СЁРНИЛÖН ДЗОРИДЗЗЕЗ

(<Кытчö тiйö мунатö. Кудымкар, 1991)

Тiян киын öддьöн аскодя книга. Сiйö гижис не öтiк, не дас морт, а уна отир — коми йöз. Гижис не öтiк век сьöрна, мöдпöв керлiс нето буржыка волькöтлiс сылiсь мукöд страницаэсö, а мыйкö колис сэтшöмöн, кытшöмöн сiя чужис. И эта бур: миян дынöдз локтiсö важ кадлöн руыс — дукыс, ассяма темаэз да сёрни.

Эта книгаын тi панталат не просто сёрни, а кужöмöн, басöка висьталöм кыв: сьыланкыввез да частушкаэз, пословицаэз да поговоркаэз, загадкаэз, приметаэз да уна мöдiкö, мый паськыта и öтмöдöрсянь мыччалö коми-пермяклiсь культурасö, олансö.

Не быд лыддьöтiсь бура бöрйисьö фольклорын, и, медбы отсавны сылö, ковсьö дженыта висьтавны нiя торрез йылiсь, кöдна аркмöтöны книгасö.

СЬЫЛАНКЫВВЕЗ. Фольклористика отирлiсь сьыланкыввесö торйöтö: обрядовöйöсь да необрядовöйöсь.

Обрядовöй ес торö пырöны: ритуальнöйöсь, заклинательнöйöсь, кöритчанаöсь, орсаннэз, лирическöй обрядовöй сьыланкыввез. Эна коласiсь комиöн сьывсьöны öтi-öтi.

Необрядовöй торас пырöны: балладнöйöсь, историческöйöсь, лирическöйöсь.

Коми-пермяцкöй необрядовöй сьыланкыввес шуч лирическöйöсь (мöддэс пантасьлöны штука-мöд).

Лирическöй необрядовöй сьыланкыввес овлöны: любовнöйöсь, семейно-бытовöйöсь, бурлацкöйöсь, рекрутскöйöсь, солдатскöйöсь, разбойничöйöсь, ямщицкöйöсь да мöдiккез.

Миян отирлöн абу сымда сьыланкыв, кыдз роч йöзлöн, и комиöн сьывсьöны только любовнöйöсь да семейно-бытовöйöсь. Книгаас 130 гöгöр сьыланкыв — сымда позис бöрйыны фольклорист ки увтö шедöм чукöрись. Ны коласын эмöсь сэтшöмöсь, кöднö тöдöны быдöс коми-пермяцкöй диалекттэс, а мукöдсö — öтiк деревня, öтiк семья, нельки öтiк морт. Öтiккез бура лöсьöтöмöсь содержаннё да форма сьöртi, мöдiккез — нач примитивнöйöсь.

Любовнöй сьыланкыв — этö том кад йылiсь, радейтöм йылiсь сьылöм. Сiя, кыдз и унажык коми-пермяцкöй песняыс, простöй композиция да стиль сьöртi, быдöнлö вежöртана, басöк лирическöй геройыс образöн. Нывка прокод мыччассьö мичаöн, вежöра да ласков мортöн. Сiя кужöмöн пасьтасьö-кöмасьö, сынасьö волькыта; сiя кузь чикися, гажа кыла, вына киа-кока, сьöд синкыма, дженыт голяа, гöгрöс чужöма, басöк серöма. Мичажык рöммес сы паськöмын — гöрд, веж, лöз, чочком — кöдна медбура тöдчöны.

Том кад йылiсь унажык песняэс абу кузьöсь, геройыс тöждöм йылiсь висьтассьö надза, но и надз кылыс пырйöт ми адззам ыджыт, дзирыт радейтöм.

Мича нылiньöйся немöн абу умöльжык удав зон: сiя вына, повтöм, визыв да удж радейтiсь. Но зонкаэс йылiсь баитсьö етшажык, геройыс тöждöм йылiсь висьтассьö эшö надзжыка. Эта — тожö коми морт мывкыдсянь, сы вежöрсянь да характерсянь, кöднö сетiс не öддьöн ласков уральскöй природа.

Радейтiсь том морт шуö:

Юриньöй менам висьö,

Сьöлöминьöй менам тöждö.

Мый понда висьö,

Мый понда тöждö —

Ачым ме тöда, ачым вежöрта:

Абу мекöт гажаö, сьöлöм бурмöтiсьö.

Мед ни сьöкыт нывкалö сэк, кöр сылöн дона ёртыс кытöнкö йöз муэзын, и сьылiсь тöждiсьö — дзик причёт пуктö:

Ыстiсö донаöс ылöся-ылö, ой,

Сытöг ог вермы овны.

Чечча и вода — тöдвылам пыр, ой,

Мича луныс не мича.

Том морт не быдпырся адззö паныта радейтöмсö, и эта вайöтö сiйö трагедияöдз. Этадз петö и социальнöй неравенство кузя, и торья мортлöн мывкыд кузя. Трагедияыс вермö аркмыны и нывкакöт, и зонкакöт, кöдö гöтралöны астöгьяс, нелюбöй вылын, и сэсся сэтшöм гозъяыс ордö оз ни пырав гажыс да шудыс.

Семейно-бытовöй сьыланкыв миян отир коласын олö медпаськыта. Сiя, кыдз и любовнöйыс, висьтасьö не сымда гажа олан йылiсь, мымда сирньылöм кад йылiсь, тшыг нужда йылiсь, мыччалö богатöй да беднöй йöзлiсь етшасьöм, семьялiсь горе да быдöс сiйö, мый бердын видзсьö деревняись олан.

Эна песняэзiсь лирическöй геройыс сэтшöм, кытшöм морттэз эмöсь оланын: öткö, вежöра, мывкыда, небыт сьöлöма, удж радейтiсь, бур ёрт, горт зорöтiсь да дорйись, а мöдкö, лёк, дыш, надз винаюись бöбöтчись, ошшасись, поперёшнöй. И прокод сiя — крестьянин да крестьянка, простöй морт. Простöй и сэк, кöр песняыс шуö сiйö купец пиянöн.

Сапога-кафтана бытшöм молодец, удав сокол, купецлöн ныв — этö символлэз, кöдна пыр отирыс висьтлö ассис желаннёсö.

Семейно-бытовöйес коласын эм ыджыт тор, кöдö позьö шуны йöзö ветлöм йылiсь, йöзын уджалöм йылiсь сьыланкыввез öн. Нiйö тöдöны и округын олiссез, и зюздинса да язьвинса, кöдна не öтiк век ни олöны миян дынсянь торйöн. Натьтö, абу пöрись коми морт, кöда бы эз кывлы «Кытчö тiйö мунатö?» сьыланкыв. Конечно, кадыс сiйö тожö бура ни перкйöма да сыналöма, мукöдлаас чинтöма частушка мыгöрöдз, но сiя сё горалö то норöн, то гажöн, то лöня, то визыла.

Косинскöй да Кочёвскöй районнэзын тöдöны «Мунi кö, мунi» важ сьыланкыв:

Мунi кö, мунi кузь туй кузя,

Пукси кö, пукси колода вылö,

Пешлi кö, пешлi котомочкаöс:

Айö да мамö изтор пуктöмась,

Дедö да бабö шомтор пуктöмась,

Сойö да вонö багсьöм нянь пуктöмась...

Стиххес рифматöмöсь, строкаэс не öткузяöсь. Сэтшöмсö, шуин бы, и сьывны сьöкыт. Но сiя бура сьывсьö — нюжвыла, не тэрмасьöмöн да норöн, кыдз тшöктö гажтöм темаыс. Натьтö, эттшöммес йылiсь и гижö аслас письмоын Горки посёлокись А. Г. Авертьева, что «миян песняэзын кыввес кытшöмöськö мöдкодьöсь, нёштöмкодьöсь, но нiя сьывсьöны öддьöн бура, басöка, мелодичнöя. Нiйö любо кывзыны...»

Нiя строкаэзын, кытöн оз тырмö слоггез, сьылiсь часто содтö междометие, повторяйтö кывсö нето сылiсь тор, а медбы эз дзугсьы стихлöн ритмика, часто вежö кывлiсь удареннё.

Йöзö ветлöм йылiсь сьыланкыввес — дас гöгöр. Нiя сьывсьöны неöтмоза (зюздинса öтiкö сьылöны нельки орсöмöн, сiя песнялöн эм припев, но быдлаын лирическöй геройыс том морт, зонка, кöда кольöма гортсö да мунöма шедтыны деньга. Кынымкö песняын эм юöр сы йылiсь, что зонкалö сьöрас пуктöмась изтор да шомтор. Эта — абу шутка, да и абу песеннöй приём. Изтор да шомтор, натьтö, гортсö колись зонка понда лоöны сэтшöм магическöй вынöн, кöдна берегитöны мортсö йöз ладорын, сiдз кыдз изтор да шомтор — горт мулöн, горт керкулöн, горт шонытлöн символ.

Йöзын олöм, йöзын удж — этö мед ни гажтöм, мед ни сьöкыт олан, кöдаись петны и туйыс абу:

Öт бокам видзöта — сьöд вöр сулалö,

Мöд бокам видзöта — сьöд ойтыр сулалö,

Одзам видзöта — гу тай сулалö...

Эна строкаэз — важ кадлöн ловья говк. Öнi сiя только и висьталö кöркöся кузь туйез йылiсь, кöдна коми зонкасö нуöтлöмась «сьöд ойтыр» дынöдз и нельки саридз дорöдз. Этö керис тшыг олан да неволя.

Но сiя кадö берся лёкыс овлöма и коми му вылын. Сыкöт пантасьлöма быд беднöй мортыс, и медодз — вынтöм да правотöм нывка, кöдö позис сетны мустöм жöник сайö и нельки вузавны, кыдз товар. Эта йылiсь висьталö песнялöн тор:

Тотараыс локтiсö,

Гортiсь нуöтöны —

Кисорöн летöны.

«Мама, да ой, мама,

Потшшалоктö сет,

Да менö эн сет!»

«Кага тэ менам,

Сьöлöмториньöй,

Сэтшöм чассё тэнат,

Да ой, сэтшöм чассё».

Мукöдыс шуöны, что эна песняэзын баитсьö сы йылiсь, кыдз ыждалiс татаро-монгольскöй вын, но эстöн, натьтö, «сьöд ойтырыс» — комиэскöт ордчöн олiсь башкиррез да татара.

Инь-нывлöн сьöкыт олöм йылiсь тема миян фольклорын кыссьö кольöм вексянь öння двадцатöй годдэзöдз, кöр мыччисис авторскöй песня. Беда пытшкö нывкаöс вермисö кундыны не йöз морттэз, а аймамыс, кöдналö колiс богатöй жöник, мый йылiсь висьталö невесталöн синва сора монолог:

Мыля нö менö, айиньöй-маминьöй,

Роднöй вонiньöй,

Сёйöмöн сёятö —

Жöник сайö сетатö — нелюбöй сайö?

Пыра ме петляö,

Но ог мун жöник сайö — нелюбöй сайö...

Коми отир и аслас шудтöм кадö ештöма-кужöма лöсьöтны öддьöн басöк да вына содержаннёа сьыланкыввез, мый миянлö эшö öтпыр казьмöтö отирлöн ыджыт талант йылiсь. Этадз позьö висьтавны и «Чочком цветки» сьыланкыв йылiсь. Сiя — сьыланкыв-метафора, кöдаын чочком цветокыс — басöк, но шудтöм нывкалöн поэтическöй образ.

Коми мортлöн социальнöй портрет петкöтöма сэтшöм песняэзын, кыдз «Чурски-чарски-мачарски», «Коми морт», «Нёль вон йылiсь», «Кин миян бытшöмыс» да мöдiккезын.

Няньбыдтöм, вöрзаптöм, гöтрасьöм, челядьöс зорöтöм, строшнöй да батрак мортлöн олöм, армияын служитöм, война, горт му да мöдiккез — сэтшöм ыджыт темаэз пантасьлöны важ коми-пермяцкöй сьыланкыввезын.

Сьылiссес репертуарын öнöдз олö öтiк историческöй сьыланкыв, кöда комиэс дынö сюрис роччезсянь — «Кузнец черрез камгö-дорö». Сiя — «вира кресення» йылiсь. Одзжык коми-пермяк, тыдалö, тöдлöма Екатерина царица йылiсь сатирическöй песня, но миян дынöдз сэтiсь локтiсö кынымкö кыв: «Катерина воддя — вирöсь-орöсь судья».

Чулалöны годдэз и веккез, вежсьö мулöн чужöм, вежсьö отир. Тшöтш этакöт мöдкодьсялö сьыланкыв чукöр. Оланiсь мунiкö быд увтырыс сьöрас нöбöтö сiйö, мый видзис сьöлöмас да лолас. Но оланыс, эта ыджытся-ыджыт да мудрöй выныс, босьтö важ отирлiсь быдöс коланасö да пуктö виль поколеннё тöдвылö.

Важ сьыланкыввез коласын эмöсь сэтшöмöсь, кöднö коми-пермяк нимкодялö нетулика öн, а роч кыв шуö примитивнöйезöн. Ныын абу öткодь тема, строкаэс, кыввес, мукöдпырся ас коласаныс йитсьöны только мелодия отсöтöн, но сэтöн эм кытшöм-нибудь басöк образ, ёся кыв, ыджыт идея. Частожыксö нетулика — неыджыт прибаутка, лёк кыла приговорка, серöмсора йöктöтан. Нiйö бура радейтöны и сьылiссес, и кывзiссес. А важся кадö, кöр петавлiс гажа лун, сьывлiс да йöктывлiс быд мортыс. И, как раз, натьтö, эттшöм гажöтчикö и шогмывлiсö то эта кодь нетуликаэс:

Сьöд Олёна абу дона —

Кык алтын да куим руб,

Серга Наста — полтораста,

Йона Паладь — двести пять...

Примитивнöй сьыланкыв сьылöтлöм ловья мортöс, может, кинöскö сьылiсь-орсiссес коласiсь. Мукöдсö пöриссес и талун тöдöны. Вот кыдз эта йылiсь висьталiс А.И. Хозяшева: «Играэс коста ойбытöн люлльöтлiмö. Сьылам, сьылам — бырсясö песняэс, сэк вöлись ассиным пондöтам: «Пешнигортын — Мокишна, ой, калина, ой, малина! Прокинчиын — Кузика, ой, калина, ой, малина!»... Быдöс матiсь деревняэсö касьтылам, старик-старухаэсö сэтчинiсь — вот и песня».

То эшö примеррез сэтшöм импровизация йылiсь.

Зюздинскöй коми-пермячка М.П. Меркучева висьтасьö: «Вöлi вотяк, дак сiя готовöй песня эз сьыв, сё ачыс лöсьöтлiс. Мый адззö, сы йылiсь и сьылö. Видзöтiс бы миян пызан вылö — сьывны пондiс: «Чешкаыс красивей, да ох, красивей, Да дорыс потöма, да ох, потöма. Вилкаыс дона де, да ох, дона. Да öтiк вожа де, да ох, öтiк вожа. Мый жöн вöчны, да ох, вöчны? Да буде брага юны, да ох, брага юны»... Сiдз сiя сьывлiс».

Инькаыс висьтасис мöдiк морт йылiсь, но сьылiс ассис лöсьöтöм сьыланкыв.

Пешнигортiсь А.Д. Денисова юöртö: «Öтi вунö Бражкин пыравис да нетуликасö сьывис. Сывöн эд мый син одзас, сiя и песняас: «Пена тэ, Пена, Митреёвна Пена! Öтнат ован да — керкуыт пуксьöм, Воротаыт нявзö, рожаыт чукрасьöм. Öмыт шешкöтчö да и ропкöтчö. Ме öтнам жö, дак вок ме дын». Ме сывö сьывыштi жö: «Бражкин тэ, Бражкин, асват абу пуксьöм? А воротаыт кытöн? Перво ассит вöсьöт да вöлись и корась!» Вежöртiн, мыся, старикашко?»

Шогмис бы эта басниыс важся кадö да отир дырни, вермис бы аркмыны виль сьыланкыв-диалог.

Öнöдз шочыника пантасьлöны йöктöтан сьыланкыввез, кöднö йöзыс шуöны «öмöн орсöм». Сэтшöм сьыланкыввезын етша нето нач абуöсь кыввез, нiя аркмöмась быдкодь изобразительнöй шыэзiсь. Сэтшöммес сьöртi йöктывлiсö уджсянь шоччисикö, кöр сьöрын абу некытшöм орсан, да сэк, кöр абу орсiсь. А шуны кö веськыта, орсiссес да орсаннэс пыр вöвлiсö. И эмöсь, кыдз Ыджыт Кочаын Бузинов И.Н., кöда сэтшöм басöка орсö пипу листöн, нето Лёвичись инькаэз, кöдна гажöна йöктöтöны отирсö ведра да чöрс отсöтöн — то сярöтöны, то гыжгöны, то жольöтöны вугнас да эшö и сьылöны. А ковсяс кö, и оркестр керасö. Комиыс эд тожö и вурсись, и вундiсь, и пöлянöн орсiсь. И öр вылын орсö, и йöр вылын йöктö.

Обрядовöй поэзия ись эта книгаö пыртöмöсь кынымкö корасян, величальнöй, орсан-йöктöтан да оллялан тексттэз, а трудовöй сьыланкыв мыччассьö кык учöтик припевкаöн. Этчö позис бы пыртны невесталiсь да рекрутлiсь тöждiсян сьыланкыввез, но нiя сё жö öддьöнжык лöсялöны бытовöйез дынö.

Олляланнэс (причёттэс) гижöмöсь не оллялiсь (вытница) иньсянь, но и нiя бытшöма мыччалöны горзiсь мортлiсь ыджыт шогсö, оланлiсь трагедиясö.

Горзiсь сёрниын часто пантасьлöны ласков кыввез — батюшко, дитятко, сокол, юр вердiсь, а сiдзжö корасян да ойзан кыввез, ошкан гиперболаэз, прокод кылö юасян да чидан интонация, кулöмсö ыджыт жалейтöм.

КÖРТКЫВВЕЗ — тожö обрядовöй поэзиялöн тор. Сэтiсь миян фольклорлö бура тöдсаöсь заклинаннёэз да заговоррез. Заклинаннёэс коласын, бурресся, тыдалö, вöлöмась и ёрдчаннэз, но öнi нiя олöны кыдз видчан фразеологизммез.

Заклинаннё вöлi тöдса уна йöзлö, ыджытлö и учöтлö. Кöдзны пондöтчикö мужик шувлiс: «Быдмы, рудзöг, кузь да тыра шепа!» Инька пуксьöтас курöгöс кольттез пöжны, висьталас: «Мед еныс сетас дас курöг да кык петух!» Старуха баняö пыртöн корö: «Банюшка-матушка, пывсьöт да миссьöт, немымда эн кольмöт!» Челядь корöны шырлiсь лы пинь, а купайтчöм бöрын тшöктöны шырсö юны пельö пырöм ва.

Заклинаннё частожык овлö монологöн, но пантасьлöны и диалоггез. Заговорресö тöдiсö только торья морттэз, кöдналöн вöлi ыджыт олан опыт, чорыт характер. Не весь эд тöдiссес да туннэс (знахаррес да колдуннэс) вöлiсö не том морттэзöн.

Сьöкыт висьтавны, национальнöйöсь я кöрткыввес, но ныын аскодь колоритыс эм. Эта йылiсь висьталö и заговорлöн важ нимыс — кöрткыв. Сiя, натьтö, шогмис «кöртавны» кылiсь (шуöны тай: кила кöртавны). Но позьö висьтавны и мöднёж: кöрткыв — кöрт кодь чорыт, кöрт кодь вына кыв (важ отирыс кöртсö лыддьывлöмась волшебнöй вына торöн).

Коми-пермяцкöй преданнёэз юöртöны тöдiссез йылiсь, кöдна мортсö вермывлöмась пöртны зверьö да зверьсис бöр бергöтны мортö, а Кудым-Ош увтырись тöдiссез ловзьöтлöмась кулöмöс.

Öння коми-пермяцкöй тöдiсь абу ыджыт вына да авторитета и частожык тöдö роч кöрткыв, но «отсалöны» сылö только комилö тöдса черöшлан, кульчунь, сьöдгыж (частожык — ош гыж), «вына туруннэз» и нельки шой чунь. Веськöтчикö нiя «уджалöны» ен нимöн, тшыкöтчикö — куль нимöн (коми язычниклöн кульыс вöвлi тожö ен). Лекарствоöн лоöны: нянь, сов, ва, лы, чераньвез, куим годöн косьмöм кольть, гаг ви, дзöдзыв пизь да берсяторыс. Эмöсь заговорённöй йиэз, кушаккез, чышкöттэз, йöрнöс-вешьян, кöднö «суд оз босьт».

Заговоррес аркмöтöны куим чукöр: веськöтаннэз, хозяйственнöйöсь, социально-бытовöйöсь.

Веськöтаннэс отсöтöн вашöтöны шогöттэз, пöрöс. Хозяйственнöйес отсалöны мортлö уджын — няньбыдтöмын, вöралöмын, подавöдитöмын. Социально-бытовöйес отсалöны янсöтчыны да смилитчыны, тшыкöтчыны да гусясьны, берегитчыны судсянь, начальствосянь, пулясянь. öттэс, мöддэс и куимöттэс öнöдз олöны отир коласын (нельки грамотнöй уголовниккезлiсь адззöны «пуксьöтöмсянь» кöрткыв).

Роч заговор сьöртi комиыс унаöн дженытжык и мöдкодьжык композиция сьöртi. Рочас частожык вит тор: введеннё, пондöтчöм, эпическöй тор, закрепка, аминясьöм (концовка). Комиын — пондöтчöм, главнöй торыс да мукöдпырся аминясьöм.

Кылыс — образнöй, сэтöн берся эпитет да сравненнё, гипербола, аскодь интонация — чорыт, лöгкодь, торжественнöй. Мукöдыслöн пондöтчöмыс нач невежöртана, но сылöн волькытыс, орсöмыс, а может и тöдтöм смыслыс тöдiсь понда лоö как раз сiя волшебнöй вынöн, кöда бытьтö бы отсалö веськöтны нето тшыкöтны мортсö.

ЧАСТУШКА — песнялöн томжык сой, пырö необрядовöй поэзияö. Сiя локтiс миян дынö, натьтö, кольöм век конецö тшöтш роч частушкакöт да паськалiс омöн коми му пасьтас. Но оз ков думайтны сiдз, что миян частушкаэс аркмöмась роччезiсь нето ны моз. Кöр буржыка видзöтан öтлаö чукöртöм частушкаэсö, сэк вöлись казялан, мымда сэтöн коми мортлöн уджыс, коми йöзлöн аскодя сёрыс да шыыс.

Частушкалöн медыджыт темаыс — радейтöм, сiдз кыдз частушка — том кадлöн, ныв-зонлöн сьылан и нылöн жö творчество. Но частушка бытшöма мыччалö и йöзлiсь социальнöй пытшкöссö — сьöкыт удж да умöль олан, быдкодь классовöй тшупöттэз, антагонизм. Серöмсора да сатирическöй частушка мукöдпырся босьтö политическöй рöм да лоö отирлöн лöг шыöн, протестöн.

Коми-пермяцкöй частушка прокод казялö да асмоза шыасьö быдöс сы вылö, мый керсьö коми му вылын, странаын.

Менö шуöны быдöнныс,

Басöка пö ола.

Ме колхозница эд öнi,

Сiдз и овны колö,

висьталö öтiк частушка. А мöдiк, кöда аркмис сёрöнжык, шуö:

Тинь-тень, трудодень,

Туруновöй брага.

Трудоденнез — тысяча,

Тити-мити — абу.

Уна частушка чужöма война годдэзö, и сiя лёка сьылöтö сiйö сьöкыт кадсö, öддьöн бытшöма мыччалö том мортлiсь, частожык — нывкалiсь да инькалiсь судьбасö, характеризуйтö олансö, зэлыт да чорыт военнöй законнэсö:

Кöкыс кöкö, кöкыс кöкö,

Кöкö Парма яг вылын.

Гöтыраэзöс любитам —

Зонкаэс война вылын.

Мыйлö менö, мама, чужтiн,

Мыйлö меным ним сетiн —

Гортiсь керкуись петкöтiн,

ФöЗöОö иньдöтiн.

Кöр странаын челядьтöм отирсянь пондiсö босьтны налоггез, частушка эта вылö шыасис то кыдз: «Нывкаэзсянь босьтöны Бессовестнöй налоггез». Висьталöма лёка, но честнöя, кыдз пыр керö частушка. Дженыта кö шуны — частушка сэтшöм боевöй жанр, кöда аслас берся темаöн ас мознас мыччалö олансö быдладорсянь, а частожык — пытшксяняс, оланшöрсяняс — видзöтö пö, отир, кыдз ми тiянкöт оламö! Унажык частушка лöсялö инь-ныв понда, но эмöсь и зонкаэзлöн да мужиккезлöн. Этася, частушкаэсö позьö торйöтны и мöднёж: радейтöм йылiсь, йöзын олöм йылiсь (армия, ФЗО, вöрзаптöм), серöмсора да сатирическöйöсь. Мукöд частушкаэс лöсьöтöны аскодь чукöр: пондöтчöны öткодь строкасянь, аркмöтöны диалог да сiдз одз. Сэтшöммезас уна öткодь кыввез, нiя öддьöн устойчивöйöсь. Эм чукöр, кытöн медодзза строкаыс то кытшöм: «Шöралi ме, вурны мöда...» Эд колiс бы шуны точнöйжыка этадз: ме шöралi, вурны мöда, но сьывсьö мöднёж, удареннёсö дзугöмöн — может, сiдз, кыдз вöлi сьылöма медодззаыс.

Частушкасö сьылöны быдкодь мелодияöн: перыта, жагвыв, нюжвыла, бöрья строкаэсö повторяйтöмöн.

Этчö колö содтыны, что частушкаас уна просторечие, сiя öддьöн интереснöй аслас композицияöн да стильöн (монолог, диалог, параллелизм, быдкодь рифма, повторрез), изобразительнöй средствоэзöн (эпитет, сравненнё, символ, гипербола). Но эмöсь и примитивнöйöсь.

ЧЕЛЯДЬ ПОНДА ФОЛЬКЛОР — этö не только челядьлöн творчество, сiйöн сiя и торйöтсьö то кыдз: ыджыттэслöн челядь понда творчество; ыджыттэс понда фольклор, кöдöн пользуйтчöны челядь; челядьлöн творчество.

Медодзза торас позяс пыртны сэтшöм жанррез: öвйöтан нэз (кага онмöсьтаннэз), кокйыв сувтöтан приговоркаэз, тпрукöтаннэз, чунь лыддяннэз, сёрнитаннэз, сьыланкыввез; мöд торас — коран-кытсаланнэз (закличкаэз), модянкыввез, лыддисяннэз; куимöтас — нерсяннэз, шусяннэз, нетуликаэз, кокнитик лыддисяннэз. Эта торйöтöмыс условнöй, да и жанрреслöн ниммес, натьтö, абу на лöсьытöсь да точнöйöсь.

Быдöс, мый лöсьöтöм челядь понда — этö учöтик мортлiсь мывкыд да вежöр зорöтан кыв, мир тöдöм, олан дынö велöтöм. И сiя ыджыт да некокнит уджыс пондöтчö öвйöтансянь. Быд öвйöтанын — меднебыт кыввез, медбасöк эпитеттэз, кагалö медыжыт дон: учöт уту, мичатор, шондiбанöй, сё золотöй (стоись золотöй, меддона), юр вердiсиньöй. Шондiбанöн да сё золотöйöн фольклор мортсö шуö только кык кадö: учöт кагаöс да радейтана ныв-зонöс. Но «бöбöтчисько лö» мам вермö кöсйыны и ремень.

Öддьöн оригинальнöйöн лоöны тпрукöтаннэз да сёрнитаннэз, и нiйö сiдзжö тöдöны быд коми-пермяцкöй деревняын. Ныын берся тема да персонаж, уна орсан кыввез. Мукöд сёрнитан сказкаыс кузькодь, но персонажжезлöн (юасисьлöн да висьтасисьлöн) баитöмыс кыдз бы джендöтö сiйö, и челядь сэтшöмсö кывзöны и асьныс висьтасьöны кокнита.

Дасöдз мöднёж лыддьöм öнi тöдöны только пöриссес, да и нiя оз вермö висьтавны, мый понда сiя колöма важ отирлö. Может, сiйö лöсьöтiс торговöй йöз, ремесленниккез, а может, сiя — воровскöй жаргон. Орсöм могись вермисö лöсьöтны и челядь.

Пантасьлöны сэтшöмöсь, кöднаын кыввес пондöтчöны сiя жö буквасянь, кыдз и порядковöй числительнöйес (öтiк — öгöд, мöдiк — мöгöд и с. одз).

ЗАГАДКАЭЗ коми-пермяккезлöн абу уна и, кыдз ачыс коми кылыс, шуч бытовöйöсь: пода, посуда, уджалан предметтэз, ыб, видз да сы йылiсь, мый эм горт гöгöрын. Но мымдакö эмöсь природа явленнёэз йылiсь. Пантасьлöны öддьöн аскодьöсь, нач комиöсь, кыдз то эна: Керку юр вылын ош йöктö (Гор лонтiсьö.), Вит баля öтiк зород перкйöны (Печкöм.), Джадж дорын ош чань (Чöрс.), Чочком нывка ойöн шыннялö (Тöлiсь).

Загадка — этö мöднёжа, мöдiк кыввезöн, мöдiк нимöн шуöм предмет, явленнё, кöда мыйöнкö вачкисьö тöдмаланыс вылö: шондi — мича гöглян; тшын путриктö-вöрöтчö — ош йöктö; мöдiккезын öткодьыс — действие: лун и ой котöртö (ю); образ да действие: кырныш гатш лэбзьö (пыж уйö). Но этадз овлö не пыр. Видзöтö, уна я öткодьыс то эна сравнивайтан предметтэзын: Вöр шöрын пельтöм Захар кытсасьö (Говк.)? Только сiя и эм öткодьыс, что «кытсасьö». Загадкаын эм гипербола, олицетвореннё. Öткодь предметтэс шусьöны воннэзöн, сойезöн, соя-вонаöн, öтiк мамлöн челядьöн, öткодь подаöн (вит баля, öткодь дудiэз).

Композиция сьöртi коми-пермяцкöй загадка öддьöн простöй, частожыксö — учöтик предложеннё. Шочыника пантасьлöны и сложнöйжыкöсь, кытöн кык простöй предложеннё, бур рифма, повторрез, диалог: Пиньö кузь, кузь, кузь, сёя тусь, тусь, тусь (Тоин); — Тшукыль-мукыль, мый керан? — Порссезöс панлала (Йöр). Эмöсь юасяннэз.

ПОСЛОВИЦАЭЗ ДА ПОГОВОРКАЭЗ миян кылын неетша, но етша чукöртöмöсь öтлаö да публикуйтöмöсь. Нiя öддьöн бура басöксьöтöны миянлiсь сёрнисö, эта кузя роч учёнöй В.И. Даль шуöма: «Поговоркаыс — дзоридзок, пословицаыс — ягöдок». А фольклöр радейтiсь М. Горький висьтавлiс: «Пословицаэс да песняэс прокод дженытöсь, а ум да чувство ныö пуктöма быдса книгаэз понда».

Пословица — басöка лöсьöтöм сёрни торок, кöдаын истина, обобщеннё: Мирыс паськыт — сусекö он дзеб; Абусис чер он кер. Висьталöма образнöя да веськыта — дзик пуртöн вундыштöм.

Поговорка — сёрниись тор, сравненнё, выраженнё, кöда оз кер обобщеннёсö, а мыччалö торья мортöс, торья случай, баитö öтiк поступок йылiсь: Сьöд боболь кодь; Сiйö виа блинöн он бöбöт.

Комиыслöн поговоркаыс басниас кыдз бы оз и тöдчы — сэтшöм естественнöя сiя пырö да йитсьö морт сёрниыскöт. И мукöдпыр, кöр юалан пöрись мортлiсь, кытшöм поговорка сiя тöдö, дак кылан: «А миян кодь ыпыыслöн кытшöм ни поговорка? Пöрисьман — шогö усян да и быдöс вунöтан... Ме вунöтчи ни, мый тöн сёйи». Вот этадз поговоркаыс и йитсьö пырся басниыскöт.

Коми-пермяцкöй пословица да поговорка, кыдз летопись, юöртöны öння йöзлö сы йылiсь, кыдз олiс да мый керис кöркöся йöз, мыччалöны сылiсь олан опыт да эшö и велöтöны миянöс, кыдз колö керны, медбы етшажык сорасьлыны олiкö.

Пословица да поговорка мыччалö, что коми мортöс интересуйтö быдöс, мый эм сы гöгöрын, и быдöслö сiя сетöма аскодь оценка:

Шондiыс эм, дак тöлiсьыс оз ков.

Уджыс вердö, пасьтöтö, овны велöтö.

Ачыт бур, дак и йöзыс бурöсь.

Эна сьöртi позьö висьтавны, что художественность ладорсянь коми-пермяцкöй пословица сiдзжö бытшöм: сыын кокнит ритм, пантасьлö рифма, басöк аллитерация — орсöны-кытсасьöны öтамöдкöт торья звуккез (Томыс да пöрисьыс öтiк умаöсь).

Кöркöся социальнöй несправедливость йылiсь баитсьö:

Судын правдасö он адззы.

Правдасö ош ляпкöтöм.

А вильжык пословица шуö:

Книга не шондi, а олансö югдöтö.

Мамлö спасибо, велöтiсьлö — кык спасибо.

ПРИМЕТАЭЗ ДА ОБЫЧАЙЕЗ отир творчествоын сулалöны кыдзкö бокынжык, и фольклористика нiйö орддьö. А эд нiя тожö басöкöсь да коланаöсь, ныын сiдзжö тыдалö отирлöн мудрость да поэзия.

Не быд приметалö да обычайлö позьö веритны: быд эпохалöн вöлi аслас кöш, кöдöн сiя гумавлiс оланлiсь истинасö. Но и нiйö колö берегитны одзлань кежö, сiдз кыдз нiя — тожö миян история, отир биографияись торок, и сiя мыччалö важ олiсьлiсь психологиясö, мировоззреннёсö, этническöй культурасö.

Приметаэз мыччалöны мортлiсь олöм-вылöм, природа дынö сылiсь отношеннё. Ны коласын уна примета погода йылiсь.

Кынымкö примета бытшöма висьталöны, кыдз отир берегитiс природасö. Тулысöн, кöр шоныт кад бöрын перыта кöдздöтас, шуöны: «Кинкö лымдорчача нетшкöвтiс». Эта лоö: природалiсь дзугисö равновесие, и сiя лöгасис. Муыс пö лöгасьö и сэк, кöр одзöв пондасö ытшкисьны нето чегöтасö льöмпулiсь, рябиналiсь дзоридза улок.

Обычай ез — этö аскодь закон сы йылiсь, кыдз видзны асьсö мортлö гортын, öтöрын, йöз коласын, шоччисикö и уджалiкö. Нiя велöтöны мортсö быдöс керны бытшöмика, бур отир моз: радейтны пöрисьжыкöс, не öмавны баитiсьöс, йöз мортлö мыччавны туй, отсавны нищöйлö, вынтöмлö, быдлаын берегитчыны аслыт.

Сiдз позьö висьтавны приметаэз да обычайез йылiсь дженытика. А ежели нiйö öтлаöтны пословицаэзкöт да поговоркаэзкöт, то нiя асланыс содержаннёöн мортыслö шуöны: эн дышöтчы, эн бöбöтчы, эн гусясь, эн видчы, эн нёштöмась, эн аснырав, эн кодав, а бытшöмика велöтчы, уджав, кывзы аймамтö, отсав ёртытлö, жалейт мöдiкöс да берегит быдöс, мый эм тэ гöгöрын, радейт горт му — ло Мортöн.

Сказкаэз, легендаэз, преданнёэз да быличкаэз эта книгаö пырисö нiя, кöдна эз сюрö одзза книгаас.

Книга листбоккез вылiсь лыддьöтiсь адззас рисуйтöм предметтэз, кытшöмöсь коми морт видзис да видзö керкуын да керку гöгöрас.

Медбöрын эмöсь примечаннёэз да словарь.

Фольклор керö ассис зэв бытшöм уджсö — отсалö овны мортлö бытшöмика. И кытшöм бы вöлi бур, кöр фольклорнöй книга, кыдз и отир история йылiсь книга, вöлi не только быд библиотекаын, но и быд керкуын, квартираын, кытöн кужöны лыддьöтны.

Дата добавления: 2015-11-16