Благодать божая.

Престани юж от плачу слези проливати,

Престани паденія Натури ридати:

Обфити истощилес слезния потоки,

Ими же наполнилес ввес свЂт ей широки.

Возлияся и в небо вода слез велика,

В ней же Натура втопит адска Амалика,

Втопит — есм излиянна божа Благодати,—

Сама же заплинет в рай паки царствовати:

Сего ради от плача горкаго престани.

Плач.

Изведи из глубини слез, прийми за длани.

СЦЕНА 8

Злост благодарствует Прелести, же Натуру Людску прелстила на вкушение древа заповЂданнаго.

Злост.

Га-га-га! ЦЂлую тя, Прелести послихо,

Всего пекелна кола любима утЂхо,

Обемлю тя усердно, лобизаю длани,

Кланяюс ти до ног, милостивая пани,

Же с того щос собрала доброго ми жнива,

Злаго Людской НатурЂ наварила пива;

ТЂх твоих цнот, Прелести, нігди не забуду,

Рознесу твое имя хвалами повсуду;

Нех же слишат твою чест вся ония конца,

Котрими огнистия перуть кони солнца.

Где егр, борей, где зефір, где аквиля вЂет,

Там мой глагол славу ти похвалми розсЂет.

Идеже вход виходит, заход западаеть,

Полуден возносится, полунощ смирает,

Там твоя чест, Прелести, прославится мною,

Прославила бо еси мене Злость тобою.

Многи слави язики твой язик лесттивий

Моим язиком злосливим славити сквапливий.

Тис радост ПрезерпЂнЂ, радост и Плютона,

И тобою ся тЂшит в пеклЂ Тизифона,

Торжествует Алекто, рада и Мегера,

Танцует невоздержно Иксиона сфера;

Випудилас Орфея всяк плач из геени.

В котрой не слышатся плачородии трени;

Плавлет во радости сердце Танталово,

Не алчет веселия, имЂет готово.

Зизиф каменодвижей не працуе нинЂ;

Адские веселятся. ликуют богинЂ.

Ляхезис и Атропос и Клото при смерти;

БелЂди ако води радост разливают,

Дай нЂмфи пекелние во ней ся купают.

Рад, рад, и Люципер, я смЂюся зЂло —

Га-га-га-га-га! Тепер же мнЂ мило,

Тепер же ми як масло помазало груди!

Вся от радости растаются уди!

Пеклу тепер торжество от твоих рук приде,

Ими ж Натура Людска из рая изийде.

Люциперас як на два тузи посадила,

Гди Натуру Людскую сладким яблком зила.

Егда снЂде Натура плод, тобою даний,

Тогда Люциперу бист уготовани

ОбЂд изобилен радости кипящий,

На которомь со мною пласал он многащи:

Отворилас ему двер до радости края,

Егдас Людскую Натуру отвергий из рая.

БЂхом во веселие тогда превелицЂ,

Егда извержену вела ко темницЂ.

Але тогда найпаче Люципер скакаше,

Егда с плачем аггелский лик горко ридаше.

О, заправди, Прелести послихо, велие,

Пеклу, Люциперу, мнЂ естес веселие.

Что пекло, Люципер и я вожделЂла.

Твоя нам, о Прелести, сооружи сила.

За котории труди всЂ дякуют мЂле

Пекелни жителЂ, твою славу смЂле

По всем вселеном крузЂ всегда разглашают,

До радости же в пекло много запрошают.

Дата добавления: 2015-09-05