Читайте также:
|
Листок второй
1. Славословия Богоматери
Почтим славно, людие, Чистую Богородицу, огнь Божества приимшую во чреве неопально, песньми величаем. Станем благоговейно в дому Бога нашего и во-зопиим: радуйся, миру Владычице; радуйся, Марие, Госпоже всех нас; радуйся, едина Непорочная в женах и добрая; радуйся, Столпе огненный, вводящий в вышнюю жизнь человечество.
Слыши, Отроковице, Дево Чистая: да речет убо Гавриил совет Вышняго древний, истинный: буди готова к приятию Божию; Тобою бо Невместимый с человеки поживе.
Легкий Облаче Света, Неискусобрачная, уготовися: се Солнце незаходимое свыше превозсияет Тебе, вмале убо в Тебе крыемо, миру же являемо и решащо (уничтожающее) злобы омрачение.
Нива несеянная, чистая, подыми словом небесное Слово, яко пшеницу плодоносну прозябающу изТебе и концы (мира) Питающаго хлебом разума.
Златый Светильниче, подыми Огнь Божества, возсияющий Тобою, и Свет мирови даруй, Имже разорится тьма наших зол.
Се Тебе, Царице, посылается божественный Архангел, провозвестити пришествие Царя всех и Бога и возгласити Тебе: радуйся, воззвание праотца! Не ужасайся гласа, не дивися глаголющему: Божий слуга есть, прииде явити Тебе таинство, Ангелы неизреченное.
Светоносный Облак, воньже всех Владыка, яко дождь с небесе на руно, сниде и воплотися нас ради, быв человек, Безначальный, величаем вси яко чистую Матерь Бога нашего.
Да поет Тебе, Владычице, движя свирель духовную, Давид праотец Твой: послушай, Дщи, радованнаго гласа от Ангела, радость бо возвещает Тебе неизглаголанную.
Сокровенное таинство и Ангелом неведомое уверяет Гавриил Архангел и к Тебе ныне прииде, Единей нетленней и добрей голубице, рода нашего воззванию, и вопиет Тебе, Пресвятая, еже радуйся, уготовися словом Бога Слова Твоими ложеснами прияти.
Великий воевода невещественных Ангел во град Назарет представ, Царя возвещает Тебе, Пречистая, и Господа веков, глаголя Тебе: радуйся, благословенная Марие, непостижимое и несказанное чудо, человеков благоволение.
Красоте девства Твоего и пресветлой чистоте Твоей Гавриил удивився, вопияше Ти, Богородице: кую Ти похвалу принесу достойную? Что же возъименую Тя? Недоумеваю и ужасаюся. Тем же, яко поведен бых, вопию Ти: радуйся, Благодатная!
Гавриилу вещавшу Тебе, Дево, радуйся, — со гласом воплощашеся всех Владыка в Тебе, святем кивоте, как рече праведный Давид. Явилася еси ширшая небес, поносивши Зиждителя Твоего. Слава всельшемуся в Тя! Слава прошедшему из Тебе! Слава свободившему нас рождеством Твоим!
Архангельское слово прияла еси, и Херувимский престол показалася еси, и на объятиях Твоих носила еси, Богородице, Надежду душ наших.
Ложесны Слово прияла еси, вся Носящаго носила еси, млеком питала еси манием (мановением) Питающаго вселенную всю, Чистая.
Песнь вопием Ты радостную: радуйся, Чистая, похвало мучеников, апостолов, преславное речение пророков; радуйся удобрение (красота) архиереев и преподобных: радуйся, Ея же ради небесная со земными радуются.
Радуйся, Владычице Дево; радуйся, Пречистая; радуйся, приятелище Божие, радуйся, свещниче Света, Адамово воззвание, Евы избавление, Горо святая, преявственное священие и чертог бессмертия.
Тя, исплетшую мирови нерукоплетенный венец, песнословим, радуйся, Тебе, Дево, зовуще, хранилище всех и ограждение, и утверждение, и священное прибежище.
Радости вина, облагодати наш помысл, еже звати Тебе: радуйся, Неопалимая Купино, Облаче всесветлый, верных непрестанно осеняющий!
Тайно во священных писаниих глаголася о Тебе, Мати Вышняго: лествицу бо древле Иаков, Тя образующую видев, рече: степень Божия Сия; священноявленному Моисею купина и огнь показа чудное чудо; Даниил Тя гору нарече мысленную; Родительницу же Божию — Исаия; видит же яко руно Гедеон, Давид же священие глаголет; дверь же Тя ин (Иезекииль); Гавриил же Тебе взывает: радуйся, Благодатная: Господь с Тобою!
Молим раби Твои и приклоняем колено сердца нашего: приклони ухо Твое, Чистая, и спаси скорбьми погружаемых присно, и соблюди от всякаго вражия пленения.
Разрешение нам долгов испроси и жития исправление, Дево, песнословящим величия Твоя и благочестивым разумом Тя славящим".
2. Песнопения в честь Архангела Гавриила
"Составим днесь лик Божественный, веселящеся, почитающе перваго бесплотных умов, возвестившаго неизреченную радость, в мир пришедшую за благость.
Великое таинство, первее Ангелом неведомое и прежде век соблюдаемое, единому уверися тебе, Гаврииле, и сие единей поведал еси Чистей, в Назарет пришед, с Нею же моли даровати душам нашим мир и велию милость.
Как небо звездами, зришися украшен божественными светлостьми, и как воевода, руками держиши скипетр пресветлый, и претекаеши всю землю, волю Владычню всегда творя и верныя изимая лютых.
Явися свет с небесе, любовию ищущим тя присно, и устави бурю на ны движимую напастей же и скорбей, о Гаврииле Архистратиже!
Усты бренными тя, огненна естеством суща, радостию восхваляем: изми ны огня всегда палящаго, божественными, Гаврииле, ходатайствы твоими".
3. Праздничные ликования
"Днесь спасения нашего главизна (начало) и еже от века (сокровенного) таинства явление. Сын Божий Сын Девы бывает, и Гавриил благодать благовествует; темже и мы с ним Богородице возопиим: радуйся, Благодатная, Господь с Тобою.
Еже от века таинство открывается днесь, и Сын Божий сын человечь бывает, да хуждшее восприем, подаст ми лучшее. Солгася (обманулся) древле Адам, и бог возжелев быти, не бысть; человеком бывает Бог, да богом Адама соделает. Да веселится тварь, да ликовствует естество, яко Архангел Деве со страхом предстоит и еже радуйся приносит печали сопротивное. За милосердие милости вочеловечивыйся Боже наш, слава Тебе!
Се воззвание ныне явися нам: паче слова Бог человеком соединяется; Архангеловым гласом прелесть отгоняется; Дева бо приемлет радость; земная быша небо; мир разрешися (освободился) первыя клятвы; да радуется тварь и гласы да воспоет: Творче и Избавителю наш, Господи, слава Тебе!
Таинство, древле прежде век предопределенное, начинает приимати явление. Земля и небесная согласно возвеселитеся и радостно воскликните!
Благовествуй, земле, радость велию; хвалите небеса Божию славу! Величайший пророков, Исаие, возвеселися: Дева бо, о Ней же прорекл еси, во чреве зачинает Ангела Совета великаго.
Играйте ликовствующие, с веселием воспойте: Гавриил Деве радость приносяй предста; в Назарете ныне граде радость Благовещения: радуйся, Чистая и Непорочная, мира предстательство; радуйся, Небесный Престоле!
Послан бысть Гавриил к Деве Марии и возвести Ей неизглаголанную радость, яко безсеменно зачнет и не истлеет: родиши бо Сына, предвечнаго Бога, и спасет люди Своя от грех их, и свидетельствует Пославый мя вопити Тебе, Благословенная, еже радуйся: Дева родиши, и по рождестве паки пребудеши Дева.
Ущедрив тварь, милосердием же Своим преклоняемь, Зиждитель во утробу Девы Богоотроковицы вселитися спешит, к Нейже великий прииде Архангел провещавая: радуйся, Богорадованная: ныне с Тобою Бог наш! Не ужасайся мене, Царева Архистратига; обрела бо еси благодать, юже погуби прежде Ева, прамати Твоя, — и зачнеши и родиши Отцу Единосущнаго.
Языка, егоже не ведяше, услыша Богородица: глаголаше бо к Ней Архангел Благовещения глаголы: отнуду же верно (верою) приимши целование (приветствие), зачат Тя, Предвечнаго Бога; темже и мы радующеся вопием Ти: из Нея воплотивыйся непреложно, Боже, мирови мир даруй и душам нашим велию милость".
Дата добавления: 2015-08-10; просмотров: 52 | Нарушение авторских прав
| <== предыдущая страница | | | следующая страница ==> |
| Наши враги | | | Слезы покаяния |