полоцким и Брянским они названы по месту первоначального своего княжения.

[19]...при Чанибѣ-цари... — при хане Золотой Орды Джани-беке (1342—1357 гг.), сыне Узбека.

[20]...не азъ почалъ... но онъ... — Исправлено; в рукописи: «но он почалъ кровъ христианскую проливати, а не яз».

[21]...Святополъкъ новый. — Имя Святополка, убившего в 1015 г. своих сводных братьев Бориса и Глеба, стало в древнерусской литературе нарицательным обозначением злодея и клятво-преступника.

[22] «Въздай же ему, Господи... творяй чюдеса единъ». — Пс. 76, 14—15; Пс. 78, 6, 10, 12; Вт. 32, 41—42.

[23]...к Пречистѣй... — Видимо, κ собору Успения Богоматери в Коломне.

[24]...къ епископу Герасиму... — Герасим, епископ коломенский (ум. в 1388 г.).

[25]...на усть Лопастны... — Река Лопасня — левый приток Оки, впадающий в нее восточнее г. Серпухова.

[26]...у великой княгини Евдокеи... — Евдокия Дмитриевна — жена (с 1366 г.) владимирского и московского князя Дмитрия Ивановича, дочь князя Дмитрия Константиновича Суздальского (ум. в 1407 г.).

[27]...у сынов своих — у Васильа, у Юрья и у Ивана... — Во время Куликовской битвы Василию (будушему великому князю московскому Василию Дмитриевичу) было девять лет, Юрию — шесть лет. Василий Дмитриевич, старший сын великого князя Дмитрия Ивановича, занимал великокняжеский стол с 1389 по 1425 г. Продолжал объединительную политику отца и деда. Второй сын великого князя Дмитрия Ивановича — Юрий Дмитриевич (1374—1434), с 1389 г. князь звенигородско-галицкий, в 1433 и 1434 гг. дважды занимал московский великокняжеский стол.

[28]...Федора Андреевича. — Речь идет об именитом московском боярине Федоре Андреевиче Кошке.

[29] И слышано бысть, сиирѣчъ высокых, Рахиль же есть, рыдание крѣпко, плачющеся чяд своих... — Здесь основной текст повести инкрустирован вставкой из апокрифического «Слова на Рождество Христово ο пришествии волхвов» и не всегда ясен; ср. в апокрифе: «...гласъ в Рамѣ слышанъ бысть, сирѣчь въ высокихъ, Рахили, плачющися чадъ своих...» (в апокрифе это место восходит к Иер. 31, 15). Совпадение с текстом апокрифа продолжается до слов: «...пагубѣ вашей». Слова «сиирѣчь высокых» — толкование географического названия «в Рамѣ», читающегося в апокрифическом тексте, — в переводе опускаем.

[30]...да сиа... печали... — Β рукописи: «за сиа». Исправлено по тексту апокрифа.

[31]...до Рожества святыа Богородица. — День Рождества Богородицы отмечается 8 сентября.

[32]...от преподобнаго игумена Сергиа... — От Сергия Радонежского, основателя, а впоследствии игумена Троицкого монастыря (ныне Троице-Сергиева лавра в г. Сергиев Посад). См. «Житие Сергия Радонежского» и коммент. к нему в наст. т.

[33] «Сии на колесницах... Бога нашего призовемъ». — Пс. 19, 8.

[34]...въ одежу их местную. — Что именно значит термин «одежда местная» — неясно.

[35]...аки аспида нѣкаа... — Аспид и ехидна — греческие наименования ядовитых змей — нередко употреблялись в средневековой письменности как нарицательные обозначения злых и коварных людей.

[36] «Аще оживемь — Господеви есмы!» — Рим. 14, 8.

[37]...в самый празник Госпожинъ... — Госпожин день в данном тексте — праздник Рождества Богородицы.

[38]...до третиаго часа. — Β Древней Руси счет часов начинался с восхода солнца. Поэтому первый час в зависимости от времени года и восхода солнца по современному исчислению времени мог соответствовать различному времени: с трех часов ночи до восьми часов утра. Так как события происходили в сентябре, то три часа дня в Древней Руси — это около восьми часов утра по современному времяисчислению.

[39] «Господи, что ся умножишя... противляхся имъ». — Пс. 3, 1; Пс. 117, 11.

[40]...в шестую годину дни... — Шесть часов дня — около одиннадцати часов утра по современному времяисчислению.

[41]...«где будет трупие, ту сберутся и орли». — Мф. 24, 28.

[42]...царя Теляка... — Речь идет, видимо, ο золотоордынском хане Тулун-беке (в русских источниках он именуется Тюляком). Известен ярлык 1379 г., данный от его имени митрополиту Михаилу (Митяю).

[43]...в великий полкъ. — Великий полк, видимо, то же, что большой полк (как он именуется в разрядных книгах), то есть полк, возглавлявшийся великим князем.

[44] «Братие, Богъ намъ прибѣжище и сила». — Пс. 45, 2.

[45]...от шестаго часа до 9-го — от одиннадцати часов утра до двух часов дня по современному времяисчислению.

[46]...въ 9 час дне... — Девять часов дня — это около двух часов дня по современному времяисчислению.

[47]...воина Георгиа, и славнаго Дмитриа... — Имеются в виду святые — покровители христианского воинства — Георгий Победоносец и Дмитрий Селунский.

[48] архистратигъ Михаил. — Архангел Михаил — предводитель «небесных сил».

[49]...гóтовыми... — Готы —древнегерманское племя.

[50]...дo рѣки дo Мечи... —Река Красивая Меча — правый приток Дона.

[51]...съдомлян... — Β Библии рассказывается ο погрязших в грехах жителях города Содома. Здесь же «содомляне» — бранный эпитет татар.

[52]...князь Феодоръ Романовичь Бѣлоозерский... Александръ Пересвѣтъ, бывый преже боляран брянскый... — Большинство этих имен перечислено в кратком рассказе ο битве 1380 г. в Троицкой (Симеоновской) летописи и в Синодике. Летописная повесть ο Куликовской битве добавляет κ ним имена еще четырех убитых, причем Дмитрий Мининич, Дмитрий Монастырев и Федор Тарусский, как следует из летописей, погибли не на Куликовом поле, а в битвах с Ольгердом в 1368 г., в битве 1378 г. на Воже и в битве под Белевым в 1437 г.

[53] «Не на лукъ бо мой уповаю... не спасеть мене» — Пс. 43, 7.

[54] «Вышняго положилъ... летящаа в день» — Пс. 90, 5, 9, 10, 11.

[55]...на поганых обѣдищех, на костех татарскых... — «Стать на костях» — значит занять после победы над врагом поле боя. Во время такого «стояния» разбирали трупы павших, хоронили своих соратников. Значение выражения «на обѣдищех» неясно.

[56]...слузѣ своему Моисею... Ярославу, сроднику великих князей... — Здесь упомянуты библейский пророк Моисей, древнееврейскнй царь Давид; новым Константином именуется, видимо, Владимир Святославич, при котором Русь приняла христианство в качестве официальной религии, как Римская империя — при императоре Константине. Ярослав — сын Владимира, отомстивший Святополку, убийце его братьев Бориса и Глеба.

[57]...Тохтамышь из Синие Орды. —Золотоордынский царевич Тохтамыш — хан Белой Орды с 1377 г. и хан Золотой Орды с 1380 г. после победы «на Калках» над Мамаем. Β 1395 г. он был разбит Тимуром. Умер Тохтамыш в 1406 г.

[58]... в Кафу... —Современная Феодосия, в XIV в. генуэзская колония в Крыму.

[59]...улусъ... — Становище, табор, а также удел, владение у кочевников.

[60]...килициев... — Киличей — посол, гонец, толмач.

Дата добавления: 2015-08-27